Karta ma engajtsïni jarhuatajka tekaantani asta kʼamarhukuni jamberi

1, 2. a) Jiáni enga apostoli Pablu judiuechani karakuapka, ¿nénaksï irekuarhixapi imeecha? b) ¿Andisï xáni marhuakuapi inde karakata?

ENGA Jesúsi na uarhipkia, kristianuecha engaksï judiuepka niárasptiksï kánikua no sési nitamakuarhini. Ísï sáni tátsekua enga Jerusaléni na uaxastanhapkia kúnguarhikua ueenasptiksï kánikua no sési kánhani (Úku. 8:1). Ka 20 uéxurhini ísï tátsekua, Kristueri chúxapatiichaksï kánikua no sési nitamakuarhispti jimboka iámu Judeaisï kʼarhingua jarhaspka ka i ambe úkuarhispti jimboka no jarhaspka sentabu (Úku. 11:27-30). Joperu uéxurhini 61 jimboisï, kristianuechaksï nóteru no sési kánhaxaptia, ka úsïngachi ísï uandani jimbokaksï tátsekua kánikua no sési nitamakuarhipirindi. Jiáni engaksï pínandikua jatsipka, apostoli Pablu karta ma karakuaspti enga niárapiringa kánikua jarhuatani.

² Ima karta enga Pablu karakuapka judiuechani, kánikua jarhuataaspti jimbokaksï no ióni jimbo kánikua no sési kánhapiringa. Pablu imani ambe karakuaspti enga kánikua jarhuatapiringa kristianuechani paraksï úni tekaantani iámindu ambe engaksï nitamakuarhipiringa jimboka no ióni jimbo kʼamajkunhapiringia Jerusaléni ísï eska Jesúsi na uandapka (Luk. 21:20). Pablu no mítetixapti na jatini meru úkuarhipirini inde ambe ka nijtu ima kristianuecha mítetini japi. Jiájkani úpirindiksï sési úrani imeecheeri tiempuni paraksï sánderu mintsikani Tata Diosïni ka únksï tekaantani ka ísïksï listu jarhani (Ebr. 10:25; 12:1, 2).

3. ¿Andisï sési jaua eskachi ini jurhiatikuecha jimbo exeaka ambe enga arhijka Karakata para Ebreu Uandariicha?

³ No ióni jimbo, juchachi sánderu no sési jásï ambe nitamakuarhiaka eska ima kristianu judiuecha (Mat. 24:21; Apok. 16:14, 16). Ima konsejuecha enga Tata Diosï Jeoba imeechani íntskuapka, ístujtsïni uaati jarhuatani juchantsïni. Ísï jimbo, ju je exeani máru konsejuechani.

“JU JE SEGUIRIINI JARHANI SÁNDERU JÁNHASKANI”

4. ¿Ambeksï xáni úkua jukanchaspi judiuecha engaksï kristianu úkuarhipka? (Ístu exe je imajenini).

⁴ Ima judiuecha enga apostoli Pablu karakuapka jurajkusptiksïa judiuecheeri relijionini ka iásïksï kristianu úkuarhisptia. Joperu inde ambe no fásiliispti para imeecha jimbokaksï judiuecha jindeespka ireta ma enga Tata Diosï Jeoba erakupka. Uánikua uéxurhiniichani jimbo Jerusaléni kʼéri ireta máespti, jima jarhasïreenga ima rei enga Tata Diosï Jeoba erakuenga ka ístu jima jarhaspti templu. Ima ambakiti judiuechaksï ísï úsïreendi eska Moisésiiri Lei na uandeenga ka ístuksï kurhajchasïreendi relijioniiri anapu orhejtsïkutiichani. Úsïreendiksï ambe engaksï imeecha jorhentpienga. Uánikua pʼindekuechanksï jatsiaspti komueska tʼirekueri ambe, sirkunsisioniiri ka ístu néna kaani uérakua anapuechani. Máteru ambe jimbo engaksï úkua jukanchapka jindeespti jimboka ísï tátsekua enga Jesúsi na uarhipkia, Tata Diosï Jeoba nóteru uékasïreendia eskaksï imeecha templurhu kéjtsïtakupiringa imani. Iámindu i ambe enga mójtakurhipka no fásiliispti para ima judiuecha engaksï kristianu úkuarhipkia ka engaksï pʼindepka imani ambe úni enga lei uandeenga (Ebr. 10:1, 4, 10). Asta apostoli Pedru jamberi úkua jukanchaspti (Úku. 10:9-14; Gal. 2:11-14). Ka paraksï sánderu úkua jukanchania, relijioniiri orhejtsïkutiichaksï ueenaspti no sési kaani imani kristianuechani jimbokaksï iásï máteru ambe jakajkusïrengia ka nóteru imani ambeia engaksï judiuecha jakajkuenga.

