Na enga exeenga Jesúsi Tata Diosï Jeobaeri nombrini

1, 2. a) ¿Ambe úspi Jesúsi ima chúrikua ante de uarhini? b) ¿Ambechi exeni jaua ini jorhenguarhikua jimbo?

ENGA na 14 de nisanipkia juebesï chúrikua uéxurhini 33 jimbo, Jesúsi mítespti eska Judasï no ióni jimbo traisionariipiringia, eskaksï no sési kámapiringa ka eskaksï tátsekua imeeri enemiguecha uándikupiringa. Engaksï na senaripkia imani kuarturhu enga kʼumanchikuarhu karhakua japka, Jesúsi uinhaperaantasïndi apostoliichani. Ka ante deksï uéntani imani kuarturhu, Jesúsi ambakiti kómarhikua ma úspti. Inde kómarhikua jimini jarhasti Juanu kapitulu 17 jimbo enga apostoli Juanu karapka.

² Ini artikulu jimbo, exeakachi ambe engachi jorhenguarhijka Jesúsiiri kómarhikueri ambe. Pori ejemplu, ¿andisï uandanhiani japi Jesúsi ante de uarhini? Ka enga Echerirhu jámani japka, ¿ambe sánderu jukaparhakuespi para ima?

“AIANGUASKIA NA ENGARI ARHINHAJKA”

3. ¿Ambe uandaspi Jesúsi Tata Diosï Jeobaeri nombriiri ambe ka ambe arhikuekaxapi? (Juanu 17:​6, 26).

³ Enga Jesúsi kómarhipka Tata Diosï Jeobani, uandaspti: “Ji aianguaskia na enga arhinhajka”, ka tsimani xanhari ísï uandaspti. I ambe xarhatasïndi eska Jesúsi meru kánikua jukaparharasïreenga Tata Diosï Jeobaeri nombrini (arhinta je Juanu 17:​6, 26). Joperu inde ambe no arhikuekasïndi eska Jesúsi aianguaspka imeeri chúxapatiichani eska Tata Diosï arhinhasïnga Jeoba jimbokaksï imeecha judiuespka ka sésiksï mítespti indeni ambe ka ístu jimboka Tata Diosïiri nombri uánikua xanhari jukanharhiska Karakateecharhu engaksï Ebreu jimbo karanhaka. Enga Jesúsi uandapka eska aianhpisïreenga Tata Diosïiri nombrini, arhikuekaxapti eska aianguasïreenga kʼuiripuechani na enga jásïika Tata Diosï Jeoba, ambe enga eratsetini jaka úni, ambe enga újka ka na enga járhati kualidadiichani jatsiaka. No nema xáni sési mítesti Tata Diosï Jeobani eska Jesúsi, jimbosï xáni uánikua ambe aianguapti kʼuiripuechani Tata Diosïiri ambe.

4, 5. a) ¿Andichisï ménisï niárajki sánderu jukaparharani kʼuiripueri nombrini ma? Úra je ejemplu ma. b) ¿Andiksïsï apostoliicha niárapi sánderu jukaparharani Tata Diosï Jeobaeri nombrini?

⁴ Parachi sánderu sési kurhanguni, ju je eranhaskani eska chaari kúnguarhikuarhu orhejtsïkuti ma jarhaska enga Dabidi arhinhajka. I orhejtsïkuti doktoriisti ka operarpisïndi. Chájtsï ióni míteskia indeni erachini. Joperu ma jurhiatikua, chájtsï uétarhinchasïnga parajtsï sóntku operarinhani. Ísï jimbo, jirejiresïksïni pásïndi imani ospitali jimbo enga ima orhejtsïkuti ánchikuarhijka ka inde erachi kánikua jánguarhintasïndi paraksïni jarhuatani ka parajtsï no uarhini. Iásï, chájtsï sánderu xénchasïngia indeni erachini, ka engajtsï kurhaajka imeeri nombrini, miántasïngajtsï ambe enga úka chánksïni jimbo. Iásï, inde erachi nóteru solu orhejtsïkuti máestia, sino ima doktori engaksïni jarhuataka para chá no uarhini.

