Tekelela Xikombiso Xa Tintsumi

1-2. a) Hi swini swilo leswi hi hambanaka hi swona ni tintsumi? b) Hi swini swilo leswi hi fanaka hi swona ni tintsumi?

HINA hi tirhelaka Yehovha, hi lumba ndjangu wa yena lowu nga ni lirhandzu. Ndjangu lowu wu patsa vamakwerhu lava mu tirhelaka amisaveni hinkwayu ni tintsumi. (Dan. 7:9, 10) Kambe minkama ya yinyingi loko hi pimisa hi tintsumi hi nga ha pimisa ntsena hi leswi hina hi hambanaka na tona hi swona. Hi xikombiso, Yehovha a rhange a yendla tintsumi na a nga se yendla vanhu. (Yob. 38:4, 7) Funtshi a tintsumi ti ni matimba swinene ku tlula hina vanhu naswona tona ti lulamile ti tlhela ti kwetsima ku hi tlula hikusa hina hi ni xidjoho. — Luk. 9:26.

² Hambileswi hi nga hambana ni tintsumi, ku ni swilo swa swinyingi leswi hi fanaka hi swona na tona. Hi xikombiso, hina ni tintsumi ha swi kota ku tekelela wumunhu la Yehovha, funtshi hi ni chunseko wa ku tilangela leswi hi lavaka ku swi yendla. Ku fana na hina, tintsumi na tona ti ni mavito funtshi yin’wani ni yin’wani yi ni wumunhu la yona naswona ti ni mintirho leyi ti nga nyikiwa hi Yehovha. Naswona hina na tona hi fanele hi gandzela Yehovha Muvumbi wa swilo hinkwaswu. — 1 Pe. 1:12.

3. Hi nga djondza yini ka tintsumi?

³ Leswi hina ni tintsumi hi fanaka ka swilo swin’wani, xikombiso xa tona xi nga hi tiyisa naswona hi nga djondza swilo swa swinyingi swaswinene ka tona. Se ka nhlokomhaka leyi hi ta djondza swaku hi nga ti tekelelisa ku yini tintsumi ka mhaka ya ku tiveka hansi, ku rhandza vanhu van’wani, ku tiyisela ni ku yendla swaku a bandla li tshama na li basile.

TINTSUMI TA TIVEKA HANSI

4. a) Tintsumi ti swi kombisisa ku yini swaku ta tiveka hansi? b) Hi mhaka muni tintsumi ti tiveka hansi? (Tipisalema 89:7)

⁴ A tintsumi ta ku tshembeka ta tiveka hansi. Ku nga na mhaka swaku ti ni xiperiyensiya, matimba ni wutlharhi minkama hinkwayu ti yingisa leswi ti byeliwaka swona hi Yehovha. (Ps. 103:20) Funtshi nkama lowu ti hetisisaka mintirho ya tona, a ti titlakusi kumbe ku tibyela hileswi ti nga ni matimba. Ku hambana ni leswo tona ti swi yendla hi lirhandzu hinkwaswu leswi Yehovha a ti kombelaka swona, hambileswi van’wani va kalaka va nga ma tivi mavito ya tona.a (Gen. 32:24, 29; 2 Tih. 19:35) Phela tona a ti pfumeli ku dzunisiwa loku ku lumbaka Yehovha. Hi mhaka muni tintsumi ti tiveka hansi? Hi mhaka leswi ti mu rhandzaka hintamu Yehovha ti tlhela ti mu hlonipha. — Lerha Tipisalema 89:7.

5. Ntsumi yin’wani yi swi kombisise ku yini swaku ya tiveka hansi loko yi laya mupostolo Yohani? (Vona mufoto.)

⁵ A hi voneni xikombiso xin’wani lexi kombisaka swaku tintsumi ta tiveka hansi swinene. Kolomuyani ka lembe la 96 E.C., ntsumi yin’wani yi kombe mupostolo Yohani xivono xa ku hlamalisa. (Nhl. 1:1) Nkama Yohani a nga vona xivono lexiyani, a khizamile a zama ku yi gandzela. Se ntsumi yi mu byelile yi ku: “U nga yendli leswo! Mina no va xikarawa ku fana na wena ni vamakwenu . . . gandzela Xikwembu!” (Nhl. 19:10) Marito lawa ma kombisa swaku ntsumi liyani a yi tiveka hansi hintamu, hikusa a yi lavanga ku dzunisiwa kumbe ku gandzeliwa hi Yohani; kambe yi mu byele swaku a fanele a gandzela Yehovha. Naswona ntsumi liyani a yi nga tivoni na yi li ya lisima ku tlula Yohani, kambe yi mu byele yi ku: ‘Mina ni xikarawa ku fana na wena’. Hambileswi a swi lava ntsumi liyani yi laya Yohani, yi yendle leswo hi ndlela ya ku rhula ni ya lirhandzu. Swi nga ha yendleka ntsumi liyani a yi swi twisisa leswi Yohani a a titwisa xiswona loko se a vone xivono lexiyani xa ku hlamalisa.

