SEMANA 23
PIREKUA 2 Chíti nombri jindesti Jeoba
Na engachi exejka jucha Tata Diosïiri nombrini
“Chájtsï jindeeska juchiiti testiguecha-i ambesti enga Jeoba uandajka-” (IS. 43:10).
AMBE ENGACHI JORHENGUARHIAKA
Exeakachi ambechi uaa úni parachi pímbinhajkuntani Tata Diosïiri nombrini ka xarhatani eska chkuanderakua ambeeska ambe enga Noambakiti uandajka.
1, 2. ¿Nénachi míteski eska Jesúsi meru kánikua jukaparharasïnga Tata Diosï Jeobaeri nombrini
NO JARHASTI sánderu jukaparhakua ambe para Jesúsi eska Tata Diosï Jeobaeri nombri. Jesúsi kuájpisïndi Taati jémbeeri nombrini. Ka eskachi na exekia máteru artikulu jimbo, asta uarhispti Tata Diosï Jeobaeri nombrini jimbo ka xarhatani eska Tata Diosï pímbinhasïiska ka eska iámu ambe sési úsïnga (Mar. 14:36; Ebr. 10:7-9). Ka enga Jesúsi na juramuakia mili uéxurhini, íntskuntaati Tata Diosï Jeobani juramukua jimboka uéksïnga eska Tata Diosï Jeobajku k’éri ambe arhinhaaka (1 Kor. 15:26-28). Jesúsi xarhatasïndi na enga xáni xénchajka Taati jémbani jimboka uánikua ambe úskia ka útasteru uánikua ambe uaati Tata Diosï Jeobaeri nombri jimbo.
2 Jesúsi jurhaspti Echerirhu para Tata Diosï Jeobaeri kuenta jimbo uandani (Juanu 5:43; 12:13). Mítetaraaspti imeeri chúxapatiichani Tata Diosï Jeobaeri nombrini (Juanu 17:6, 26). Tata Diosïiri nombri jimbosï jorhentpiendi ka uaani milagruechani (Juanu 10:25). Ma xanhari ísï kómarhijpikuaspti imeeri chúxapatiicha: “Kuájchakua chiiti nombri jimbo” (Juanu 17:11). I ambe xarhatasïndi eska Jesúsi meru jukaparharasïreenga Tata Diosïiri nombrini. Ísï jimbo, kʼuiripu ma no uaati uandani eska kristianueska jimboka no míteska ni úrani Tata Diosï Jeobaeri nombrini.
3. ¿Ambechi exea ini artikulu jimbo?
3 Ambakiti kristianuechachi jánguarhintasïnga májkueni úni eska Jesúsi, jimbochisï kánikua jukaparharajka Taati jémbeeri nombrini (1 Ped. 2:21). Ini artikulu jimbochi exeaka eskaksï Tata Diosï Jeobaeri nombrini pásïnga imeecha engaksï aianhpijka ambakiti aianhperakuani Tata Diosï Reinueri ambe (Mat. 24:14). Ístuchi exeaka nénachi jatsipirini para exeni Tata Diosïiri nombrini mándani jucha.
“IRETANI MA ERAKUSTI ENGA IMEERI NOMBRINI PAAKA”
4. a) ¿Ambe arhiaspi Jesúsi imeeri chúxapatiichani ante de auandarhu karhanchentani? b) ¿Náki kurhamarhikuanchi mókuntani jaua?
4 Ante de Jesúsi auandarhu karhanchentani, arhiaspti imeeri chúxapatiichani: “Joperujtsï chá intsïnhaaka uinhapikua jiáni engaksïni espiritu santu juuaka andarhierani. Ka chájtsï juchiiti ambe uandantaaka Jerusaléni ka iámu Judea ka Samariaisï ka asta jima jamberi enga sánderu iauaniika parhakpinirhu” (Úku. 1:8). Ísï jimbo, ambakiti aianhperakua no solu Israeli aianhpinhapirindi, sino iápurisï anapuechaksï úpirindi Jesúsiiri chúxapatiini (Mat. 28:19, 20). Ju je exeni ambe enga uandapka Jesúsi: “Chájtsï juchiiti ambe uandantaaka”. ¿Arhikuekaxapi eskaksï kʼuiripuecha Jesúsiiri ambejku uandantapiringa? o ¿ístu eskaksï jatsipiringa para míteni Tata Diosïiri nombrini? Ju je exeni ambe enga uandajka Úkuecha kapitulu 15.
