1 Kompromisu

¿AMBE ARHIKUEKASÏNI?

Temungurhiriicha engaksï ísï exejka temungurhirikuani komu kompromisu ma, nóksï uékasïndi jurajperani ka i ambe úsïndi eskaksï seguru pʼikuarheraaka. Tsimarhanksï seguru jarhasïndi eskaksï no méni jurajperaaka ambe uéjki úkuarhini.

Máru temungurhiriichaksï no jurajperasïndi jimbokaksï imeecheri familia ka amiguechaksï no jurajkuasïnga paraksï ísï úni. Joperu sánderu sésiisti eskaksï no jurajperaaka jimbokaksï uékperasïnga ka janhanharperani.

BIBLIERI KARAKATA: “Acheeti asï chútantee imeeri uarhiitini” (1 Korintu 7:11).

“Engari miántajka eskari kompromisu ma jatsiska, nóri sóntku no sési exesïnga ambe ma. Ístu, sánderu fásiliisïndi puátspentani ka kurhajkuarhini eskaksïni puáchentaaka ka no ísï exeani problemechani komu ambe ma engajtsï jimbo úpiringa diborsiarikuarhini” (Micah).

¿ANDISÏ JUKAPARHAKUE?

Engaksï temungurhiriicha no kompromisu jingoni pʼikuarheraaka, jiáni enga problema ambe jauaka, úpirindiksï eratseni eskaksï no terukusïnga ka jurajperanksï uékani.

“Uánikua kʼuiripuechaksï tembuperasïndi eratseparini eska engaksï no uaaka sési pájperani uaakaksï diborsiarikuarhini. Engajtsï ísï eratseparini uambuchaska o tembuchani, jiájkantsï no ma kompromisu jingoni tembuperaska” (Jean).

¿AMBEJTSÏ UAA ÚNI?

EXE JE NA ENGAJTSÏ JÁSÏIKA

¿Ambejtsï úsïni engajtsï chaari acheeti o uarhiiti jingoni arhirperajka?

• ¿Pʼamondakuarhisïntsï engajtsï uámbuchaka o tembuchani?

• ¿Eratsesïntsï nénajtsï irekapirini máteru nema jingoni?

• ¿Uandasïntsï arini ambe: “jurajkuakakini” o “máteru nemani jirinhakuarhintaakia engareni jukaparharaaka”?

Engajtsï uandaska eska jo ma ísï i kurhamarhikuecheeri, jánguarhintsï je sánderu kompromisu jingoni pʼikuarherani.

IIRI AMBE UANDONTSKUARHI JE TEMUNGURHIRI

• ¿Andichisï nóteru ísï exejkia juchaari temungurhirikuani eska kompromisu ma?

• ¿Ambechi uaa úni parachi sánderu kompromisu jingoni exeni juchaari temungurhirikuani?

KONSEJUECHA

• Karaku je ménichanisï chaari acheetini o uarhiitini parajtsï arhini na engajtsï xáni uékajka.

• Jatsia je chaari acheetiiri o uarhiitiiri fotuechani jima engajtsï ánchikuarhijka.

• Pauani pauani uandajpa je chaari uarhiitini o acheetini engajtsï ánchikuarhitarhu jauaka o engajtsï no márku jauaka.

BIBLIERI KARAKATA: “Imeechani enga Diosï kúndaaka, asï nema jáme jarhangutaantani” (Mateu 19:6).