NHLOKOMHAKA YA DJONDZO 15
LISIMU 30 Tatana, Xikwembu ni Munghanu wa Mina
Ku Va Vanghanu Va Yehovha Swa Pfuna!
“Ku tshinela ka Xikwembu i swinene ka mina.” — PS. 73:28.
LESWI HI NGA TA SWI DJONDZA
Ka nhlokomhaka leyi hi ta vona swaku hi nga yendla yini swaku hi va ni wunghanu la ku tiya na Yehovha ni swaku leswo swi hi pfunisa ku yini.
1-2. a) Ku laveka yini swaku hi va ni wunghanu la ku tiya ni munhu? b) Hi ta djondza hi yini ka nhlokomhaka leyi?
PIMISA hi munghanu wa wena wamukulu ni leswi wunghanu la n’wina li nga sungulisa xiswona. Swi nga yendleka mi hete nkama wa wunyingi na mi bula leswaku u tiva swikarhatu leswi a nga tshama a kumana na swona, u tiva swilo leswi a swi rhandzaka ni leswi a kalaka a nga swi rhandzi; funtshi u tlhele u vona swaku munghanu wa wena a ni wumunhu la ku saseka leli na wena u navelaka ku li tekelela naswona hi leswo swi ku yendlaka u ya u mu rhandza hintamu munghanu wa wena.
2 Ku va ni wunghanu la ku tiya ni munhu swi lava minzamu ni nkama. Swa fana ni wunghanu la hina na Yehovha. Ka djondzo leyi hi ta vona leswaku hi nga maha yini swaku hi va ni wunghanu la ku tiya ni Xikwembu, ni leswaku hi mhaka muni ku yendla leswo swi li swinene. A hi rhangeni hi ku vona swaku hi mhaka muni swi li swinene kuva hi tshinela ka Munghanu wa hina wamukulu Yehovha.
3. Hi mhaka muni swi li swa lisima ku pimisa hi leswi hi pfunekisaka xiswona hi ku va vanghanu va Yehovha?
3 I swa lisima ku tshamela ku pimisa hi leswaku hi ta pfuneka hi yini loko hi li vanghanu va Yehovha, hikusa ku yendla leswo swi ta hi pfuna kuva hi ya hi swi hisekela hintamu ku va vanghanu va Yehovha. (Ps. 63:6-8) Hi xikombiso, vanhu hinkwavu va swi tiva swaku swi kahle ku hamba jinaxtika, va dla swakudla swa kahle, va yetlela nkama wa ku yenela va tlhela va phuza mati ya manyingi. Kambe vanhu va ku tala a va na mhaka na swona leswo hikusa a va tinyiki nkama wa ku pimisa hi swaku leswo swi nga va pfuna leswaku va tipumbela mavabyi. Swa fana ni wunghanu la hina na Yehovha. Ha swi tiva swaku ku va vanghanu va Yehovha swi kahle, kambe lexi nga hi pfunaka swaku hi yendla hinkwaswu leswi hi nga swi kotaka swaku hi va kusuhi hintamu na Yehovha i ku tshamela ku pimisa hi swaku leswo swi hi pfunisa ku yini. — Ps. 119:27-30.
4. I yini leswi mupisalema a nga swi vula ka Tipisalema 73:28?
4 Lerha Tipisalema 73:28. Mutsali wa Tipisalema 73 a a li Mulevhi naswona a a ni ntirho wa ku yimbelela ka tempele ya Yehovha. Swi nga yendleka se a a ni malembe ya manyingi na a tirhela Yehovha hi ku tshembeka. Hambileswo, a a swi vona na swi li swa lisima kuva yena ni vanhu van’wani va pimisa hi swaku va pfunekisa ku yini loko va “tshinela ka Xikwembu”. Se swoswi a hi voneni swaku hi pfunekisa ku yini hi ku va vanghanu va Xikwembu.
