Jatirichaksï útasï kánikua jarhuajpesïndi kúnguarhikuarhu

Jamberijtsï chájtu májkueni pʼikuarherajka eska Connie jimbokajtsï uánikua ambe nóteru úsïngia úni. Ka nájkirukajtsï míteka eskajtsï ióni sési marhuakuskia Tata Jeobani, jamberijtsï no sési pʼikuarherajka jimbokajtsï nóteru úsïnguia ísï marhuakuni eska antesi. Jiájkani, ¿ambeksïni jarhuataa parajtsï no ísï pʼikuarherani?

AMBE UÉKASÏNI TATA JEOBA ESKAJTSÏ UAAKA

Kurhamarhikuarhi je: “¿Ambe uékasïni Tata Jeoba eskani uaaka?” Deuteronomio 6:5 arhisïndi: Xéncha “chíti Tata Diosï Jeobani iámu chíti mintsita jingoni, iámu chíti alma jingoni ka iámu chíti uinhapikua jingoni”. ¿Andijtsïnisï i uandakuecha uinhaperantajki?

Jimboka i uandakuecha xarhatasïnga eska Tata Jeoba uékasïnga eskajtsï marhuakuaka xáni eskajtsï xáni uaaka. Míteni ini ambe, jarhuataatiksïni parajtsï no terukutakuarhintani máteruechani jingoni ni imani ambe jingoni engajtsï antesi ueenga ka iásï nóteria.

Eratsenta je: engajtsï sapichku japka, jánguarhintapkajtsï sési marhuakuni Tata Jeobani jimbokajtsï jiáni úsïreenga. Joperu iásï, ¿nénajtsï marhuakuxaki Tata Jeobani? Jánguarhintaxakajtsï májkueni úni jimbokajtsï íntskuxaka Tata Jeobani ambe engajtsï uaaka úni iásï. Ióntki, kánikuajtsï jánguarhintaspka marhuakuni Tata Jeobani ka iásïjtujtsï májkueni úxaka.

CHÁJTSÏ UAAKA JARHUATAANI MÁTERUECHANI

Chá engajtsï jatiriikia, enbesi dejtsï eratseni jarhani eskajtsï uánikua ambe nóteru úsïngia úni, jimbokajtsï kʼériiskia, eratsi je ambejtsï úpirini úni. Jiáni enga ma sapichku jarhajka, uánikua ambe no úsïndi úni. Ju je exeani máru ejempluechani.

Aiangua je máteruechani ambe engajtsï xáni nitamakuarhika. Exe ambe engaksï uandapka máru kʼuiripuecha engaksï Biblia uandaajka:

Rei Dabidi: “Tumbi máespka ka iásï jatiriskia, peru no méni exeska eska kaxumbiti ma jurajkunhaaka, nijtu uájpeechani kómuksï jámani jarhani tʼirekua jirinhani” (Sal. 37:25).

Josué: “Iásï exe je, nóteru ióni jimbo uarhiakia, ka chájtsï sési mítetixaka iámu chaari mintsita ka iámu chaari alma jingoni eska iámindu ambakiti ambe engaksïni aiachika Jeoba chaari Tata Diosï niáraskaksï ísï úkuarhini. Iáminduechaksï niárasti kumplirikuarhini para chaari sési jimbo. Iámindu ambe enga uandapka niárasti ísï úkuarhini” (Jos. 23:14).

Dabidi ka Josué, imani ambeksï uandaspti enga ísïipka jimbokaksï uánikua uéxurhini sési marhuakuspka Tata Jeobani ka uánikua ambeksï exespti. Ísï jimbo, imeechaksï no chkuanderaxapti. Ka chájtu sáno májkueni, ambe engajtsï aianguauaka máteruechani, imaksïni jakajkucheati.

Engajtsï ióni páni jakaia marhuakuni Tata Jeobani, uaakajtsï aianguani máteruechani na engaksïni jarhuataka Tata Jeoba. ¿Chá ménisï exeskia na enga jarhuatajka Tata Jeoba imeeri marhuariichani? Enga ísïika, aiangua je máteruechani. Engajtsï ísï uaaka, kánikuajtsï uinhaperaantauaka ka ístujtsï chá sési pʼikuarheraaka (Rom. 1:​11, 12).

Engajtsï jánguarhintaaka nirani tánguarhikuecharhu uinhaperaantauakajtsï máteruechani ka chájtujtsï uinhapikuarhintaaka. Connie engachi ueenani jámani uandaka, uandantasïndi: “Nirani tánguarhikuecharhu kánikuarini uinhaperantasïndi jimbokajtsïni erachiichani kánikua xénchperakua jingoni kámasïnga. Ísï jimbo, jíjtuni sési kaasïnga ka intsïkuarhiani ambe ka jánguarhintasïnga imeecha jingoni nirani aianhpini o máteru ambe úni”.

