Ambakiti ambe engachi no erokuarhienga ka ambe engachi xáni jorhenguarhika marhuakuparini Tata Diosï Jeobani

Segunda Guerra Mundial jimbo, juchiiti taatiichaksï uéakuntaspti Estonia ka Alemaniaksï niraspti irekani. Ka ji jima andajpenuska. Ka tátsekuaksï prepararikuarhispti parachi Canadá mótsini. Jima engachi orheta irekapka, no iauani pakarasïreendi Ottawa. Irekaspkachi kʼumanchikua ma jimbo engaksï ístu tsíkateecha japka. Kánikuachi pobriispka, peruchi méntkisï jatsisïreenga blankiiu para arhani.

Ma jurhiatikua, Jeobaeri testiguechaksï arhikuntaspti juchiiti naandini Jaŋaskuecha 21:3, 4. Ambe enga jorhenguarhipka, mintsitarhu niárakuspti ka ueenaspti uerani. Juchiiti taatiichaksï seguiriispti Biblieri ambe jorhenguarhini, ka ísï no ióni jimbo, itsï atakuarhisptiksï.

Nájkirukaksï juchiiti taatiicha no ueenga sési uandani inglesi, imeechaksï meru uékasïreendi Biblieri ambe jorhenguarhini. Sáno méntkisï, mándani sábadu, nájkiruka juchiiti taati erantskuteenga ánchikuarhini Sudbury (Ontario) jima enga níkeli tsïteranhanteenga, pásïreendijtsïni aianhpini jíndeni ka juchiiti ermanani sánderu sapichuni Sylviani. Ka mándani semanachi tánguarhintasïreenga juchiiti familia jingoni parachi jorhenguarhini rebista Aianhpiri jingoni. Juchiiti taatiichajtsïni jorhendasti xénchani Tata Diosïni ka inde ambe úspti eskani uékapiringa aiakukuarheni Tata Diosï Jeobani 1956 jimbo, jiáni engani 10 uéxurhini jatiriipka. Na engaksï juchiiti taatiicha xáni xéncheenga Tata Diosïni, jarhuatastirini parani jíjtuni seguiriini marhuakuni.

Engani na uéntapkia sekundaria, nóteruni xáni uékasïreengia marhuakuni Tata Diosïni. Eratsesïreenga eska engani prekursori úkuarhipiringa no méni jatsipiringa sentabu parani úni ambe engani ji xáni tsitienga: abioni ma jatani ka nirani paisiichani miiuani. Úndaspka ánchikuarhini estasioni de radiu ma jimbo disku jatsikuantani ka kánikua tsitisïreenga indeni ambe úni. Peru jimbokani inchatiruechani ánchikuarhisïreenga, no úsïreenga iámindu tánguarhikuecharhu nirani. Ka ístu jukarini kúnguarhisïreenga imeechani jingoni engaksï no marhuakuenga Tata Diosïni. Peru tátsekua, ambe engani jorhenguarhipka Bibliarhu, jarhuatasptireni parani mójtakukuarhini.

Oshawa (Ontario) mótsispka. Jima mítespka Ray Norman ka imeeri ermana jémbani Lesli ka máteru prekursoriichani. Iáminduechajtsïni kánikua sési kámaspti. Exeni na engaksï tsípikua jingoni irekeenga, úspti eskani eratsentapiringa ambe engani uékeenga úni juchiiti tsípikuani jingoni. Imajtsïni animariispti parani prekursori úkuarhini. Ka ísï úspka septiembrini 1966 jimbo. Ji kánikua tsípikua jingoni irekaxapka ka kánikuarini sési nichexapti joperu mátirku úkuarhispti ambe ma enga mójtakupiringa juchiiti tsípikuani.

ENGAKENI TATA DIOSÏ JEOBA PʼÍMARHISKA ÚNI AMBE MA, ANDIRISÏ NO JÁNGUARHINTAJKI ÍSÏ ÚNI

Engani útasï sekundaria jámani japka, uininharhitaspka solisitudi ma parani Toronto (Canadá) anapu Betelirhu nirani marhuani. Ka ísï tátsekua, engani na prekursoriipkia, pʼímarhinhaspka para tʼámu uéxurhini marhuani Beteli. Peru ji kánikua xénchasïreenga Leslini ka chésïreenga eskani nóteruni úpiringia exeni engani jiókuarhipiringa Beteli marhuani. Engani na kánikua kómarhipkia Tata Diosïni, uandaspka eskani nipiringa Beteli marhuani ka kánikua no sési pʼikuarheraspka engani jurajkupka Leslini.

