Maiu

Primeru siglurhu kʼéri kʼarhingua ma jarhaspti “iápuru parhakpinirhu”. Seguru eskaksï imeecha engaksï taatiipka uandanhiani japka nénaksï úpirini kéndani imeecheri familiani. Ka tumbiicha ka uátsïicha engaksï eratseni japka sánderu aianhpini, jamberiksï kurhamarhikuarhiendi sinksï jatsipirini para erokuarhini asta enga na kʼarhingua nitamapiringia. Ambe uéjkiksï nitamakuarhini jarhani, kristianuechaksï seguiriispti jánguarhintani xáni eskaksï xáni úpka para aianhpini ka tsípikua jingonksï intsïmbiaspti ambe engaksï jatsikuarhepka Judea anapu kristianuechani (Úku. 11:29, 30). Imeecha engaksï intsïnhapka ambe engaksï uétarhinchani japka exesptiksï eska Tata Diosï Jeoba kuidariuaxapka (Mat. 6:31-33). Ka seguru eskaksï sánderu sési pájperasïreengia imani erachiicha jingoni engaksï jarhuataapka. Ístu, imeecha engaksï sentabu ambe jingoni jarhuajpepka o engaksï máteru ambe úpka para jarhuataani erachiichani kánikuaksï sési pʼikuarheraspti (Úku. 20:35). w23.04 16 párr. 12, 13

Ménichani, Tata Diosï Jeobajtsïni mókuchiantasïndi kómarhikuechani imani kʼuiripuechani úrapariani engaksï no marhuakujka. Pori ejemplu, úspti eska rei Artajerjesi jurajkupiringa Neemíasini para Jerusaléni kʼuanhatsentani para jarhuajpeni iretani úntani (Neh. 2:3-6). Ka iásïjtu Tata Diosï Jeoba uaati eska asta ima kʼuiripuecha engaksï no marhuakujka imani, jarhuataakajtsïni jiáni engachi uétarhinchani jauaka. Sáno méntkisï, Tata Diosï Jeoba no kʼéri ambe úsïndi parajtsïni mókuchiantani kómarhikuechani. Perujtsïni imani ambe íntskusïndi engachi uétarhinchajka parachi no jurajkuni. Ísï jimbo, jatsiskachi para méntkisï jingontku jarhani parachi exeni na engajtsïni mókuchintajka juchaari Taati auandarhu anapu. Ka ménichanisï arhuta tiempu para eratsentani na enga Tata Diosï Jeoba mókuantani jaka chaari kómarhikuechani (Sal. 66:19, 20). Jatsiskachi para mintsikani Tata Diosïni engachi kómarhiaka, ka ístu jiókuarhini ambe uéjki engajtsïni mókuchintaaka (Ebr. 11:6). w23.05 12 párr. 12, 15; 13 párr. 16

Jiáni engachi aiakukuarhepka, arhispkachi Tata Diosï Jeobani eskachi imantku kómarhipiringa ka eskachi úpiringa ambe enga ima uékajka ka jatsiskachi para ísï úni eskachi na uandaka. Ambe engachi aiakuka Tata Diosïni no kʼuetsapiti ambeesti o enga úkua jukaka para úni, ¿andi? Jimboka Tata Diosï Jeobajtsïni kueraaska parachi úni ambe enga ima uékajka (Apok. 4:11). Ústi eskachi jucha mintsita jingoni uékaaka míteni ka kómarhini. Ka ístujtsïni ísï kueraasti eska ima na jásïika, jimbochisï újka andarhierani imani ka tsitini imani ambe úni enga ima uéjka. Joperu ístu engachi újka ambe enga Tata Diosï Jeoba uékajka ka májkueni úni eska imeeri Uájpa, kánikuachi sési pʼikuarherasïnga (Mat. 11:28-30). Sánderu xéncha je Tata Diosï Jeobani, eratsenta je iámindu ambe enga ima úkia chánksïni jimbo ka na engaksïni újchakuraaka sánderu orhepatini. Ka engajtsï sánderu xénchaaka, sánderu fásiliuati parajtsï kurhajchani. Exeakajtsï eska no kʼuetsapiti ambeeska ambe engajtsïni ima juramuchijka (1 Juanu 5:3). Jesúsi úspti úni ambe enga Tata Diosï uékeenga jimboka kómarhisïreenga para kurhakuni eska jarhuatapiringa ka ístu méntkisï miáni jarhasïreendi ambe enga andapiringa (Ebr. 5:7; 12:2). Májkueni eska Jesúsi, kurhaku je Tata Diosï Jeobani uinhapikua, ka asï méni mirikurhi je eskajtsï uaaka irekani para méntkisï. w23.08 27, 28 párr. 4, 5

Iáminduechachi tsitisïnga imani kʼuiripuecha jingoni jarhani engaksï tekaantstiika. ¿Andi? Jimbokachi respetariuasïnga imeechani engaksï tekaantskua jingoni erokuarhijka ka no sóntkuksï ikiani. Ístuchi jukaparharaasïnga imeechani engajtsïni tekaantskua jingoni kámajka jiáni engachi no újka sési úni ambe ma. Ka ístuchi kánikua agradesidu jarhaska ima erachi jingoni engajtsïni Biblieri ambe jorhendaka, jimbokajtsïni tekaantskua jingoni kámaska jiáni engachi úkua jukancheenga kurhanguni ambe ma, o ísï úni eskachi na jorhenguarhini japka. ¡Ka sánderuchi agradesidu jarhaska Tata Diosï Jeoba jingoni jimbokajtsïni tekaantskua jingoni kámasïnga! Iáminduechachi jukaparharaasïnga imeechani engaksï tekaantstiika, joperu jamberichi jucha úkua jukanchajka tekaantstiini. Pori ejemplu, jiáni engachi karretera jimbo nirani jarhajka ka jukari tráfiku jarhani, jamberichi sóntku ikiajka ka sánderia engachi sóntku uékani jarhajka niárani nani. Jamberichi ístu sóntku ikiajka enga nema uandajka o újka ambe ma engachi no tsitijka. Ístuchi úpiringa eratseni eska jimbanhi parhakpini engajtsïni Tata Diosï Jeoba aiachijka ióndaxaka niárani. Joperu, ambe uéjki úkuarhini, jatsiskachi para sánderu tekaantstiini. w23.08 20 párr. 1, 2

