Leswi Nga Humelela Ka Ntshava Ya Karmeli

Ka mfumu wa 10 wa tinxaka ta Israyele ku ve ni tihosi ta tinyingi leti a ti yendla minchumu ya ku biha. Mun’we ka tihosi leti nga yendla minchumu ya ku biha hintamu ku ve Akabu. Yena a chade ni wansati lweyi a a yendla minchumu ya ku biha, vito la yena a ku li Jezabele. Se Jezabele na Akabu va yendle leswaku Vayisrayele va gandzela xikwembu xa mavunhwa lexi a xi vitaniwa Bali, naswona va tlhele va yendla leswaku ku dlayiwa vaprofeta va vanyingi va Yehovha. Se i mpsini leswi Yehovha a nga swi yendla? A rhume muprofeta Eliya leswaku a ya vulavula na Akabu.

Eliya a vule leswaku hi mhaka ya wubihi la Akabu, a ku nga ha ta na mpfula aIsrayele. Se va tshame 3 wa malembe na ku nga ni mpfula aIsrayele. Hi mhaka leyo vanhu va fe hi ndlala hikusa a ku nga ha na swakudla. Yehovha a tlhele a rhuma Eliya leswaku a ya vulavula na Akabu. Se loko Akabu a vone Eliya a te:

— Swilo hinkwaswu leswi swi humelela hi mhaka ya wena.

Se Eliya a ku:

— U li hi mhaka ya mina? Hi wena hosi u nga yendla leswaku vanhu va ya gandzela Bali. Kambe a hi yendleni nchumu lexi nga ta kombisa leswaku hi xihi Xikwembu xa ntiyiso. Hlengeleta xitshungu ni vaprofeta va Bali ka Ntshava ya Karmeli.

Xitshungu xi fambe ka Ntshava ya Karmeli. Kolahayani Eliya a te:

— N’wina swi lava mi langa swaku i mani lweyi mi nga ta gandzela yena. Yehovha kumbe Bali. A hi yendleni nchumu lexi nga ta kombisa leswaku hi xihi xikwembu xa ntiyiso. 450 wa vaprofeta va Bali va fanele va lunghiselela gandzelo leswaku li ya ka Bali, mina ni ta lunghiselela leswaku li ya ka Yehovha. Xikwembu lexi nga ta rhumela ndzilu hi le tilweni leswaku wu ta hisa gandzelo hi xona xa ntiyiso.

Vaprofeta va Bali va lunghiselele gandzelo. Vona va tshame siku hinkwalu na va vitana Bali kambe Bali a a nga va hlamuli. Eliya a sungule ku hleka vaprofeta lavayani, a gama a ku:

— Swi nga yendleka Bali a yo yetlela, vangani guwa mi mu vitana kumbe a ta pfuka.

Vaprofeta va Bali va tame va huwelela va mu vitana anze li ya chona, kambe a ku zanga hi ku yendleka nchumu.

Se Eliya a teke a gandzelo la yena a li veka ka altari a gama a li chela mati. Se a khongela ka Yehovha a ku:

— Yehovha na kombela, va kombi vanhu lava hinkwavu swaku hi wena Xikwembu xa ntiyiso.

Nkama lowu Eliya a nga gama ku yendla xikhongelo, Yehovha a yendle leswaku ku wa ndzilu hi le tilweni ahenhla ka altari. Se Vayisrayele hinkwavu va kholwile leswaku Yehovha hi yena Xikwembu xa ntiyiso. Hi siku leliyani hinkwavu vaprofeta va Bali va 450 va dlayiwile.

Eliya a game a vona rhefu lalitsongo a gama a byela Akabu a ku:

— Ku ta na mpfula yayikulu, hantlisa u lunghiselela movha wa wena wa nyimpi leswaku u muka na mpfula yi nga se sungula ku na.

Ku game ku sungula ku mphuma ku ba moya wawukulu ku tlhela ku na mpfula yayikulu hintamu. Akabu a khwele movha wa yena wa nyimpi a wu tsutsumisa swinene. Hi ku pfuniwa hi Yehovha Eliya a swi kotile ku tsutsuma a siya movha wa Akabu. Hi wugamu ku tlhele ku na mpfula aIsrayele, kambe Eliya a wa ha ta kumana ni swikarhatu swin’wani.