“No méni jandiajku jarhaspka”

JUCHIITI TAATIICHEERI EJEMPLU

Juchiiti taatiichaksï katolikueespti. Joperu engaksï exepka Bibliarhu eska Tata Diosïiri nombri jindeeska Jeoba, kánikua tsípikua jingonksï ueenaspti marhuakuni komu Jeobaeri testiguecha. Papa nóteru uaasïreendia Jesúsiiri imajeniichani ka imani ambe enga jorhenapka karpinterieri ambe úraspti para ma parti juchaari kʼumanchikuani, kʼumanchikua Reinueri ma úni. Inde kʼumanchikua Reinueri ueenaspti jarhani San Juan del Monte ireta ma enga Manila jaka ka enga kapitaliika Filipinas.

Uéxurhini 1952 jimbo andajpenuska ka papajtsïni ueenaspti jorhendani Tata Diosï Jeobaeri ambe, ísï eskaksï na úni japkia juchiiti tʼámu ermanuecha jingoni ka tanimu ermaneecha jingoni, engaksï sánderu kʼériika eska ji. Ka engani na sánderu kʼépkia, juchiiti taatireni arhispti eskani arhintapiringa Bibliani pauani pauani mándani kapitulu. Ka ístuchi marku jorhenguarhisïreenga máru publikasioniichani. Ka ménichanksï juchiniu pakarasïreendi sirkuitueri orhejtsïkutiicha ka beteliteecha. Ka eksperiensiechantsïni aianguasïreendi engajtsïni uinhaperanteenga ka sési pʼikuastanta iámu familiani. Ka inde ambejtsïni jarhuataspti exeni eska Tata Diosï Jeobani marhuakuni, sánderu jukaparhakuespka.

Juchiiti taatiichajtsïni ambakiti ejemplu ma jurajkuchesti, jimbokaksï tsípikua jingoni marhuakuspka Tata Diosï Jeobani. Uéxurhini 1971 jimbo, ísï tátsekua enga mama uarhipkia pʼamenchakua ma jimbo, papa ka ji prekursori regularichi úkuarhispka. Joperu 1973 jimbo, engani 20 uéxurhini jatiripkia, papajtu uarhispti. Kánikua jandiajkuni pʼikuarherasïreenga jimbokani nóteru jatsispkia papani ni mamani. Joperu míteni ambe enga Biblia uandajka “jarhuatasïndijtsïni parachi jucha sési anhaxurhitini jarhani”. Jo kánikuarini jarhuatasti parani no jukari kómu pʼikuarherani ka parani méntkisï Tata Diosï Jeoba jingoni jarhani (Ebr. 6:19). Ísï tátsekua enga papajtu uarhipkia, prekursori espesiali únhaspka isla de Coron enga Palawan jaka.

JANDIAJKU JARHASPKA ASIGNASIONIICHARHU ENGAKSÏ KÁNIKUA ÚKUA JUKAPKA

Engani Coron niárapka 21 jatiriispka. Ji siudadi ma jimbo tʼarhexespka, ísï jimbo engani niárapka islarhu exespka eska no xáni jarhasïreenga lusi, itsï, karruecha ni motuecha. Nájkirukaksï japka máru erachiicha, no ma prekursori jarhaspti, jimbosïni ménichani jandiajku uéreenga aianhpienga. Ima mesi engani niárapka kánikua úkua jukanchaspka jimbokani kánikua jirinhantasïreenga juchiiti familiani ka amiguechani. Mándani chúri, ueparini erancheasïreenga jóskuechani. Ka uékaxapkia jurajkuni juchiiti asignasionini ka kʼuanhatsentani juchiiti familia jingoni.