Jingontku kurhaa je ambe engajtsï arhinhaaka para úni ka ísï ú je. Tata Diosï Jeoba arhispti Gedeónini eska namunitu sondaduecha jingoni pakarapiringa. Jamberi ima eratsepti: “¿Meru uétarhijki ini ambe úni? ¿Sési uéra iámindu ambe?”. Nájkiruka indeni ambe kurhamarhikuarhipka, Gedeóni kurhajchaspti Tata Diosïni. ¿Nénaksï uaa orhejtsïkutiicha májkueni úni? Engaksï kurhandiraska enga Tata Diosï Jeobaeri kúnguarhikua uandaaka eskaksï iásï ménderueni uaakia ambe ma (Ebr. 13:17). Gedeóni kurhajchaspti Tata Diosï Jeobani nájkiruka cheenga ka nájkiruka úpiringa no sési ambe úkuarhinchani (Juec. 9:17). Enga Tata Diosï Jeoba na arhipkia eska jarhuatapiringa, Gedeóni seguru jarhaspti eska Tata Diosï jarhuatapiringa kuájchakuni imeeri iretani. Ima orhejtsïkutiicha engaksï imani lugaricha jimbo irekajka nani engaksï no jurajkunhajka úni juchaari ánchikuarhita, ísïistiksï eska Gedeóni. Balori jingonksï organisariuasïndi tánguarhikuechani, orhejtsïkusïndiksï aianhpikuani nájkirukaksï úpiringa ónhanhani, oksï kurhamarhiani kúnguarhikueri ambe, chútanhantanksï ánchikuarhitarhu oksï no sési kánhani. Kʼéri mískuarhitarhu, orhejtsïkutiichaksï jatsiati para kánikua balori jukani paraksï úni ambe engaksï arhinhajka, nájkirukaksï úpiringa no sési ambe úkuarhinchani. w23.06 5, 6 párr. 12, 13

Tata Diosï Jeoba ústi eska karakata pakarapiringa imeeri Karakatarhu ambe enga xáni úpka i kʼéri saserdoti parakachi jucha májkueni úpiringa (Rom. 15:4). Ka enga Jeoiadá uarhipkia, kʼéri kóntperata ma intsïnhaspti: “jatsinhantaspti Dabidiiri ireta jimbo, reiicha jingoni, jimboka ambakiti ambe úspka Israeli para Tata Diosï jurhimbiti ka ístu para imeeri kʼumanchikuarhu” (2 Crón. 24:15, 16). Ambe enga Biblia uandajka Jeoiadáeri ambe, jarhuatasïndijtsïni parachi sánderu chénharhini Tata Diosïni. Orhejtsïkutiichaksï uaati májkueni úni eska ima engaksï jánguarhintaska kuájchakuni Tata Diosïiri kúnguarhikuani (Úku. 20:28). Erachiicha engaksï jatiriikia uaatiksï jorhenguarhini eska Tata Diosï Jeoba úrauaka para úni ambe enga ima uékajka. Ka imeecha engaksï sapichku jaka, uaatiksï exeni na enga kámapka Tata Diosï Jeoba Jeoiadáni ka uaatiksï májkueni kaani erachiichani engaksï jatiriikia, jukaparharaani ka janhanharhikua jingoni kaani ka sánderia imeechani engaksï ióni páni jakaia sési marhuakuni Tata Diosïni (Prov. 16:31). Jatsiskachi para mintsita jingoni jarhuataani ka kurhajchaani imeechani engajtsïni orhejtsïkujka (Ebr. 13:17). w23.06 17 párr. 14, 15

Tánguarhikuecharhu jatsiskachi para exeni namuni xanharichi tarhataa jájki para komentariu ma intsïnhani. Engachi jucha someni tarhatani jauaka jájki, jamberi ima erachi enga jorhenguarhikuani nitamatarani jauaka, ísï pʼikuarheraati enajkijtsïni jatsi para uánikua komentariuechani íntskuani nájkirukaksï máteruecha nótki komentariini jauaka. Ístu, engachi ísï úska, máteruechaksï nóteru uékapirindia komentariini (Ecl. 3:7). Engaksï uánikua erachiicha tarhatajka jájki paraksï komentariini, jamberichi jucha no uaaka xáni komentariini eskachi na uékapiringa, ka jamberi niárapirindi kʼamakurhini tánguarhikua ka juchachi no ma komentariu íntspini. Ísïisti, inde ambejtsïni no sési pʼikuastapirindi, joperu ju je no jámani ikiani (Ecl. 7:9). Nájkirukachi no uaaka xáni komentariini eskachi na uékapiringa, méntkisïchi uaaka jingontku kurhaani engaksï máteruecha komentariuaka ka enga na kʼamakurhiakia tánguarhikua, felisitariuani. Jamberi ima ambakiti ambe engachi arhiauaka, májkueni uinhaperantauati erachiichani eska ima ambe engachi uékani japka komentariini. w23.04 23, 24 párr. 14-16

Ju je jorhenguarhini Tata Diosïiri Uandakuani ka eratsentani indeeri ambe. Paraka anhatapu ma uiuinhasï jauaka, uétarhisïndi eskaksï sïranguecha iauani inchatseaka. Sáno májkueni, juchajtuchi jatsiska para kánikua mintsikani Tata Diosïiri Uandakuani parachi uiuinhasï jarhani. Enga anhatapu ma na sánhani arhini jarhajka kʼéni, imeeri sïranguechajtuksï kʼésïndi ka iauanksï inchatsesïndi. Engachi jorhenguarhijka ka eratsentani Bibliani, sánderuchi mintsikasïnga Tata Diosïni ka sánderuchi seguru jarhasïnga eska ambe engajtsïni Tata Diosï jorhendajka sánderu ambakiti ambeeska (Kol. 2:6, 7). Ju je eratsentani na enga ióntki marhuakuapka Tata Diosï Jeobaeri marhuariichani úni ambe enga ima arhiapka, kurhajchani imeeri konsejuechani ka na enga kuájchakuapka. Pori ejemplu, enga Esekieli jánhaskakua ma exepka, jingontku exespti na enga ánjeli ma sési tsʼéritani japka templuni. I jánhaskakua, úspti eska Esekieli sánderu mintsikapiringa. Ka jorhendasïndijtsïni na engachi jatsika para kurhajchaani Tata Diosï Jeobaeri juramukuechani parachi ísï kómarhini eska ima na uéjka (Ezeq. 40:1-4; 43:10-12). Juchantsïntu kánikua marhuachesïndi engachi arhutajka tiempu parachi jorhenguarhini ka eratsentani ima ambeeri enga úkua jukaka para kurhanguni Bibliarhu. Uaakachi úni eska juchaari mintsita uiuinhasï jauaka ka eska mintsikaaka Tata Diosï Jeobani (Sal. 112:7). w23.07 18 párr. 15, 16

