Mahahla Ya Ku Hambana

Nkama Izaki a a ni 40 wa malembe a tive Rabeka a gama a chada na yena. Izaki a a mu rhandza hintamu Rabeka naswona hi ku famba ka nkama Rabeka a game a kuma nyimba ya mahahla.

Lweyi a nga rhanga a huma ka khwirhi la mamani wa yena a ve Esawu ku gama ku landzela Yakobe. Esawu a a rhandza ku hlota. Indjhe wa swi tiva swaku swi vula yini ku hlota kumbe ku kasara? I ku famba u lavetela swiharhi khwatini swaku u swi dlaya, ku nga ha va swaku u swi dla kumbe swin’wani. Kambe Yakobe a a rhandza ku tshama kaya a yendla mintirho ya le kaya.

Esawu a a li n’wana wa ku sungula, hi mhaka leyo a a ni mfanelo ya ku kuma a tshomba la linyingi la ku tlula la Yakobe. Wa swi tiva swaku i yini tshomba? I swilo hinkwaswu leswi papayi a swi siyelaka vana loko a fa. Swa ku fana ni masimu ni male. Ka ndjangu wa Izaki swilo hinkwaswu leswi Yehovha a a swi tshembise Abrahamu na swona a swi fana ni tshomba. Kambe Esawu a a nga na mhaka ni tshomba lolelo. Kambe ka Yakobe a li li la lisima hintamu.

Siku lin’wani Esawu a vuye hi ku hloteni ka swiharhi akhwatini na a karhalile hintamu. Se a twa ku nun’hwela ka swakudla leswi Yakobe a a swi sweka. Yena a byele Yakobe a ku:

— Na fa hi ndlala! Ni kombela u ni nyika swakudla ni dla!

Yakobe a ku:

— Ni nga ku nyika swona, ntsena loko u ni tshembisa swaku u ta ni nyika tshomba la wena.

Se Esawu a hlamula a ku:

— A ni na mhaka na swona leswo, ni nga ku nyika swona, no lava swakudla ni dla ntsem.

Indjhe swi ve swinene leswi Esawu a nga swi yendla? Nada, a swi vanga swinene. Phela Esawu a txintxe minchumu ya lisima hintamu hi pratu la swakudla.

Nkama lowu Izaki na a gugile hintamu a a lava ku katekisa n’wana wa yena wa matevula. Kambe Rabeka a a swi tiva swaku Esawu a xavise mfanelo ya yena ya ku va matevula ka makwavu wa yena. Hi mhaka leyo a yendle leswaku ku katekisiwa Yakobe. Nkama Esawu a nga swi tiva leswo a kwate hintamu a za a lava ni ku dlaya Yakobe. Se leswi Izaki na Rabeka a va lava ku vhikela Yakobe va mu byele leswaku a baleka a ya ka tiyu wa yena Labani, va tlhela va mu byela swaku a nga vuyi anze Esawu a tshika ku kwata. Yakobe a va yingisile a vhela a yendla leswi va nga mu rhuma swona.