Marito Lawa Ma Nga Tsaliwa Ka Paredi

Loko se ku hundze nkama, Belxazara a ve hosi ya Babilona. Siku lin’wani niwusiku a hambe fexta a rhamba vanhu hinkwavu va lisima va Babilona. Se a rhume vatirhi va yena leswaku va tisa tikopo ta woru leti Nebukadinazara a a ti tekile ka tempele ya Yehovha. Belxazara ni vanhu hinkwavu a va phuza ka tikopo ta woru na va vulavula hi swikwembu swa vona. Se na va nga swi nyimelanga ku humelelile a voko la wanuna. A voko lelo li tsale marito lawa a ma nga tolovelekanga ka paredi la ndhawu leyi a va li ka yona.

Belxazara a sungule ku chava hintamu, a vitane tintlharhi ta yena a ku:

— Lweyi a ni tlhamuselaka marito lawa ma nga ka paredi ni ta mu yendla a va wa wu 3 ka vanhu va lisima aBabilona.

Vavanuna va ku tlhariha va zamile ku tlhamusela marito lawayani kambe a va swi kotanga. Se nsati wa hosi a game a ku:

— Ku ni wanuna lweyi vito la yena ku nga Daniyele, hi yena lweyi a a mu tlhamusela swilo Nebukadinazara. Yena a nga swi kota ku ku byela swaku marito lawa ma lava ku vula yini.

Se Daniyele a game a ya ka hosi, hosi yi fike yi ku:

— Loko u swi kota ku lerha marito lawa u tlhela u ni byela swaku ma vula yini, ni ta ku nyika cordão la woru ni tlhela ni yendla leswaku u va wanuna wa wunharhu wa lisima hintamu aBabilona.

Daniyele a te:

— A ni lavi nchumu ka leswo, kambe ni ta ku tlhamusela leswi marito lawa ma vulaka swona. Papayi wa wena Nebukadinazara a ve hosi leyi a yi tibyela hintamu kambe Yehovha a mu djondzise nchumu. Hambileswi wena hosi u nga tiva leswi swi nga yendlekela papayi wa wena u phuze vhinyu hi tikopo leti ti nga tekiwa ka tempele. Yehovha a kwate swinene. A ve leswo swi nga yendla leswaku a tsala marito lawa ka paredi: Mene, Mene, Tekele ni Parisini. Wona ma lava ku vula swaku hosi ya Vameda ni Vapersiya yi ta dumela aBabilona funtshi wena hosi a wu nga ha ta va hosi.

A Babilona hinkwaku a ku ni muru wawukulu hintamu ni nambu lowu a wu yente hintamu. Hi mhaka leyo vanhu hinkwavu a va pimisa leswaku a nga kona lweyi a a ta dumela aBabilona. Se ka wusiku leli a ku ni fexta aBabilona, masonchwa ya Meda ni Persiya ma dumele Babilona. Se hosi ya Persiya leyi yi vitaniwaka Korexe yi djikise mati. Hi mhaka leyo, swi ma vevukelile masonchwa ya Korexe leswaku ma ya fika ka swipfalu swa Babilona. Loko se ma fike ka swipfalu ma kume leswaku a swipfalu se a swi pfuliwile. Masonchwa ma nghenile ma dumela Babilona ni ku dlaya Belxazara. Se Korexe a ve hosi ya Babilona.

Loko se ku hundze lembe, Korexe a vule leswi ka vanhu hinkwavu:

— Yehovha a ni rhume leswaku ni pfuxeta tempele ya yena aYerusalema, ni ta tshika Vayuda hinkwavu lava va lavaka ku pfunisa leswaku va famba.

Leswi Yehovha a nga swi hlaya swi yendlekile, Vayuda va tlhelele kaya loko se ku hundze 70 wa malembe na Yerusalema a helisiwile. Korexe a tlhelise tikopo ta woru ni ta prata leti Nebukadinazara a a ti susile ka tempele. Wa vo, Yehovha a tirhise Korexe leswaku a pfuna Vayuda.