Bibliarhu, uaakari exeantani ejempluechani acheetiicheeri engaksï kánikua xéncheenga Tata Diosïni ka ístu engaksï mámaru ambe úpka paraksï kuájchakuni Tata Diosïiri iretani. Ka chiiti familiarhu ka kúnguarhikuarhuksï jati erachiicha engaksï kánikua jánhaskatiika ka tʼuri uaaka májkueni úni eska imeecha (Ebr. 13:7). Ka ísturi jatsiska sánderu ambakiti ejemplu ma, jo, Jesúsiiri (1 Ped. 2:21). Engari jorhenguarhini jauaka indeecheeri ambe, eratsenta ambeeri sánderu tsitiski (Ebr. 12:1, 2). Tátsekua eratsenta amberi úpirini májkueni úni. Kʼuiripuechaksï jiántkusï újti sési úni ambe ma engaksï tiempu arhutajka para sési eratsentani. Jiájkani jánguarhinta pʼindeni ísï úni ka asï kuatantsï. Orheta, jatsiskari para jorhenguarhiani Biblieri prinsipiuechani ka eratsentani andisï Tata Diosï Jeoba uandajki eska inde ambe sánderu sésiiska para iáminduecha. Tátsekua, engari uékani jauaka úni ambe ma, úra ambe engari jorhenguarhikia ka ísïri uaaka sési pʼikuastani Tata Diosï Jeobani (Sal. 119:9). Engari jorhenguarhiska sési eratsentani, niárakari kristianu jánhaskati máeni (Prov. 2:11, 12; Ebr. 5:14). w23.12 24, 25 párr. 4, 5

Taatiichaksï uaati jorhendaani sapiichani paraksï iátsitakuarhu mókukuntani nemani enga kurhamarhiauaka ambe engaksï jakajkujka (Sant. 3:13). Máru taatiichaksï jiáni jorhendaasïndi uájpeechani engaksï familieri jorhenguarhikuani jatsijka. Exesïndiksï máru temeechani engaksï úpiringa kurhamarhiani eskuela ka exeraasïndiksï nénaksï uaa mókukuantani máteruechani. Ístuksï jorhendaasïndi nénaksï uaa iátsitakuarhu mókukuantani máteruechani ka parakaksï kurhajchauaka. Familia jingoni jorhenguarhini no solu jarhuataasïndi tumbiichani paraksï imeecha xarhataaka pruebeecha jingoni eska inde ambe engaksï jakajkujka meru ísïiska, sino ístu jarhuataasïndi paraksï imeecha mismu seguru jarhani inde ambeeri. Partirhu “Jóvenes” enga jw.org jimbo jaka, jarhasti seksioni ma enga arhinhajka “Ponlo por escrito”, i úkata jarhasti para jarhuataani tumbiichani sánderu mintsikani Tata Diosïni ka parakaksï uaaka máteruechani aianguani ambe engaksï jakajkujka. Engachi juchaari familia jingoni jorhenguarhiska ini informasionini ka ístu seksionini “Tumbiichaksï kurhanguarhisïndi”, iáminduechachi jorhenguarhiaka iátsitakuarhu kuájpini ambe engachi jakajkuka ka eskajtsïni máteruecha uékaaka kurhajchani. w23.09 17 párr. 10; 18 párr. 15, 16

Jamberijtsï chá eratsekia úni ambe ma perujtsï úkua jukanchani jarhani ísï úni. Pori ejemplu, Philip uékasïreendi sánderu someni kómarhini Tata Diosïni ka mintsita jingoni, peru úkua jukanchasïreendi arhutani tiempu para indeni ambe úni. Erika uékasïreendi sánderu xarhentku niárani tánguarhikuecharhu engaksï jindeeka para uérani aianhpini, peru nájkiruka jánguarhinteenga, sáno méntkisï ióndasïreendi niárani. Engajtsï chá jánguarhintani jaka úni ambe ma, perujtsï no úni jarhani ísï úni, asï chkétakuarhi je. Tiempu uétarhisïndi ka eska ma jánguarhintaaka para úni ambe enga eratsetini jaka, nájkiruka inde ambe no xáni úkua jukaaka. Enga chá seguiriini jaka jánguarhintani, xarhatasïngajtsï eskajtsï kánikua jukaparharasïnga sési pájperani Tata Diosï Jeoba jingoni ka eskajtsï uékasïnga sánderu ambakiti ambe íntskuni. Tata Diosï exesïndi indeni ambe ka nóksïni kurhachesïndi ambe ma engajtsï chá no uaaka úni (Sal. 103:14; Miq. 6:8). Ísï jimbo, engajtsï eratsetini jauaka úni ambe ma, exe je eska ima ambeuaka engajtsï chá meru uaaka úni. Ka engajtsï seguru jakaia eskajtsï uaaka indeni ambe úni. w23.05 26 párr. 1, 2