5. Apostoliicha ka Jerusaléni anapu orhejtsïkutiicha, ¿ambeksï uandaspi eska jukaparhakuespka úni? (Ístu exe je imajenini).
5 Uéxurhini 49 jimbo, apostoliicha ka Jerusaléni anapu orhejtsïkutiichaksï tánguarhintaspti paraksï pakatperani nénaksï úpirini no judiuecha kristianu úkuarhini. Enga na kʼamarhuni japkia tánguarhikua, Santiagu Jesúsiiri mediu ermanu jémba uandaspti: “Simeóntsïni [Pedru] iámindu ambe aiangustia na enga Tata Diosï ueenapka jaiapanheantani no judiuechani para iretani ma erakuni enga imeeri nombrini paaka”. ¿Náki nombrini? Santiagu uandaspti ambe enga Amósi karapka: “Ka imeecha engaksï útasï pakarani jauaka, uaatiksï iámu mintsita jingoni jirinhantani Tata Diosï Jeobani, iámindu imani kʼuiripuechani jingoni engaksï no judiueka ka ini kʼuiripuechani erakuaska paraksï juchiiti nombrini páni. Ísï uandasïndi Tata Diosï Jeoba” (Úku. 15:14-18). Ísï jimbo, apostoliicha ka Jerusaléni anapu orhejtsïkutiichaksï xarhataspti eskaksï iámindu Jesúsiiri chúxapatiicha jatsispka para jorhenguarhini Tata Diosï Jeobaeri nombriiri ambe ka imeeri nombrini páni. Ísïksï mítekateepirindi eska Tata Diosï Jeoba na arhinhajka ka ístuksï uandantapirindi imeeri nombrini.
Apostoliicha ka Jerusaléni anapu orhejtsïkutiichaksï kurhanguspti eskaksï kristianuecha jatsipiringa para mítetarpini Tata Diosï Jeobaeri nombrini ka eskaksï imeeri nombri jimbo mítekateepiringa. (Exe je párrafu 5).
6, 7. a) ¿Andisï Jesúsi jupi Echerirhu? b) ¿Náki jindeeski sánderu kʼéri rasoni enga jimbo Jesúsi jupka Echerirhu?
6 Eskachi na exekia, Jesúsiiri nombri arhikuekasïndi “Tata Diosï Jeoba pʼímutantspisïndi”. Ka indeni ambesï úti Tata Diosï Jeoba, axaspti imeeri Uájpani para pʼímutaantani kʼuiripuechani engaksï mintsikapiringa Tata Diosï Jeobani ka ístu Jesúsini. Ísï jimbo, Jesúsi jurhaspti Echerirhu para uarhini iámindu kʼuiripuecha jimbo (Mat. 20:28). Ka enga ísï úpka, úspti eskaksï iámindu kʼuiripuecha puáminhantaaka imeecheeri pekaduechani ka jatsinksï tsípikua para méntkisï (Juanu 3:16).
