Xitshembiso Lexi Va Nga Xi Yendlela Yehovha

Loko se ku hundze tiwheti timbirhi na va humile Gibita, Vayisrayele va fikile ka Ntshava ya Sinayi, va tshama kona swa nkamanyana. Se Yehovha a byele Moxe leswaku a khwela ka Ntshava ya Sinayi, a gama a ku:

— Hi mina ni nga ponisa Vayisrayele, loko vona va yendla hinkwaswu leswi ni nga ta va byela swona, va ta va vanhu va mina.

Se loko Moxe a xike ka ntshava a byele Vayisrayele hinkwaswu leswi Yehovha a nga mu byela swona. Wa swi tiva leswi Vayisrayele va nga swi vula? Va te:

— Hi ta yendla hinkwaswu leswi Yehovha a nga ta hi byela swona.

Moxe a tlhele a khwela ka Ntshava ya Sinayi, se Yehovha a mu byela a ku:

— Loko se ku hundze masiku manharhu ni ta vulavula ni Vayisrayele, va byeli leswaku va nga khweli ka ntshava.

Se Moxe a xika ka ntshava a ya byela Vayisrayele leswaku va tilunghisela hikusa Yehovha a a lava ku va byela minchumu ya lisima hintamu.

Hi siku la wunharhu, Vayisrayele va vone ku hatima ni rhefu la ku mphuma hintamu na li mbhonye Ntshava ya Sinayi. Ku tlhela ku twala ku duma ka tilo ni guwa lalikulu la ku chayiwa ka limhondzo. Va tlhele va vona ndzilu lowu a wu xika hi tilweni wu ya ka Ntshava ya Sinayi. Se loko va vonile hinkwaswu leswo, Vayisrayele va sungule ku chava hintamu. Hikusa ntshava se a yi mbhonyiwe hi ximusi, funtshi a yi tsekatseka hintamu, naswona guwa la ku chaya ka limhondzo a li ya li twala hintamu swinene. Se a xikarhi ka ndzilu, Vayisrayele va twa rito la Xikwembu li ku:

— Hi mina Yehovha, n’wina a mi fanelanga mi gandzela xikwembu xin’wani.

Moxe a tlhele a khwela ka Ntshava ya Sinayi, se Yehovha a mu nyike minawu leyi Vayisrayele a va fanele va yi landzela. Minawu leyi a yi vulavula hi leswi a va fanele va mu gandzelisa xiswona Yehovha, minawu yin’wani a yi vulavula hi leswi a va fanele va swi yendla ni leswi a va nga fanelanga va swi yendla. Se Moxe a va byelile hinkwaswu leswi Yehovha a nga mu rhuma swaku a va byela swona, se vona va tshembise Yehovha va ku:

— Hi ta yendla hinkwaswu leswi Yehovha a nga hi byela swona.

Kambe indjhe va swi yendlile leswi va nga tshembisa Yehovha?