12 Wa Vakambeli

Vayisrayele va suke ka Ntshava ya Sinayi va tama va famba amananga. Nkama va nga fika ka ndhawu leyi vitaniwaka Kadexi, Yehovha a byele Moxe swaku a rhuma 12 wa vavanuna leswaku va ya kambela tiko la Kanana, a a fanele a langa wanuna mun’we ka lixaka lin’wani ni lin’wani va za va fika 12 wa vona. Se Moxe a byele vavanuna lava a ku:

— Fambani ka tiko la Kanana mi ya vona kumbe ku ni tindhawu ta kahle ta ku rima ka tona. Mi vona madoropa ya kona ni swaku vanhu va kona va ni matimba kumbe a va na wona.

Se vakambeli lava va 12 va fambile va ya Kanana. Loko se ku hundze 40 wa masiku, vakambeli lava va vuye ni makuwa, ma romã, ni mawuvha se va gama va kontarela Vayisrayele hinkwaswu leswi va nga swi vona, va te:

— A tiko la kona i linene kambe vanhu va kona va ni matimba swinene, funtshi doropa la kona li ni mimuru yayikulu hintamu.

Kambe Kalebe mun’we wa lava 12 a te:

— Leswo a swi na mhaka. Hi nga swi kota ku va hlula, a hi fambeni swoswi.

Hi mhaka muni Kalebe a vule leswo? Hi mhaka a a mu tshemba hintamu Yehovha. Mukambeli mun’wani lweyi a a vitaniwa Yoxuwa na yena a a mu tshemba Yehovha, kambe vakambeli lavan’wani va 10 va te:

— A hi nge yi seniyani, Vakanana va lehile hintamu va tlhela va va ni matimba, phela ka vona hi fana ni swisokotani.

Nkama va nga twa leswo, Vayisrayele va sungule ku chava Vakanana. Se va lava ni ku tlhela va ya Gibita. Kambe Yoxuwa na Kalebe va zame ku va miyeta va ku:

— Mi nga va chaveni Vakanana, Yehovha a ta hi vhikela ka vona kambe swo lava hi mu tshemba ntsena.

Kambe Vayisrayele a va nga lavi ku twa nchumu, phela a va lava hambi hi ku dlaya Yoxuwa na Kalebe.

Se Yehovha a yendle yini? A byele Moxe a ku:

— Vayisrayele lava ni va yendlele minchumu ya yinyingi yayinene, kambe a va swi lavi ku ni yingisa, hi mhaka leyo va ta tshama 40 wa malembe amananga funtshi va ta fela kona, lava va nga ta nghena ka tiko la Kanana i Yoxuwa na Kalebe ni vana va Vayisrayele lava.