Yonatani Munghanu Wa Ku Tshembeka A Tlhela A Nga Chavi Nchumu

Yonatani n’wana wa matevula wa Sawulo a a li musonchwa lweyi a a nga chavi nchumu. Hambi Davhida a te a a li munhu lweyi a a hantlisa ku tlula xinyanyani lexi vitaniwaka gama naswona a a ni ntamu ku tlula nghonyama. Siku lin’wani, Yonatani ni vapfunisi va yena va vone Vafilista ka ntshava. Yonatani a byele mupfunisi wa yena a ku:

— Loko Vafilista va hi vitana swaku hi khwela ka ntshava swaku hi lwa na vona, i xikombiso xa leswaku Yehovha a ta hi pfuna.

Funtshi a ve leswo swi nga yendleka, Vafilista va vitane Yonatani ni mupfunisi wa yena leswaku va khwela ka ntshava. Havambirhi va lwe ni Vafilista va va hlula, va dlaya 20 wa vona.

Leswi Yonatani a a li n’wana wa ku sungula wa Sawulo a a ni mfanelo ya ku va hosi leyi a yi ta landzela, kambe a a swi tiva swaku Yehovha a a lange Davhida leswaku a va hosi loko ku suka Sawulo. Hambileswo Yonatani a a nga na wukwele la Davhida, kambe havambirhi ka vona va ve vanghanu vavakulu. Yonatani na Davhida va tshembisane leswaku a va ta vhikelana ni kuva va pfunana. Leswaku va tiyisa wunghanu la vona, Yonatani a nyike Davhida a kazaku la yena, xipada xa yena, bandhi la yena ni nchumu xa ku txopa hi xona loko a li nyimpini.

Nkama Davhida na a baleka Sawulo, Yonatani a fambile a ya tlhangana na yena, a fika a ku:

— Davhida, u nga chavi! Vana ni matimba, u tiya nhlana Yehovha a ku langile leswaku u va hosi. Phela hambi hi papayi wa swi tiva leswo.

A swi tsakisi ku va ni munghanu wa ku fana na Yonatani?

Yonatani a veke wutomi la yena nghozini leswaku a pfuna munghanu wa yena. Nkama Sawulo a a lava ku dlaya Davhida, Yonatani a yendle hinkwaswu leswaku Sawulo a txintxa mapimiselo ya yena kambe Sawulo a mu kwatelile hintamu Yonatani.

Loko ku hundze nkama, Yonatani na Sawulo va dlayiwile na va li nyimpini. Se Davhida a lavetele Mefiboxeti n’wana wa Yonatani, a ku:

— Papayi wa wena a ve munghanu wa mina wamukulu, hi mhaka leyo, ni ta ku hlayisa wutomi la wena hinkwalu, wena u ta tshama ka yindlo ya wuhosi, funtshi u ta dla hinkwaswu leswi u swi lavaka.

Phela Davhida a nga mu khohlwanga munghanu wa yena wamukulu Yonatani.