⁵ Ka májkueniisti Tata Diosï Jeobaeri nombri jingoni. Nájkirukaksï Jesúsiiri chúxapatiicha mítepkia na enga arhinheenga Tata Diosï, imeechaksï niáraspti sánderu sési míteni ka jukaparharani jimboka Jesúsi jámaspka uandantani. Jesúsi sési xarhataspti na enga jásïika imeeri Taati jimboka mámaru ambe úspka ka ambakiti ambe uandani. Engaksï apostoliicha exepka na enga jorhentpienga Jesúsi ka na enga káuenga kʼuiripuechani, niárasptiksï sánderu sési míteni Tata Diosï Jeobani (Juanu 14:9; 17:3).

“CHIITI NOMBRI JIMBO, INDENI NOMBRI JIMBO ENGANI JI AIANGUAKIA”

6. ¿Ambe arhikuekaspi Jesúsi enga uandapka eska Tata Diosï íntskuspka imeeri nombrini? (Juanu 17:​11, 12).

⁶ Enga Jesúsi imeeri chúxapatiichani kómarhijpikuani japka, arhispti Tata Diosï Jeobani: “Kuájchakua chiiti nombri jimbo, indeni nombri jimbo engani ji aianguakia” (arhinta je Juanu 17:​11, 12). Ari uandakuecha “Indeni nombri jimbo engani ji aianguakia”, ístu ísï tradusirikuarhisïndi “Indeni nombri jimbo engareni tʼu íntskuka”. ¿I ambe arhikuekasïni eska Jesúsi ísï arhinhapiringia eska Tata Diosï Jeoba? Nómbe. Ima antesi uandaspti: “Chiiti nombri jimbo”. Jiájkani no niárapirindi ísï arhinhani eska Tata Diosï Jeoba. Joperu ¿ambe arhikuekaxapi Jesúsi enga uandapka eska Tata Diosï íntskuspka imeeri nombrini? Arhikuekaxapti eska Tata Diosï Jeoba axaspka para imeeri kuenta jimbo uandani ka eska imeeri uandakua páriispka ka eska íntskuspka uinhapikua para kʼérati milagruechani uaani Tata Diosï Jeobaeri nombri jimbo (Juanu 5:43; 10:25). Ka ístu, Jesúsiiri nombri arhikuekasïndi “Tata Diosï Jeoba pʼímutantspisïndi”. Jo, Jesúsiiri nombri pásïndi Tata Diosï Jeobaeri nombrini.

7. Úra je ejemplu ma parachi kurhanguni andisï Jesúsi ueeni uandani Tata Diosï Jeobaeri kuenta jimbo.

⁷ Parachi sánderu sési kurhanguni, ju je arini ejempluni exeni. Gobernanti ma, kʼuiripuni ma erakusïndi para nani uéjkisï axani ka íntskusïndi juramukua para imeeri kuenta jimbo uandani. Ka jiáni uératini, ima kʼuiripu májkueni juramukua jatsisïndia eska gobernadori. Ka Tata Diosï Jeoba májkueni úspti Jesúsi jingoni. Imani erakuspti ka axaspti ixú Echerirhu ka íntskuspti juramukua para imeeri kuenta jimbo uandani (Mat. 21:9; Luk. 13:35).

8. Ante de Jesúsi Echerirhu jurhani, ¿andisï Tata Diosï uandapi eska Jesúsi tʼuini mintsitarhu pásïreenga imeeri nombrini? (Éxodo 23:​20, 21).

⁸ Biblia uandasïndi eska Jesúsi jindeeska Uandakua jimboka desde iónisïa Tata Diosï Jeoba imani úraska para arhiani ambe ma o para íntskuani instruksioniichani ánjeliichani ka kʼuiripuechani (Juanu 1:​1-3). Jamberi Jesúsiipti ima ánjeli enga Tata Diosï Jeoba axapka para orhekupaani ka kuájchakuani israeliteechani jiáni engaksï desierturhisï jámani japka. ¿Ka andiksïsï israeliteecha jatsipi para kurhajchani indeni ánjelini? Jimboka Tata Diosï Jeoba uandaspka: ʻIma, imeeri mintsitarhu paati juchiiti nombrini’ (arhinta je Éxodo 23:​20, 21).a ¿Andisï Tata Diosï uandapi eska Jesúsi mintsitarhu pásïreenga imeeri nombrini? Ísï uandaspti jimbo Tata Diosï Jeoba Jesúsini axaspka para imeeri kuenta jimbo uandani ka para kuájpini Tata Diosï Jeobani ka ístu imeeri nombrini.