7 ¿Andiksïsï kʼuiripuecha uétarhincheeni eskaksï euajpinhantapiringa? Imani ambe jimbo enga jardini de Edénirhu úkuarhipka. Ísï eskachi na exekia máteru artikulu jimbo, Adáni ka Eba nóteruksï uékasptia kurhajchani Tata Diosï Jeobani jimboksïsï nóteru úpirindia irekani para méntkisï (Gén. 3:6, 24). Ísï jimbo, Jesúsi jurhaspti Echerirhu para pʼímutaantani Adáni ka Eba uájpeechani. Joperu ístu jurhaspti para sánderu kʼéri ánchikuarhita ma úni. Ju je miáni eska Noambakiti chkuanderakua ambe jauatakuspka Tata Diosï Jeobani (Gén. 3:4, 5). Ísï jimbo, uétarhisïreendi eska kʼuiripu mítepiringa eska Tata Diosï Jeoba méntkisï sési úsïnga iámindu ambe ka eska imeeri nombri pímbinhasïiska. Ka Jesúsijkusï úpirindi sánderu sési pímbinhajkuntani Tata Diosï Jeobaeri nombrini, jimboka Tata Diosïiri nombri jimbo jurhaspka ka ísïmindu úspti eska Tata Diosï Jeoba na uékeenga.
¿Néna úpirini kʼuiripu ma uandani eska kristianueska ka jini no míteni ni úrani Tata Diosï Jeobaeri nombrini?
8. ¿Ambeksï jatsipirini para kurhanguni ka jiókuarhini imeecha engaksï Jesúsiiri chúxapati úkuarhipiringa?
8 Iámindu imeecha engaksï Jesúsiiri chúxapati úkuarhipiringa, judiuecha ka no judiuecha, jatsipirindiksï para kurhanguni ka jiókuarhini eska Tata Diosï Jeobajkusï úpiringa pʼímutaantani, jo, Jesúsiiri Taati jémba (Juanu 17:3). Ka ísï eska Jesúsi na mítekateepka, imeechajtuksï Tata Diosï Jeobaeri nombri jimbo mítekateepirindi. Ka paraksï pʼímutantskata uérani, ístuksï jatsipirindi para kurhanguni andisï xáni jukaparhakuepi pímbinhajkuntani Tata Diosï Jeobaeri nombrini (Úku. 2:21, 22). Ísï jimbo, ima ambakiti kristianuechaksï jatsispti para jorhenguarhini Tata Diosï Jeobaeri ambe ka Jesúsiiri ambe. Jimbosï Jesúsi ísï kʼamarhukupti imeeri kómarhikuani: “Ji aianguaskia na engari arhinhajka ka útasïni aianguauaka parakaksï indeechajtu ísï xénchauaka máteru kʼuiripuechani ísï eskarini tʼu na xénchajka jíndeni, ka ísï úparini, ji indeechani jingoni jauaka” (Juanu 17:26).
“CHÁJTSÏ JINDEESKA JUCHIITI TESTIGUECHA”
9. ¿Nénachi jatsiski para exeni Tata Diosï Jeobaeri nombri?
9 Ísï eskachi na exekia, jucha engachi Tata Diosï Jeobani marhuakujka, jatsiskachi para kánikua jánguarhintani pímbinhajkuntani Tata Diosï Jeobaeri nombrini (Mat. 6:9, 10). Jatsiskachi para úkuecha jingoni xarhatani eska para jucha, Tata Diosï Jeobaeri nombri sánderu kʼéri ambeeska. Ísï jimbo, ¿nénachi jarhuataa Tata Diosï Jeobani pímbinhajkuntani imeeri nombrini? ka ¿ambechi uaa úni parachi xarhatani eska Satanási chkuanderakua ambe jauatakuska Tata Diosï Jeobani?
10. ¿Ambe uandasïni Isaías kapitulu 42 a 44 jamberi? (Isaías 43:9; 44:7-9; ístu exe je imajenini).
10 Isaías kapitulu 42 a 44 jamberi, uandasïndi ambe engachi uaaka úni jucha para pímbinhajkuntani Tata Diosï Jeobaeri nombrini. Ini kapituluecha jimbo, uandasïndi eska Tata Diosï Jeoba uékasïnga eska xarharaaka né jindeeski Tata Diosï jurhimbiti. Ísïisti komu jusgadurhu ma jarhani nani enga Tata Diosï Jeoba arhiani jaka diosïichani eskaksï meru xarhataaka eskaksï diosïiska. Ka pʼitajkuarhiasïndi kʼuiripuechani paraksï uandantani eska ísïiska ambe engaksï inde diosïicha uandajka. Joperu no nema niárasïndi (arhinta je Isaías 43:9; 44:7-9).
