Ku Tsakamisiwa Swi Nga Ku Yentxa U Kuma Minkateko Ya Yinyingi

Yesu a vule swaku Vakreste va fanele va tsakamisiwa. (Lerha Matewu 28:19, 20.) Kambe i yini ku tsakamisiwa? Naswona munhu a fanele a yentxa yini swaku a tsakamisiwa?

1. Swi vula yini ku tsakamisiwa?

A rito leli nge “ku tsakamisiwa” li ta hi ka Xigriki naswona li vula “ku nyuvelisiwa” kumbe ku petiwa ka mati hi ku helela. Nkama Yesu a nga tsakamisiwa ka Nambu wa Yordani, a petiwe ka mati hi ku helela, a gama “a huma matini”. (Marku 1:9, 10) Hi ku fanana, Vakreste va ntiyiso loko va tsakamisiwa va petiwa ka mati hi ku helela.

2. Loko munhu a tsakamisiwa a kombisa yini?

Loko munhu a tsakamisiwa, a kombisa swaku a tinyiketelile ka Yehovha. A swi yentxisa ku yini leswo? Na a nge se tsakamisiwa, a khongela ka Yehovha na a li yexe, a mu byela swaku a lava ku mu tirhela wutomi la yena hinkwalu. A tshembisa Yehovha swaku a ta gandzela yena ntsena a tlhela a rhangisa ku yentxa ku rhandza ka Yehovha ka wutomi la yena. A langa ku ‘titshika . . . a . . . landzela’ tidjondzo ta Yesu ni xikombiso xa yena. (Matewu 16:24) Ku tinyiketela ni ku tsakamisiwa swi nga yentxa swaku munhu a va munghanu wa mukulu wa Yehovha ni wa vanhu lava va mu tirhelaka.

3. Munhu a fanele a yentxa yini swaku a tsakamisiwa?

Na u nge se tsakamisiwa u fanele u djondza hi Yehovha u tlhela u va ni lipfumelo ka yena. (Lerha Vaheberu 11:6.) Loko u ya u mu tiva Yehovha ni ku va ni lipfumelo ka yena u ta ya u mu rhandza hintamu, leswo swi ta ku yentxa u lava ku byela van’wana hi yena u tlhela u hanya hi minawu ya yena. (2 Timotiyu 4:2; 1 Yohani 5:3) Loko munhu a hanya ‘hi ndlela leyi fanelaka ka Yehovha, a mu tsakisa ka timhaka hinkwatu’ a nga ha lava ku nyiketela wutomi la yena ka Yehovha a tlhela a tsakamisiwa. — Vakolosa 1:9, 10.a

DJONDZA SWIN’WANA

4. Leswi hi nga swi djondzaka ka ndlela leyi Yesu a nga tsakamisiwa hi yona

Lerhani Matewu 3:13-17 swaku u vona swin’wana hi ndlela leyi Yesu a nga tsakamisiwa hi yona. Mi gama mi bula hi swivutiso leswi landzelaka:

• Yesu a a li xibebetana nkama a nga tsakamisiwa?

• Yena a tsakamisisiwe ku yini? Ku nga va swaku va yo mu chela swimatana ka nhloko?

Loko se a tsakamisiwile, Yesu a sungule ku yentxa ntirho wa ku hlawuleka lowu a a nyikiwe hi Xikwembu. Lerhani Luka 3:21-23 na Yohani 6:38, mi gama mi bula hi xivutiso lexi landzelaka:

• Loko Yesu se a tsakamisiwile, hi wini ntirho lowu a wu li wa lisima ka wutomi la yena?

5. Swi nga koteka kuva u tsakamisiwa

Mhaka ya ku tinyiketela ni ku tsakamisiwa yi nga ha ku chavisanyana. Kambe loko u djondza hi Yehovha u tlhela u mu tiva kahle swi ta ku pfuna swaku u ya u mu tshemba u tlhela u yentxa xiboho lexi xa lisima. Vona swikombiso swa vanhu van’wana lava nga swi kota ku yentxa leswo, sixtirani VHIDIYO.

VHIDIYO: Tiyisa Wunghanu La Wena Na Yehovha (1:11)

Lerhani Yohani 17:3 na Yakobo 1:5, mi gama mi bula hi xivutiso lexi landzelaka:

• I mpsini swi nga pfunaka munhu swaku a tilunghiselela ku tsakamisiwa?

1. Hi tinyiketela hi ku khongela ka Yehovha hi mu byela swaku hi lava ku mu tirhela wutomi la hina hinkwalu

2. Loko hi tsakamisiwa, hi kombisa ka vanhu hinkwavu swaku hi tinyiketelile ka Xikwembu

6. Loko hi tsakamisiwa hi lumba ndjangu wa Yehovha

Loko hi tsakamisiwa, hi lumba ndjangu wun’we wa ku twanana wa misava hinkwayu. Hambileswi hi tshamaka ka matiko ya ku hambanahambana, hi tlhela hi kulisiwa hi tindlela ta ku hambana, hinkwerhu hi kholwa minchumu ya ku fana naswona hi hanya hi minawu ya ku fana ya Bibele. Lerhani Tipisalema 25:14 na 1 Pedru 2:17, mi gama mi bula hi xivutiso lexi landzelaka:

• Loko munhu se a tsakamisiwile a sungula ku va ni wunghanu la ku tshamisa ku yini na Yehovha ni vanhu lava va mu tirhelaka?

LESWI HI NGA SWI DJONDZA

Yesu a vule swaku Vakreste va fanele va tsakamisiwa. Swaku munhu a tsakamisiwa, a fanele a va ni lipfumelo la ku tiya ka Yehovha, a hanya hi minawu ya yena a tlhela a tinyiketela ka yena.

Ku kambela leswi hi nga swi djondza

• I yini ku tsakamisiwa, naswona hi mhaka muni swi li swa lisima?

• Hi kwini ku yelana loku nga kona ka ku tinyiketela ni ku tsakamisiwa?

• I mpsini leswi munhu a faneleke a swi yentxa na a nge se tinyiketela a tlhela a tsakamisiwa?

LOKO U LAVA KU TIVA SWIN’WANA

Djondza hi leswi ku tsakamisiwa swi vulaka swona.

“I Yini Nkhuvulo?” (Nhlokomhaka leyi nga ka site la jw.org hi Xitsonga)

Vona leswi u nga swi yentxaka swaku u tsakamisiwa.

“Kurhandza Yehovha Switaku Yendla U Lava Kutsakamisiwa” (Murindzi wa Março wa 2020)

Djondza swaku i yini swi nga yentxa wanuna lweyi a lava ku tsakamisiwa.

“A Va Lava Leswaku Ndzi Tikumela Ntiyiso Hi Ndzexe” (Murindzi wa 1 ka Fevereiro wa 2013 hi Xitsonga)

Vona swaku hi mhaka muni swi li swa lisima ku tsakamisiwa u tlhela u vona swaku u nga yentxa yini kuva u tilunghisela.

“Xana Ndzi Fanele Ndzi Khuvuriwa?” (Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2, ndzima 37 hi Xitsonga)