“TAATI, JARHUATAA KʼUIRIPUECHANI PARAKAKSÏ MÍTEAKA NA ENGA XÁNI KʼÉRI AMBEEKA CHIITI NOMBRI”

9. ¿Nénachi míteski eska Jesúsi kánikua jukaparharasïreenga Tata Diosïiri nombrini?

⁹ Ante de Jesúsi Echerirhu jurhani, ima tʼuini jukaparharasïreendia Tata Diosï Jeobaeri nombrini ka májkueni úspti jiáni enga Echerirhu jámani japka. Ka ambe enga xáni úpka Echerirhu, xarhataspti eska seguiriixapka kánikua jukaparharani Tata Diosïiri nombrini. Ka enga nóteru ióni kueratani japkia para uarhini, Jesúsi kómarhispti Tata Diosï Jeobani: “Taati, jarhuataa kʼuiripuechani parakaksï míteaka na enga xáni kʼéri ambeeka chiiti nombri”. Ka auandarhu uératini imeeri Taati jirejiresï arhispti: “Ísï úskia ka kʼuiripuechajtsïni kʼéri ambe arhisti ka ménderuni ísï uaaka ka kʼuiripuechajtsïni kʼéri ambe arhiati” (Juanu 12:28).

10, 11. a) ¿Néna úspi Jesúsi eskaksï kʼuiripuecha kʼéri ambe arhipiringa Tata Diosïiri nombrini? (Ístu exe je imajenini). b) ¿Andisï uétarhijki eskachi pímbinhajkuntaaka Tata Diosï Jeobaeri nombrini ka xarhatani eska no ísïiska ambe enga Noambakiti uandajka?

¹⁰ Jesúsi, ístu úspti eska Tata Diosï Jeobaeri nombri kʼéri ambe exenhapiringa jimboka aianguaspka kʼuiripuechani eska Tata Diosï sési járhati kualidadiichani jatsiaska ka eska kʼéri ambe úsïnga. Ka no solu indeni ambe úspti, Jesúsi mítespti eska jatsispka para xarhatani eska Tata Diosï Jeoba méntkisï iámindu ambe sési úsïnga ka eska imeeri nombri pímbinhasïiska. Ka enga jorhendaapka imeeri chúxapatiicha ísï kómarhini: “Juchaari Taati engari auandarhu jaka, eska niáraaka mítenhani eska chiiti nombri pímbinhasïiska”, xarhataspti eska kánikua jukaparhakueska pímbinhajkuntani Tata Diosïiri nombrini (Mat. 6:9).

¹¹ Jardini de Edénirhu, Noambakiti chkuanderakua ambe jauatakuspti Tata Diosï Jeobani. Uandaspti eska Tata Diosï chkuandera máespka ka eska no jurajkuspka Adáni ka Ebani ambakiti ambe jatsini. Indeni ambe jimbo, uétarhisïni pímbinhajkuntani Tata Diosïiri nombrini ka xarhatani eska no ísïiska ambe enga Noambakiti uandajka (Gén. 3:​1-5). Noambakiti uandaspti eska no sési jarhaska na enga újka ambe ma Tata Diosï Jeoba ka inde ambe meru kánikua no sési pakataspti Tata Diosïiri nombrini. Ka jiáni enga Jobu irekani japka, Noambakiti uandaspti eskaksï kʼuiripuecha interesi jimbojkusï marhuakujka Tata Diosïni. Ima kʼéri chkuandera uandaspti eska kʼuiripu ma jurajkusïnga Tata Diosï Jeobani enga tsʼéjkukua ambe jatsijka jimboka no xénchasïnga Tata Diosïni mintsita jingoni (Job 1:​9-11; 2:4). Ísï jimbo, uétarhisïreendi tiempu para xarhatani sini Noambakitisï chkuanderani japi o Tata Diosï Jeoba.

“JI ÍNTSPISÏNGA JUCHIITI TSÍPIKUANI”

12. ¿Ambe úspi Jesúsi Tata Diosï Jeobaeri nombrini jimbo?