Beteli, labanderiarhu ánchikuarhispka ka tátsekua komu sekretariu. Lesli prekursora espesiali únhaspti Gatineau, (Quebec). Méntkuni eratseni jarhasïreenga ambe úni jarheeni ka kurhamarhikuarhisïreenga sini sési jarhaspi ambe engani erakupkia úni. Jimajkani, ambakiti notisia ma intsïnhaspka: pʼímarhisptiksï Rayini para Beteli marhuani, Lesliiri ermanu jémba. Ka tsimarhanchi mismu kuarturhu irekaspka. Ísïchi ueenaspka ménderu uandajperani Lesli jingoni ka 27 de febreru de 1971 jimbo tembuperaspkachi, jiáni andagutaspka tʼámu uéxurhini Beteli marhuani.

Quebec axanhaspkachi, kúnguarhikua ma jimbo enga fransesi uandanheenga. Máru uéxurhini tátsekua, arhinhaspka ambe ma engani no erokuarhini japka: pʼímarhisptijtsïni parani marhuani komu sirkuitueri orhejtsïkuti. Jiánisï 28 jatiriispka ka ísï pʼikuarherasïreenga enajkini no ma ambe mítepi. Peru ambe engareni kánikua jarhuatapka, jindeesti ambe enga arhijka Jeremías 1:7, 8. Joperuni ístu uandanhiaxapka na engajtsïni nichepiringa jimboka Lesli uánikua xanhari aksidentarikuarhispka karru jingoni ka ísï jimbo no úsïreendi kʼuíni. Perurini Lesli arhispti: “Engajtsïni Tata Diosï Jeoba pʼímarhini jaka para úni ambe ma, ¿andichisï no jánguarhintajki ísï úni?”. Jiókuarhispkachi imani asignasionini ka 17 uéxurhinchi marhuaspka komueska sirkuitueri orhejtsïkuti.

Kánikua ánchikuarhita jatsispka engani sirkuitueri orhejtsïkutiipka engani jamberi nóteruni xáni tiempu jatsiengia para Lesli jingoni jarhani. Ísï jimbo, ambakiti ambe jorhenguarhispka. Ma lunesï xarhentku, timbri kúskaspti ka engani mítapka puertani, no nema jarhaspti, tsïkiatajku ma jarhaspti manteli ma jingoni, fruta, kesu, kurhinda, binu, kopeecha ka sïranda ma enga arhienga: “Pá je chaari uarhiitini dia de kampurhu ma”. Kánikua sési jánhaskuarhispti. Peruni ji jatsispka para diskursuechani máru prepariuani, jimbosïni arhipka Leslini eskachi no úpiringa nirani. Ima kurhanguspti, peru kómu pʼikuarheraspti sáni. Engani ueenapka diskursuecha jingoni prepararikuarhini, úndaspka no sési pʼikuarherani indeni ambe jimbo. Ka jiáni miáspka ambe enga Efesu 5:25, 28 uandajka. Eratsespka eska Tata Diosï Jeoba indeni tekstuechani úraaxapka parareni miátantani eskani jatsispka parani exeni na enga pʼikuarhereenga juchiiti uarhiiti. Kómarhikua ma úspka ka tátsekua arhispka Leslini: “Ju uérani sáni”. Ima kánikua tsípispti. Karru jimbochi niraspka ka niáraspkachi lugari ma jimbo enga kánikua sési jándepka. Riu ma jarhaspti ka jimachi tatsintskaspka mantelini ka kánikuachi sési nitamakuarhispka ima jurhiatikua. ¡Ka ístuni úspka diskursuechani preparariuani!

Uánikua sirkuituechanchi pʼorhembiaska Columbia Británica uératini asta Terranova jamberi. Kánikuachi sési nitamakuarhispka iámindu indeni lugariichani jimbo. Desde sapichu, ji uékasïreenga miiuni máteru lugariichani ka iásï inde ambe kumplirikuarhixaptia. Uékasïreenga nirani Galaadiiri Jorhentperakuarhu, peru no tsitisïreenga marhuani komu misioneru máteru paisi jimbo. Eratsesïreenga eskani no úpiringa misionerueni ka eskani no úpiringa indeni asignasioni jingoni. Chésïreenga eskajtsïni África axapiringa, paisi ma jimbo enga guerra ka pʼamenchakua ambe japiringa. Ji kánikua sési pʼikuarherasïreenga nani engani marhuani japka.