KU VA MUNGHANU WA YEHOVHA SWI HI YENDLA HI TSAKA
5. a) Hi mhaka muni ku va vanghanu va Yehovha swi hi yendla hi tsaka? b) Nyikela swikombiso swa ndlela leyi wutlharhi la Yehovha li ku pfunaka hi yona. (Swivuriso 2:6-16)
5 Loko hi va ni wunghanu la ku tiya na Yehovha hi ta tsaka swinene ka wutomi la hina. (Ps. 65:4) Hi ni swivangelo swa swinyingi swa ku vula leswo. Hi xikombiso, loko hi lerha Bibele hi tlhela hi tirhisa leswi hi swi lerhaka hi ta kuma wutlharhi lalikulu. Wutlharhi lolelo li nga hi pfuna leswaku hi fambela kule ni vanhu kumbe swilo leswi nga hi yendlaka hi wela ka swidjoho swaswikulu. (Lerha Swivuriso 2:6-16.) Hi leswo swi yendlaka Bibele li ku: “Wa tsaka munhu lweyi a kumaka wutlharhi ni munhu lweyi a kumaka ku twisisa.” — Swiv. 3:13.
6. Hi mhaka muni mupisalema a heleliwe hi ntsaku?
6 Hambi hi vanghanu va Yehovha, minkama yin’wani va nga xukuvala. Mutsali wa Tipisalema 73 a heleliwe hi ntsaku nkama a nga sungula ku va ni mapimiselo ya ku biha. Yena a a kwata a tlhela a navela lava a va yendla swa ku biha, lava a va nga na mhaka ni Xikwembu naswona a a pimisa swaku swilo a swi va fambela kahle. Mupisalema a a pimisa swaku vanhu lava a va yendla swa ku biha va tlhela va tibyela a va ganyile, va ni lihanyu lalinene naswona a va nga karhateki hi nchumu. (Ps. 73:3-7, 12) Yena a karhatekile hintamu lakakuva a za a pimisa swaku minzamu leyi a a yi yendla swaku a tirhela Yehovha a yi nga pfuni nchumu. Hi nga swi vona leswo ka marito lawa a nga ma vula loko a ku: “Phela ni yi basise mahala mbilu ya mina ni tlhela ni hlamba mavoko ni kombisa swaku a ni na nandzu.” — Ps. 73:13.
7. Hi nga yendla yini loko hi xukuvalile? (Vona mufoto.)
7 Hambileswi mupisalema lwiyani a a xukuvalile, a nga khondlanga mavoko kambe a yendle xan’wanchumu swaku a txintxa mavonelo ya yena. Bibele li vula leswaku a nghene ka “ndhawu leyi kwetsimaka ya Xikwembu”, naswona Yehovha a mu pfunile swaku a txintxa mapimiselo ya yena. (Ps. 73:17-19) Na hina loko ho tshuka hi kumana ni xiyimu xa ku fana ni xa mupisalema lweyi, Yehovha Munghanu wa hina wamukulu wa swi vona leswi swi hi humelelaka. Funtshi loko hi kombela hi tlhela hi pfumela ku pfuniwa hi yena, a ta tirhisa Bibele ni vamakwerhu abandleni leswaku a hi pfuna kuva hi tama hi mu tirhela na hi tsakile hambiloko hi xukuvalile. Naswona hambiloko hi vilela hintamu hi nga xi tivi ni xa ku xi yendla, Yehovha a ta hi tiyisa a tlhela a hi rhulisa mbilu. — Ps. 94:19.a
Mulevhi lweyi a nga tsala buku la Tipisalema 73, na a nyime phambheni “ka ndhawu leyi kwetsimaka ya Xikwembu” (Vona paragrafu 7)
SWI HI NYIKA NTSHEMBO NI KU HI PFUNA KU TIVA SWAKU HI HANYELA YINI
8. Hi swini swilo swimbirhi leswi hi pfunekaka hi swona hi ku va vanghanu va Xikwembu?
8 Ku ni swilo swin’wani leswi hi pfunekaka hi swona hi ku va vanghanu va Xikwembu. Xa ku sungula, swi hi pfuna ku tiva swaku hi hanyela yini. Xa wumbirhi, swi hi nyika ntshembo wa ku tiya wa leswi nga ta yendleka ka nkama lowu taka. (Yer. 29:11) Swoswi a hi buleni hi swaku swilo leswi swimbirhi swi hi pfunisa ku yini.