Ima kʼuiripuecha engaksï balori jukajka ístuksï chésïndi, peruksï no jurajkusïndi eska inde ambe ójkutauaka paraksï imani ambe úni enga sési jaka. Danieli tumbi máespti enga kánikua balori jukapka. Pʼindespti jorhenguarhini ambe engaksï Tata Diosïiri profeteecha karapka, komu pori ejemplu Jeremías. Ini ambe jimbo, tátsekua niáraspti kurhanguni eska nóteru ióni kuerataxapkia parakaksï judiuecha uéakuntapiringa Babilonia (Dan. 9:2). Danieli exespti eska ambe enga Tata Diosï Jeoba uandapka niáraspka ísï úkuarhini, inde ambe úspti eska Danieli sánderu mintsikapiringa Tata Diosïni. Ka enga kʼuiripu ma kánikua mintsikajka Tata Diosïni, kánikua balori jukasïndi (terukutanta je i ambe Roma 8:32, 37-39 jingoni). Ambe enga sánderu jarhuatapka Danielini, jindeespti eska ima kánikua kómarhisïreenga Tata Diosï Jeobani (Dan. 6:10). Aiangusïreendi imeeri pekaduechani ka ístu na enga pʼikuarhereenga ka kurhakusïreendi eska jarhuatapiringa (Dan. 9:4, 5, 19). Ísï eska na uéjki kʼuiripu ma, Danieli no andajpenuspti balori jingoni. Ima estudiarisïreendi, kómarhini ka kánikua mintsikani Tata Diosï Jeobani para úni ini kualidadini jatsini. w23.08 2 párr. 4; 4 párr. 7

Engachi kurhajchaajka juramutiichani, sésijtsïni nichesïndi ka ístu máteru kʼuiripuechani. ¿Andi? Jimbokajtsïni no kastigariuaka ísï eska imeechani engaksï no kurhajchaajka leiichani (Rom. 13:1, 4). Ístu, engachi jucha kurhajchaaska juramutiichani, imeechaksï exeati eskaksï Jeobaeri testiguecha ambakiti kʼuiripueska. Ambe enga úkuarhipka Nigeria xarhatasïndi eska i ambe ísïiska. Tánguarhikuarhu ma, máru sondaduechaksï inchaspti Kʼumanchikua Reinuerirhu. Jirinhantanksï jámaxapti kʼuiripuni ma enga kánikua no sési jámani japka, jimboka no uékasïreenga impuestu maiampini. Joperu ofisiali enga orhejtsïkuani japka sondaduechani, juramukuaspti eskaksï uéntapiringa jima. Arhiaspti: “Jeobaeri testiguechaksï no jámasïndi jimeesïsï no sési uandaparini paraksï no maiampiani impuestuechani”. Ísï jimbo, méntkisï enga chá kurhajchauaka leiichani, jarhuajpesïngajtsï para sési uandanhani Jeobaeri testiguecheeri ambe, ka ma jurhiani, inde ambe uaati jarhuataani juchaari erachiichani. w23.10 9 párr. 13

Máru Tata Diosï Jeobaeri marhuariichaksï ióni páxatiia erokuarhini eska i parhakpini kʼamaraaka. Kʼuiripuechaksï úpirindi ísï exeni enajki ióndani jaki ísï úkuarhini. Peru Tata Diosï Jeoba kurhangusïndi na engaksï pʼikuarherajka imeeri marhuariicha, jimbosï aiakupti profeta Abakukini: “Útasï kuerataxa[ti] paraka niáraaka ima tiempu enga uaxastakata jaka jánhaskakueri ambe, ka i ambe sóntku niáraati ísï úkuarhini ka no ísku ambeesti. Nájkiruka sáni sáni ióndapiringa, ¡jingontku ja! Meru niáraati ísï úkuarhini. ¡No ióndaati janoni!” (Hab. 2:3). ¿I uandakuechaksï jindeespi solu para Abakuki o ístujtsïni uinhaperantasïni juchantsïni? Tata Diosï Jeoba, úrasti apostoli Pabluni para inde mismu ambe arhiani imani kristianuechani engaksï erokuarhini jaka eska janoaka jimbanhi parhakpini (Ebr. 10:37). Ka nájkirukachi ísï pʼikuarheraaka eska Tata Diosï Jeoba ióndaxaka, ju je miántani eska ima ambe enga ima aiatspejka “meru niáraa[ka] ísï úkuarhini. ¡No ióndaati janoni!”. w23.04 30 párr. 16

Xáni no sési engaksï israeliteechaksï no uékeenga kurhanguni eska Tata Diosï Jeoba Moisésini erakuspka para jarhuataani (Núm. 14:10, 11). Jimbokaksï méntku úndaspka no jiókuarhini Moisésini, Tata Diosï no jurajkuaspti eskaksï inchapiringa ima Echerini jimbo enga Aiakuapka (Núm. 14:30). Joperu, jarhasptiksï máru israeliteecha engaksï jiókuarhipka ambe enga Tata Diosï Jeoba arhiani japka. Pori ejemplu, Tata Diosï Jeoba uandaspti: ‘Kalebi [...] seguiriixapti jíndeni jingoni jámani iámu imeeri mintsita jingoni’ (Núm. 14:24). Tata Diosï Jeoba újchakuraspti Kalebi ka asta jamberi jurajkuspti eska erakupiringa nani enga uékapiringa irekani Kanaáni (Jos. 14:12-14). Májkueni eska Kalebi, israeliteecha engaksï sésikua intsïnhapka para inchaakuni Echerirhu engaksï Aiaminhapka, jurajkusptiksï eska Jeoba jarhuataapiringa. Ka méntkisïsï janhanharhispti Josuéni, achamasïni enga Tata Diosï Jeoba erakupka para Moisésiiri kuenta jimbo jarhania ka orhekupani iretani (Jos. 4:14). Jimbosï Tata Diosï Jeoba újchakuraapti ka jurajkuaspti eskaksï inchaakupiringa Echerirhu engaksï Aiaminhapka (Jos. 21:43, 44). w24.02 21 párr. 6, 7

