Ku Divhidiriwa Ka Mfumu

Nkama lowu Solomoni a a yingisa Yehovha, aIsrayele a ku ni ku rhula. Kambe Solomoni a sungule ku chada vavasati va vanyingi lava a va nga mu gandzeli Yehovha. Hi kutsongokutsongo Solomoni a sungule ku gandzela swikwembu leswi vasati va yena a va gandzela swona. Yehovha a kwate hintamu hi leswo, a byele Solomoni a ku:

— Ni ta ku tekela mfumu wena ni va ndjangu wa wena, a mfumu lowu wu ta divhidiriwa hi mimfumu yimbirhi, tinxaka ta tinyingi ti ta fumiwa hi mutirhi wa wena, ku to va tinxaka tatitsongo ntsena leti nga ta fumiwa hi ndjangu wa wena.

Mun’we wa vatirhi va Solomoni lweyi a a vitaniwa Yerobuwamu a a li ku yendzeni, se a gama a tlhangana na muprofeta Ahiya. Muprofeta Ahiya a teke mpahla leyi a a li na yona a yi handzula ku huma 12 wa switarapu, a gama a byela Yerobuwamu a ku:

— Yehovha a ta susa mfumu wa Israyele ka ndjangu wa Solomoni naswona a ta wu divhidira wu va mimfumu yimbirhi. Se wena teka 10 wa switarapu lani hikusa hi wena u nga ta fuma 10 wa tinxaka ta Israyele.

Solomoni a swi tivile leswo naswona a a lava ku dlaya Yerobuwamu. Se Yerobuwamu a balekile a ya Gibita. Ka malembe lawa ma nga landzela, Solomoni a file naswona n’wana wa yena lweyi a a vitaniwa Robuwamu a ve hosi. Hi nkama wolowo Yerobuwamu a pimise leswaku a a li nkama wawunene wa ku tlhelela aIsrayele.

Vavanuna vavakulu va Israyele va byele Robuwamu va ku:

— Loko u va yendlela swilo swaswinene Vayisrayele va ta tama va nyima na wena.

Kambe vanghanu va Robuwamu lava a nga kula na vona va te:

— U nga va babi Vayisrayele, va yendli va tirha hintamu.

Robuwamu a yendle leswi lava a nga kula na vona va nga mu byela swona. Leswo swi yendle leswaku Vayisrayele va mu djikela. Se a 10 wa tinxaka ti lange Yerobuwamu leswaku a va hosi ya tona. Se leti ta timbirhi ti tame ti nyima na Robuwamu. Leswo swi yendle leswaku a 12 wa tinxaka ta Israyele ti divhidiriwa hi mimfumu yimbirhi. A 10 wa tinxaka a ti vitaniwa mfumu wa Israyele se letin’wani ta timbirhi a ti vitaniwa mfumu wa Yuda.

Yerobuwamu a a nga swi lavi swaku vanhu va yena va ya gandzela Yehovha aYerusalema lani a ku ni mfumu wa Robuwamu. Wa swi tiva swaku hi mhaka muni? Hikusa a a chava swaku xitshungu xa yena a xi nga ha ta nyima na yena a xi ta sungula kuva xi nyima ni mfumu wa Robuwamu. Se Yerobuwamu a yendle swifaniso swimbirhi swa swihon’wani swa woru a gama a byela xitshungu a ku:

— A Yerusalema i kule, gandzelani Xikwembu lani.

Se vanhu va sungule ku gandzela swifaniso swa woru. Phela ni swoswi se a va mu khohlwile Yehovha.