Engani no sési pʼikuarherani jarhenga, mintsita jingoni kómarhisïreenga Tata Diosï Jeobani. Ka miántasïreenga ambe engani xáni arhinteenga Bibliarhu ka publikasionicharhu engajtsïni kánikua jarhuateenga. Eratsentasïreenga Salmo 19:14 ka kuenta íntskukuarhespka eska Tata Diosï Jeoba jindeepiringa “juchiiti Kʼerenda ka engareni Euajpintajka” ístuni, eratsentasïreenga imani ambe enga ima jaiapanhintajka, ambe enga xáni kueraaka ka imeeri kualidadiichani. Ka jarhaspti rebista Aianhpiri enga arhinheenga “Usted nunca está solo”,a engareni kánikua jarhuatapka. Uánikua xanhari arhintaspka. Engani jandiajkuni jarheenga ísïispti enajkini Tata Diosï Jeoba jingoni jarheeni ka inde ambe kánikua jukaparhakuespti jimbokani úsïreenga kómarhini, estudiarini ka eratsentani.

Ísï tátsekua engani niárapka Coron orhejtsïkutijtsïni úspti ka jimbokani jandiajkuni jarhaspka jima, ji orhejtsïkusïreenga Eskuelani engajtsïni Jorhendajka Aianhpini, Tánguarhikua serbisiueri, Biblieri jorhenguarhikua kúnguarhikua jingoni ka Jorhenguarhikua Aianhpiri jingoni. Ka ístuni arhijtsïkperata nitamataraasïreenga mándani semana. Kánikuarini marhuachespti jimbokani no tiempu jatsisïreenga parani jandiajku pʼikuarherani jarhani.

Kánikuarini sési nichisïreendi aianhpikuarhu jini Coron, asta máru imeecha engani jorhendani japka niárasptiksï itsï atakuarhini. Joperu ístu jarhaspti máru ambe enga úkua jukapka. Pori ejemplu, ménisï chúskutasïreenga xanharani parani úni jima niárani nani engani aianhpepiringa, ka no mítesïreenga nani pakarapirini enga na chúripiringuia. Ístu, kúnguarhikua uánikua isleechani jatsiaspti para aianhpini. Ka parani úni jima niárani, jatsisïreenga parani lanchani jimbo nirani nájkiruka kánikua no sési jánhaskuarhipiringa ka ji no jorhenaspka nadariini, joperu Tata Diosï Jeobareni méntkisï kuájchakuspti ka jarhuatani. Tátsekua kuenta íntskukuarhespka eskarini Tata Diosï Jeoba prepararixapka para ima ambe engani sánderu orhepatini nitamanchapiringa juchiiti jimbanhi asignasionirhu.

PAPÚA NUEVA GUINEA

Uéxurhini 1978 jimbo, Papúa Nueva Guinea axanhaspka, enga norte de Australia jaka. Papúa Nueva Guinea uánikua juáteechaksï jarhasti ka xáni kʼésti eska España. Nájkirukaksï ma tanimu miionisï kʼuiripuecha irekapka, jukari 800 idioma uandanhasïreendi. Joperu xáni sési engaksï uánikua kʼuiripuecha uandeenga pidgin, Nueva Guinea anapu uandakuani enga ístu, ísï mítekateeka komu tok pisin.

Orhetajtsïni axaspti kúnguarhikua inglesi jimbo, enga Port Moresby jaka enga kapitaliika. Joperuni no ióni jarhaspka jima jimbokajtsïni móskuspka kúnguarhikua ma jimbo, enga tok pisin uandanheenga ka ueenaspka jorhenguarhini imani idiomani. Ambe engajtsïni jorhendeenga jirejiresï úrasïreenga aianhpikuarhu ka inde amberini jarhuataspti parani sóntku jorhenguarhini. No ióni jimbo úsïreengia nitamataraani arhijtsïkperateechani tok pisin jimbo. No jamberi ma uéxurhini jimbo engani Papúa Nueva Guinea niárapka, ískuni pakaraska jimbokajtsïni sirkuitueri orhejtsïkuti úspka ka arhisptijtsïni eskani kúnguarhikuechani pʼorhembiapiringa engaksï tok pisin uandeenga ka engaksï uánikua ireta sapiicha jimbo japka.