PʼÍMARHINHASÏNGACHI PARA MARHUANI ESTONIA KA MÁTERU PAISI BÁLTIKUECHA JIMBO

Uéxurhini 1992 jimbo, Jeobaeri testiguechaksï úsïreendia ménderu aianhpini imani paisiicha jimbo engaksï ióntki Unión Soviética jingoniipka. Ísï jimbo, kurhamarhisptijtsïni sinchi uékapirini nirani marhuani Estonia komu misioneruecha. Nóchi erokuarhixapka i ambe, peruchi kómarhispka Tata Diosï Jeobani. Ka ménderuchi uandaspka: “Engajtsïni Tata Diosï Jeoba pʼímarhini jaka para úni ambe ma, ¿andichisï no jánguarhintajki ísï úni?”. Jiókuarhispkachi indeni asignasionini ka sésichi pʼikuarherantaspka jimbokachi no nipiringa África.

Sóntkuchi ueenaspka jorhenguarhini estoniu uandani. Ka ísï no ióni jimbo engachi paisirhu japkia, pʼímarhisptijtsïni parani sirkuitueri orhejtsïkutiini. Jatsispkachi para 46 kúnguarhikuechani pʼorhembiani ka uánikua grupuechani engaksï tanimu paisi báltikuechani jimbo japka ka ístu Kaliningrado (Rusia). Ísï jimbo, jatsispkachi para jorhenguarhini uandani letóni, lituanu ka ruso. Para jucha kánikua úkua jukaspti ísï úni. Peru erachiichaksï kánikua jukaparharasïreendi engachi jánguarhinteenga ísï úni ka kánikuajtsïni jarhuataspti. 1999 jimbo, Estonia Beteli ma mítanhaspti ka ji ka Toomas Edur, Lembit Reile ka Tommi Kauko arhinhaspkachi para jima anapu Betelini orhejtsïkuni.

Uánikua Testiguechanchi míteaspka engaksï Siberia pánhapka. Peru nájkirukaksï kánikua kómu nitamakuarhipka kárselirhu ka iauanksï jarhani imeecheeri familieri, nóksï ísï jimbo nóteru tsípisïreendia. Jánguarhintasptiksï méntkisï tsípikua jingoni aianhpini. I ambejtsïni jorhendaspti eskachi úpiringa tekaantani ka tsípikua jingonchi irekani ambe uéjkichi nitamakuarhini jarhani.

Uánikua uéxurhini nitamasptia ka jucha kasi no mintsikuarhisïreenga, ísï jimbo, Lesli ueenaspti kánikua kuatarani. Nóchi kuenta íntskukuarhespka eska ísï pʼikuarheraxapka pʼamenchakua ma jimbo enga arhinhajka fibromialgia. Ísï jimbo, eratsexapkachi kʼuanhatsentani Canadá. Ka engajtsïni pʼímarhipka para Patterson (New York) nirani Jorhentperakuarhu engaksï imeecha intsïnhajka engaksï Grupurhu ma jaka engaksï Betelini ma Orhejtsïkujka, eratsespkachi eskachi no úpiringa nirani. Peru engachi na kánikua kómarhipka Tata Diosïni, uandaspkachi eskachi nipiringa. Tata Diosï Jeobajtsïni újchakuraspti engachi ísï úpka. Ka engachi ini jorhentperakuarhu jimbo nípka, Lesli úspti doktori jingoni nirani ka intsïnhaspti ambe enga xáni uétarhincheenga para inde pʼamenchakua. Ini ambe jimbo, úspkachi ménderu kʼuanhatsentani juchaari asignasionirhu.

MÁTERU AMBE ENGACHI NO EROKUARHINI JAPKA: MÁTERU KONTINENTERHU MARHUANI

Uéxurhini 2008 jimbo, engachi na Estonia japkia, Beteli uératijtsïni uandajpaspti nani engaksï exejka Jeobaeri testiguecheeri ánchikuarhitani, parajtsïni kurhamarhini sinchi uékapirini nirani marhuani República Democrática del Congo. Ískuni pakaraspka, ka sánderia jimbokachi ísï pauandikua jatsispka para aianguani sinchi úpirini nirani. Chúrikua no ma ambe arhispka Leslini paraka úpiringa kʼuíni. Peruni ji tsínharhitini pakaraspka ka aiangukuarhixapka Tata Diosï Jeobani andisïni uandanhiani japi África nirani.

