Yesu Na Wa Ha Li Mutsongo

Yosefa, Mariya na Yesu ni vamakwavu va yena a va tshama aNazareta. Yosefa a a li karpinteru, funtshi a a djondzisa vana va yena hi Yehovha ni Minawu ya yena. A ndjangu wa Yosefa minkama hinkwayu a wu ya lani Yehovha a a gandzeliwa kona leswaku wu ya mu gandzela, naswona lembe ni lembe a wu yendla liyendzo lalikulu swinene leswaku wu ya aYerusalema wu ya tlangela a Paxkwa.

Nkama lowu Yesu a a ni 12 wa malembe a ndjangu wa yena wu ye Yerusalema leswaku wu ya tlangela a Paxkwa. Leswi a ku li nkama wa Paxkwa a ku ni vanhu va vanyingi swinene. Nkama lowu Paxkwa li nga hela, Yosefa na Mariya va sungule ku yendza leswaku va tlhelela kaya. Leswi a va yendza ni maxaka naswona a va li vanyingi hintamu, a va pimisa leswaku Yesu a a li kona xikarhi ka vanhu lavayani. Kambe nkama va nga sungula ku mu lavetela a va mu kumanga.

Se Yosefa na Mariya va tlhelele aYerusalema, va ya mu lavetela. Va hete 3 wa masiku na va nga mu kumi, se va vone swi yampsa leswaku va ya mu kamba atempeleni. Loko va fikile, va mu kume na a ni vadjondzisi na a va yingisela kahle a tlhela a va hamba swivutiso. Vadjondzisi lavayani va hlamalile hintamu lakakuva hi vona va nga sungula ku mu hamba swivutiso, se Yesu a va hlamula. Vona va vhele va swi vona leswaku Yesu a a yi twisisa kahle Minawu ya Xikwembu.

Yosefa na Mariya a va karhatekile hintamu, se Mariya a vutise Yesu a ku:

— N’wananga, phela hi ku lavetelile ka tindhawu hinkwatu, kasi a wu li kwini?

Yesu a hlamula a ku:

— Mina a ni li kola kaya ka Papayi wa mina.

Se Yesu a tlhelele aNazareta ni vapsali va yena naswona Yosefa a mu djondzise ntirho wa ku khwaya mapulangu. U pimisa leswaku Yesu a a a li munhu wa ku tshamisa ku yini nkama lowu a a li xifanyani? Loko Yesu a ya a kula a ve ni wutivi naswona a a tsakeliwa hi Xikwembu ni vanhu.