9. Ku va vanghanu va Yehovha swi hi pfunisa ku yini?
9 Namuntlha vanhu va ku tala va vula swaku Xikwembu a xi kona funtshi a va swi tivi swaku hi hanyela yini. Va pimisa swaku hi ku famba ka nkama vanhu va ta helisiwa va nga ha li kona; kambe hina vanghanu va Yehovha ha swi tiva swaku hi hanyela yini. Loko hi djondza Bibele ha kholwa swaku Xikwembu “xi kona ni leswaku hi xona xi hakelaka lava va xi lavaka hi mbilu hinkwayu.” (Heb. 11:6) Ha tsaka swinene loko hi tirhela Yehovha hikusa hi swoleswo a nga hi yendlela swona. — Det. 10:12, 13.
10. Hi ku ya hi Tipisalema 37:29, i mpsini leswi Yehovha a hi tshembisaka swona?
10 Vanhu va ku tala namuntlha a va na ntshembo. Xa lisima ka vona i ku va va tirha, va chada, va va ni vana va tlhela va veka male swaku va yi tirhisa loko se va gugile. Phela vona a va na mhaka ni Xikwembu, kuve hina vanhu va Yehovha hi ni ntshembo. (Ps. 25:3-5; 1 Tm. 6:17) Ha tiyiseka swaku hinkwaswu leswi Yehovha a nga hi tshembisa swona swi ta yendleka, naswona ku ni swilo swa swinyingi leswi hi nyimelaka swaku Yehovha a hi yendlela swona, kambe xaxikulu ku tlula hinkwaswu i ku va hi mu gandzela na hi li paradesini na hi nga ha fi. — Lerha Tipisalema 37:29.
11. Hi pfunekisa ku yini hi ku va vanghanu va Yehovha?
11 Phela ha pfuneka hi tindlela ta ku hambanahambana loko hi li vanghanu va Xikwembu. Hi xikombiso, loko ho tshuka hi djoha hi gama hi tisola, Yehovha a tshembisa leswaku a ta hi rivalela. (Esa. 1:18) Se leswo swi yendla swaku hi tshama na hi ni lipfalu la ku basa hi tlhela hi nga tshameli ku titwa nandzu hi mhaka swidjoho leswi hi nga swi yendla ka nkama lowu nga hundza. (Ps. 32:1-5) Xin’wani hileswaku ku va vanghanu va Yehovha swi yendla leswaku mbilu ya yena yi tsaka. (Swiv. 23:15) Ha tiyiseka swaku ku ni minkateko yin’wani leyi hi yi kumaka hileswi hi nga vanghanu va Yehovha. Kambe hi nga yendla yini leswaku hi tama hi va vanghanu va Yehovha?
TAMA U TSHINELA KA XIKWEMBU
12. I mpsini leswi se u nga swi yendla swaku u va munghanu wa Xikwembu?
12 Loko se u tsakamisiwile, ku ni swilo swa swinyingi leswi se u nga swi yendla swaku u va munghanu wa Yehovha. Hi xikombiso, u djondze swilo swa swinyingi hi Yehovha na Yesu, u tisolile ka swidjoho swa wena, u kombisa lipfumelo ka Xikwembu u tlhela u yendla minzamu yayikulu leswaku u tama u yendla ku rhandza ka Yehovha. Kambe leswaku u kulisa wunghanu la wena na Yehovha, u fanele u tama u swi yendla swilo leswi. — Kol. 2:6.