Kúnguarhikuechaksï kánikua jarharperatixapti. Ísï jimbo, jatsispka parani uánikua kʼéri tánguarhikua sirkuitueri uáni ka ístuni jatsisïreenga parani méntkuni mótsini jarhani. Ueenani jámani kánikua kómu pʼikuarherasïreenga jimbokani no miiupska, no uandasïreenga imani idiomani nijtuni míteapi pʼindekuechani. Ka jimbokaksï uánikua juáteecha jarhaspka, no úsïreenga pʼorhembiani kúnguarhikuechani karretera jimbo. Ísï jimbo mándani semana abioneta jimbo nirasïreenga. Uánikua xanhari jíjkusïni nirani jarheenga imani abioneta jimbo enga ísï kurhaakuarhienga enajki uekorhentapirinia ka inde ambeeri kánikua chérasïreendi, májkueni engani lancha jimbo nirani jarheenga.

Kúnguarhikuechani karta axakuasïreenga, jimboka kasi no nema jatsispka telefonu. Ka uánikua xanhari ji orhetkuni niárasïreenga ka eskaksï karteecha, ísï jimbosïni jima anapu kʼuiripuechani kurhakuauenga parajtsï jarhuatani erachiichani exeantani. Ka méntkisï engani exeantauenga, kánikua xénchperakua jingontsïni erokasïreendi ka inde amberini miátantasïreendi andisïni xáni jánguarhintani japi indeni ánchikuarhitani úni. Uánikua xanharu exeska na engareni jarhuatapka Tata Diosï Jeoba ka inde ambeerini ísï pʼikuastaspti enajki ima jindeeni jingoni japi.

Orheta xanhari engani nípka kúnguarhikua ma jimbo, enga isla Bougainville jimbo jaka, kánikua tsípikua jingondeni andarhieraspti temungurhiri ma. Ka kurhamarhisptijtsïni: “¿Miásïntsïni? ¡Jo, miásïngaksïni! ji jiáni aianguaspka Biblieri ambe, engani apenasi niárapka Port Moresby ka ma tiempu jorhendaaspka Biblieri ambe ka tátsekua jima anapu erachi ma seguiirispti jorhendaani ka itsï atakuarhisptiksï. Inde jindeespti ma kóntperata engani jatsiapka imani tanimu uéxurhini enga Papúa Nueva Guinea japka.

FAMILIA SAPICHU MA ENGA KÁNIKUA OKUPADU JAPKA

Uéxurhini 1978 jimbo, nintaspka Coron uératini joperuni tʼuini mítespkia pirenchini ma enga sési marhuakuni japka Tata Diosï Jeobani ka Adel arhinhasïreendi. Ima prekursora regulari máespti ka jandiajku tʼarhexeraaxapti tsimani uájpeechani, Samuel ka Shirley ka ístu imeri amambani kuidarixapti. Ka maiuni 1981 jimbo, ménderuni niraspka Filipinas parani Adel jingoni tembuchani. Ka ueenaspkachi tsimarhani marhuani komu prekursori regulari ka familiani kuidariini.

Ka nájkirukani familiani jatsipkia, uéxurhini 1983 jimbo, ménderuni prekursori espesiali únhaspka. Ka isla Linapacan axanhaspka enga Palawan jaka. Ka nájkiruka iauaniipka ka no ma Jeobaeri testigu jarhani, iáminduechachi jima mótsispka ka engachi ma uéxurhinisï páni japkia, Adeliiri amamba uarhispti. Kánikuajtsïni jarhuataspti uérani aianhpini parachi no xáni no sési pʼikuarherani. Ka uánikuecha engaksï Biblieri ambe jorhenguarhini japka, uékasïreendiksï nirani tánguarhikuecharhu, ísï jimbo uétarhixapti Kʼumanchikua Reinueri ma. Jimbochisï úspka kʼumanchikua sapichu ma, nani engachi úpiringa tánguarhini. Kánikuachi sési p’ikuarheraspka, jimbokachi apenasi tanimu uéxurhini páxapka jima ka 110 kʼuiripuechaksï niraspti tata Jesukristueri uarhikueri miántskuarhu. Ka uánikua imeechaksï niáraspti itsï atakuarhini ísï tátsekua engachi na uéntapkia.