¹² Jesúsi xáni xénchasïreendi Taati jémbani jimbosï kánikua jánguarhintapti pímbinhajkuntani imeeri nombrini ka xarhatani eska Tata Diosï méntkisï iámu ambe sési úsïnga. Asta jamberi uandaspti: “Ji íntspisïnga juchiiti tsípikuani” (Juanu 10:​17, 18). Jo, Jesúsi uékaspti uarhini Tata Diosï Jeobaeri nombri jimbo.b Adáni ka Eba engaksï perfektuepka, jurajkusptiksï Tata Diosï Jeobani ka Noambakiti jingonksï úkuarhispti, joperu Jesúsi nómbe. Ima uékaspti jurhani Echerirhu ka xarhataspti eska xénchasïnga Tata Diosï Jeobani jimboka méntkisï kurhajchaspka (Ebr. 4:15; 5:​7-10). Jesúsi méntkisï kurhajchaspti Tata Diosï Jeobani asta jiáni jamberi enga uándikunhapka chkarirhu enga jindeepka para no sési nitamakuarhini (Ebr. 12:2). Ka indeni ambe úparini, xarhataspti na enga xáni xéncheenga Tata Diosïni ka imeeri nombrini.

13. ¿Andisï Jesúsi sési xarhatapi eska Noambakitisï chkuanderani japka? (Ístu exe je imajenini).

¹³ Ambe enga xáni úpka Jesúsi Echerirhu, sési xarhataspti eska Noambakitisï chkuanderani japka ka no Tata Diosï Jeoba (Juanu 8:44). No nema jarhasti iámu parhakpinirhu enga sánderu sési míteka Tata Diosï Jeobani eska Jesúsi. Ka enga ísïipiringa ambe ma eska Noambakiti na uandani japka, Jesúsi mítepirindi indeni ambe. Joperu Jesúsi méntkisï xarhataspti eska Jeoba ambakiti Tata Diosï máeska. Asta jiáni jamberi enga ísï xarhareenga enajki Tata Diosï jurajkupia Jesúsini, ima no uékaspti jurajkuni imeeri Taatini nájkiruka jatsipka para uarhini (Mat. 27:46).c

“KʼAMARASKIA ÚNI AMBE ENGARENI TʼU ARHIKA”

14. ¿Ambe úspi Tata Diosï Jeoba para kóndentani Jesúsini?

¹⁴ Ima chúri ante de uarhini, Jesúsi ístu arhispti Tata Diosï Jeobani: “Kʼamaraskia úni ambe engareni tʼu arhika”. Jesúsi mintsikaxapti eska Tata Diosï kóndentapiringa jimboka méntkisï sési marhuakuspka(Juanu 17:​4, 5). Ka seguru jarhaspti eska inde ambe ísïipiringa jimboka Tata Diosï no jurajkuspka eska Jesúsiiri kuerpu tumbarhu pakarapiringa (Úku. 2:​23, 24). Tata Diosï tsítantaspti Jesúsini ka kʼéri ambe úspti auandarhu (Filip. 2:​8, 9). Ka ísï tátsekua, Jesúsi niáraspti jindeeni Rei Tata Diosïiri Reinurhu. ¿Ambe xáni úpirini imeeri Reinurhu? Jesúsijtsïni aiangusïndi indeni ambe jimbokajtsïni ístu jorhendaska kómarhini Tata Diosïni: “Eska juuaka chiiti Reinu. Eska úkuarhiaka ambe engari tʼu uéjka, jini auandarhu ka ístu echerirhu” (Mat. 6:10).

15. ¿Ambeteru xáni uaa Jesúsi?

¹⁵ No ióni jimbo, Jesúsi uarhiperaati imeecha jingoni engaksï ikiakujka Tata Diosïni ka Armajedonirhu kʼamajkuauati no sési úriichani (Apok. 16:​14, 16; 19:​11-16). Tátsekua, Jesúsi kʼuaninhaati Noambakitini jima enga xáni jauanhika, jima ónhaati paraka nóteru ambe ma uaakia úni (Apok. 20:​1-3). Ka enga ueenaakia ima tiempu para Jesúsi juramuni mili uéxurhini jimbo, Jesúsi uaati eska jauaka pínandikua Echerirhu ka jarhuataati kʼuiripuni paraksï perfektueni. Tsítantauati uarhiriichani ka uaati eska iámu Echeri Paraisu máeuaka. Iásï kʼóru úkuarhiatia ambe enga Tata Diosï Jeoba eratseni japka (Apok. 21:​1-4).