6. Hi nga ku tekelelisa ku yini ku tiveka hansi ka tintsumi?

⁶ Hi nga ti tekelelisa ku yini tintsumi hi ku tiveka hansi? Na hina, ku fana ni tintsumi a hi lavi ku tibyela kumbe ku lwela swaku vanhu van’wani va hi khensa hi mhaka ya mintirho leyi hi nga na yona ka nhlengeletanu ya Yehovha. (1 Ko. 4:7) Naswona a hi lavi swaku vanhu van’wani va titwa na va nga li va nchumu loko va tifananisa na hina hileswi i nga khale na hi tirhela Yehovha kumbe hi mhaka ya leswi hi nga ni mintirho ya ku hlawuleka ka nhlengeletanu ya Yehovha. Funtshi nkama hi yaka hi tirhela Yehovha hi fanele hi ya hi tiveka hansi swinene ku fana ni tintsumi. — Luk. 9:48.

7. Hi nga swi kombisisa ku yini swaku ha tiveka hansi loko hi laya munhu?

⁷ Hi nga tlhela hi kombisa swaku ha tiveka hansi loko hi lava ku pfuna munhu kumbe ku mu laya, ku nga ha va makwerhu bandleni kumbe vana va hina. Minkama yin’wani swi ta lava hi tiyisa voko loko hi va laya, kambe hi fanele hi yendla leswo hi ndlela ya ku rhula ni ya lirhandzu ku fana ni ntsumi liyani yi nga laya Yohani. Loko swi lava hi laya munhu a hi fanelanga hi swi yendla hi ndlela leyi nga ta mu heta ntamu kumbe a titwa na a nga pfuni nchumu. Loko hi nga tivoni na hi li va lisima ku tlula van’wani hi ta swi kota ku va pfuna hi ku tirhisa minawu leyi nga ka Bibele hi ndlela ya xihlonipho ni ya lirhandzu. — Kol. 4:6.

TINTSUMI TA VA RHANDZA VANHU

8. a) Hi ku ya hi Luka 15:10, tintsumi ti swi kombisisa ku yini swaku ta va rhandza vanhu? b) Tintsumi ti hi pfunisa ku yini ka ntirho wa ku chumayela? (Vona mufoto.)

⁸ Tintsumi ti ni mhaka ni vanhu. Phela tona ta va rhandza vanhu. Loko munhu lweyi a nga djohela Yehovha a tisola, kumbe lweyi a nga susiwa bandleni a tlhelela ka Yehovha tintsumi ti tsaka swinene. Naswona ta tsaka swinene loko munhu lweyi a djondzaka Bibele a txintxa wutomi la yena a gama a sungula ku tirhela Yehovha. (Lerha Luka 15:10.) Tintsumi ti tlhela ti pfunisa ka ntirho wa ku chumayela. (Nhl. 14:6) Yehovha a tirhisa tintsumi swaku ti pfuna vachumayeli kuva va kuma vanhu lava va tsakelaka ku djondza Bibele. Hi mhaka ya leswi Yehovha a tirhisaka swilo swa ku tala leswaku swi hi pfuna ku chumayela, swa ku fana ni moya wa ku kwetsima ni swin’wani a hi nge vuli hi ku kongoma swaku ka mhaka leyi kumbe liyani Yehovha a tirhise tintsumi. (Min. 16:6, 7) Kambe hi nga tiyiseka swaku Yehovha wa ti tirhisa tintsumi ta yena leswaku ti hi pfuna ku chumayela vanhu. — Vona kwadru leli nge “Yehovha A Swi Hlamulile Swikhongelo Swa Vona.”b