5. ¿Nákiispiksï ima tsimani grupuecha engaksï no sési kaani japka kristianuechani?

⁵ Jarhasptiksï tsimani grupuecha engaksï ueenapka no sési kaani imani judiuechani engaksï kristianu úkuarhipka. Máruksï jindeespti relijioniiri orhejtsïkutiicha engaksï ísï exeauenga kristianuechani komueska apostateecha. Ka ístuksï jarhaspti ima kristianuecha engaksï afuersa uékeenga eskaksï seguiripiringa úni máru ambe enga Moisésiiri Lei uandeenga, jamberiksï ísï uékeendi úni paraksï nóteru no sési kánhania (Gal. 6:12). ¿Ambe jarhuataapirini imani kristianuechani paraksï úni sési tekaantani?

6. ¿Ambe arhiaspi Pablu imeechani engaksï ebreu uandeenga? (Ebreu 5:14–6:1).

⁶ Imani karta jimbo enga Pablu ebreu uandariichani karakuapka arhiaspti eskaksï jánguarhintapiringa arhintani Tata Diosïiri karakatani ka eratsentani (arhinta je Ebreu 5:14–6:1). Úraaspti Karakateechani engaksï Ebreu jimbo Karanhapka para aianguani eska sánderu ambakiti ambeespka na engaksï kristianuecha kómarhienga Tata Diosïni ka eska na engaksï ueenga judiuecha.a Pablu mítespti eska kánikua jarhuataapiringa engaksï imeecha sánderu jorhenguarhipiringa ka sési kurhanguntani ambe enga arhienga karakata paraksï úni exeni ambe enga chkuanderakua ambeepiringa ka ísïksï no jurajkuni jurhimbikuani.

7. ¿Ambeksï uandasïni uánikua kʼuiripuecha ka nénajtsïni kámasïni?

⁷ Jarhastiksï uánikua kʼuiripuecha engajtsïni no sési kámajka ka imani ambeksï uandani enga no terukuntajka Tata Diosï Jeobaeri juramukuecha jingoni. Imeechaksï uandasïndi eskachi jucha no sáni tekaakuantasïnga ka no sési kaani imani kʼuiripuechani engaksï ísku jándikua ambe niátajka, ka eskachi nóteru jurajkuasïngia paraksï Jeobaeri testigueni ima kʼuiripuecha engaksï no uéjka kurhajchaani Biblieri juramukuechani. I parhakpini anapu kʼuiripu sánhani arhixati sánderu ménderueni eratseni eska Tata Diosï Jeoba (Prov. 17:15). Ísï jimbo, jatsiskachi para sánderu jánguarhintani sóntku exeni ka no jiókuarhini imani ambe engajtsïni no sési pʼikuastaaka ka úni eskachi jurajkuaka jurhimbikuani (Ebr.13:9).

8. ¿Ambejtsïni jarhuataa parachi ambakiti kristianu máeni?

⁸ Pablu arhiaspti imani kristianuechani eskaksï jánguarhintapiringa sánderu jánhaskatiini ka juchajtuchi jatsiska para májkueni úni. ¿Nénachi uaa ísï úni? Engachi sánderu jorhenguarhiska jurhimbikueri ambe ka jánguarhintani sánderu ísï eratseni eska Tata Diosï Jeoba. Ka nájkirukachi aiakukuarhekia Tata Diosïni ka itsï atakuarhinia jatsiskachi para seguiriini jarhani ísï úni. Ísï jimbo, iáminduechachi jatsiska para pauani pauani arhintani ka estudiarini Tata Diosïiri karakatani, no arhiparini sinchi apenasi míteski ochi ióni páxakiia engachi míteka Tata Diosïiri ambe (Sal. 1:2). Engachi ambakiti programa ma úska para estudiarini, uaakachi ísï úni eska Pablu na karakuapka kristianuechani imeeri karta jimbo: mintsikani Tata Diosïni (Ebr. 11:1, 6).

“JUCHACHI ÍSÏISKA ESKAKSÏ IMA KʼUIRIPUECHA ENGAKSÏ MINTSIKAJKA KA ENGAKSÏ TSÍPITI PAKARAJKA”

9. ¿Andiksïsï kristianuecha jatsipi para kánikua mintsikani Tata Diosïni?

