Vayisrayele A Va Yendlanga Leswi Va Nga Swi Tshembisa

Yehovha a byele Moxe leswaku a khwela ka Ntshava ya Sinayi, Moxe a hete 40 wa masiku na a li ka Ntshava ya Sinayi. Se Yehovha a tsale 10 wa minawu ya lisima hintamu ka maribye mambirhi.

Loko se ku hundze nkamanyana Vayisrayele va sungule ku pimisa swaku Moxe a a nga ha ta vuya, se va byele Aroni va ku:

— Moxe a nyamalalile, hi yendleli xikwembu swaku xi ta hi susa lani.

Se Aroni a kombela a woru ka Vayisrayele a li teka a li dereterisa a yendla xifaniso xa xihon’wani. Se Vayisrayele hinkwavu va xi hambela fexta, va tlhela va sungula ku xi gandzela va ku:

— Lexi i xikwembu xa hina, hi xona xi nga hi humesa ka tiko la Gibita.

Indjhe a swi li swinene leswi Vayisrayele va nga swi yendla? Nada. A swi nga li swinene. Phela vona a va tshembise Yehovha leswaku va ta gandzela yena ntsena, kambe a va swi yendlanga leswi va nga swi tshembisa. Loko Yehovha a swi vonile a byele Moxe a ku:

— Xika u ya vona Vayisrayele, a va ha ni yingisi va yendle xifaniso funtshi vo xi gandzela.

Moxe a xika ka Ntshava ya Sinayi na a khome maribye. Se loko a fike kusuhi ni lani Vayisrayele a va li kona a twe xitshungu na xi yimbelela kambe loko a ya a tshinela a vone Vayisrayele na va txina va tlhela va gandzela xihon’wani xa woru. Moxe a kwate hintamu nkama a nga vona leswo lakakuza a wisa maribye lawa a li na wona ya mambirhi ma fayeka a gama a pfotlosa xihon’wani xa woru, se a vutisa Aroni a ku:

— Hi mhaka muni u pfumele ku xengeteliwa hi vanhu lava u yendla xihon’wani? Phela leswo swi bihile, swi bihile hintamu.

Se Aroni a ku:

— Moxe u nga kwati. Phela hambi hi wena wa va tiva Vayisrayele lava, vona a va lava ku yendleliwa xikwembu se va ni tisela woru, mina ni yo li teka ni li veka ka ndzilu se ku huma xihon’wani lexi.

Se Moxe a tlhela a khwela ka Ntshava ya Sinayi a ya kombela Yehovha leswaku a rivalela Vayisrayele.

Yehovha a va rivalelile Vayisrayele kambe a yo rivalela lava a va lava ku mu yingisa. Se wa swi vona leswaku ka Yehovha i swa lisima hintamu ku yingisa?