Yehovha A Vhikele Yesu

Siku lin’wani niwusiku, vavanuna van’wani lava a va tshama kule ni tiko la Israyele va vone ku phatima atilweni loku a ku fana ni ku phatima ka nyeleti. Vona a va kholwa leswaku tinyeleti ti nga kongomisa vanhu ti tlhela ti va pfuna. Hi mhaka leyo va sungule ku landzelela nyeleti liyani, yona yi va kongomisile anze va ya fika aYerusalema. Nkama va nga fika aYerusalema va vutise vanhu va ku:

— Xi kwini xifanyani lexi xa ha ku psaliwaka lexi nga ta va hosi ya Vayuda? Hi lava ku xi vona leswaku hi xi nyika maprezenti.

Heroda hosi ya Yerusalema, a nga swi tsakelanga loko a twa vanhu va vulavula hi hosi yin’wani. Hi mhaka leyo a vitane vaprista a fika a va vutisa a ku:

— Hi kwini lani hosi leyi yi nga ta psaliwa kona?

Vaprista va vule leswaku a yi ta psaleliwa aBetlehema. Se Heroda a vitane vavanuna lava a va ta hi le kule a fika a ku:

— Fambani aBetlehema mi ya lavetela xifanyani lexi, se mi ta gama mi vuya mi ta ni byela lomu xi nga kona, na mina ni lava ku ya xi vona.

Kambe Heroda a wo hemba hikusa a a nga lavi ku xi vona hikakunene xifanyani lexiyani kambe a a lava ku xi dlaya.

Vavanuna lavayani va tame va famba va landzelela “nyeleti” anze va ya fika aBetlehema. “Nyeleti” liyani yi fike yi nyima henhla ka yindlo, se vona va fika va nghena ka yindlo yoleyo, va kuma Mariya na Yesu. Vavanuna lavayani va fike va khizama phambheni ka Yesu va mu nyika maprezenti ya ku dura. Kambe ku nga va leswaku i Yehovha lweyi a nga rhuma vavanuna lavayani leswaku va ya ka Yesu? Nada.

Ka wusiku lolelo Yehovha a byele Yosefa na a yo yetlela a ku:

— Heroda a lava ku dlaya Yesu, baleka wena na Mariya ku patsa na Yesu mi ya aGibita. Ni ta mi byela nkama lowu mi nga ta vuya hi wona.

Na a nga zanga a hlwela, Yosefa a balekile ni ndjangu wa yena va ya Gibita. Naswona Yehovha a byele vavanuna lava a va ta hi le kule leswaku va nga ha tlheli va ya byela Heroda lomu Yesu a a li kona. Loko Heroda a vone leswaku vavanuna lava a va nga ha ta vuya, a kwate hintamu. Leswi a a nga mu kumi Yesu, Heroda a humese nawu wa leswaku ku dlayiwa swifanyani hinkwaswu swa Betlehema, leswi a swi ni malembe ya ku ringana ni ya Yesu.

Hi ku famba ka nkama Heroda a game a fa. Se Yehovha a byele Yosefa a ku:

— Swoswi mi nga tlhelela ka tiko la n’wina.

Se Yosefa, Mariya na Yesu va tlhelelile ka tiko la Israyele va ya tshama ka doropa la Nazareta.