Korneliyo A Djondza Hi Yehovha

Ka doropa la Khezariya, a ku tshama wanuna lweyi a a li murhangeli wa masonchwa ya Roma, vito la yena a ku li Korneliyo. Yena a a nga li Muyuda kambe a a rhandziwa hintamu hi Vayuda. Korneliyo a a swi rhandza ku pfuna vanhu van’wanyani a tlhela a pfuna ni swisiwana, yena a a kholwa ka Yehovha naswona minkama hinkwayu a a khongela ka yena. Se siku lin’wani ku humelele ntsumi yi byela Korneliyo yi ku:

— Xikwembu xi swi twile swikhongelo swa wena. Rhuma vanhu leswaku va ya ka doropa la Yopa va ya vitana Pedru. Na a nga hlwelanga, Korneliyo a rhumele vavanuna vanharhu va ya Yopa.

Hi nkama wolowo, Pedru a vone swilo na a li Yopa. Yena a vone swiharhi leswi Vayuda a va nga fanelanga va dla. Se kolanu, yena a twe rito na li ku a a fanele a dla swiharhi swoleswo, kambe Pedru a a nga swi lavi hikusa a a li swiharhi leswi nawu a wu nga pfumeli swaku va dla. Se rito li te:

— U nga pimisi swaku swiharhi leswi a swi basanga. Xikwembu xi swi basisile.

Se Xikwembu xi byela Pedru xi ku:

— Ku ni vavanuna vanharhu lava va ku lavetelaka. Famba na vona.

Pedru a humile a ya vulavula na vona, a fike a va vutisa ka leswaku i mpsini leswi a va swi yendla lahayani! Vona va ku:

— Hi rhumiwe hi Korneliyo, lweyi a nga murhangeli wa masonchwa ya Roma. Yena a hi rhume leswaku hi ta ku vita leswaku u ya kaya ka yena aKhezariya.

Vavanuna lavayani va tshamile ka munti lowu Pedru a a li ka wona. Se hi mundzuku ka kona nimixo, Pedru ni vavanuna lavayani vanharhu ni vamakwerhu van’wani va Yopa va fambile va ya Khezariya.

Loko Pedru a fikile, Korneliyo a khizamile phambheni ka Pedru. Se Pedru a ku:

— Pfuka u nyima! Mina ni munhu wa ku fana na wena. Hambileswi Vayuda va kalaka va nga ngheni ka munti wa munhu lweyi a kalaka a nga li Muyuda, Xikwembu xi ni rhumile leswaku ni ta lani kaya ka wena. Ni kombela u ni byela, hi mhaka muni u rhumele vanhu leswaku va ta ni vitana?

Korneliyo a hlamula a ku:

— Ka 4 wa masiku lawa ma nga hundza ni khongelile ka Xikwembu, se ntsumi ya Xikwembu yi ni byele swaku ni ku vitana. Se ha ku kombela, hi djondzise hinkwaswu leswi Yehovha a swi lavaka.

Pedru a ku:

— Swoswi se na swi tiva swaku Xikwembu xi yamukela vanhu hinkwavu leswaku va xi gandzela, ku nga na mhaka swaku i Vayuda kumbe a hi Vayuda.

Pedru a game a sungula ku va djondzisa swilo swa swinyingi hi Yesu. A djondzise Korneliyo ni hinkwavu lava a va li kaya ka yena naswona hinkwavu va yamukele moya wa ku kwetsima va tlhela va tsakamisiwa.