Uéxurhini 1986 jimbo, Culion axanhaska isla ma jimbo nani engaksï uánikua kʼuiripuecha lepra pʼamencheenga. Tátsekua Adel prekursora espesiali únhaspti. Ueenani jámani chésïreengachi predikarikuani imani kʼuiripuechani engaksï lepra pʼamenchani japka. Joperu jima anapu erachiichajtsïni arhispti eskaksï intsïnhaspkia tratamientu ka eskajtsïni nóteru úpiringuia kéritani. Ka máru imeecha engaksï lepra pʼamenchapka, niraxaptiksïa tánguarhikuecharhu pirenchiiri kʼumanchikuarhu ma. Sóntkuchi pʼindespka, ka kánikuachi sési pʼikuarherasïreenga aianguani Biblieri erokuarhikuani, imani kʼuiripuechani engaksï ísï pʼikuarhereenga eska Tata Diosï no xénchasïreenga ni kʼuiripuecha. Kánikuachi sési pʼikuarherasïreenga exeani imani kʼuiripuechani na engaksï xáni tsípienga míteni eskaksï ma jurhiani nóteru pʼamenchakia (Luk. 5:​12, 13).

¿Ambe jarhuataspi juchaari sapiichani parakaksï úpiringa pʼindeni Culion? Adel ka ji pʼímarhiaspkachi tsimani Coron anapu pirenchi sapiichani, parajtsïni pámbetani aianhpini ka ísïksï juchaari sapiicha úni jatsiani ambakiti amiguechani. Samueli, Shirley ka i pirenchiichaksï kánikua tsípikua jingoni jorhendasïreendi máteruechani jurhimbikua ambe. Imeechaksï sapiichani jorhendasïreendi ka Adel ka ji, jorhendaasïrengachi taati jémbeechani. Ka niáraspkachi asta 11 familiechani jorhendaani. Joperu tátsekua, xáni uánikua kʼuiripuechaksï nirasïreendia tánguarhikuarhu engachi jatsipkia para jimbanhi kúnguarhikua ma úni.

Imani kúnguarhikuarhu jíjkusïni orhejtsïkutiipka. Ísï jimbo, Betelirini kurhachespti eskani mándani semana nitamatarapiringa tánguarhikuechani Culion nani engaksï ochu aianhpiricha japka ka ístu Marily engaksï nuebe aianhpiricha japka. Ka parachi Marily niárani tanimu orachi úsïreenga marirhisï. Tátsekua enga na kʼamakurhiingia tánguarhikua, juchiiti familia jingonchi juátarhisï iauani xanharasïreenga parachi Biblieri ambe jorhentpini ireta ma jimbo enga Halsey arhinheenga.

No ióni jimbo, uánikua Testiguechaksï jarhasptia Marily ka Halsey. Jimbochisï mándani ireta jimbo úpka Kʼumanchikua Reinueri ma. Májkueni eska Linapacan, erachiicha ka kʼuiripuecha engaksï jorhenguarhini japka Biblieri ambe, íntspisptiksï iámindu ambe ka ístuksï jarhuajpespti para Kʼumanchikua Reinueri únhani jini Marily. Inde saloni jindeespti para 200 kʼuiripuecha joperu úsïreendi sánderu kʼéndani para kʼéri tánguarhikuecha.

KÓMU PʼIKUARHERANI KA JANDIAJKU JOPERUNI TÁTSEKUA SÉSI PʼIKUARHERANTASÏNGA

Uéxurhini 1993 jimbo, juchaari sapiichaksï kʼésptia ka Adeli ka ji ueenaspkachi marhuani komu sirkuitueri orhejtsïkuti jini Filipinas. Tátsekua uéxurhini 2000 jimbo, pʼímarhisptijtsïni parani nirani Jorhentperakuarhu de Entrenamiento Ministerial parani exeni néna jorhentpini indeni eskuelarhu. Joperuni ji eratsesïreenga eskani no úpiringa úni indeni ánchikuarhitani, joperureni Adeli méntku uinhaperantani jarhasïreendi ka miátantani eskarini Tata Diosï Jeoba íntskupiringa uinhapikua parani ísï úni (Filip. 4:13). Ka Adelirini sési jimbosï arhini japti jimboka ima sési marhuakuxapka Tata Diosïni nájkiruka pʼamenchani japka.