Májkueni eska doktori ma na újka míteni na enga xáni uinhapiti jarhajka juchaari mintsita engajtsïni pulsuni exechijka, juchajtuchi uaaka míteni na engachi xáni xénchajka Tata Diosï Jeobani engachi exejka na engachi xáni kánikua xénchajka máteruechani. Engachi exeaka eskachi nóteru xáni xénchaasïngia juchaari erachiichani i ambe arhikuekani jauati eskachi nóteru xáni xénchaxakaia Tata Diosï Jeobani. Joperu engachi méntkisï xarhatakuani jarhajka eskachi xénchaani jarhasïnga juchaari erachiichani inde ambe xarhatani jauati eskachi kánikua xénchasïnga Tata Diosï Jeobani. ¿Andichisï jatsipirini para uandanhiani engachi nóteru xáni xénchaapiringia juchaari erachiichani? Jimboka inde ambe arhikuekapirindi eskachi jarharixaka Tata Diosï Jeobani. Apostoli Juanu ini ambe uandaspti: “Ima enga no xénchajka erachi jémbani ka jini exeni jarhani, no uaati xénchani Tata Diosïni, imani enga no exejka” (1 Juanu 4:20). ¿Ambejtsïni jorhendasïni i ambe? Eskachi solu uaaka jaiapanherantani Tata Diosï Jeobani engachi xénchperaska máteru ka máteruni jingoni (1 Juanu 4:7-9, 11). w23.11 8 párr. 3; 9 párr. 5, 6

Enga Jeoási sapichuepka imeeri taati jémba uarhispti ka kʼéri saserdoti Jeoiadá ísï kʼuiriperaspti komueska imeeri uájpani ma ka uánikua ambe jorhendaspti Tata Diosï Jeobaeri ambe. Jeoási jánhastiispti jimboka kurhajchaspka Jeoiadáeri konsejuechani, ka inde ambe jarhuataspti paraka erakupiringa marhuakuni Tata Diosï Jeobani ka ístu jarhuataspti Tata Diosïiri iretani paraksï májkueni úni. Ístu úspti eska sési jájkunhantapiringa templu (2 Crón. 24:1, 2, 4, 13, 14). Engaksïni chiiti taatiicha o máteru kʼuiripuecha jorhendani jaka xénchani Tata Diosï Jeobani ka kurhajchaani imeeri juramukuechani, ambakiti regaluksïni ma íntskuxati (Prov. 2:1, 10-12). Chiiti taatiichaksïni uaati uánikua ambe jorhendani. Engari kurhajchaaska Biblieri konsejuechani engaksïni chiiti taatiicha íntsaajka, imeechaksï kánikua sési pʼikuarheraati. Ka sánderu ambakiti ambe, sésiri pʼikuastaaka Tata Diosï Jeobani, ka i ambekini jarhuataati parari méntkisï sési pájperani imani jingoni (Prov. 22:6; 23:15, 24). ¿A no eskaksï i ambe jindeeska ambakiti rasoniicha parari májkueni úni eska Jeoási? w23.09 8, 9 párr. 3-5

Tata Diosï Jeobajtsïni aiachisïndi eska kurhauaka juchaari kómarhikuechani. Tata Diosï Jeoba xénchaasïndi imeeri marhuariichani, ka méntkisï kurhauati imeeri kómarhikuechani (Sal. 10:17; 37:28). Joperu i ambe no arhikuekasïndi eskajtsïni íntskuaka iámindu ambe engachi kurhakuaka. Jamberichi jatsiaka para erokuarhini asta jimbanhi parhakpinirhu parajtsïni Tata Diosï Jeoba íntskuni máru ambe engachi uékajka. Jiáni engajtsïni mókuchiantajka juchaari kómarhikuechani Tata Diosï Jeoba méntkisï miásïndi ambe enga uékajka úni (Is. 55:8, 9). Ma ambe enga uéjka úni, jindeesti eska ixú echerirhu irekaakaksï kʼuiripuecha engaksï uékaaka eska ima juramukuauaka ka eskaksï tsípikua jingoni marhuakuaka májku kʼéri. Joperu Satanási uandaspti eskajtsïni sánderu sési nichepiringa engachi jandiajku juramukuarhipiringa (Gén. 3:1-5). Para xarhatani eska chkuanderakua máeska ambe enga uandapka Noambakiti, Tata Diosï jurajkusti eskaksï kʼuiripuecha jandiajku juramukuarhipiringa. Ka i ambe ústi eskaksï uánikua uandanhiateechani jatsiauaka (Ecl. 8:9). Míteskachi eska Tata Diosï Jeoba no kénditauaka iásï indeni uandanhiateechani. w23.11 21 párr. 4, 5

Tata Diosï Jeoba Abraánini jimbo aiatspespti “eskaksï uánikua nasionicha” újchakuranhapiringa. Joperu enga Abraáni 100 uéxurhini jatiripkia ka Sara 90, nótkiksï ma sapini kánguarhisïreendi. Kʼuiripu ma úpirindi eratseni eskaksï nóteru jamberi úpiringia kánguarhini. Nájkiruka inde kʼéri tsʼéjkukua máepka para Abraáni, ima “mintsikaspti eska niárapiringa uánikua ireteecheeri taatini” (Rom. 4:18, 19). Ka tátsekua, inde erokuarhikua niáraspti ísï úkuarhini. Jimboka Abraáni niáraspti kánguarhini imani uájpani enga xáni erokuarhini japka ka enga niárapka Isaaki arhinhani (Rom. 4:20-22). Májkueni eska Abraáni, juchajtuchi uaaka májkueni úni, eskajtsïni Tata Diosï ísï exeaka komueska kʼuiripu ma enga sési jámajka ka ístujtsïni uaati ísï exeni komueska imeeri amigu. Jimbosï apostoli Pablu arhini ambe uandapti Abraániiri: “Joperu enga ísï karakata jaka ‘Tata Diosï ísï exesti imani komueska kʼuiripu ma enga sési jámeenga’ no imantkusï arhikuekani jati, ístujtsïni juchantsïni arhikuekaxati, jimbokajtsïni Tata Diosï ísï exeaka komueska kʼuiripuecha engachi sési jámajka, jimbokachi mintsikasïnga imani enga tsítantaka Jesúsini, juchaari Tatani” (Rom. 4:23, 24). Uétarhinchasïngachi tanimu ambe jatsini májkueni eska Abraáni: mintsikakua, úkuecha ka erokuarhikua. w23.12 7 párr. 16, 17

