SEMANA 47
PIREKUA 38 Jeobakini xénchasïndi
“ Tʼuri kánikua jukaparhakueska”
“ Tʼuri kánikua jukaparhakueska” (DAN. 9:23).
AMBE ENGACHI JORHENGUARHIAKA
I artikulu jarhuatauati imeechani engaksï ísï pʼikuarherajka eska no sáni jukaparhakueska parakaksï kurhanguaka eska Tata Diosï Jeoba kánikua jukaparharaasïnga ka xénchaani.
1, 2. ¿Ambejtsïni jarhuataa seguru jarhani eskajtsïni Tata Diosï Jeoba kánikua jukaparharasïnga?
TATA DIOSÏ JEOBA iámindu imeeri marhuariichani kánikua jukaparharaasïndi. Joperu jarhastiksï máru engaksï ísï pʼikuarherajka eska no nema xénchasïnga ka ísïksï pʼikuarherasïndi jimbokaksï no sési kánhaska oksï ísï pʼikuastani eskaksï no ma ambe marhuasïnga. Engari ísï pʼikuarherajka, ¿ambekini jarhuataa parari seguru jarhani eskakeni Tata Diosï Jeoba kánikua jukaparhasïnga?
2 Uaakari arhiantani imani karakateechani engaksï xarhatajka na enga uéjka Tata Diosï Jeoba eskachi kámberaaka. Enga Jesúsi sési kámpipka ka respetu jingoni, xarhataxapti eska imeeri Taati kánikua jukaparharaasïnga kaxumbitiichani engaksï no kʼéramakuarhijka (Juanu 5:19; Ebr. 1:3). Ini artikulu jimbo tsimani ambechi exeni jauaka: 1) ambe úspi Jesúsi para xarhatani eska Tata Diosï Jeoba jukaparharaasïnga kʼuiripuechani ka 2) nénari uaa seguru jarhani eskakeni Tata Diosï Jeoba tʼungintu jukaparharasïnga (Ageo 2:7).
AMBE ÚSPI JESÚSI PARA XARHATANI ESKA TATA DIOSÏ JEOBA JUKAPARHARAASÏNGA KʼUIRIPUECHANI
3. ¿Néna kaaspi Jesúsi Galilea anapuechani engaksï nípka arhini eska jarhuataapiringa?
3 Enga Jesúsi Galilea aianhpini japka, kʼuiripuechaksï méntkisï nirasïreendi andarhierani paraka ima jorhendaapiringa ka tsinaani. Ka Jesúsi exespti eskaksï ima kʼuiripuecha “no sési kánhasïreenga ka jandiajkuksï jarhani komueska karichiicha engaksï no jatsika karichi erangutini” (Mat. 9:36). Relijioniiri orhejtsïkutiichaksï no sáni xénchaasïreendi indeni kʼuiripuechani, ísïksï exeasïreendi enajkiksï no ma ambe jánhaskeeni níjtu míteni “ambe enga Lei uandajka” (Juanu 7:47-49). Joperu Jesúsi sési kaaspti ka jurajkusïreendi máru ambe para jorhendaani ka tsinaani (Mat. 9:35). Ístu para sánderu uánikua kʼuiripuechani jarhuataani, jorhendaaspti imeeri apostoliichani paraksï aianhpini ka íntsaaspti uinhapikua paraksï ambakerantani kʼuiripuechani (Mat. 10:5-8).
4. ¿Ambechi jorhenguarhisïni na enga Jesúsi kaapka kʼuiripuechani engaksï kaxumbitiipka?
4 Jesúsi sési kaaspti ka respetu xarhatakuaspti imani kʼuiripuechani engaksï máteruecha no xénchauenga. Ísïisti, Jesúsi xarhataxapti eska ima jukaparharasïreenga ka ístu imeeri Taati. Ísï jimbo, engari tʼu marhuakuni jaka Tata Jeobani ka ísïiri pʼikuarherani enajkiri no jukaparha, miá na enga Jesúsi kaapka imeechani engaksï kaxumbitiipka ka engaksï uékeenga imeeri ambe jorhenguarhini. Inde ambekini jarhuataati exeni eskakeni Tata Diosï Jeoba kánikua xénchasïnga.