Ka uéxurhini 2006 jimbo, mítespkachi eska Adeli párkinsoni kámasïreenga. Ískuchi pakaraspka engachi indeni ambe mítepka. arhispka Adelini eskani nóteru jorhentpepiringia indeni eskuelarhu parani úni kuidariini. Joperu imarini arhispti: “Jirinha doktorini ma engareni uaaka jarhuatani ini pʼamenchakua jingoni. Míteska eskajtsïni Jeoba jarhuataaka seguiriini juchaari asignasionirhu”. Seisi uéxurhini, Adeli seguiriispti marhuakuni Tata Diosï Jeobani tsípikua jingoni. Ka enga nóteru ueengia xanharani, aianhpisïreendi imeeri siia de ruedaru uératini. Ka ma o tsimani ambejku uandasïreendi tánguarhikuecharhu jimboka nóteru úsïreengia xáni uandani. Méntkisïksï axakuasïreendi mensajiichani paraksï arhini na eskaksï jukaparhareenga enga ima xáni tekaantani japka astaka uarhipka 2013 jimbo. Jukari 30 uéxurhini irekaspka juchiiti uarhiiti jingoni enga ambakiti kʼuiripu máepka ka uékpitiini. Joperu enga ima ísï uarhika ménderuni ueenaska kómu pʼikuarherani ka jandiajku.

Adeli uékapirindi eskani seguiripiringa juchiiti asignasionini jingoni ka ísï úspka, kánikua okupadu jarhaspka ka inde amberini jarhuataspti no xáni jandiajku pʼikuarherani. Uéxurhini 2014 uératini asta 2017 jamberi, pʼorhembiaspka kúnguarhikuechani engaksï tagalo uandeenga, ka engaksï imani paisiicha jimbo japka enga no sésikua japka para aianhpinhani. Ka ístuni pʼorhembiaspka kúnguarhikuechani engaksï ístu tagalo uandeenga jini Taiwán, Estados Unidos ka Canadá. Ka 2019 jimbo, arhistatspisïreenga Jorhentperakuarhu para Aianhpiricha Reinueri engaksï inglesi jimboepka jini India ka Tailandia. Kánikua sési pʼikuarherasïreenga indeni asignasionini jimbo. Engani sánderuni jánguarhintajka sési marhuakuni Jeobani, sánderuni sési pʼikuarherasïnga.

TATA DIOSÏJTSÏNI MÉNTKISÏ JARHUATASÏNDI

Mándani lugari jimbo engani marhuakia niáraska kánikua xénchaani erachiichani. Ísï jimbo, no fásiliisti jurajkuani. Joperuni jorhenguarhiska kánikua mintsikani Tata Diosï Jeobani. Mémindu exeskia na engareni jarhuatajka ka inde amberini jarhuatasïndi parani jiókuarhini enga ambe ma mójtakurhijka. Iásï, Filipinas marhuaxakaia komu prekursori espesiali, kánikua sési pʼikuarherasïnga ini jimbanhi kúnguarhikua jimbo enga niáraka ísïini eska juchiiti familia ka engareni kánikua xénchperakua jingoni kuidarijka. Ístuni kánikua sési pʼikuarherasïnga exeni eska Samueli ka Shirley májkuenksï mintsikasïnga Tata Diosïni eska imeecheeri amamba Adeli (3 Juanu 4).

Uánikua tsʼéjkukuechani nitamakuarhiaska, komu exeni juchiiti uarhiitini enga xáni komu uarhipka imeri pʼamenchakua jimbo. Ístuni jatsipka parani jiókuarhini uánikua ambe enga mójtakurhienga, joperuni exeska eska Tata Diosï Jeoba “no iauani jarhaska juchantsïni jingoni” (Úku. 17:27). Tata Diosï Jeoba iójkurhasti para jarhuataani ka uinhaperaantani imeri marhuariichani nájkirukaksï iauanisï jauaka (Is. 59:1). Kánikua agradesidu jarhaska Tata Diosï Jeobani jingoni. Jimboka ima jindeeska juchiiti kʼerenda ka méntkisï jindeeni jingoni jarhasti, no méni jandiajku jarhaska.