Xénchperakua Jeobani jimbo uinhapikuarini íntskusïndi parani úni orhepani uérani

UÉXURHINI 1970 jimbo ospitalirhu ma jarhaspka kamarhu. Jiáni 20 jatirispka, sondaduespka ka uinhamu pʼamenchaxapka. Jimbokani pʼamenchakua ma kérikuarhispka Ospitalirhu jarhaspka enga arhinhajka General Valley Forge de Phoenixville, jini Pensilvania (Estados Unidos). Mándani media ora enfermeru jukasïrendi pararini presioni exechini enga méntku kétseni japka. Ima tumbi sanititu sánderu kʼérispti eskani ji ka ísï xarharasïreendi enajki kánikua chéni japi. Ji kurhamarhispka: “Nóri méni exeska uarhini ¿o no? Ka ima tʼuputʼupunharintaspti ka arhisptirini: Nómbe, no méni”.

Kánikua no sési jarhaspti ambe ma. Joperu jurajkuksïni aianguni ¿Andi engani indeni ospitalirhu niárapka engani sáno?

GUERRARINI SÉSI JANOKUARHINI MA ÍNTSKUSÏNDI

Guerrarhu niáraspka pʼamenchani jini Vietnam engani jima jarhuajpeni japka engaksï kʼuiripuechani operarhiuajka. Tsitisïrenga jarhuatani atakatechani ka pʼamenchatichani. Uékasïreenga sirujanuni. Vietnam juliu de 1969 jimbo niáraspka. Ma semanajtsïni íntskuspti parani pʼindeni imani orarini ka jimboka jukari aparhikuarhisïrenga ka ístu parajtsïni jorhendani.

Tátsekua niraspkia ánchikuarhini ospitali ma jimbo engaksï operaripijka jini Dong Tam, delta enga riu Mekong jaka. Nóksï ióndaspti janoni elikopteruecha atakatecha ka uarhiricha jingoni. Ji kánikua tsitisïreenga juchiiti paisini ka tsitisïreenga ánchikuarhini, jimbosïni jirejiresï uénapka jarhuajpeni. Preparariuasïrhengachi atakatechani ka sóntkuchi incharasïrenga kuartu sapichurhu ma aire akondisionadori jukapka jimbokachi jima operhariuasïrhenga. Jima no kóndespti ísï jimbosï sirujanu ka enga anestesia jatsikpienga ka tsimani enfermeruecha, úkua jukanchendi; Iáminduechachi jánguarhintasïrenga parakaksï no uarhipirhinga. Tátsekua exeka eska elikopterhuru kʼérati bolsa turhipitichaksï jarhaspti enga no nema késkuapka. Arhisptijtsï eskaksï jima jatarhixapka sondaduecha engaksï undurhuakurhini japka guerra jimbo. Inde jindeespti sési janokua engareni guerra íntskupka.

UÉNASÏNGA JIRHINHANI TATA DIOSÏNI

Máru uéxurhinichani ante de guerrarhu nirani tʼuini mítespkia Jeobaeri testiguechani. Juchiiti nándi ma tiempu jorhenguarhispti imeecha jingoni joperu no niáraspti itsï atakuarhini. Ji kánikua tsitisïreenga imani jingoni uaxakani ka kurhaani ambe engaksï jorhendenga. Ma xanhari jimeesïchi nitamaspka enga kʼumanchikua Reinueri ma japka juchiiti padrastuni jingoni ka kurhamarhispka: “¿Ambeeski inde?”. Imarini mókuchispti: “Méntku asï jáma kurhajchani indeni kʼuiripuechani”. Ji kánikua xénchasïreenga ka mintsikani imani jimbosïni kasu úkupka ka nóteruni niáraspkia uandontskuarheni Jeobaeri testiguechani.

