Xikwembu Xi Yendle Matilo Ni Misava

Lweyi a nga hi yendla i Yehovha. Yena a yendle swilo hinkwaswu leswi nga kona. Yehovha a yendle minchumu leyi hi yi vonaka ni leyi hi kalaka hi nga yi voni. Yehovha a rhange hi ku yendla tintsumi ta tinyingi atilweni. Wa swi tiva swaku i yini tintsumi? Tintsumi i vanhu va ku fana ni Xikwembu naswona ti tshama matilweni. Hina a hi swi koti ku vona tintsumi ku fana ni leswi hi kalaka hi nga swi koti ku vona Xikwembu. Ntsumi ya ku sungula leyi Yehovha a nga yi yendla yi game yi tirha na yena. Ntsumi yoleyo yi pfune Yehovha ku yendla tinyeleti, maplaneta ni swilo hinkwaswu leswi swi nga kona. Lin’we la maplaneta wolawo i misava, ku nga ndhawu ya ku saseka leyi hi tshamaka ka yona.

Yehovha a yendle swaku misava yi va ndhawu yayinene ya leswaku vanhu ni swiharhi va tshama ka yona. Yehovha a yendle leswaku dlambu li voningela misava. A game a yendla mamontanya, mapraya ni mariyu.

Wa swi tiva leswi swi nga gama swi yendleka? Yehovha a game a ku:

— Na ha yendla byanyi ni minsinya.

Se a game a yendla minchumu ya yinyingi ya ku dliwa, ya ku fana ni mafruta ni mavherdura. A tlhela a yendla ni maflori. Yehovha a game a yendla swiharhi. Wa swi rhandza swiharhi? Hi xihi xiharhi lexi u xi rhandzaka hintamu? Phela i Yehovha a nga swi yendla hinkwaswu. Yehovha a yendle swiharhi leswi fambafambaka, leswi hahaka ni leswi tshamaka matini. Naswona a yendle swiharhi swaswitsongo swa ku fana ni mimpfundlha a tlhela a yendla swiharhi swaswikulu swa ku fana ni maelefanti.

Yehovha a game a byela ntsumi ya ku sungula a ku:

— A hi yendle vanhu swaku va tshama misaveni.

Yehovha a yendle vanhu hi ndlela ya xipesiyali. Phela ku hambana ni swiharhi, vanhu a va ta swi kota ku tiyendlela swilo swa nyuwani. Funtshi a va ta swi kota ku vulavula, ku hleka, hambi hi ku bula ni Xikwembu. Naswona a va ta hlayisa misava ni swiharhi. Wa li tiva vito la munhu wa ku sungula? Hi ta li tsumbula ka xitoriya lexi landzelaka.