Xikwembu Xi Yendle Wanuna Ni Wansati Wa Ku Sungula

Yehovha a yendle jardim ka ndhawu leyi a yi vitaniwa Edeni. Ka jardim lelo a ku ni maflori ya manyingi ya ku saseka, minsinya ni swiharhi. Wa swi tiva swaku Yehovha a game a yendla yini swin’wani? A game a tirhisa misava swaku a yendla wanuna, a gama a fufuta wanuna lweyi ka tinhompfu se wanuna a sungula ku hanya. Yehovha a game a mu nyika vito. Wa swi tiva swaku a te hi yena mani? A te i Adamu. A tlhele a mu nyika ntirho wa ku hlayisa jardim, ni ku swi nyika mavito swiharhi hinkwaswu.

Yehovha a game a mu nyika nawu Adamu, a te:

— U nga dla mafruta hinkwawu lawa u ma lavaka lani jardim. Kambe ku ni nsinya wun’we wa xipesiyali, u nga dli mafruta ya nsinya lowo. Loko wo tshuka u dla u ta fa.

Siku lin’wani Yehovha a game a ku:

— Na ha mu yendlela nsati Adamu, leswaku a ta mu pfuna.

Yehovha a yendle leswaku Adamu a yetlela. Se na wa ha yetlelile a mu suse rhambu leli vitaniwaka swaku i limbambu, a mu yendlela nsati hi lona. Wa swi tiva swaku i mani vito la wansati yelweyo? I Evha. Adamu na Evha a va li ndjangu wa ku sungula. Kambe indjhe Adamu a a tsakile hi wansati lweyi Xikwembu xi nga mu nyika yena? Ina, a tsake hintamu. Hi mhaka leyo a te:

— Hawena! Munhu lweyi Xikwembu xi nga mu yendla a saseke ndjhani. Phela a na ha li noxe. Se ni ni munhu wa ku fana na mina.

Yehovha a byele Adamu na Evha leswaku va va ni vana va vanyingi va za va tata misava. Yehovha a a lava swaku vona va tirha xikan’we na va tsakile loko va yendla swaku misava hinkwayu yi va paradesi. Wa swi tiva swaku paradesi i yini? I ndhawu ya ku saseka hintamu ku fana ni jardim la Edeni. Kambe Adamu na Evha a va swi kotanga ku yendla misava yi va paradesi. Wa swi tiva swaku hi mhaka muni? Hi ta swi vona ka xitoriya lexi landzelaka.