Engani na kʼuanhatsentapkia Vietnam ísï pʼikuarheraspka enajkini uétarhincheni jirinhani Tata Diosïni. Kánikua chérakata pakaraspka. Ísï xarharasïreendi enajki no nema kurhangueni ambe enga úkuarhini japka imani paisi jimbo. Uandanhasïrhendi eska Estados Unidos anapu sondaduechaksï sapiichani jamberi uándikuaxapka jini Vietnam ka miásïnga eskaksï protestechaksï jarhaspka ka kʼuiripuechaksï arhiasïrendi eskaksï charhaku uándikpitispka.

Uékasïreenga míteni Tata Diosïri ambe, jimbosïni uénapka uánikua iglesiecharhu nirani. Méntkisï pʼikuarhinhespka xénchani Tata Diosïni joperuni no tsitispka ambe engani exepka iglesiecharhu. Tátsekua Kʼumanchikua Reinueri ma jimbo niraspka engaksï Jeobaeri testiguecha tánguarhijka jini Delray Beach (Florida). Miásïnga eska domingu máespka Febreru 1971 jimbo.

Engani niárapka kʼamaraxamendia arhijtsïkperata joperuni pakaraspka jorhentperakua rebista Aianhpiri jingoni. No miásïnga ambe enga uandanhapka joperu ambe engani no méni mirikurhiaka sapiichani engaksï jirinhantani japka karakatechani imeecheri Bibliarhu. Ískujtsïni pakataspti. Ji solu kurhaaxapka ka exeni. engani na níntani jámeengia erachi ma enga ma 80 uéxurhini ísï jatiripka andarhierasptirini. Arhinhasïreendi Jim Gardner. Libruni ma kámaxapti enga arhinhajka La verdad que lleva a vida eterna ka arhisptirini: “¿Uékasïndi ini libruni?”. Ka jima mismuchi pakatperaspka eskachi máteru juebesï jimbo tsípa anapuchi jorhenguarhipirhinga.

Klinika ma jimbo ánchikuarhisïreenga jini Boca Raton (Florida) ka imani domingu jimbo enga nípka tánguarhini, chúrikua ánchikuarhipirhinga. Uénapirhinga a lasi onse ka pauandikua a lasi siete tsípa anapu uéntapiringa. No kánikua ánchikuarhita jarhaspti, ísï uénaspka arhintani libruni ka enfermerarhini ma andarhieraspti ka euajkusptirhini libruni; exespti ka arhistirini: “Nóreni indeni relijioni jingoni úkuarhiaka ¿o no? Euantaspka libruni ka arhispka: “Buenu, apenasi terujkankusïni arhintaka joperu péringani ísï uáka”. Enfermera niraspti ka ji kʼamaraspka iámu libruni ima chúrikua.

Ambe engani orhetkuni kurhamarhipka erachi Gardner enga niárapka juebesï jindeespti: “¿Ambechi jorhenguarhia?”. Imarini arhispti: “Indeni libruni engakeni íntskuka”. Ji arhispka “iámu arhintaskia”. Imarini arhispti: “Buenu, soluchi exeakia primeru kapituluni”. Ískuni pakaraspka jimboka uánikua ambe jarhaspka engani no úpka exeni. Arhisptirini eskani uánikua tekstuecha jirinhantapiringa juchiiti Bibliarhu enga jindepka la Versión del Rey Jacobo. Tátsekua exespka eskani uénaxapkia míteni Tata Diosï Jeobani. Ima tsípa tanimu kapituluchi jorhenguarhispka Jim jingoni (ji tsitisïreenga arhini Jim erachi Gardnerini). Mándani juebesï, tanimu kapituluchi jorhenguarhiasïrhenga. ¡Kánikua tsitisïrhenga! Ka ¡kʼéri kóntperata máespti engareni erakukata ma jorhendenga ka enga mítepka erachi Russell!

Máru semanecha tátsekua, uénaspkia aianhpini kúnguarhikua jingoni. Ueenani jámani, Jim kánikuarini jarhuataspti jimbokani ji chésïrhenga (Uk 20:20). Joperuni seguirispka uerani aianhpini imani jingoni ka niáraspka kánikua tsitini aianhpini. Iásï jamberi seguirisïnga ísï eratseni eska inde jindeeska sánderu kʼéri kóntperata engani jatsika. ¡No jarhasti sánderu kʼéri ambe ka eska jindeeni Tata Diosïri jarhuajpiri! (1Kor. 3:9).