5. Enga Jesúsi Galilea jámani japka, ¿ambe nitamakuarhixapi jima anapu uarhiiti ma?
5 Jesúsi no solu jima jorhentpisïreendi ka jarhuajpeni enga uánikua kʼuiripu japiringa, sino ístu mándani kʼuiripuni. Komu enga Galilea jámani japka aianhpini, uarhiiti ma jarhaspti enga 12 uéxurhini páni japkia pʼamenchani emorrajia (Mar. 5:25). Ka jimboka inde uarhiiti pʼamenchaxapka, lei uandasïreendi eska no pímbinhasï jarhaspka, ísï jimbo, né uéjki enga pʼárhipiringa imajtu nóteru pímbinhasïipirindia, jiájkani inde uarhiiti nóteru nireendia kʼuínchikuecharhu ka ni jima engaksï judiuecha tánguarhienga paraksï Tata Diosïni kómarhini (Lev. 15:19, 25). I uarhiiti kánikua no sési nitamakuarhixapti, jimboka no solu pʼamenchaxapka sino ístu kánikua kómu pʼikuarherasïreendi (Mar. 5:26).
6. ¿Néna tsinakuarhispi uarhiiti ma enga emorrajia pʼamencheenga?
6 I uarhiiti uékasïreendi eska Jesúsi tsinapiringa. Joperu jamberi kʼuratsendi imeeri pʼamenchakuani jimbo ka jimbosï no arhipti Jesúsini eska tsinapiringa o jamberi chéendi eska Jesúsi xukapiringa jimboka uarhiiti jimeesïsï niraspka enga uánikua kʼuiripu japka ka no pímbinhasï jarhani. Jimbosï imeeri xukuparhakuani pʼárhikupti jimboka mintsikasïreenga eska úpiringa tsinani (Mar. 5:27, 28). Ka tsinakuarhispti. Jiájkani enga Jesúsi kurhanguarhipka né pʼárhispi, ima uarhiiti uandantaspti eska ima pʼárhispka. ¿Ka ambe úspti Jesúsi?
7. ¿Néna kámaspi Jesúsi uarhiitini? (Markusï 5:34).
7 Jesúsi kuenta íntskukuarhispti eska i ‘uarhiiti manarantaxapka xáni chéni’, ísï jimbo, xénchperakua jingoni kámaspti ka respetu jingoni uandajpaspti (Mar. 5:33). Asta arhispti “ija”, joperu no ísku jatinisï ísï arhi japti, sánderu sési xarhatakuxapti eska meru xénchasïreenga ka pʼamojkuni (arhinta je Markusï 5:34). I ueltajkusï arhijti Bibliarhu enga Jesúsi uandapka “ija”, jamberi ísï úpti jimboka exespka uarhiitini na enga xáni manarantani japka chéni. Enga Jesúsi no káni sési kámapiringa nájkiruka tsinapiringa, ima uarhiiti útasï no sési pʼikuarherani japirindi jimboka no aiangupiringa andisï pʼárhipi. Joperu Jesúsi no solu ambakerantaspti, sino ístu jarhuataspti exeni eska imeeri Taati auandarhu anapu kánikua xénchasïreenga ka ima uarhiiti kánikua sési pʼikuarheraspti.
8. ¿Ambe xáni nitamakuarhispi Brasil anapu pirenchi ma?
8 Ini jurhiatikuecha jimbojtu máru Tata Diosï Jeobaeri marhuariichaksï pʼamenchasïndi ka ísïksï pʼikuarherani enajkiksï no ma ambe marhuajki ka kómu pʼikuarherani. Ju je exeni ambe enga nitamakuarhipka Renataa Brasil anapu prekursora ma. Ima no jukaaspti jantsiriicha ni jájki ma, jimboka ísï andajpenuspka. Ima uandantasïndi: “Eskuelarhu teresmarhusïreendijtsïni ka arhinchani. Ka imani ambejtsïni arhisïreendi engareni meru no sési pʼikuasteenga. Asta juchiiti familiariichajtsïni ménisï menusi úsïreendi”.
9. ¿Néna niáraspi kurhanguni Renata eska Tata Jeoba kánikua jukaparharasïnga?