Juchachi xarhatasïnga eskachi solu Tata Diosï Jeobaeri testigueska. (Exea je párrafuechani 10 ka 11).
11. Eska na arhijka Isaías 43:10-12, ¿ambe arhiasïni Tata Diosï Jeoba imeeri marhuariichani?
11 (Arhinta je Isaías 43:10-12). Tata Diosï Jeoba arhiasïndi imeeri marhuariichani: “Chájtsï jindeeska juchiiti testiguecha [...] ka ji jindeeska Tata Diosï”. Ka ístu kurhamarhiasïndi: “¿Jarhaski máteru Diosï aparte de ji?” (Is. 44:8). Ísï jimbo, juchachi jatsiska kʼéri kóntperata ma, xarhatani eska Jeobajkusï jindeeka ima Tata Diosï enga jurhimbitiika. Ka juchaari uandakuecha ka úkuechani jingoni, xarhataakachi eska inde ambe ísïiska, ka eska imeeri nombrijkusï sánderu kʼéri ambeeka. Ka ambe engachi újka pauani pauani, xarhatasïngachi eskachi mintsita jingoni xénchasïnga Tata Diosï Jeobani ka eskachi no méni jurajkuaka na uéjkijtsïni xáni tsʼéjkuni Satanási. Engachi ísï úska, uaakachi pímbinhajkuntani Tata Diosïiri nombrini.
12. ¿Néna niáraspi ísï úkuarhini eska na arhijka Isaías 40:3, 5?
12 Ístu, Isaías uandaspti eska japiringa nema enga prepararipiringa Tata Diosï Jeobaeri xanharuni (Is. 40:3). ¿Néna kumplirikuarhispi i profesia? Niáraspti ísï úkuarhini jimboka Juanu enga itsï atauenga kʼuiripuechani, preparariispti xanharuni para Jesúsi enga jupka Tata Diosï Jeobaeri nombri jimbo ka enga uandapka imeeri kuenta jimbo (Mat. 3:3; Mar. 1:2-4; Luk. 3:3-6). Isaías ístu uandaspti: “Tata Diosï Jeobaeri tʼíntskua xarhatanhaati” (Is. 40:5). I ambe ísï úkuarhispti jimboka Jesúsi meru ísï jámaspka enajki Tata Diosï Jeoba jupi Echerirhu (Juanu 12:45).
13. ¿Nénachi uaa májkueni úni eska Jesúsi?
13 Ka juchajtuchi kuájpisïnga Tata Diosï Jeobaeri nombrini jimbokachi májkueni úsïnga eska tata Jesukristu. Ísï eska Jesúsi, juchajtuchi Tata Diosï Jeobaeri testigueska. Pásïngachi imeeri nombrini ka aianguasïngachi kʼuiripuechani na enga xáni kʼéri ambe újka. Joperu parachi ambakiti testigu máeni, ístuchi jatsiska para aianguani kʼuiripuechani ambe enga xáni úkia Jesúsi ka ambe enga uaaka para pímbinhajkuntani Tata Diosïiri nombrini (Úku. 1:8). Jesúsi jindeesti sánderu kʼéri testigu Tata Diosïiri ka juchajtuchi májkueni úsïnga eska Jesúsi (Apok. 1:5). Ísï jimbo, ¿nénachi exesïni Tata Diosï Jeobaeri nombrini?
NÉNACHI EXESÏNI TATA DIOSÏ JEOBAERI NOMBRINI
14. Ísï eska na arhijka Salmo 105:3, ¿nénachi pʼikuarherasïni Tata Diosï Jeobaeri nombri jimbo?