XÉNCHPERAKUA JEOBANI JIMBO

Iásïksïni aianguni jauaka enga juchiiti ambejkueka: xénchperakua jeobani jimbo (Jaŋ. 2:4). Inde uékperakua, jarhuatasti parani úni orhepani uérani imani ambe jingoni engareni xáni no sési pakatapka guerra ka máteru uandanhiatechani (Is. 65:17).

Jarhasti jurhiatikua ma engani mintsita jingoni miántajka. Uéxurhini 1971 jimboesti. Nótki xáni iónispti engareni juchiiti padrastru petantapka edifisiurhu engani irekani japka imani jingoni. Ima no jurhakusïreendi eska nema enga Jeobaeri testiguepiringa imeeri edifisiurhu jimbo irekapiringa. Ji no kánikua sentabu kámaxapka. Juchiiti ánchikuarhitarhu, mándani tsimani semana maiamusïreendi ka kʼamajkuspkia jimbokani takusï ambe piáspka parani uérani aianhpini. Uékasïreenga sési xarharani jimbokani Jeobanisï marhuakuni japiringa. Nájkirukani sáni patsakuarhini japka sentabu, bankurhu ma jimbo jatsirixapka jini estado de Michigan, jima engani tʼarhexepka. Ísï jimbo jatsispka parani máru jurhiatikuechani karrurhu irekani. Rasurarikuarhisïrhenga ka jikuani ambe baniuecharhu engaksï gasolinerecharhu jarhenga.

Ma jurhiatikua, sáni xarheni niáraspka kʼumanchikua Reinurhu antedeksï erachicha niárani para uérani aianhpini ánchikuarhitarhu uératini niraspka ka tátsepani estasionarhispka karruni nani engareni no nema exepiringa. Jima uénaspka miántani Vietnam anapu ambe na enga jájkundeenga kʼuiripueri kʼuiripeta kurhiri eranhaskasïrhenga iurhirini enga juchiiti uirhipandani japka... Úsïreenga kurhaani ka exeani sondaduechani engajtsïni arhienga notirhu janhaskaparhia no uarhiaka ¿o no? ¡Jarhuatarini! Ji mítesïreenga eskaksï uarhipiringa, joperuni jánguarhintasïreenga sési pʼikuastantaani ka no xarhatakuani eskaksï uarhipiringa. Iámindu indeni ambe jimbo, nóteruni úspkia

Ueparini kómarhispka Jeobani (Sal. 56:8). Ka uénaspka eratsentani tsíntskueri ambe. Mátirkuni kurhanguspka ambe enga Tata Diosï Jeoba: úraati tsíntskuani para kénditani iámindu imani no sési jásï ambe engani exepka ka uáti eskaksï kʼuiripuecha nóteru no sési pʼikuarherakia indeni ambe jimbo. Tata Diosï Jeoba tsítantauati iámindu imani tumbiichani ka íntsauati oportunidadi ma paraksï míteni (Uk 24:15). Kánikua xénchperakua pʼikuarheraspka Jeobani jimbo. I amberini mintsitarhu niárachespti ka no méni mirikurhiaka. Ka jiáni uératini jánguarhintasïnga eskani xáni uáka parani seguirini xénchani Jeobani ka sánderia enga tsʼéjkukuechani ka uandanhiatechani jatsiajka.