9 ¿Ambe jarhuataspi Renatani? Enga Jeobaeri testiguepkia, kúnguarhikuarhu anapu erachiichaksï xénchperakua jingoni kámaspti ka jarhuatasptiksï exeni eska Tata Diosï Jeoba kánikua jukaparharasïnga. Renata uandasïndi: “Engani jatsipiringa para karaani imeeri nombriichani engajtsïni xáni jarhuataka, ¡no méni kʼamarapiringa! Ji kánikua sési pʼikuarherasïnga jimbokarini Tata Diosï ambakiti familia ma íntskuska”. Ambe engaksï xáni úka erachiicha Renata jimbo, kurhangusti eska Tata Jeoba kánikua jukaparharasïnga.
10. ¿Néna irekaxapi María Magdalena? (Ístu exea je imajeniichani).
10 Ka jarhasti máteru ejemplu enga Jesúsi ambakerantapka kʼuiripuni ma: María Magdalenani engaksï siete demoniuecha incharhitini japka (Luk. 8:2). Jamberi inde demoniuechaksï ueendi eska ima no sési jámapiringa, jimboksïsï kʼuiripuecha no andarhiereendi. Jiáni engaksï demoniuecha incharhitini japka, María Magdalena chéendi ka ísï pʼikuarherani eska no nema úpiringa jarhuatani ni xénchani. Joperu enga Jesúsi na petarhitaantapkia demoniuechani, ima ueenaspti mintsikani ka chúxapani. Jesúsi jarhuataspti exeni eska Tata Diosï Jeoba xénchasïreenga, joperu ju je exeni ambe máteru ambe úspi imani jimbo.
¿Ambe úspi Jesúsi para jarhuatani María Magdalenani exeni eska Tata Diosï kánikua jukaparharasïreenga? (Exea párrafuechani 10 ka 11).
11. ¿Néna xarhatakuspi Jesúsi María Magdalenani eska Tata Diosï Jeoba kánikua xénchasïreenga? (Ístu exea imajeniichani).
11 Jesúsi mámaru ambe úspti para xarhatakuni María Magdalenani eska Tata Diosï Jeoba kánikua xénchasïreenga (Juanu 20:11-18). Pori ejemplu, Jesúsi arhispti eska nipiringa pámbetani aianhpini.b Jimbosï María Magdalena jamberi jorhenguarhiendi ambe enga Jesúsi jorhentpienga. Ístu enga Jesúsi na tsíntapkia, imani jingoni ueenaspti uandontskuarheni ka arhispti eska ima nipiringa aianguani máteru apostoliichani eska Jesúsi tsíntaspkia.
12. ¿Andisï Lidia ísï pʼikuarhereeni enajki no nema úpirini xénchani?
12 Májkueni eska María Magdalena, iásïjtu uánikua kʼuiripuechaksï jarhasti engaksï jandiajku pʼikuarherajka. Pirenchi Lidia España anapu uandasïndi eska imeeri amamba uékasïreenga tsïtani. Ka nájkiruka no ísï úpkia, Lidia miásïndi eska amamba no sáni uandanhiasïreenga imani jimbo jiáni enga sapichuepka ka eska imani ambe arhisïreenga enga meru no sési pʼikuasteenga, ístu uandantasïndi: “Ambe engajkuni uékeenga jindeespti eskajtsïni sési kámapiringa ka xénchani, joperuni chésïreenga jimbokarini ióntki mama arhisïreenga eskani no ambakispka ka eskani no jukanchaspka parareni nema sési kámani”.
13. ¿Ambe jarhuataspi Lidiani exeni eska Tata Diosï Jeoba kánikua xénchasïnga?
13 Joperu kánikua ménderuenisptia enga Lidia ueenapka jorhenguarhini Biblieri ambe, jimboka iásï kómarhisïreenga Tata Diosïni, arhintani Bibliani ka ístu erachiichaksï sési kámasïreendi. I tanimu ambe jarhuataspti exeni eska Tata Diosï Jeoba jukaparharasïreenga ka xénchani. Lidia uandasïndi: “Juchiiti acheetirini someni arhisïndi na engareni xáni xénchajka ka eskani ambakiti kʼuiripu máeska. Ístuni jatsiaska amiguechani engaksï májkueni újka ka engajtsïni ístu xénchajka”. ¿Chá míteski nemani enga uétarhinchani jaka exeni eska Tata Diosï Jeoba kánikua xénchasïnga? ¿Nénajtsï uaa jarhuatani?