14 Juchachi kánikua sési pʼikuarherasïnga Tata Diosï Jeobaeri nombri jimbo (arhinta je Salmo 105:3). Tata Diosï Jeoba tsípisïndi engachi jucha arhikuarhijka o sési pʼikuarherani imeeri nombri jimbo (Jer. 9:23, 24; 1 Kor. 1:31; 2 Kor. 10:17). Enga Biblia úrajka ini uandakuani ‘arhikuarhini’, arhikuekasïndi eskachi kánikua sési pʼikuarherasïnga jimbokachi míteska Tata Diosï Jeobani. Ka juchachi kánikua sési pʼikuarherasïnga aianguani máteruechani eska Tata Diosï Jeoba pímbinhasïiska ka eska méntkisï sési úsïnga iámu ambe. Nani uéjkichi jarhani ia sea eskuelarhu, ánchikuarhitarhu o iretarhu, nóchi jatsiska para kʼuratseni uandantani eskachi Jeobaeri testigueska. Noambakiti uékasïndi eskachi nóteru uandantakia Tata Diosï Jeobaeri nombriiri ambe (Jer. 11:21; Apok. 12:17). Noambakiti ka imeecha engaksï imani jingoniika, uékasïndiksï eskaksï kʼuiripuecha mirikurhiaka Tata Diosï Jeobaeri nombrini (Jer. 23:26, 27). Joperu juchachi xénchasïnga imeeri nombrini jimbochisï uéjka pauani pauani kʼéri ambe arhini (Sal. 5:11; 89:16).
15. ¿Ambe arhikuekasïni uandani Tata Diosï Jeobaeri nombrini?
15 Méntkisïchi uandasïnga Tata Diosï Jeobaeri nombrini (Joel 2:32; Rom. 10:13, 14). Uandani Tata Diosï Jeobaeri nombrini no solu arhikuekasïndi míteni na enga arhinhajka ka úrani imeeri nombrini, sino arhikuekasïndi míteni na jásïiski Tata Diosï, mintsikani ka kurhakuni eskajtsïni jarhuataaka ka eskajtsïni arhiaka ambechisï jatsi para úni (Sal. 20:7; 99:6; 116:4; 145:18). Ka ístu arhikuekasïndi aianguani máteru kʼuiripuechani Tata Diosï Jeobaeri nombriiri ambe ka imeeri kualidadichani ka pʼímarhiani eskaksï móantaaka ka eskaksï jánguarhintaaka mójtakurhini paraka Tata Diosï Jeoba jaiapanheantauaka (Is. 12:4; Úku. 2:21, 38).
16. ¿Nénachi uaa xarhatani eska Satanási chkuandera máeska?
16 Juchachi listu jarhaska parachi no sési nitamakuarhini Tata Diosï Jeobaeri nombri jimbo (Sant. 5:10, 11). Engachi no sési nitamakuarhijka ka nóchi jurajkuni Tata Diosï Jeobani, xarhatasïngachi eska Noambakiti chkuandera máeska. Jiáni enga Jobu irekapka, Satanási arini ambe uandaspti Tata Diosïiri marhuariicheeri ambe: “Iámindu ambe enga kʼuiripu jatsikuarhika, íntspiati para kuájpintani imeeri tsípikuani” (Job 2:4). Satanási arhikuekaxapti eskaksï kʼuiripuecha jiántkusï sési marhuakupiringa Tata Diosï Jeobani engaksï sési jámani japiringa, joperu eskaksï jurajkupiringa engaksï no sési nitamakuarhini japiringa. Joperu Jobu xarhataspti eska inde ambe chkuanderakua ambeespka. Ka Tata Diosï Jeobajtsïni íntskusti sésikua parachi xarhatani eskachi no méni jurajkuaka nájkirukajtsïni Satanási méntku tsʼéjkuni jauaka. Juchachi seguru jarhaska eskajtsïni Tata Diosï Jeoba seguiriini jauaka kuájchakuni imeeri nombri jimbo (Juanu 17:11).