16. ¿Néna irekaaia kʼuiripu jiáni enga Jesúsi na kʼamaraakia juramuni mili uéxurhini jimbo?

¹⁶ Enga Jesúsi na kʼamaraakia juramuni mili uéxurhini, nóteru jauatia pekadu. Nóteru uétarhiatia eskajtsïni Tata Diosï Jeoba puácheantauaka pekaduechani Jesúsiiri uarhikua jimbo, niteruksï uétarhiaia 144,000 saserdotiicha, ni Jesúsi enga jindeeka sánderu kʼéri saserdoti parajtsïni jarhuatani sési pájperani Tata Diosï jingoni. “Últimu, kʼamajkunhaati uarhikua enga jindeeka juchaari ikiatspiti” ka uarhiriichaksï tsíntaati (1 Kor. 15:​25, 26). Imeecha engaksï Echerirhu irekaaka, nóteruksï ambe ma pʼamenchaatia, ni tʼarhepini nijtu no sési pʼikuarherani.

17, 18. a) ¿Ambe úkuarhia enga na kʼamakurhiakia mili uéxurhini? b) ¿Ambe uaa Jesúsi enga na kʼamaraakia juramuni mili uéxurhini? (1 Korintu 15:​24, 28; ístu exe je imajenini).

¹⁷ Jiáni uératini enga Noambakiti uandapka jardini de Edénirhu eska Tata Diosï Jeoba chkuandera máespka ka eska no xénchaasïnga kʼuiripuechani jimboka no sési juramusïnga, ambakiti kristianuechachi jánguarhintaxaka pímbinhajkuntani Tata Diosïiri nombrini. Ísï jimbo, jiáni enga na kʼamakurhiakia mili uéxurhini, iásï kʼóruksï kʼuiripuecha exeatia eska Tata Diosï Jeobaeri nombri pímbinhasïiska ka nóteru nema no sési uandaatia imeeri ambe. Jo, juchaari Taati auandarhu anapu xarhataati eskajtsïni mintsita jingoni uékasïnga.

¹⁸ Ka iámindu kʼuiripuechaksï míteatiia eska Noambakiti puru chkuanderakua ambejkusï uandeenga Tata Diosï Jeobaeri ambe. ¿Ka ambe uaa Jesúsi enga na kʼamaraakia juramuni mili uéxurhini? ¿Májkueni uaa eska Noambakiti ka nóteru uékaia kurhajchani Tata Diosï Jeobani? Nómbe, no ísï uaati. Jesúsi kánikua ménderueni jásïisti eska Noambakiti (arhinta je 1 Korintu 15:​24, 28). Jesúsi íntskuntaati imeeri Taatini juramukua ka jurajkuati eska Taati jémba juramukuaka. Ka ísï uaati jimboka xénchasïnga Tata Diosï Jeobani. Jiáni enga Noambakiti kʼamajkunhaakia, Tata Diosï Jeobaeri nombri iásï kʼóru pímbinhasïntaatia ka xarharaati eska Noambakiti puro chkuanderakua ambesï uandeenga Tata Diosïiri ambe.

19. Jiájkani, ¿néna exesïni Jesúsi Tata Diosï Jeobaeri nombrini?

¹⁹ Iásï kʼóruchi míteskia andisï Tata Diosï Jeoba íntskupi Jesúsini imeeri nombrini ka jurajkuni eska Jesúsi uandapiringa Tata Diosïiri kuenta jimbo. Jesúsi kánikua sési úspti ambe enga xáni Taati jémba arhipka. Para Jesúsi no ma ambe jarhasti enga sánderu jukaparhakueka eska Tata Diosïiri nombri. Jo, Jesúsi meru kánikua jukaparharasïndi Tata Diosï Jeobaeri nombrini. Uékaspti uarhini Tata Diosïiri nombri jimbo ka ístu eratsetixati íntskuntani iámu ambe enga na kʼamaraakia juramuni mili uéxurhini. Máteru artikulu jimbo, exenchi jauaka nénachi uaa májkueni úni eska Jesúsi.