⁹ Ima kristianuechaksï jatsispti para kánikua mintsikani Tata Diosïni paraksï úni tsípiti pakarani jimboka no ióni jimbo no sési ambe úkuarhipiringa Judea (Ebr. 10:37-39). Jesúsi arhiaspti imeeri chúxapatiichani eskaksï juátarhisï nipiringa sïpakuarhini engaksï exepiringa eskaksï sondaduecha uirhipandani japiringia Jerusaléni. Ka i konseju no solu jindeespti para imeecha engaksï Jerusaléni irekani japka sino ístu para imeecha engaksï uéramanisï irekani japka (Luk. 21:20-24). Jiáni enga ireta ma máteru iretarhu uékeenga inchaakuni, kʼuiripuechaksï jatsisïreendi para iretarhu mismu kuájchakukuarhini. Iretarhu enga kʼérati bardeechani jukaapiringa ísï eska Jerusaléni na japka. Jimboksïsï judiuecha jatsipti para kánikua mintsikani jimbokaksï máru úpiringa eratseni eska no marhuapiringa juátarhisï nirani sïpakuarhini.

10. ¿Ambeksï úpirini kristianuecha engaksï mintsikeenga Tata Diosïni? (Ebreu 13:17).

¹⁰ Ima kristianuechaksï ístu jatsispti para kánikua mintsikani erachiichani enga Jesúsi úraani japka para orhejtsïkuni kúnguarhikuani. Jamberiksï ima erachiicha arhiaptia meru na jatinksï sïpakuarhipirini ka nénaksï ísï úpirini (arhinta je Ebreu 13:17). Uandakua griegu enga ísï tradusirikuarhika “kurhajchaa je” ixú Ebreu 13:17 jimbo, imani kʼuiripunisï arhikuekajti enga kurhandirajka jimboka seguru jarhaska eska uaaka mintsikani ka úni ambe enga arhinhani jaka ka no solu jimboka jatsiska para ísï úni. Kristianuechaksï jatsispti para sánderu mintsikaani orhejtsïkutiichani ante de ueenani no sési jánhaskuarhini. Engaksï imeecha kurhandirapiringa jiáni enga pínandikua japka, sánderu fásiliipirindi kurhandirani jiáni enga no sési jánhaskuarhipiringa.

11. ¿Andichisï jatsi para kánikua mintsikani Tata Diosïni?

¹¹ Juchajtuchi jatsiska para májkueni mintsikani eska ima kristianuecha enga apostoli Pablu karakuapka. Iásï, uánikua kʼuiripuechaksï no jakajkusïndi eska no ióni jimbo kʼamajkunhaakia parhakpinirhu anapu ambe, ka astajtsïni teresmarhusïndi engachi jucha ísï uandajka (2 Ped. 3:3, 4). Ka nájkiruka Biblia uandajka na enga no sési jánhaskuarhiaka imani jurhiatikua jimbo enga “kánikua no sési nitamakuarhinhaaka”, útasï uánikua ambe jarhasti engachi no míteka. Ísï jimbo, jatsiskachi para meru mintsikani eska Tata Diosï Jeoba kʼamajkuaka parhakpini anapu ambe jiáni enga uandarini jakaia. Ka ístuchi jatsiska para seguru jarhani eskajtsïni ima kuidariuaka (Hab. 2:3).

12. ¿Ambejtsïni jarhuataa tsípiti pakarani jiáni enga kánikua no sési nitamakuarhinhani jauaka?

¹² Juchajtuchi jatsiska para mintsikani eska Tata Diosï Jeoba úraxaka ‘jántspirini enga mintsinharhikueka ka jánhaskatiini’ parajtsïni orhejtsïkuni ini jurhiatikuecha jimbo (Mat. 24:45). Ísï eskaksï ima kristianu judiuecha na arhinhapka ambe engaksï jatsipiringa para úni jiáni engaksï Roma anapuecha niárapiringia, jamberichi juchajtu arhinhaaka nénachi uaa tsípiti pakarani jiáni enga ueenaaka kánikua no sési nitamakuarhinhani. Ísï jimbo, iásïchisï jatsika para sánderu mintsikaani imeechani enga Tata Diosï Jeoba úraani jaka paraksï orhejtsïkuni imeeri kúnguarhikuani. Engachi no mintsikaaska ka no ísï úni eskajtsïni imeecha na arhini jaka iásï, sánderu úkua jukaati eskachi kurhajchauaka jiáni enga kánikua no sési nitamakuarhini jauaka.

13. ¿Andisï xáni jukaparhakuepi konseju enga Ebreu 13:5 jimbo jaka?