Ísï pauandikua, engani na aiangupkia Leslini, uandaspkachi: “Engajtsïni Tata Diosï Jeoba pʼímarhini jaka parachi África nirani, ¿nénachi uaa uandani eskachi no uaaka jini marhuani engachi no méni nirani jaka?”. Ísï jimbo, engachi na 16 uéxurhini japkia Estonia, niraspkachi Kinsasa, enga kapitaliika República Democrática del Congo. Beteli sési jásï jardini ma jarhaspti ka agustu pʼikuarherakuarhisïreendi. Ma ambe enga orheta peerapka Lesli juchaari kuarturhu, jindeespti tarjeta ma enga patsapka desde engachi Canadá mótsipka. Inde tarjeta arhisïreendi: “Tsípi nani uéjkiri jarhani”. Engachi na míteapkia erachiichani, jorhentpini Biblieri ambe ka exeni na enga sési pʼikuarherakuarhijka ini ánchikuarhitani úni, kuentachi íntskukuarhespka na engachi úpiringa tsípikua jingoni irekani. Ísï tátsekua úspkachi pʼorhembiani máteru Beteliichani 13 paisiicheeri engaksï África jaka. I ambejtsïni jarhuataspti parachi mámaru jásï kʼuiripuechani míteani ka sési járhati ireteechani. Nóteruni chésïreengia ka diosmaiamukuachi arhispka Tata Diosï Jeobani engajtsïni África axapka.

Congo, mámaru jásï tʼirekuajtsïni íntskusïreendi engachi jucha no méni eratsepka arhani, komu insektuechani; peru engachi exepka na engaksï juchaari erachiicha xáni anhencheenga, juchajtuchi tsʼémuaspka ka anhenchaspkachi.

Úspkachi nirani paisirhu esterhisï parachi erachiichani jarhuataani paraksï no jurajkuni Tata Diosï Jeobani ka pákuani ambe engaksï xáni uétarhinchani japka. Imani lugariicha jimbo, grupuecha engaksï no sési úriipka inchaakusïreendiksï ireteecharhu ka no sésiksï kaasïreendi uarhiitiichani ka sapiichani. Sáno iámindu erachiicha nóksï jatsikuarheriispti. Perujtsïni ísku pakataspti na engaksï xáni jakajkuenga eska jauaka tsíntskua, na engaksï xáni xéncheenga Tata Diosï Jeobani ka na engaksï no jurajkupka kúnguarhikuani. Máru erachiichaksï tsïtaspti imeecheri kʼumanchikuechani ka ambe engaksï xáni jatsintapka. I amberini miátantaspti na enga xáni fásiliika tsïtani jatsikuarhekua ambe ka na enga xáni jukaparhakueka sési jarhani Tata Diosï jingoni. Ka nájkirukaksï erachiicha no sési nitamakuarhini japka, iauani ménichantkuksïsï kejarikuariendi. I ambejtsïni jarhuataspti parachi balori jingoni orhepani uérakuani uandanhiateechani ka pʼamenchakuechani.

JIMBANHI ASIGNASIONI MA: ASIACHI NIRASÏNGA MARHUANI

Ménderuchi arhinhaspka ambe ma engachi no erokuarhini japka. Arhisptijtsïni eskachi mótsipiringa Hong Kong Betelirhu. Nóchi méni eratsespka eskachi Asia nipiringa. Peru jimbokajtsïni Tata Diosï Jeoba jarhuataspkia máteru asignasioniicharhu, nóchi eratsentani pakaraspka ka jiókuarhispkachi. 2013 jimbo, kómu pʼikuarheraparini jurajkuaspkachi juchaari amiguechani ka iámindu sési jásï ambe enga África japka, no míteparini na engajtsïni nichepiringa.