Engajtsï nitamakuarhini jaka ambe ma enga kánikua úka jukaka ka chéni jarhantsï, miá je eska Tata Diosï Jeoba exexaka ambe engajtsï nitamakuarhini jaka ka no inde ambejku ístu mítesti na engajtsï pʼikuarherani jaka. Pori ejemplu, engaksï Tata Diosïiri marhuariicha jántspiripka Ejiptu, Tata Diosï Jeoba sési mítespti na engaksï kómu nitamakuarhini japka ka na engaksï xáni no sési pʼikuarherani japka (Éx. 3:7). Engachi chéni jaka jimbokachi uandanhiata ma jatsiska jamberichi úkua jukanchaaka exeni na engajtsïni Tata Diosï Jeoba jarhuatani jaka. ¿Ambechi uaa úni? Ju je kurhakuni eskajtsïni jarhuataka exeni ambe enga xáni úni jaka juchantsïni jimbo (2 Rey. 6:15-17). Tátsekua ju je eratsentani: ¿Uinhaperantaskirini arhijtsïkperata ma o komentariu ma engani tánguarhikuarhu kurhaaka? ¿Jarhuataskirini publikasioni, bideu o pirekua ma? ¿Exeraskirini erachi ma karakata ma engareni sési pʼikuastantaka? Ménichani sóntku mirikurhisïnga eska Tata Diosïiri intsïmperata máeska engajtsïni erachiicha sési kámajka ka iámindu ambe engachi intsïnhajka para Tata Diosï Jeobaeri ambe jorhenguarhini (Is. 65:13; Mar. 10:29, 30). I intsïmperateechaksï xarhatasïndi eska ima uandanhiasïnga juchantsïni jimbo ka eskachi jatsiska para mintsikani imani (Is. 49:14-16). w24.01 4, 5 párr. 9, 10

Ante de Jesúsi auandarhu kʼuanhatsentani, miátantaaspti imeeri chúxapatiichani eskaksï jatsispka para aianhpini imeeri ambe “Jerusaléni ka iápuru Judea ka Samaria ísï ka iápuru parhakpinirhu asta jima enga sánderu iauaniika” (Úku. 1:8; Luk. 24:46-48). Ísï tátsekua, judiuecha engaksï relijioniiri orhejtsïkutiipka, jupikasptiksï Pedruni ka Juanuni ka paasptiksï jima enga Sanedríni japka. Jimaksï arhiaspti eskaksï nóteru jámapiringia aianhpini ka chéraasptiksï (Úku. 4:18, 21). Pedru ka Juanu, ini ambeksï uandaspti : “Sienga sánderu sésiika [Tata] Diosïni japarini chánksïni janhanharhini ka eska para [Tata] Diosïni janhanharhini, jimboka jucha nómindu uaaka no uandantani [ambe] engachi exeka ka kurhandini” (Úku. 4:19, 20). Engaksï relijioniiri orhejtsïkutiicha jurajkuapka, íksï tsimani apostoliichaksï tánguarhintaspti máteru Jesúsiiri chúxapatiichani jingoni, ka májku kʼériksï kómarhispti Tata Diosï Jeobani paraka jarhuataapiringa úni ambe enga ima uéjka. Ka Tata Diosï Jeoba mókukuantaspti indeni xáni sési jásï kómarhikuani (Úku. 4: 31). w23.05 5 párr. 11, 12

Tata Diosï Jeoba ka imeeri Uájpa, ueenastiksï kánikua sési pájperani desde iónisïa, jimboksïsï májku kʼéri jati ka kánikuaksï xénchperani. Ísï eskachi na arhintaka iásï anapu textu jimbo, Tata Diosï Jeoba uánikuechani japarini uandaspti eska xénchasïreenga Jesúsini. Ka no solu uandaspti eska jaiapanhentasïreenga, sino ístu uandaspti: “juchiiti Sapi engani xáni xénchajka” jimboka uékasïreenga eskachi jucha mítepiringa na enga xáni xénchajka Jesúsini ka sési pʼikuarherani imani jimbo (Éfes. 1:7). Ka Jesúsi sési mítetixapti ambe enga Tata Diosï Jeoba pʼikuarherajka imani jimbo. Jesúsi xáni seguru jarhaspti eska Taati jémba xénchasïreenga jimbosï someni uandapti eska ísïispka (Juanu 3:35; 10:17; 17:24). w24.01 28 párr. 8

Eranhaska je eska nema kánikua no sési uandasïnga chaari ambe. Ka nájkiruka no ísïika; máruksï jakajkusïndi ka ueenasïndiksï máteruechani aianguani, ka iápuru ísï mítekuarhisïndia. ¿Nájtsï pʼikuarherapirini chá? Jamberijtsï úpiringa uandanhiani ka kánikua no sési pʼikuarherani jimboka inde ambeksïni úpiringa kánikua no sési pakatani. I ejemplujtsïni úpirindi jarhuatani kurhanguni na enga pʼikuarherapka Tata Diosï Jeoba enga imeeri uájpa ma chkuanderapka imeeri ambe jini auandarhu ka no sési pakatani. Eba jakajkuspti indeni chkuanderakuani, ka indeni jimbo, juchaari primeru taatiichaksï nóteru kurhajchasptia juchaari Tata Diosï Jeobani. Ka iásï, kʼuiripuechachi pekariisïnga ka uarhini (Gén. 3:1-6; Rom. 5:12). Jimboka Satanási ueenaspka chkuanderani jardini de Edénirhu iásïksï interu parhakpinirhu jarhastia uandanhiateecha, pori ejemplu uarhikua jimbo, guerrecha ambe ka kʼuiripuechaksï komu nitamakuarhisïndi. Ka nájkiruka inde ambe úkuarhika, no ústi eska Tata Diosï Jeoba ikiani jauaka o jatanhetspini. Sánderu sési, Biblia uandasïndi eska Tata Diosï máeska enga “xáni tsípijka” (1 Tim. 1:11). w24.02 8 párr. 1, 2