¹³ Engaksï jamberi erokuarhini japka imani jurhiatikuani engaksï jatsipka para sïpakuarhini, kristianu judiuechaksï jánguarhintaxapti arisku sáni irekani ka no jukari tsitini sentabuni (arhinta je Ebreu 13:5). Ma tiempu, máruksï no ma ambe jatsikuarhespti ka nijtu tʼirekua ambe (Ebr. 10:32-34). Ka nájkirukaksï tekaantapka jiáni engaksï xáni no sési kánhani japka ambakiti aianhperakua jimbo, máruksï jamberi ueenapti sánderu sentabu uékani andani paraksï nóteru xáni pobriinia ka paraksï no xáni no sési nitamakuarhini. Joperu ima sentabu no úpirindi jarhuataani paraksï tsípiti pakarani jiáni enga Jerusaléni kʼamajkunhapiringa (Sant. 5:3). Ima enga sánderu tsitipiringa sentabu ambe, sánderu úkua jukanchapirindi sïpakuarhini ka jurajkuni imeeri kʼumanchikuani ka jatsikuarhekua ambe.

14. Engachi jucha sési jimbo jakajkuska ambe enga úkuarhiaka no ióni jimbo, ¿ambechi erakua úni?

¹⁴ Engachi sési jimbo jakajkuska eska na uéjki jatini kʼamajkunhaaka parhakpini anapu ambe jarhuataatijtsïni parachi no tsitini jatsikuarhekua ambe. Sentabu méntku no marhuauati jiáni enga kánikua no sési nitamakuarhinhani jauaka. Biblia uandasïndi eskaksï kʼuiripuecha “xanharu jimbo kʼuanikuaka imecheri platani” engaksï exeaka eska “imeecheri plata ni imeecheeri oru uaaka pʼímutantani jiáni enga Tata Diosï kánikua ikiani jauaka” (Ezeq. 7:19). Ísï jimbo, enbesi de sánderu ka sánderu uékani sentabu andani, ju je exeni ambejtsïni uaa jarhuatani arisku sáni irekani joperu eskachi ístu no xáni no sési nitamakuarhiaka. I ambe arhikuekaasïndi eskachi no jatsiska para ísku jatini jópchani sentabu o masi arhini jarhani máteru ambe úni ka nóteru pakatania tiempu para máteru ambe. Ístuchi jatsiska para jingontku jámani parachi no tátsekua no uékani jarhani jurajkuni imani ambe engachi jatsikuarheka (Mat. 6:19, 24). Ísïisti, sánhani arhixati axuterku jarhania ima jurhiatikua enga kʼamajkunhaaka parhakpini anapu ambe, ísï jimbo jatsiakachi para xarhatani sinchi sánderu mintsikasïni Tata Diosï Jeobani o jatsikuarhekua ambe.

“CHÁJTSÏ JATSISKA PARA TEKAANTANI”

15. ¿Andisï xáni jukaparhakuepi eskaksï kristianuecha tekaantapiringa?

¹⁵ Enga Judea sánhani arhini japiringa sánderu no sési jánhaskuarhini kristianuechaksï jatsipirindi para xarhatani eskaksï mintsikasïreenga Tata Diosïni (Ebr. 10:36). Nájkirukaksï máru kristianuecha tʼuini tekaantapkia engaksï xáni no sési kánhapka, jarhasptiksï uánikuecha engaksï jiáni mítepka jurhimbikuani engaksï nóteru no sési kánhani japkia. Jiájkani, Pablu arhiaspti iámindu indeni kristianuechani eskaksï niárapiringa sánderu ka sánderu no sési kánhani, jimboksïsï imeecha jatsipirindi para listu jarhani ka tekaantanksï asta uarhikuarhu jamberi ísï eska Jesúsi na úpka (Ebr. 12:4). Uánikua judiuechaksï sánderu ikiaxaptia jimbokaksï sánderu uánikua kʼuiripuecha kristianu úkuarhisptia. Máru uéxurhini antesi, jiáni enga apostoli Pablu Jerusaléni jámani japka aianhpini, uánikua kʼuiripuechaksï tánguarhintaspti ka no sésiksï kámaspti apostolini, ka jukari 40 judiuechaksï “jurariisptiksï eskaksï no ma ambe apiringa astakaksï na uándikupiringa Pabluni” (Úku. 22:22; 23:12-14). Nájkirukaksï uánikua kʼuiripuecha no xénchauenga kristianuechani, iichaksï jatsispti para seguiriini jarhani tánguarhini, aianhpini ka kánikua mintsikani Tata Diosïni.