AMBEKINI JARHUATAA ÍSÏ EXEKUARHINI ESKAKINI TATA JEOBA NA EXEJKA
14. ¿Ambejtsïni jorhendasïni 1 Samuel 16:7 na enga eratsejka Tata Diosï Jeoba? (Ístu exe rekuadruni “¿Andisï Tata Diosï Jeoba xáni jukaparharaajki imeechani engaksï marhuakujka?”).
14 Miá eska Tata Jeoba no májkueni eratsesïnga eska kʼuiripuecha (arhinta 1 Samuel 16:7). Kʼuiripuechaksï jukaparharasïndi nemani jimboka sési jáxeska, jatsikuarheriini ka karrera ma estudiarini, joperu Tata Diosï Jeoba no indeni ambe exesïndi (Is. 55:8, 9). Ísï jimbo, ante deri eratseni eskari no ma ambe jukaparhakueska, uaakari arhintani Bibliarhu Elíasiiri ambe, Noemíiri ka Anaeri. Indeechaksï ísï pʼikuarherasïreendi enajkiksï no sáni jukaparhakuepi, joperu Tata Jeoba exeraaspti eska kánikua jukaparharaasïreenga ka xénchaani. Ísturi uaaka karaani imani jurhiatikuechani engakeni Tata Diosï Jeoba xarhatacheka eskakeni kánikua xénchasïnga ka jukaparharani. Ka ísturi uaaka arhiantani publikasionichani engakeni jarhuataaka seguru pʼikuarherani o xénchakuarhini.c
15. ¿Andisï Tata Diosï Jeoba arhipi Danielini: “Tʼuri kánikua jukaparhakueska”? (Daniel 9:23).
15 Asï mirikurhi eskakeni Tata Jeoba kánikua xénchasïnga jimbokari tʼu sési marhuakuxaka. Enga Danieli sáno 100 uéxurhini jatiriipkia ima kánikua no sési pʼikuarheraspti ka kuatarani (Dan. 9:20, 21). Ka paraka Tata Jeoba uinhaperantapiringa axakuspti ánjeli Gabrielini paraka arhipiringa eska kurhaaspka imeeri kómarhikuani ka ístu para arhini: “Tʼuri kánikua jukaparhakueska” (arhinta Daniel 9:23). ¿Andisï Tata Diosï xáni xéncheeni? Jimboka Danieli méntkisï uékaspti úni ambe enga sési jaka ka jimboka sési marhuakuxapka (Ezeq. 14:14). Ka Tata Diosï Jeoba úspti eska Danieliiri ambe karakata pakarapiringa parajtsïni sési pʼikuastantani (Rom. 15:4). Jiájkani, Tata Jeoba kurhauasïndi chiiti kómarhikuechani ka jukaparharasïndikini jimbokari méntkisï sési ambe úsïnga ka jimbokari sési marhuakuxaka (Miq. 6:8, noteecha; Ebr. 6:10).
16. ¿Ambekini jarhuataa ísï exeni Tata Diosï Jeobani komueska Taati ma engakeni xénchajka? (Ístu exe imajenini).
16 Jánguarhinta exeni eska Tata Jeoba ísïiska komueska Taati ma engakeni kánikua xénchajka. Ima no exesïndi ambe engari no sési újka, sánderu sési imakeni uékasïndi jarhuatani (Sal. 130:3; Mat. 7:11; Luk. 12:6, 7). Eratsentani ini ambe, jarhuataastia uánikua kʼuiripuechani paraksï nóteru ísï pʼikuarherania eska ióntki. Ju je exeni pirenchi Martineeri ejempluni enga España anapueka; desde iónisïa uámba no sési arhisïreendi ka pirenchi niáraspti ísï pʼikuarherani enajki no ma ambe marhuaueni ka eska no nema xénchasïreenga. Ima uandantasïndi: “Méntkisï ísï pʼikuarherani jarhasïnga enajkini no ma ambe marhuajki, joperuni jánguarhintasïnga eratseni eskarini Tata Diosï Jeoba kamanharhitixaka ka eskarini xénchasïnga ka kuájchakuni” (Sal. 28:9). Lauren, Sudáfrica anapu, someni miásïndi ini ambe: “Tata Jeobareni uékperakua jingoni antsitasti ka jarhuataxatirini sési marhuakuni, ístureni jarhuatasïndi parani máteruechani jorhendaani Biblieri ambe. Jiájkani i ambe xarhatasïndi eskani ji kánikua marhuakuxaka ka eskarini ima kánikua jukaparharasïnga” (Os. 11:4).