13. Hi swini swilo swinharhu leswi swi nga hi pfunaka ku tama hi va vanghanu va Yehovha?
13 I mpsini swi nga hi pfunaka ku tama hi va vanghanu va Xikwembu? Xa ku sungula, hi fanele hi tama hi lerha hi tlhela hi djondza Bibele. Kambe a hi lavi ku gamela ka tidjondzo ta ku sungula ntsena, swi lava hi zama ku twisisa ndlela leyi Yehovha a pimisaka hi yona, leswi a lavaka swaku hi swi yendla hi tlhela hi tirhisa leswi hi swi djondzaka. (Efe. 5:15-17) Xa wumbirhi, hi fanele hi tiyisa lipfumelo la hina. Hi nga yendla leswo hi ku pimisa hi ndlela leyi Yehovha a hi kombaka hi yona swaku wa hi rhandza. Kasi xa wunharhu, hi fanele hi tama hi nyenya swilo leswi Yehovha a kalaka a nga swi tsakeli ni ku kala hi nga tlangi ni vanhu lava yendlaka swa ku biha. — Ps. 1:1; 101:3.
14. I mpsini hi nga swi yendlaka siku ni siku swaku hi tsakisa Yehovha? (1 Vakorinto 10:31) (Vona mafoto.)
14 Lerha 1 Vakorinto 10:31. I swa lisima hintamu kuva hi yendla swilo leswi swi nga ta mu tsakisa Yehovha. Kambe ku va kona ka ntirho wa ku chumayela ni ku ya mintlhanganwini a swi yenelanga, swi lava hi mu tsakisa ni hi leswi hi swi yendlaka siku ni siku. Hi xikombiso, Yehovha wa tsaka loko a vona swaku ha tshembeka ka hinkwaswu leswi hi swi yendlaka ni ku vona swaku ha swi rhandza ku nyika van’wani leswi hi nga na swona. (2 Ko. 8:21; 9:7) Yehovha a tlhela a tsaka loko a vona swaku ha li hlonipha prezenti lalikulu leli a nga hi nyika lona, ku nga wutomi la hina. Wa tsaka loko a vona swaku ha pimela nkama lowu hi dlaka ni ku phuza ni ku vona swaku hi yendla swilo swin’wani kuva hi kombisa swaku ha li rhandza wutomi ni ku lwela ku va ni lihanyu la kahle. Xin’wani ni xin’wani hi xi yendlaka swaku hi tsakisa Yehovha, xi yendla swaku a ya a hi rhandza swinene. — Luk. 16:10.
Leswi hi nga swi yendlaka swaku hi tsakisa Yehovha: Hi fambisa kahle movha, hi maha jinaxtika, hi dla swakudla swa kahle hi tlhela hi rhandza ku nyika (Vona paragrafu 14)
15. Yehovha a lava swaku hi va yendlela yini van’wani?
15 Yehovha a va yendlela swaswinene va ku lulama ni va ku kala va nga lulamanga. (Mat. 5:45) Hi mhaka leyo, a nyimela leswaku na hina hi yendla leswi fanaka. Hi xikombiso, hina ‘a hi vulavuli ku biha hi van’wani, a hi rhandzi ku holova kambe . . . hi hanya hi ku rhula ni vanhu hinkwavu.’ (Tit. 3:2) Hi mhaka leyo, hambiloko munhu a nga kholwi ka Xikwembu, a hi tivoni na hi yampsa ku mu tlula. (2 Tm. 2:23-25) Loko hi kombisa wunene hi tlhela hi pimisela van’wani, hi ya hi tshinela kusuhi swinene ni Xikwembu xa hina.
TIYISA WUNGHANU LA WENA NA YEHOVHA HAMBILOKO U PHAZAMA
16. Mutsali wa Tipisalema 73 a titwise ku yini hi mhaka swihoxo swa yena?
16 Swihoxo leswi hi swi yendlaka, minkama yin’wani swi nga hi yendla hi pimisa swaku Yehovha a nga ha li Munghanu wa hina. Hi leswo mutsali wa Tipisalema 73 a nga titwisa xiswona. Yena a te: “A ku yo sala katsongo swaku minenge ya mina yi huma ndleleni; a ku yo sala katsongo swaku minenge ya mina yi rhetemuka.” (Ps. 73:2) A tlhele a vula swaku ‘mbilu ya yena a yi karhatekile,’ ni swaku ‘a a nga twisisi nchumu . . . ku fana ni xiharhi lexi kalaka xi nga pimisi’. (Ps. 73:21, 22) Swi nga yendleka mupisalema lweyi a vule leswo hileswi a a titwa na a nga pfuni nchumu hi mhaka swihoxo leswi a nga swi yendla. Phela yena a a pimisa swaku a swi nga ha mu faneli ku tama a rhandziwa hi Yehovha.
