Segundu Karakata para Timoteu
2 Ísï jimbo iju, indeni jimbo engajtsïni Kristu Jesúsi xáni kóndentajka, tʼu seguirii uinhapikuarhintani. 2 Ka inde ambe engakeni ji arhika, ka engaksï uánikuecha uandajka eska ísïiska, imani achamasïichani jorhendaa engaksï mintsinharhikueka paraksï ima mítekuni nénaksïsï jatsi para jorhendaani máteruechani. 3 Ka jimbokari tʼu ambakiti sondadueska Kristu Jesúsiiri, tekaanta ambe engari xáni no sési nitamakuarhiaka. 4 Enga sondadu ma uéjka sési pʼikuastani imani enga ióarhika para sondadueni, méntku no jámasïndi negosiuecharhisï inchamukuni.* 5 Ka chʼanakua ma jimbo, imantkuksïsï íntskujti koronani enga ísï chʼanajka eska na jindeeka. 6 Tarherisï jatsiti para ueenani arhani ambe enga pʼikuntaka jimboka imasï uinhamu ánchikuarhika. 7 Asï méni mirikurhi ambe engakeni arhini jaka; Tata kánikuakeni jarhuataati parari iámu ambe kurhanguni.*
8 Miá eska tata Jesukristu tsítanhantaska* ka eska Dabidi uájpeeska, ísï eska na uandajka ambakiti aianhperakua engani ji jámani jaka aianhpini, 9 indeni jimbosïni xáni no sési nitamakuarhini jaka ka ónhakata jarhaska enajkini ji xáni no sési ambe niáta. Joperu Tata Diosïiri uandakuani kʼóru no nema úsïndi pʼínguni. 10 Jimbosïni iámindu ambe tekaantani jaka erakukateechani jimbo, parakaksï indeechajtu uaaka pʼímutanhantani ka parakaksï intsïnhauaka indeni kóntperateechani engaksï jindeuaka para méntkisï Kristu Jesúsini jimbo. 11 I ambe meru ísïisti: engachi imani jingoni uarhiaka, ístuchi imani jingoni irekaaka; 12 engachi seguiriini jauaka tekaantani, ístuchi imani jingoni juramuaka; engachi jucha uandaaka eskachi no míteska imani, imajtu uandaati eskajtsïni no míteska juchantsïni; 13 ka nájkirukachi jucha no uaaka ambe enga ima uandajka, ima kʼóru ísï uaati eska na uandarini jakaia, jimboka ima no jámasïnga ma ambe uandani ka tátsekua máteru ambe úni.
14 Méntku miátaantani ja ini ambe ka Tata Diosïni japarini arhistakua* eskaksï no jámaaka uarhipeni uandakuecha jimbo, inde ambe ískuesti jimboka no sési úkuasïnga* imeechani engaksï kurhajchaani jarhajka. 15 Kánikua jánguarhinta para xarhatani eskakeni Tata Diosï jaiapanhentasïnga, eskari ánchikuarhiri máeska enga no ma ambe jimbo kʼuratsetanhajka ka enga sési úrajka Tata Diosïiri uandakuani.* 16 Ísku kurhandi indeni ambe enga no terukuntajka Tata Diosïiri ambe jingoni, jimboka ísï jimboksïsï kʼuiripuecha sánderu no janhanharhijti Tata Diosïni 17 ka ambe engaksï imeecha uandaaka ísï etsakurhiati komueska xúta* enga kániipani jarhajka. Ka Imeneu ka Filetu ísïksï úxati. 18 Íksï acheetiicha jurajkusti jurhimbikuani jimbokaksï uandasïnga eskaksï uarhiriicha tsíntaskia ka úxatiksï eskaksï máru nóteru mintsikaakia Tata Diosïni. 19 Ka nájkiruka ísï úkuarhini jaka, Tata Diosï sési uaxastakata jatsisti imeeri ambakiti pítsekuani, ka jimini ari ambe karakata jarhasti: “Tata Diosï Jeoba sési míteasti imeechani engaksï imeeriika”, ka “Iámindu imeecha engaksï kómarhiaka Tata Diosï Jeobani ka uandanksï imeeri nombrini nóteruksï jatsistia para no sési ambe niátani”.
20 Ka kʼéri kʼumanchikua ma jimbo jarhasïndiksï máru jatakuecha engaksï oru ka plata jingoni úkata jaka, joperu ístuksï jarhasïndi máteruecha engaksï chkari ka kʼuerekua* jingoni úkata jaka. Máruksï jindeesti paraksï kʼuínchikuecharhu úranhani ka máteruechaksï para ísku úranhani. 21 Ima jatakua enga jarhariauaka indeni jatakuechani engaksï ísku úranhajka, jindeuati para kʼuínchikuecharhu úranhani ka inde jatakua pímbinhasï jauati, kánikua marhuakuati kʼumanchikuarhu anapu achamasïni ka uaati úranhani para ambakiti ambe úni. 22 Ísï jimbo, sïpakuarhiku indeni ambe engaksï xáni tsitijka tumbiicha ka jánguarhinta sési jámani, mintsikani Tata Diosïni, xénchpeni ka pínandikua jatsini, jánguarhinta ini ambe úni imeecha jingoni engaksï pímbinhasï mintsita ma jingoni kómarhijka Tatani.
23 Ístu, asï jáma kurhajchaani indeni kʼuiripuechani engaksï ísku ambe ma jimbo arhirperani jarhajka, jimbokari tʼu míteskia eskaksï kʼuiripuecha ísï jimbosï uarhiperajka. 24 Ima enga Tatani jántspikujka, no jatsisti para uarhipeni jámani, sánderu sési jatsisti para iáminduechani sési kaani, sési mítekuni nénasï jatsi para jorhentpini ka jatsisti para pʼíngukuarhini engaksï no sési kámaaka 25 ka jatsisti para iatsitakuarhu jorhendaani indeechani engaksï no kurhandirajka, jamberi Tata Diosï jarhuatauati parakaksï móantaaka* ka ísïksï niárani sési míteni jurhimbikua ambe, 26 paraksï ima úni ménderu sési eratsentani ka para Noambakiti jurajkuani, jimboka sïndari ma jingoni jupiaska parakaksï uaaka ambe enga ima uéjka.