¿Nénachi uaa májkueni jámani eska José ka méntkisï kurhajchani Tata Diosï Jeobani? Uaakachi desde iásï ueenani eratseni ambechi uaa jiáni engachi tsʼéjkukua ma jatsiaka. Jatsiskachi para jirejiresï kénditani imani ambe enga Tata Diosï Jeoba kurhunhijka, ka nóchi jatsiska para imani ambe pakarani eratseni (Sal. 97:10; 119:165). I ambejtsï jarhuataati parachi no úni kʼéri pekadu ma, jimbokachi sési mítetini jauakia ambe úni. Jamberiri pʼikuarherajka eskari exentaskia jurhimbikuani ka uékandi iámu mintsita jingoni marhuakuni Tata Diosï Jeobani. Joperu ¿jarhaski ambe ma engaksïni pʼínguni jaka parajtsï aiakukuarheni ka itsï atakuarhini? Enga ísïika uaakajtsï májkueni úni eska Dabidi enga ísï kurhakupka Tata Diosï Jeobani: “Exe ambe enga juchiiti mintsitarhu jaka, oh, Tata Diosï, ka exe ambe engareni xáni uandanhiatani jaka. Ka exerini sini eratsexaki ambe ma enga no sési jaka, ka imani xanharu jimborini pá enga jindeeka para méntkisï” (Sal. 139:23, 24). Engajtsï jánguarhintani jaka parajtsï úni aiakukuarheni ka itsï atakuarhini, xarhatani jauakajtsï eskajtsï jánguarhintaxaka Tata Diosï Jeobani kurhajchani, ka Biblia uandasïndi eska Tata Diosï Jeoba újchakuraasïnga imeechani engaksï jánguarhintajka ísï úni (Ebr. 11:6). w24.03 6 párr. 13-15

Sánderu kʼéri saserdoti uandapikusïreendi iretani Tata Diosïni japarini. Jiáni enga ueenapka úranhani tabernakulu, Tata Diosï Jeoba erakuspti imani sánderu kʼéri saserdotini enga ueenapka jarhani Israeli, Aaróni. Joperu Pablu uandaspti: “Ístu saserdotiichaksï no úsïreendi ióni marhuani komueska saserdotiicha jimbokaksï uarhisïreenga, jimboksïsï máteruecha niáreendia paraksï saserdotiini” (Ebr. 7:23-26). Ístu, jimbokaksï inde sánderu kʼéri saserdotiicha no perfektueska, imajtuksï jatsipti para kéjtsïtakua ambe úni imeecheri pekaduechani jimbo. Indeni ambe jimboksïsï méntku ménderueniiti Israeli anapu sánderu kʼéri saserdotiicha, tata Jesukristuni jingoni enga jindeeka sánderu Kʼéri Saserdoti. Juchaari sánderu Kʼéri Saserdoti tata Jesukristu “jántspisïndi […] imani tabernakulurhu enga sési jimboeka ka enga Tata Diosï Jeoba úka ka no kʼuiripuecha” (Ebr. 8:1, 2). Pablu uandaspti eska “jimboka Jesúsi méntkisï irekaaka, nóteru uétarhisïndia eska máteru nema saserdotiuaka”. Ístu uandaspti eska Jesúsi ʻpímbinhasïiskaʼ ka eska ʻno májkueni jámasïnga eska imeecha engaksï pekadoriikaʼ ka eska no májkueniiska eska israeli anapu sánderu kʼéri saserdotiicha, “jimboka no jatsiska para pauani pauani kéjtsïtakuni Tata Diosïni” imeeri pekaduechani jimbo. w23.10 26 párr. 8, 9

“Auanda enga ióntki japka, nóteru jarhasptia ka nijtu ima echeri enga ióntki japka”. “Auanda enga ióntki japka” arhikuekaasïndi juramutiichani engaksï újka ambe enga Satanási ka demoniuecha uékajka (Mat. 4:8, 9; 1 Juanu 5:19). Bibliarhu, ménichani uandakua echeri úrakuarhesïndi para kʼuiripuechani arhikuekaani (Gén. 11:1; Sal. 96:1). Ísï jimbo, “echeri enga ióntki japka” imani kʼuiripuechani arhikuekaasïndi engaksï iásï kánikua no sési úriika. I ambe arhikuekasïndi eska Tata Diosï Jeoba no sántkisï ambe mójtakukuaka i “auandani” ka “echerini”, sino eska méntku kʼamajkuauaka ka peentaani “jimbanhi auanda ma ka jimbanhi echeri ma”, enga jindeeka eska jimbanhi juramuti ma juramukuauaka kʼuiripuechani engaksï jurhimbitiika. Tata Diosï Jeoba sési jájkuntaati echerini ka uaati eskaksï kʼuiripuecha perfektueuaka. Ísï eska na uandapka profeta Isaíasi, iámu parhakpini paraisu máeuati o ísï xáni sési jándeati eska jardini de Edéni. Ka mándani juchajtuchi jimbanhintaaka. Ka ístu, Tata Diosï Jeoba tsinaauati imeechani engaksï no újka xanharani, no újka exeni ka no újka kurhaani, ka tsítantauati uarhiriichani (Is. 25:8; 35:1-7). w23.11 4 párr. 9, 10

Ma repentku ueenaati kánikua no sési nitamakuarhinhani (Mat. 24:21). Peru i kánikua ménderueniuati eska desastrecha, jimbokachi jucha mítetixaka eska niáraaka ísï úkuarhini. Ka ma 2,000 uéxurhinisïstia enga Jesúsi arhiapka imeeri chúxapatiichani ambe engaksï jatsipka para úni paraksï preparadu jarhani para i jurhiatikua. Engachi jucha úska ambe enga i konseju uandajka, sánderu fásiliuati eskachi tsípiti pakaraaka indeni jurhiatikuechani jimbo enga xáni no sési jánhaskuarhiaka ka uaakachi jarhuataani máteruechani paraksï imeechajtu tsípiti pakarani (Luk. 21:36). Uétarhiati eskachi tekaantstiuaka parachi kurhajchani Tata Diosï Jeobani ka mintsikani eskajtsïni ima kuájchakuaka. ¿Ambechi uaa engaksï juchaari erachiicha tsïtaaka máru ambe oksï no ma ambe jingoni pakarani? (Hab. 3:17, 18). Uétarhiati eskachi pʼamojkuauaka para jarhuataani ka parachi íntsaani ambe engaksï uétarhinchaaka. ¿Ka ambechi uaa engajtsïni grupu ma nasionicheeri ueenaaka no sési kámani ka engachi jamberi jatsiaka para ma tiempu, juchaari erachiichani jingoni irekani jima enga no káni ambandiaka? (Ezeq. 38:10-12). Uétarhiati eskachi mintsita jingoni xénchauaka juchaari erachiichani. w23.07 2 párr. 2, 3

