Xidjoho Xa Hosi Davhida

Nkama lowu Sawulo a nga fa, Davhida a game a va hosi. Yena a a ni 30 wa malembe. Siku lin’wani niwusiku, na a li ka yindlo ya yena ya le henhla, a vone wansati wa ku xonga hintamu. Davhida a tsumbule swaku wansati lwiyani a vito la yena a a li Batixeba naswona a a chade na Uriya lweyi a a li musonchwa. Hambileswo, Davhida a yendle swaku Batixeba a ya ka yindlo ya yena. Loko a fikile a fambe masangu na yena, se Batixeba a va ni nyimba. Davhida a zame ku fihla xidjoho xa yena. A tlhele a yendla hinkwaswu leswaku Uriya a ya dlayiwa nyimpini. Loko Uriya a dlayiwile, Davhida a chade na Batixeba.

Kambe Yehovha a swi vonile hinkwaswu leswi Davhida a nga swi yendla. Se a rhume muprofeta Natani leswaku a ya vulavula na Davhida. Natani a fike a ku:

— A ku ni wanuna wa ku ganya hintamu, lweyi a a ni tinyempfu ta tinyingi se ni wanuna mun’wani lweyi a a li xisiwana naswona a wo va ni nyempfu yin’we leyi a a yi rhandza hintamu. Wa swi tiva swaku wanuna lwiyani wa ku ganya hintamu a yendle yini? A teke nyempfu ya wanuna lwiya wa xisiwana.

Se nkama Davhida a nga twa leswo a kwate hintamu a gama a byela Natani a ku:

— Wanuna lweyo a a fanele a dlayiwa.

Se Natani a gama a ku:

— Hosi ya mina, phela leswo hi leswi wena u nga swi yendla ka Uriya.

Davhida a kwate hintamu a gama a hlaya swaku a djohile. Hi mhaka ya xidjoho lexo, Yehovha a tshike Davhida ni ndjangu wa yena va humeleliwa hi swilo swa ku biha. Kambe leswi Davhida a a tiveka hansi, Yehovha a mu rivalelile.

Loko ku hundzile malembenyana, Davhida a lave ku yakela Yehovha tempele, kambe Yehovha a lange Solomoni n’wana wa Davhida swaku a yendla ntirho lowo. Davhida a sungule ku lunghiselela swa ku yaka hi swona tempele, a gama a ku:

— Leswi Solomoni a nga jovhem kuve tempele ya Yehovha yi fanele yi saseka, ni ta yendla xan’wanchumu swaku ni mu pfuna.

Davhida a nyikele hi male ya yinyingi leswaku yi tirha ka ku yaka tempele. A vitane vatirhi va vanyingi a tlhela a hlengeleta woru, prata ni timhandzi ta minsinya swaku va ti tirhisa ka ku yaka. Na Davhida a nga se fa a byele Solomoni a ku:

— Yehovha a ni kombele swaku ni ku nyiketa dezenyu leli la leswi tempele yi nga ta tshamisa xiswona. U nga chavi n’wananga hikusa Yehovha a ta ku pfuna. Vana ni ntamu u tlhela u tinyimisela ku tirha.