16. Seguni Karakata para Ebreu Uandariicha, ¿nénachi jatsiski para exeni jiáni engachi no sési nitamakuarhini jauaka? (Ebreu 12:7)

¹⁶ ¿Ambe jarhuatapirini kristianuechani paraksï úni tekaantani? Pablu mítetixapti eskaksï ima kristianuecha jatsispka para kurhanguni andiksïsï ísï nitamakuarhipirindi. Jimbosï aianguapti eska Tata Diosï jurajkusïnga eska nema no sési nitamakuarhiaka para jarhuatani sánderu ambakiti kristianu máeni (arhinta je Ebreu 12:7). Imeechaksï jatsipirindi para kurhanguni eska inde ambe jarhuatapiringa paraksï jatsiani ka xarhatani imani kualidadiichani engaksï meru uétarhijka. Engaksï jánguarhintapiringa eratseni eska inde ambe jarhuatapiringa paraksï sánderu ambakiti kristianu máeni, nóksï xáni úkua jukanchapirindi tekaantani ambe uéjkiksï nitamakuarhini jarhani (Ebr. 12:11).

17. ¿Andisï Pablu sési mítepi na enga xáni jukaparhakueka tekaantani jiáni enga ma no sési kánhani jarhajka?

¹⁷ Apostoli Pablu arhiaspti imani kristianuechani eskaksï tekaantapiringa ka no kuatantani. Ka meru ísïispti ambe enga uandani japka. ¿Andi? Jimboka ióntki ima no sési kaasïreenga kristianuechani, jimbosï sési mítetini japti ambe engaksï nitamakuarhienga. Ka ístu mítetixapti na enga pʼikuarherakuarhijka jimboka enga na kristianu úkuarhipkia kʼuiripuechaksï uánikua xanharu no sési kámaspti (2 Kor. 11:23-25) Pablu sési mítetixapti ambe enga uétarhijka para úni tekaantani. Jimbosï miátaantapti eskaksï no jatsispka para imeecha mismu mintsinharhikuarhini, sino mintsikani Tata Diosï Jeobani. Ima méntku no sáni chéparini arhiaspti: “Tata Diosï Jeobareni jarhuatasïndi. Méntkuni no sáni chéaka” (Ebr. 13:6).

18. ¿Ambechi jatsiski para mítetini jarhani ka ambechi jatsiski para úni desde iásï?

¹⁸ Máru erachiichaksï iásï kánikua no sési nitamakuarhixati ka tekaantaxatiksï indeni ambe. Ísï jimbo, uaakachi kómarhijpikuani ka ménisï úni ambe ma para xarhatakuani eskachi xénchasïnga ka eskachi apoiariuasïnga (Ebr. 10:33). Bibliajtsïni mátirku arhisïndi: “Iámindu imeecha engaksï Kristu Jesúsini chúxapajka ka engaksï uéjka sési marhuakuni Tata Diosïni, ístuksï no sési kánhaati” (2 Tim. 3:12). Inde ambe arhikuekasïndi eskachi iáminduecha jatsiska para preparadu jarhani para jiáni enga no sési ambe úkuarhiaka. Ísï jimbo, jatsiskachi para mintsita jingoni mintsikani Tata Diosï Jeobani ka seguru jarhani eskajtsïni ima jarhuataaka tekaantani ambe uéjki úkuarhini. Ima exerixatiia na enga jatini sési pʼikuastantauaka imeeri marhuariichani (2 Tes. 1:7, 8).

19. ¿Ambe ka ambechi jatsiski para úni parachi erokuarhini jarhani imani jurhiatikuani enga kánikua no sési nitamakuarhinhaaka? (Ístu exe je imajenini).

¹⁹ Ima karta enga apostoli Pablu judiuechani karakuapka kánikua jarhuatapti paraksï erokuarhini ambe enga úkuarhipiringa. Pablu arhiaspti eskaksï jánguarhintapiringa sánderu míteani karakateechani ka sési kurhanguantani, ísïksï úpirindi exeni engaksï chkuanderakua ambe aiangunhapiringa ka nóksï jiókuarhini, ka ísïksï seguiriini japirindi mintsikani Tata Diosïni. Ístu arhiaspti eskaksï jánguarhintapiringa sánderu mintsikani paraksï kurhajchani Jesúsini ka imeechani engaksï orhejtsïkuni japka kúnguarhikuani. Pablu, ístu kurhangutaraspti eskaksï imeecha úpiringa tekaantani engaksï eratsepiringa eska, imeecheeri Taati enga xáni uékpitiika, jurajkuxapka paraksï ísï nitamakuarhini paraksï sánderu ambakiti kristianu máeni. Ísï jimbo, engachi ísï úska eskaksï Tata Diosïiri konsejuecha na uandajka, juchajtuchi uaaka tekaantani asta kʼamarhukuni jamberi (Ebr. 3:14).