Yehovha A Yendla Singita Ka Lwandle La Ku Pshuka

Nkama lowu Faru a nga vona leswaku Vayisrayele va humile aGibita, a byele masonchwa hinkwawu ya yena ya nyimpi a ku:

— Lunghiselelani tinyolo ta nyimpi, a hi va landzeni! Ina hi nga va tshikanga va famba.

Se Yehovha a tame a kongomisa Vayisrayele. Wa swi tiva swaku a a swi yendlisa ku yini? Ninhlikanhi a a tirhisa rhefu swaku li va komba ndlela, se niwusiku a a tirhisa ndzilu leswaku wu va voningela. Nkama lowu va nga fika ka Lwandle la Ku Pshuka, Yehovha a byele Vayisrayele leswaku va nyimanyana.

Se Vayisrayele va vone Faru na a ta ni masonchwa ya yena. Kambe vona a va nga ha na ndlela, hikusa phambheni ka vona a ku ni Lwandle la Ku Pshuka kambe ndzhaku ka vona a ku ni Vagibita. Se Vayisrayele va sungula ku chava hintamu, funtshi a va lava ni ku tlhelela aGibita.

Kambe Moxe a a tshemba Yehovha, a va byele a ku:

— Mi nga chaveni. Tiyani nhlana mi vona loko Yehovha a mi ponisa.

Se Yehovha a byela Vayisrayele leswaku va tilunghiselela leswaku va tama va famba. Ka wusiku lolelo Yehovha a yendle leswaku rhefu leli a li li phambheni ka vona li ya ndzhaku ka vona se ka tlhelo leli Vagibita a va li ka lona ku mphuma hintamu, kambe ka tlhelo leli Vayisrayele a va li ka lona a ku yo baa.

Se Yehovha a byela Moxe leswaku a tlakusa voko la yena phambheni ka Lwandle la Ku Pshuka. Se hi wusiku lelo Yehovha a yendla leswaku ku va ni moya wawukulu, lowu nga yendla swaku lwandle li yavana hi xikarhi se ku va ni ndlela ya ku woma leyi Vayisrayele va nga famba ka yona.

Faru ni masonchwa ya yena va sungule ku landza Vayisrayele hi ndlela leyi Yehovha a nga yi pfula ka Lwandle la Ku Pshuka. Se Yehovha a sungula ku va dunga tinhloko va nga ha xi tivi xa ku xi yendla a tlhela a susa maroda ka tinyolo ta vona lakakuza swi va karhatela ku ti fambisa. Se Vagibita va te:

— A hi balekeni, Yehovha wa va lwela Vayisrayele.

Se Yehovha a byele Moxe a ku:

— Tlhela u tlakusa voko la wena henhla ka Lwandle la Ku Pshuka.

Nkama lowu Moxe a nga yendla leswo, mati lawa a ma yavanile ma pfula ndlela xikarhi ka lwandle ma mbhonya Vagibita hinkwavu. Se Faru ni masonchwa ya yena hinkwawu va fa. Phela a ku salanga ni mun’we wa vona.

Nkama lowu Vayisrayele va nga vona leswi Yehovha a nga va yendlela swona, leswaku va kombisa ku mu khensa, vavasati va sungule ku txina ni ku tlhela va yimbelela va ku:

— A hi yimbeleleni Yehovha hikusa namuntlha vanhu va ta swi tiva swaku hi yena a nga tlakuka amisaveni hinkwayu, hikusa yena namuntlha a hi ponisile ka mavoko ya Vagibita. Yena a dlaye masonchwa hinkwawu ni makavhalu ya vona hinkwawu.

Phela hinkwavu a va tsakile hikusa se a va chunsekile.