9. Hi nga ti tekelelisa ku yini tintsumi hi ku komba van’wani swaku ha va rhandza?

⁹ Hi nga ti tekelelisa ku yini tintsumi hi ku rhandza vanhu van’wani? Loko hi twa swaku makwerhu ximanyani a tlhelelile bandleni, ku fana ni tintsumi hi fanele hi tsaka na yena, hi tlhela hi yendla hinkwaswu leswi hi nga swi kotaka swaku hi mu komba swaku ha mu rhandza. (Luk. 15:4-7; 2 Ko. 2:6-8) Hi nga tlhela hi ti tekelela tintsumi hi ku hiseka ka ntirho wa ku chumayela. (Ekl. 11:6) Phela tintsumi ta hi pfuna ka ntirho wa ku chumayela, se na hina hi fanele hi lavetela tindlela ta ku pfuna vamakwerhu van’wani swaku va wu yendla kahle ntirho lowu. Hi xikombiso, hi nga ha kombinara ni vamakwerhu swaku hi huma na vona nsimu, ngopfungopfu vachumayeli lava va kalaka va nga na xiperiyensiya. Xin’wani hi nga xi yendlaka i ku va hi pfuna vamakwerhu lava nga guga ni lava vabyaka swaku na vona va swi kota ku wu yendla ntirho lowu wa ku chumayela.

10. Hi nga djondza yini ka xikombiso xa Sara?

¹⁰ Hi nga yendla yini loko hi nga swi koti ku fikelela leswi hi lavaka ku swi yendla ka ntirho wa Yehovha hi mhaka ya swiyimu swa hina? Hi fanele hi lavetela tindlela tin’wani swaku hi tirha ni tintsumi ka ntirho wa ku chumayela. Hi ni xikombiso xa makwerhu mun’wani wa le Índia, lweyi a vitaniwaka Sara.c Nkama na a ni kolomuyani ka 20 wa malembe na a li mupfuli wa ndlela, a sungule ku vabya, naswona minkama hinkwayu a a tshama na a yetlelile mubedwini naswona a a nga humahumi. Phela leswo swi mu karhatile hintamu Sara lakakuva a nga xi tivi xa ku xi yendla a tlhela a titwa na a nga pfuni nchumu. Kambe hi ku pfuniwa hi vamakwerhu ni ku tlhela a va ni djondzo ya Bibele ya munhu a li yexe, swi mu pfunile swaku a tlhela a va ni mavonelo yamanene. I ntiyiso swaku swi lave a titwananisa ni leswi xiyimu xa yena a xi lava swona. Leswi a a nga swi koti ku tshama swaku a tsala makarta, yena a a tirhisa telefoni swaku a chumayela. Se a ligarele marevhizita ya yena, ma gama ma mu nyika tinumeru ta vanhu lava a va tsakela ku djondza Bibele. A game a kuma 70 wa swidjondzo leswi a swi tsakela ku djondza Bibele funtshi swin’wani swa swona a swi nyikelile ka vamakwerhu abandleni hileswi a a nga swi koti ku swi fambisa hinkwaswu, naswona vanyingi va vona va tama va ya mintlhanganwini. Phela a hi kanakani swaku tintsumi ti tsaka hintamu hi ku tirha ni vamakwerhu va ku hambanahambana lava chumayelaka hi matimba va ku fana na Sara!

TINTSUMI TA TIYISELA

11. I ka swiyimu swini lani tintsumi ti nga kombisa ku tiyisela?

¹¹ Tintsumi i swikombiso swaswinene swa ku tiyisela. Tona ti tiyisele swilo swa swinyingi swa ku biha ku ringana malembe ya manyingi. Ti vone Sathana ni tintsumi tin’wani ti djikela Yehovha. (Gen. 3:1; 6:1, 2; Yud. 6) Daniyele 10:13 yi vula swaku ku ni ntsumi yin’wani ya ku tshembeka leyi nga lwisana ni dimoni leli na lona a li ni matimba. Naswona tintsumi ti vone vanhu va vanyingi na va langa ku djikela Yehovha va yendla swilo swa ku biha. Hambileswo tintsumi leto, ti tama ti mu tirhela Yehovha hi mbilu hinkwayu naswona na ti tsakile. Tona ti nyimela Yehovha swaku hi nkama wa kona a ta lulamisa swilo hinkwaswu.