17. ¿Ambekini uaa jarhuatani parari seguru jarhani eskakeni Tata Jeoba jaiapanhentasïnga? (Salmo 5:12; ístu exe imajenini).
17 Seguru ja eskakeni Tata Jeoba jaiapanhentasïnga (arhinta Salmo 5:12). Dabidi uandaspti eska Tata Jeoba jaiapanheantasïnga imeechani engaksï sési jámajka ka eska kʼéri eskudu ma jingoni kuájchakuasïnga. Ísï jimbo, engari tʼu seguru jauaka eskakeni Tata Diosï Jeoba jaiapanhentaxaka ka jarhuatani, uaati eskari no ísï pʼikuarherani eskari no ma ambe marhuasïnga. ¿Nénari uaa míteni sini Tata Diosï Jeobakini jaiapanhentasïni? Imeeri Karakata jimbo úsïngachi exeni na engajtsïni xáni xénchajka. Ístu úraasïndi orhejtsïkutiichani, juchaari amiguechani ka ístu máteru erachiichani parajtsïni jarhuatani miántani na engachi xáni jukaparhakueka para Tata Diosï Jeoba. Joperu, ¿amberi jatsiski para úni jiáni engakeni nema uinhaperantaaka?
Míteni eskajtsïni Tata Jeoba xénchasïnga, jarhuatasïndijtsïni parachi seguru pʼikuarherani ka exeni eskachi uánikua ambe úsïnga úni. (Exe párrafu 16).
18. Engaksïni sési jásï ambe arhiaka, ¿andiresï jatsi para jakajkukuani?
18 Engaksïni sési ambe arhiaka ima kʼuiripuecha engaksïni míteka ka xénchani, jakajkukua. Miá, Tata Jeoba indeni kʼuiripuechani úraani jati parakeni xarhatacheni eskakeni xénchasïnga. Martina ístu uandasïndi: “Para ji no fásiliisti jakajkuni engajtsïni máteruecha sési jásï ambe arhijka, joperuni jatsiska para ísï úni, jimboka Tata Diosï Jeoba uékasïnga eskani jakajkuaka indeni ambe”. Ístu, orhejtsïkutiichaksï xénchperakua jingoni jarhuatasti ka iásï prekursorestia ka imeo uératini jarhuajpexati Beteli.
19. ¿Andiresï uaa seguru jarhani eskakeni Tata Jeoba kánikua jukaparharaasïnga?
19 Jesúsi sési kaaspti kʼuiripuechani parajtsïni jorhendani eskajtsïni juchaari Taati auandarhu anapu kánikua jukaparharasïnga (Luk. 12:24). Ísï jimbo, asï méni mirikurhi eskakeni Tata Diosï Jeoba tʼungini kánikua jukaparharasïnga. Ístu jánguarhinta jarhuataani máteruechani parakaksï exeaka eska imeechajtu kánikua jukaparharaasïnga.
PIREKUA 139 ¿Eranhaskasïndi jimbanhi parhakpinini?
a Máru nombriichaksï mójtakurhisti.
b Máru uarhiitiicha engaksï Jesúsi jingoni jámeenga aianhpini ka engaksï úrapka imeecheeri jatsikuarhekua ambe paraksï jarhuatani Jesúsini ka apostoliichani, ma jindeespti María Magdalena (Mat. 27:55, 56; Luk. 8:1-3).
c Exe je librurhu Acerquémonos a Jehová, kapitulu 24 jimbo ka tekstuechani ka ejempluechani engaksï ini títulu jimbo jaka “No jakajkuni” librurhu Bibliarhu anapu karakateecha para kristianuecheeri irekua.