Kánikua ménderueniispti Hong Kong irekani jimboka jima uánikua máteru paisi anapuechaksï irekasti ka kánikua úkua jukaspti chino cantonés jorhenguarhini. Perujtsïni erachiicha kánikua sési erokaspti ka kánikuachi anhenchaspka jima anapu tʼirekua. Jima anapu Betelirhu sánderu kánikua ánchikuarhita jarhaxaptia. Joperuksï kʼumanchikuecha ka echeriicha kánikuaksï jukaparhaspti. Ísï jimbo, Grupu enga Orhejtsïkuajka iámindu kúnguarhikuechani uandaspti eska móskupiringa Betelini ka eskaksï atarantapiringa sáno iámindu echeriichani. Sánisï tátsekua, 2015 jimbo, mótsispkachi Corea del Sur ka ixúchi marhuaxaka asta iásï jamberi. Kánikua úkua jukasti ixú anapu idioma jorhenguarhini. Perujtsïni kánikua sési pʼikuastasïndi engajtsïni erachiicha arhijka eskachi sánderu sési uandaxakaia coreano, nájkirukachi útasï kánikua jatsika para jorhenguarhini.

AMBE ENGACHI XÁNI JORHENGUARHIKIA

No méntkisï fásiliisïndi jimbanhi amiguechani jatsiani. Peruchi exespka eska engachi jucha ueenapiringa úni ambe ma ka pʼímarhiani juchaari erachiichani juchiniu, nóchi ióndapiringa sési míteani. Exespkachi eskaksï sáno iámindu erachiicha májkueniiska ka Tata Diosï Jeobajtsïni kueraasti parachi xénchaani juchaari erachiichani ka sési pájperani iáminduecha jingoni (2 Kor. 6:11).

Jorhenguarhispkachi eska uétarhisïnga ísï exeani kʼuiripuechani eska Tata Diosï Jeoba na exeajka ka jánguarhintani exeni na engajtsïni xáni xénchajka Tata Diosï ka na engajtsïni jarhuatajka. Méntkisï engachi chkétakuarhitini pʼikuarhereenga o engachi kurhamarhikuarhienga sintsïni máteruecha sési exeeni, arhiantasïreengachi tarjeteechani o karteechani engajtsïni juchaari amiguecha íntsaapka. Jucha mismu exekuarhiskia eska Tata Diosï Jeoba mókuantasïreenga juchaari kómarhikuechani ka ístu na engajtsïni jarhuatapka ka uinhaperantani jiáni engachi uétarhinchani japka.

Iámu ini tiempu jimbo, Lesli ka ji kuentachi íntskukuarheska eska nájkiruka kánikua úkua ambe jauaka, kánikua jukaparhakueska arhutani tiempu parachi tsimarhani jarhani. Ístu, kánikua jukaparhakuesti tsípini ima ambeeri engachi méni újka ka sánderia engachi idioma ma jorhenguarhini jarhajka. Ka mándani chúrichi eratsentasïnga ambe ma engachi kánikua tsitika ka diosmaiamukuachi arhisïnga Tata Diosï Jeobani indeni ambe jimbo.

Paraksïni mátirku aianguni, no méni eratsespka eskani úpiringa misionerueni o máteru paisi jimbo nirani. Peruni exeska eska Tata Diosï Jeobaeri jarhuajperata jingoni, úsïngachi iámindu ambe úni ka kánikuani sési pʼikuarherasïnga indeni ambe jimbo. Májkueni eratsesïnga eska profeta Jeremíasi enga uandapka: “Oh Tata Diosï Jeoba, ískurini pakataska” (Jer. 20:7). Ísïisti, imajtsïni uánikua ambe íntskusti ka kóntperateechani engachi no erokuarhienga. ¡Asta ústi eskani abioni jatapiringa! Abioni jimbochi niraspka uánikua lugariicharhu, sánderu uánikuecharhu eskani na eranhaskeenga engani sapiipka. Niraskachi miiuani Beteliichani sinko kontinentiicharhu. Ka kánikuani agradeserikusïnga Leslini jimbokarini kánikua jarhuataska iámindu asignasioniicharhu.

Méntkisïchi miásïnga eskachi úsïnga ini ambe jimbokachi kánikua xénchasïni Tata Diosï Jeobani. Kóntperateecha engachi iásï jatsiaka, xarhatachesïndijtsïni na enga jindeuaka jiáni engachi irekaaka para méntkisï ka enga Tata Diosï Jeoba íntsauaka ambe engaksï xáni uétarhinchaaka imeechani engaksï tsípiti jaka (Sal. 145:16).