12. I yini xi nga ta hi pfuna ku tiyisela?

¹² Hi nga ti tekelelisa ku yini tintsumi hi ku va hi tiyisela? Na hina namuntlha, hi vona swilo swa swinyingi swa ku kala swi nga li swinene na swi yendleka lani misaveni. Naswona minkama yin’wani hi nga hluphiwa hileswi hi tirhelaka Yehovha. Kambe ku fana ni tintsumi, ha tiyiseka swaku hi nkama wa kona Yehovha a ta swi helisa swilo hinkwaswu swa ku biha leswi yendlekaka. Ku fana ni tintsumi, a hi nge tshiki ku “yendla swaswinene.” (Gal. 6:9) Se hi nga khongela hi kombela Yehovha swaku a hi nyika moya wa yena wa ku kwetsima swaku wu hi pfuna ku tiyisela. Loko hi yendla leswo, Yehovha a nga ta hi khomisa ribye. (1 Ko. 10:13) A ta hi pfuna swaku hi tiyisela, a tlhela a hi pfuna swaku lehisa mbilu hi tlhela hi mu tirhela na hi tsakile. (Gal. 5:22; Kol. 1:11) Se loko u hluphiwa hileswi u tirhelaka Yehovha, u nga chavi, mu tshembi hi ku helela Yehovha. Yena a ta ku tiyisa. — Heb. 13:6.

TINTSUMI TA PFUNISA SWAKU BANDLA LI TSHAMA NA LI BASILE

13. Hi wini ntirho wa ku hlawuleka lowu tintsumi ti wu yendlaka ka masiku ya wugamu? (Matewu 13:47-49)

¹³ Yehovha a nyike tintsumi ntirho wa ku hlawuleka hintamu ka masiku lawa ya wugamu. (Lerha Matewu 13:47-49.) Ntirho wa ku chumayela wu yendla swaku vanhu va ku tala va ta ka nhlengeletanu ya Yehovha. Naswona van’wani ka vona va txintxa wutomi la vona va sungula ku tirhela Yehovha, kasi van’wani a va lavi ku twa nchumu. Se tintsumi ti nyikiwe ntirho wa ku “hambanisa va ku biha ka va ku lulama.” Leswo a swi lavi ku vula swona swaku vanhu lava nga yendla swilo swa ku biha a va nge tisoli va tlhelela ka nhlengeletanu ya Yehovha. Naswona leswo a swi lavi ku vula swona swaku a ku nga ta va ni timhaka tatikulu bandleni leti lavaka ku lulamisiwa. Kambe hi nga tiyiseka hi ku helela swaku tintsumi ti yendla ntirho wa lisima swaku mabandla ma tshama na ma basile.

14-15. Hi nga yendla yini swaku hi pfunisa swaku bandla li tshama na li basile? (Vona mafoto.)

¹⁴ Tekelela tintsumi hi ku yendla swaku bandla li tshama na li basile. Hinkwerhu hi nga yendla xan’wanchumu swaku bandla li tshama na li basile. Leswaku leswo swi koteka hi fanele hi vhikela mbilu ya hina. Ndlela yin’wani ya ku yendla leswo, i ku va hi tlanga ni vanhu lava va mu rhandzaka Yehovha hi tlhela hi fambela kule ni swilo leswi nga hi yendlaka hi nga ha mu rhandzi Yehovha. (Ps. 101:3) Xin’wani hi nga xi yendlaka swaku bandla li tshama na li basile, i ku va hi pfuna vamakwerhu swaku va tama va tshembeka ka Yehovha. Hi xikombiso, loko u tiva swaku makwerhu a yendle xidjoho xaxikulu, leswi u mu rhandzaka u fanele u mu byela swaku a ya byela madoda leswi a nga swi yendla. Kambe loko yena a nga pfumeli, u fanele u famba u ya ma byela. Phela hi lava swaku vanhu hinkwavu lava nga wela ka xidjoho va pfuniwa hi xihantla! — Yak. 5:14, 15.

¹⁵ Lexi vavaka hileswaku van’wani va yendla swidjoho swaswikulu va tlhela va nga tisoli, va gama va susiwa abandleni. Loko leswo swi yendleka hi “tshika ku titlhanganisa” na vona.d (1 Ko. 5:9-13) Leswo swi yendla swaku bandla li tshama na li basile. Naswona swi pfuna munhu lweyi a nga djoha ku vona swaku leswi a nga swi yendla swi bihile a gama a tisola a tlhelela abandleni. Loko a tlhelela bandleni, hina na Yehovha ni tintsumi ha tsaka swinene. — Luk. 15:7.

16. Hi nga ti tekelelisa ku yini tintsumi?

¹⁶ Hina hi ni nkateko wawukulu wa ku ti tiva ku yampsa tintsumi hi tlhela hi tirha xikan’we na tona! Phela hi swi lava hintamu ku tekelela tintsumi hi ku va hi tiveka hansi, hi rhandza vanhu van’wani, hi tiyisela hi tlhela hi pfunisa swaku bandla li tshama na li basile. Loko hi yendla leswo hi ta lumba ndjangu wa Yehovha lowu mu tirhelaka naswona wu nga ta tama wu mu tirhela hi masiku ni masiku.