17. Eska na arhijka 1 Pedru 2:12, ¿ístuchi néna uaa xarhatani eskachi k’éri ambe arhisïnga Tata Diosï Jeobaeri nombrini?
17 Xarhatasïngachi eskachi janhanharhisïnga Tata Diosï Jeobaeri nombrini (Prov. 30:9; Jer. 7:8-11). K’uiripuechaksï mítesti eskachi Jeobaeri testigueska. Jiájkani, na engachi jámajka ka na engachi uandajka, uaakachi sési pakatani Tata Diosï Jeobaeri nombrini o nómbe (arhinta je 1 Pedru 2:12). Ísï jimbo, uékasïngachi jánguarhintani parakaksï kʼuiripuecha k’éri ambe arhiaka Tata Diosï Jeobani imani ambe jimbo engachi uandajka ka úni. Ka nájkirukachi no perfektueka uaakachi úni eska Tata Diosï Jeobaeri nombri k’éri ambe arhinhaaka.
18. ¿Ístuchi ambe úsïni parachi xarhatani eskachi jukaparharasïnga Tata Diosï Jeobaeri nombrini? (Ístu exe je notani).
18 Sánderuchi jukaparharasïnga Tata Diosï Jeobaeri nombrini ka eska juchaari ambe (Sal. 138:2). Jimbokachi xénchasïnga Tata Diosï Jeobani, jánguarhintasïngachi úni ambe enga ima jaiapanhintajka. Ka indeni ambe jimbo, kʼuiripuechajtsïni teresmarhusïndi ka no sésijtsïni arhini.a Joperu ju je exeni ambe enga úpka Jesúsi, ima ísï uarhispti eska no sési úri ma ka kʼuratsetanhaspti. Joperu ísï úspti para kʼéri ambe arhini Tata Diosï Jeobaeri nombrini. Eska na arhijka Ebreu 12:2-4, ima uarhispti “nájkiruka kánikua kʼuratsetanhapka”. Jo, ima no uandanhiaxapka ambe engaksï kʼuiripuecha eratsepiringa imeeri ambe. Sánderu sési, uékasïreendi Tata Diosï Jeobaeri eratsekuani úni (Mat. 26:39).
19. ¿Para chá na xáni jukaparhakueski Tata Diosï Jeobaeri nombri ka andi?
19 Sésichi pʼikuarherasïnga Tata Diosï Jeobaeri nombri jimbo ka kʼéri kóntperata máesti ísï mítenhani komueska Jeobaeri testigu. Ísï jimbo, nóchi no sési pʼikuarherasïnga engajtsïni kʼuiripuecha teresmarhujka oksïni no sési ambe arhini. Jimbochisï no uandanhiajka na engajtsïni exejka. Sánderu sési, sánderuchi jukaparharasïnga Tata Diosï Jeobaeri nombrini na uéjkijtsïni xáni tsʼéjkuni Satanási. Juchachi uékasïnga seguiriini jarhani kʼéri ambe arhini Tata Diosï Jeobani. Ka ísï eska Jesúsi, xarhataakachi eska Tata Diosï Jeobaeri nombri kánikua jukaparhakueska para jucha.
PIREKUA 10 Ju je Jeobani kʼéri ambe arini!
a Asta Jobu sánderu uandanhiaspti ima tanimu kʼuiripuecha engaksï uandeenga eskaksï imeeri amigu jémbeespka. Nájkiruka jiáni enga uarhiranchapka uájpeechani ka tsïtani imeeri jatsikuarhekua ambe, “no ma kʼamanharhintskua úspti, níjtu no sési uandani Tata Diosïri ambe” (Job 1:22; 2:10). Joperu engaksï uandapka eska no sési ambe úspka, ueenaspti ísku ambe ma uandani. sánderu uandanhiaspti ambe engaksï eratsepiringa imeeri ambe ka eska pímbinhajkuntani Tata Diosï Jeobaeri nombrini (Job 6:3; 13:4, 5; 32:2; 34:5).