Abraani... Tata Diosïri amigu

MAPURHU engaksï kʼuiripuecha nípka irekani enga na nitamapkia Kʼéri Janikua, arhinhasïrendi Uri. Uri, kʼéri ireta máespti ka ambarhati kʼumanchikuechaksï jarhaspti. Joperu jima anapuechaksï kómarhiasïrendi diosï no jurhimbitichani. Babeli anapuechajtuksï májkueni úsïrendi. Uri ka Babeli anapuecha nóksï májkuenispti eska Noe ka imeri uájpa Semi, engaksï méntkisï Jeobani marhuakupka.

Noe uarhispti 350 uéxurhini tátsekua enga nitamapkia kʼéri janikua, tsimani uéxurhini tátsekua, andajpenuspti i achati enga dibujurhu jaka. Tata Diosï kánikua uékasïrendi i achamasïni. Abraani arhinhasïrendi ka imeri familiani jingoni irekaspti, ireta Uri.

Ma jurhiatikua Jeoba arhispti Abraanini: ‘Uéaku Uri uératini ka jurajkua chíti parientechani, ka ni imani paisini jimbo engakini arhiaka’. ¿Kurhajchaspi Tata Diosïni ka jurajkuspi iámindu ambe enga xáni jatsikuarhepka Uri? Jo. Ka jimboka méntkisï kurhajchasïrenga Tata Diosïni, niáraspti mítikuarhini komueska Tata Diosïri amigu.

Enga Abraani uéakupkia Uri, nirasptiksï imani jingoni máru imeri familiemba. Niraspti témba Sara, tátemba Tare ka sobrinuemba Loti. Tátsekua, niárasptiksï ireta Arani ka jima uarhispti Tare. Ireta Uri iauani pakarasptia.

Tátsekua Abraani ka imeri familiemba uéakuntasptiksï Arani ka niárasptiksï ireta Kanaani. Jima, Jeoba arhispti: ‘I jindesti echeri engani íntskuauaka chíti uájpechani’. Abraani, Kanaani pakaraspti irekani ka kʼumanchikua sïkuiriri úkatechani jimbo irekasïrendi.

Tata Diosï kánikua kóndispti Abraanini, ka niáraspti uánikua karichichani kaani ka ístu máteru jásï animalichani, ka sientu jimbo jántspirichani. Joperu Abraani ka Sara nóksï ma uájpani kánguarhisïrendi.

Enga Abraani 99 uéxurhini jatiripka, Jeoba arhispti: ‘Aiachesïngakini eskari niáraka jindeni uánikua nasionicheri tátemba’. Joperu, ¿néna úkuarhipirini i ambe? Jimboka, Abraani ka Sara tʼarhepispkaksïa paraksï kánguarhini uájpani ma.