JEOBARENI MÉNTKISÏ SÉSI KÁMASTI

Enga guerra jarhajka kʼuiripu kánikua no sési jásï ambe úsïndi ka jíjtuni májkueni úspka. Ambe ma engareni jarhuataka parani úni orhepani uérani ka nóteruni kulpa pʼikuarherania jindeesti, eratseantani karakatechani engani kánikua tsitiajka. Orheta jindeesti Jaŋaskuecha 12:10, 11, enga uandajka eska noambakiti tsïtaskia no solu juchaari aianhpikua jingoni sino ístu karichi sapichu iurhiri jimbo. Máteru jindeesti Galasia 2:20. Inde karakatarhini jorhendatasti eska tata Jesukristu uarhiska “jindeeni jimbo”. Jeobareni imeeri uájpeeri iurhirini jimbo exesïndi jindeeni ka puáchentastirinia ambe engani úka. Kurhanguni ini ambe, jarhuatasïndirini paraka juchiiti konsiensia sési jauaka ka ístureni jarhuatasïndi eskani xáni uáka jarhuatani máteru kʼuiripuechani parakaksï míteaka juchaari Tata Diosï pʼamojpitiini (Ebr. 9:​14).

Engani eratsentajka ióntki anapu ambe kuenta íntskukuarheska eskarini Jeoba méntkisï kuidariska. Pori ejemplu ima mismu jurhiatikua enga Jim mítepka eskani juchiiti karrurhu irekaxapka pirenchi ma jingondi páspti enga kʼumanchikua ma jatsipka para rentarini. Seguru jarhaska eska Jeoba Jimini úraaska ka imani pirenchi parareni íntskuni sési jásï lugari ma parani pakarani. ¡Kánikua ambakitisti ka sési kuidariuasïndi imeeri marhuarichani!

JÁNGUARHISPKA JORHENGUARHINI RESPETU JINGONI UANDANI

Maiuni 1971 jimbo, jatsispka para nirani ambe ma úni jini Michigan. Ante de jurajkuni kúnguarhikuani Delray Beach anapu uiniraspka juchiiti karruerhi kajuelani libruecha ka rebistecha jingoni. Uéraspka Florida uératini ka jini karhamaspka karretera 75 jimbo. Nótkini terujkani xanharu niraxapka ka kʼamajkuaspkia. Nani uéjkini engani uenga anhaxurhisïrenga ka tsípikua jingoni uandontskuarhesïrenga kʼuiripuecha Reinueri ambe. Aianhpispka karselicharhu, asta jurajkukuaspka trataduechani imani kʼuiripuechani engani baniuecharhu ísï exeauenga, jimeesïsï engaksï kʼuiripuecha mintsikuarhijka engaksï biajarhini jarhajka. Ménichani kurhamarhikuarhisïrhenga sini ima máisï semiia niára frutu íntspini (1 Kor. 3:​6, 7).

Joperuni uékasïnga uandantani eska jiáni engani jorhenguarhipka jurhimbikua ambe, no sáni respetu jingoni uandasïreenga ka sánderia enga juchiiti familia jingoni uandontskuarhienga. Juchiiti xénchperakua Jeobani jimbo kánikuespti jimbosïni balori jingoni aianhpienga, joperu ístu, uinhamaritspisïrhenga. Ji kánikua xénchasïnga juchiiti ermanuechani, John ka Ron, uékasïreenga eskaksï imeechajtu afuersa jakajkupiringa. Joperuni ísï tátsekua jatsispka parareni arhiani eskajtsïni puáchentapirhinga jimbokani jukarini uinhamarhikuaspka. Seguirisïnga kómarhini Tata Diosïni eskaksï ma jurhiani jiókuarhiaka jurhimbikuani. Jiáni uératini, Tata Diosï Jeobareni kánikua amberini jorhendasti ka iásï, sánderuni jingontkuni aianhpisïngia ka jorhentpini (Kol. 4:6).

