Davhida Na Goliyadi

Loko se ku hundze nkama, Yehovha a byele Samuwele leswaku a ya kaya ka wanuna lweyi a a vitaniwa Yese. Mun’we ka vana va Yese a a ta va hosi leyi a yi ta pfaleta Sawulo. Loko Samuwele a fike kaya ka Yese a vone n’wana wa Yese wa matevula, nkama a nga mu vona a pimise swaku hi yena a a ta va hosi leyi a yi ta pfaleta Sawulo, kambe Yehovha a te:

— A hi yena lweyi ni nga mu langa, mina a ni yi hi leswi munhu a nga tshamisa xiswona hi le handle, swa ku fana ni ku saseka. Phela ka mina nchumu xa lisima hintamu ka munhu i kuva a va ni mbilu yayinene.

Se Yese a tise 6 wa vana va yena, kambe Yehovha a nga langanga ni mun’we ka vona. Samuwele a vutise Yese swaku a a nga na n’wana mun’wani ke? Se Yese a hlamule a ku:

— Ni ni mun’wani wamutsongo ka hinkwavu, vito la yena i Davhida. Yena a le ku luseni ka tinyempfu.

Se Yese a rhumele vanhu leswaku va ya vitana Davhida, se loko Davhida a fikile, Yehovha a byele Samuwele a ku:

— Davhida hi yena ni nga mu langa.

Samuwele a chele Davhida mafurha ka nhloko ku kombisa leswaku hi yena hosi leyi a yi ta landzela.

Loko ku hundze nkama, Vafilista va ye va ya lwa ni Vayisrayele. Sonchwa lin’wani la Vafilista leli vito la lona a ku li Goliyadi a li lehe hintamu li tlhela li va ni ntamu, se a li tshamela ku hleka Vayisrayele li ku:

— A ku na munhu lweyi a nga ni hlulaka ka n’wina, loko mo mu kuma naswona a ni hlula, hina hi ta va vatirhi va n’wina. Kambe loko a nga swi koti ku ni hlula n’wina mi ta va vatirhi va hina.

Siku lin’wani Davhida a fambe a ya nyika swakudla vamakwavu va yena lava a va li nyimpini. Nkama na a li kusuhi a twe Goliyadi na a rhuketela Vayisrayele. Se a byela Sawulo swaku a a ta lwa na Goliyadi, Sawulo a mu byele leswaku leswo a swi nga ta koteka hikusa Davhida a wa ha li mutsongo. Se Davhida a mu hlamule a ku:

— A swi na mhaka hikusa Yehovha a ta ni pfuna.

Se Sawulo a teka mpahla ya ku lwa hi yona a yi nyika Davhida, kambe Davhida a yi tlhelisile hikusa a yi nga ta mu pfuna hi mhaka a yi nga mu ringani. Yena a game a teka 5 wa maribye a ma peta ka paxta la yena, se a teka xibalakatsa a gama a ya ku lweni na Goliyadi. Nkama lowu Goliyadi a nga vona Davhida a sungule ku mu poyilela a ku:

— Kasi munhu wa kona hi yelweyi! Vuya u ta lwa na mina. Ni ta ku dlaya naswona ni ta teka nyama ya wena ni yi nyika swiharhi swi yi dla.

Kambe Davhida a a nga chavi nchumu yena a hlamule a ku:

— Wena u ta lwa na mina na u tshemba xipada xa wena, kambe mina ni ta lwa na wena na ni tshemba Yehovha. Wena u pimisa leswaku u lwa na hina kambe u lwa na Yehovha. Vanhu hinkwavu lava va nga lani va ta swi vona swaku Yehovha a ni matimba ku tlula xipada xin’wani ni xin’wani. Yena a ta hi pfuna leswaku hi ku dlaya.

Davhida a teka ribye a li peta ka xibalakatsa a txopa Goliyadi hi ntamu wa yena hinkwawu. Yehovha a yendla leswaku ribye li ba Goliyadi ka ximombo, a wa hansi a fa. Se Vafilista va suka hi ku tsutsuma va baleka. Wa swi vona leswaku Davhida a a mu tshemba Yehovha? Wena ke, wa mu tshemba Yehovha?