TATA JEOBA JUKAPARHARASÏNDI AMBE ENGAJTSÏ ÚJKA IMANI JIMBO

Bibliarhu uánikua ejempluechaksï jarhasti ima kʼuiripuecheeri engaksï no ueenga ísï marhuakuni Tata Diosïni eskaksï na uékeenga, joperu Tata Jeoba kánikua xénchaasïreendi. Ma jindeespti Simeóni, israelita ma enga kʼériipkia jiáni enga Jesúsi andajpenupka. Ísï jimbo, méni enga nireenga templurhu exeauendi sapirhatkuechani mámaru ambeksï úni jarhani templurhu. ¿Ambe eratseni jarheni Simeóni? Jamberi eratsendi eska Tata Jeoba nóteru xáni jukaparharasïreengia jimboka kʼériispkia. Joperu no ísïispti, Tata Jeoba uandaspti eska ima sési jámasïreenga ka janhanharhini Tata Diosïni; jimbosï Tata Jeoba úpti eska mítepiringa Jesúsini enga apenasi andajpenupka. Ka ístu arhispti Simeóni eska uandantapiringa eska Jesúsi jindeepiringa Mesíasi (Luk. 2:​25-35). I ejemplu xarhatasïndi eska Tata Jeoba no exexapka na enga Simeóni nóteru ueengia úni máru ambe, sánderu sési, exexapti na enga sánderu mintsikeengia Tata Diosïni, jimbosï íntskupti “imeeri espiritu santu”.

Ístu, uaakajtsï seguru jarhani eska Tata Jeoba kánikua jukaparharasïnga engajtsï jánguarhintani jaka sési marhuakuni nájkirukajtsï nóteru xáni uánikua ambe újkia úni. Tata Jeoba kánikua sési pʼikuarherasïndi enga exejka eska mándani imeeri marhuari jánguarhintaxaka íntskuni “ambe enga jatsikuarheka [o ambe enga újka úni] ka no imani ambe enga no uaaka íntspini [o úni]” (2 Kor. 8:12).

Ísï jimbo, jánguarhinta je úni ambe engajtsï uaaka úni. Pori ejemplu eratsi je ambejtsï úpirini para aianhpini Tata Diosïiri ambe nájkiruka solu ma ratueuaka. Ístu, uaakajtsï uinhaperaantani erachiichani engajtsï uandajpauaka o nota ma karakuani. Ambe engajtsï uaaka erachiicha jimbo, imaksï exeati eska, ambakiti erachi o pirenchi ma komu chá engajtsï ióni sési marhuakukia Tata Jeobani, kánikua xénchaasïnga.

Nájkirukajtsï nóteru agustu jámajkia, útasïjtsï uaaka sési marhuakuni Tata Jeobani. Pori ejemplu, arini rekuadru jimbo “Uarhipirindi enga no uandajpapiringa” exentaakajtsï pirenchiiri eksperiensia ma enga África anapueka.

Miá je na engajtsï xáni uinhaperantauaka máteruechani jimbokajtsï ióni marhuakuska Tata Jeobani ka útasïjtsï seguiriixaka marhuakuni. Chájtsï ambakiti ejemplu máeska jimbokajtsï tekaantaxaka. Ka asï mirikurhi je ambe enga uandajka Ebreu 6:10: ʻTata Diosï méntkisï sési úsïndi iámindu ambe ka no mirikurhiati ambe engajtsï xáni újka ka nijtu na engajtsï xáni xénchajka imeeri nombrini, jimbokajtsï jarhuataaska pímbinharhatiichani ka útasïjtsï jarhuataaxaka’.

JÁNGUARHINTA JE JARHUATAANI MÁTERUECHANI

Imeecha engaksï medisineeri ambe míteka uandasïndiksï eskaksï no pʼamenchasïnga, nóksï mirikurhisïndi ambe ka sánderuksï ióni irekasïndi ima kʼuiripuecha engaksï jatiriikia ka jánguarhintanksï jarhani jarhuataani máteruechani.

Ka nájkirukajtsï jarhuatauaka máteruechani, inde ambe no arhikuekaasïndi eskajtsï nóteru no sési pʼikuarheraakia, jimboka solu Tata Diosïiri Reinu uaaka kénditani pekaduni enga újka eska ma tʼarhepiaka ka uarhini (Rom. 5:12).

Joperu engajtsï jánguarhintaaka marhuakuni Tata Jeobani ka jarhuataani máteruechani parakaksï míteaka imani, uinhaperantaatiksïni parajtsï seguiriini mintsikani eska ísï úkuarhiaka ambe enga Tata Diosï uandarini jakaia, ka ístu, jamberijtsï no xáni pʼamenchaaka. Chá erachiicha engajtsï jatiriikia ka engaksïni kánikua xénchajka, asï mirikurhi je eska Tata Jeoba kánikua jukaparharasïnga ambe engajtsï xáni újka, ka ístu kúnguarhikuarhu anapuechaksïni kánikua jukaparharasïndi jimbokajtsï chá ióni sési marhuakuskia Tata Jeobani.