Temungurhiriichaksï uaati uánikua ambe jorhenguarhini Ákila ka Prisileeri ambe, temungurhiri ma enga primeru siglurhu irekapka ka engaksï erachiicha kánikua xénchauenga (Rom. 16:3, 4). Májku kʼéri ánchikuarhisïreendiksï, aianhpini ka májku kʼériksï jarhuataasïreendi máteruechani (Úku. 18:2, 3, 24-26). Ka méntkisï enga Biblia Ákileeri ka Prisileeri ambe uandajka, imeechaksï méntkisï májku kʼéri jarhasïndi. ¿Nénaksï uaa temungurhiriicha májkueni úni? Eratsenta je iámindu ambe engajtsï jatsika para tsimarhani úni. ¿Úpirintsï máru ambe májku kʼéri úni, enbesi de táchanisï? Pori ejemplu, Ákila ka Prisila májku kʼériksï aianhpisïreendi. ¿Chájtujtsï pʼindeski májkueni úni? Ístu, Ákila ka Prisila májku kʼériksï ánchikuarhisïreendi. Ísïisti, jamberi chaari acheeti o uarhiiti máteru ambe ánchikuarhijti. Perujtsï uaaka májku kʼéri úni kʼumanchikuarhu anapu ambe (Ecl. 4:9). Engajtsï ísï úska, jarhuajperantsï jauaka ísï eska ekipu ma ka uaakajtsï úrani indeni tiempuni parajtsï uandontskuarheni. w23.05 22, 23 párr. 10-12

Iáminduechachi ménichani niárasïnga chéni. Ju je eratsentani Tata Diosïiri marhuarini ma enga ménichani niárapka kánikua chéni, Dabidini. Enga rei Saúli jirinhantani jámani japka Dabidini para uándikuni, ima sïpakuarhispti filisteuecheeri ireta jimbo enga arhinhajka Gat. Engaksï aiangupka juramuti Akísini Gat anapuni eska Dabidi sondadu uinhapiti máespka, Dabidi kánikua chéspti (1 Sam. 21:10-12). Kánikua uandanhiaspti enga eratsepka eska juramuti Akísi no sési ambe úkupiringa. ¿Ambe úspi Dabidi para nóteru xáni chénia? Salmo 56 jimbo, Dabidi uandantasïndi na enga pʼikuarherani japka enga ireta Gat jimbo japka. Indeni salmo jimbo uandantasïndi andisï xáni chéni japi ka ambe enga jarhuatapka para nóteru ísï pʼikuarherania: mintsikani Tata Diosï Jeobani (Sal. 56:1-3, 11). Kánikua sési úspti enga ima ini ambe eratsepka úni. Tata Diosï Jeobaeri jarhuajperata jimbo, Dabidi ísï jámaspti eska loku ma o eska miákua tsïtani. Ka sési nikuspti enga indeni ambe úpka. Akísi nóteru ambe ma úkusptia, sánderu sési uékasïreendi eska Dabidi uéakuntapiringa Gat jimbosï Dabidi úpti sïpakuarhini (1 Sam. 21:13–22:1). w24.01 2 párr. 1-3

¿Neeskiksï imeecha enga iásï anapu karakata uandajka? Íksï jindeesti kristianu erakukateecha engaksï tsítanhantanhakia. I ambe arhikuekasïndi eska engaksï iámindu erakukateecha auandarhu jauakia ambe engaksï orhetku uaaka jindeuati uarhipeni. Ka engaksï na auandarhu jauakia jarhuataatiksï Kristuni ka imeeri ánjeliichani uarhipeni, para kʼamajkuani imeecheeri enemiguechani. Ju je ini ambe eratsentani. Máru erakukateecha engaksï Echerirhu jaka, jatiriistiksïa ka nóteruksï xáni uinhapistia. Joperu engaksï na auandarhu irekaakia espiritueuatiksï, engaksï no méni uarhijka. Ka engaksï uinhapikua jatsiaka para uarhipeni reini jingoni enga jindeeka Jesukristu. Enga na kʼamaraakia Armajedoni jarhuatauatiksï kʼuiripuechani paraksï niárani perfektueni. Seguruchi jarhaska eskaksï sánderu jarhuatauaka erachiichani auandarhu uératini ka eska engaksï echerirhu japiringa. w24.02 6, 7 párr. 15, 16

Uánikuechaksï listu jarhasïndia paraksï aiakukuarheni ka itsï atakuarhini, joperuksï no tekaasïndi ísï úni. Jamberiksï chéjti ka eratsenksï eskaksï niáraaka no sési jásï ambe úni ka petanhantanksï kúnguarhikuarhu. Joperu Biblia arhisïndi eska Tata Diosï Jeoba íntsauaka imeeri marhuariichani iámindu ambe engaksï uétarhinchaaka parakaksï “ísï jámaaka eska Tata Diosï Jeoba na jaiapanhentajka” ka paraksï “méntkisï sési pʼikuastani” (Kol. 1:10). Ísï jimbo, engajtsï chá chéni pʼikuarherajka, uaakajtsï seguru jarhani eskaksïni Tata Diosï Jeoba íntskuaka uinhapikua parajtsï méntkisï úni ambe enga sési jaka. Ka ima uánikuechani jarhuataastia (1 Kor. 10:13). Jimboksïsï namunitku kʼuiripuechajku petanhantajti kúnguarhikuecharhu. Jo, Tata Diosï Jeobaksïni uaati jarhuatani parajtsï no méni jurajkuni. Jimbokachi iáminduecha pekadoriiska, jarhasïndi ménisï engachi imani ambe uéjka úni enga no sési jaka (Sant. 1:14). Joperuchi no jatsiska para no sési ambe niátani; nájkirukachi táchanisï jatsika para erakuni ambechisï uaa engachi tsʼéjkukua ma jatsiaka. Uánikua kʼuiripuechaksï uandasïndi eskaksï no úsïnga pʼíngukuarhini, joperu inde ambe no ísïisti. Uaakachi jorhenguarhini pʼíngukuarhini parachi no imani ambe pʼikuarherani o úni enga no sési jaka. w24.03 5 párr. 11, 12