17. a) I yini leswi mupisalema a nga swi yendla nkama na a hele ntamu? b) Hi djondza yini ka xikombiso xa yena? (Vona mafoto.)
17 Hambileswi mupisalema a a pimisa swaku Yehovha a a mu tsukulile, a nga ha li Munghanu wa yena, a nga hlwelanga ku hlula mapimiselo wolawo. Swi tikomba ku ve hi nkama wolowo a nga pimisa hintamu hi lisima la ku va munghanu wa Xikwembu. Hi leswo swi nga yendla swaku ka Tipisalema 73: 23, 24 a vula marito lama nge: “Swoswi ni na wena nkama hinkwawu; u khome voko la mina la xinene. Wa ni kongomisa hi switsundzuxu swa wena, se u ta gama u ni komba timpsalu.” Ku fana ni mupisalema lweyi, na hina loko hi hela ntamu hi fanele hi kombela ku pfuniwa hi Yehovha. Phela Yehovha i Ribye, leswi nge a nga txintxi; minkama hinkwayu a tinyimisele ku hi tiyisa loko hi hela ntamu. (Ps. 73:26; 94:18) Se hambiloko hi tshuka hi yendla swihoxo swaswikulu, swi nga koteka ku tlhela hi va vanghanu va Yehovha hikusa yena a tinyimiselile ku hi rivalela. (Ps. 86:5) Phela loko hi godola kumbe hi hela ntamu, hi kona swi lavekaka hintamu kuva hi tshinela ka Xikwembu xa hina Yehovha. — Ps. 103:13, 14.
Loko hi hela ntamu, hi fanele hi zama ku tshinela kusuhi na Yehovha hi ku yendla mintirho leyi nga ta tiyisa wunghanu la hina na yena (Vona paragrafu 17)
TIYISA WUNGHANU LA WENA NA YEHOVHA HI MASIKU NI MASIKU
18. Hi mhaka muni hi vula swaku hi nga tiyisa wunghanu la hina na Yehovha hi masiku ni masiku?
18 Swi nga koteka kuva hi tiyisa wunghanu la hina na Yehovha hi masiku ni masiku hikusa ku djondza hi Yehovha a swi gami. Hi vula leswo hikusa Bibele li vula swaku tindlela ta Yehovha, wutlharhi la yena ni wutivi la yena swi ‘yentile’ swinene. — Rom. 11:33.
19. Tipisalema 73 yi hi yendla hi tiyiseka hi yini?
19 Tipisalema 79:13 yi li: “Hina vanhu va wena, hina ntlhambi wa wena, hi ta ku khensa hi masiku; naswona hi ta ku dzunisa hi masiku ni masiku.” Phela loko u tama u tiyisa wunghanu la wena ni Xikwembu, u ta tikhorisa hi minkateko leyi xi nga ta ku chululela yona hi masiku ni masiku naswona u ta titwa ku fana ni mupisalema lweyi a nga te: “Xikwembu i ribye la mbilu ya mina ni tshomba la mina hi masiku ni masiku.” — Ps. 73:26.
LISIMU 32 Nyima na Yehovha!
a Lava va titwaka na va karhatekile, va vilela va tlhela va hela ntamu hi nkama wa ku leha, swi nga lava va kombela ku pfuniwa hi dotori. Leswaku u djondza swin’wani hi mhaka leyi, vona Murindzi wa N.o 1 wa 2023 (hi Xitsonga).