MÁTERU AMBE ENGANI ÍSTUNI XÉNCHAJKA

Méntkisï miásïnga na engani xáni xénchajka Jeobani ka ístuksï jarhasti máteruecha engani xénchajka. Ma jindeesti juchiiti uarhiti Susan, méntkisï uékasïreenga kompanierani ma engari jarhuatapiringa marhuakuni Tata Diosïni ka Susan jindeesti inde kompaniera. Ima uinhapitisti ka kánikua tsitisïndi Tata Diosïri ambe. Méntkisï miásïnga enga ma jurhiatikua engani nípka exeni jiáni engachi nobiuepka. Exespka Susan, chenjembo arhintani jarhani rebista Aianhpiri enga ima irekapka Cranston (Rhode Island). Ma amberini engareni ísku pakatapka jindeespti eska arhintaxapka artikulu ma ka jirinhantaxapti iámindu tekstuechani Bibliarhu. Uandaspka, “¡I jindeesti uátsï ma enga kánikua tsitijka Tata Diosïri ambe!”. Tembuperhaspkachi disiembrini 1971 jimbo ka desde jiáni uératini, nórimeni jurajkusti ka jarhuatasïndirini, ini ambe jimbo kánikua agradeserikusïnga. Ambe engani sánderuni tsitijka imeeri ambe eskarini kánikua xénchasïnga peru eska sánderu xénchasïnga Jeobani.

Susan ka ji, tsimanchi sapiichani kánguarhiaska, Jesse ka Paul. Jeoba no méni jurajkuasti imeechani (1 Samuel 3:19). Ka Susan ka ji, sésichi pʼikuarherasïnga jimbokaksï niáraska xénchani jurhimbikuani. Asta iásï jamberiksï sésiksï marhuakuxati Jeobani jimbokaksï no mirikurhisïnga na engaksï xénchajka Jeobani. Tsimarhanksï jukari beinte uérhini páxatiia marhuani tiempu kompletueri. Ístuni, kánikua sési pʼikurherasïnga juchiiti tarhambecha jingoni, Stephanie y Racquel engaksï ísïika eska juchiiti uájpeecha. Jesse ka Paul, imeechanksï erakuasti engaksï mintsita jingoni xénchajka Jeobani (Efes. 6:6).

Engani na itsï atakuarhipkia diesiseisi uéxurhinisï marhuaspka estado de Rhode Island. Jima ambarhati amiguechani jatsiaspka. Uánikua ambakiti ambe miántasïnga ima orhejtsïkuticheri jingoni engani jingoni marhuapka. Ístuni kánikua agradeserhikuasïnga sirkuitueri orhejtsïkutichani jimbokani uánikua ambe jorhenguarhiska imeecheri ambe. Kʼéri kóntperata máespti imeechani jingoni ánchikuarhini engaksï seguirini jaka xarhatani eskaksï xénchasïnga Jeobani. Uéxurhini 1987 jimbo, mótsispkachi Estado de Carolina del Norte parachi apoiarhiuani erachichani aianhpikuarhu ka jimajtuchi ueenaspka jatsiani.a

Agostuni 2002 jimbo, Susan ka ji pʼímarhinhaspkachi parachi beteli nirani marhuani jini Patterson (Estados Unidos). Ji imani grupu jingoni ánchikuarhisïreenga enga exejka na enga aianhpinhani jaka ka Susan, labanderiarhu. Ima tsitisïreendi jima ánchikuarhini. Tátsekua agostu 2005 jimbo kʼéri kóntperata ma intsïnhaspka para jarhani Grupurhu enga Orhejtsïkuajka Iámindu kúnguarhikuechani. Ísï pʼikuarheraspka enajkini no jukanchapi ini asignasionini. Juchiiti uarhiiti uandanhiaxapti, jimbokani sánderu responsabilidadichani, ánchikuarhita ka biajichani jatsiapiringuia. Susan no tsitisïreendi abioni jatani peru iásï, méntkuchi abioni jatani jarhasïnguia. Susan uandasïndi eska sési járhati uandakuecha engaksï úrajka imeecheri témbecha engaksï Kuerpu Gobernantiri jaka kánikuaksï marhuakuska parareni ima méntkisï jánguarhintani apoiarini. Ka inde ambe úsïndi eskarini sánderuni xénchaaka.

Juchiiti ofisinarhu, uánikua fotuechani jatsiaska engaksï kánikua jukaparhakueka para ji. Miátantasïndijtsïni na engani xáni sési nitamakuarhika. Ístuni uánikua kóntperatechani jatsiaska engani seguirini jaka xarhatani xénchperakua Jeobani jimbo!