Uikixkandani: Urakani Ian, Florida, EUA septiembri 2022 (Sean Rayford/Getty Images); terujkanirhu: Naandi ma ka imeeri uájpa, sïpakuarhixatiksï, Donetsk, Ucrania, juliu 2022 (Alex Chan Tsz Yuk/SOPA Images/LightRocket via Getty Images); jurhijkandani: Uánikua kʼuiripuechaksï exexati sinksï COVID pʼiraski, Beijing, China, abrili 2022 (Kevin Frayer/Getty Images)
¡MÉNTKISÏ JINGONTKU JA JE!
2022: Uéxurhini enga kánikua uandanhiatapka kʼuiripuni | ¿Ambe uandasïni Biblia?
Uéxurhini 2022 jimbo, notisiecharhu ini ambejkuchisï kurhaapka: guerreecheeri ambe, no jarhani sentabu ka enga xáni no sési úkuarhini japka klima jimbo. Joperu Bibliajkusï uandajti andisï i ambe úkuarhini jaki.
Ambe arhikuekasïni inde ambe enga xáni úkuarhika 2022
Ambe enga xáni úkuarhika últimu uéxurhini jimbo, xarhatasïndi eskachi irekaxaka imani jurhiatikuechani jimbo enga Biblia arhiajka ‘últimu jurhiatikuecha’ (2 Timoteo 3:1). Íksï últimu jurhiatikuecha ueenakuarhisti 1914 jimbo. Exe je na enga i ambe enga úkuarhini jaka, sési terukuntajka indeni ambe jingoni enga Biblia tʼuini uandarini japkia eska úkuarhipiringa ini jurhiatikuechani jimbo:
‘Guerreecha’ (Mateu 24:6).
“Uéxurhini 2022 jimbo, ménderuksï ueenasti jarhani guerrecha Europa”.a
Exe je artikuluni “Rusia inchaakusti Ucrania”.
“Kʼarhingua ambe” (Mateu 24:7).
“Uéxurhini 2022 jimbo, kánikua kʼarhingua jarhaspti iápurisï”.b
Exe je artikuluni “Guerra enga Ukrania úkuarhini jaka úxati eska nóteru xáni tʼirekua jauakia”.
Kʼérati ‘pʼamenchakuecha’ (Lukasʌ 21:11).
“Enga ménderu ueenapka jarhani polio, viruela del mono ka COVID-19, íksï pʼamenchakuecha kánikua no sési úkuasti kʼuiripuechani ka xarharasïndi eska náki uéjki kʼuiripu ma uaaka sóntku kérikuarhini”.c
Exe je artikuluni “COVID jimbo, 6 miioni kʼuiripuechaksï uarhistia”.
“Chérpikueni jásï ambe” (Lukasʌ 21:11).
“Kánikua aparhikuarhini, kʼarhikʼarhindeni iápurisï, kurhundeni ka iurhentpekua ambe. Kʼuiripuechaksï méntku miáni pakaraati emendani 2022 jimboka kánikua no sési ambe úkuarhispti jiánisï klima jimbo, uánikua kʼuiripuechaksï uarhispti ka ístu uánikua máteruechaksï jurajkuaspti imeecheeri kʼumanchikuechani ka máteru naniisïksï niraspti mótsini”.d
Exe je artikuluni “Iásï sánderu aparhikuarhisïndia iámu parhakpinirhu”.
“No sési kámberanhani” (Lukasï 21:9, TNM).
“Uéxurhini 2022 jimbo, kʼuiripuechaksï méntku no sáni konformi jarhaspti gobiernuechani jingoni jimboka sánderu jukaparhaskia ambe ma ka no jarhani sentabu”.e
Exe je artikuluni “Iámindu ambe sánderu jukaparhaxati interu parhakpinirhu”.
¿Ambe úkuarhia máteru uéxurhini?
No nema uaati uandani ambe meru úkuarhia 2023 jimbo. Joperu ambe engachi kʼóru míteka, jindeesti eska no ióni jimbo Tata Diosïiri Reinu, enga auandarhu jaka, ambakiti ambe uaaka Echerirhu (Daniel 2:44). I gobiernu kénditaati iámindu imani ambe enga újka eskaksï kʼuiripuecha kómu nitamakuarhiaka ka uaati eska úkuarhiaka ambe enga Tata Diosï uékani jaka úni Echerirhu (Mateu 6:9, 10).
Ju je seguiriini ‘jingontku jarhani’ ísï eska tata Jesukristu na uandapka, jimboka i ambe enga iásï úkuarhini jaka parhakpinirhu, xarhatasïndi eskaksï Biblieri profesiecha úkuarhixakaia (Markusʌ 13:37). Uaakajtsïni karachini parajtsï míteni na engaksïni Biblia uaaka jarhuatani iásï, ka ístu, parajtsï míteni na engaksïni uaaka jarhuatani chánksïni ka chaari familiani parajtsï seguru jarhani eska ambakiti ambe úkuarhiaka sánderu orhepatini.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.