SEMANA 51
Ambe enga chá erokuarhini jaka niáraati ísï úkuarhini
“Nóchi méni kʼuratsekua jingoni pakaraaka engachi ísï mintsikani jauaka” (ROM. 5:5).
PIREKUA 142 Ju je tsípikua jingoni erokuarhini
AMBE ENGACHI EXEAKAa
1. ¿Andichisï újki uandani eska ambe enga Abraáni mintsikani japka niárapiringa ísï úkuarhini?
JEOBA aiakuspti imeeri amigu Abraánini eska imeeri uájpeecha jimbo iámindu Parhakpini anapuecha k’éri kóntperata ma intsïnhapiringa (Gén. 15:5; 22:18). Jimboka Abraáni kánikua mintsikasïreenga Tata Diosïni, seguru jarhaspti eska ísï úkuarhipiringa i aiatsperakua. Joperu enga Abraáni kasi 100 uéxurhini jatiripkia ka Sara 90, íksï Tata Diosïiri marhuariicha nótki ma sapini kánguarhisïreendi (Gén. 21:1-7). Biblia ísï uandasïndi Abraániiri: “Ima erokuarhispti ka mintsikaspti eska niárapiringa uánikua ireteecheeri taatini nájkiruka ísï xarhareenga enajki no méni úpirini ísï úkuarhini” (Rom. 4:18). Eskachi na mítekia, ima mintsikaspti ka ísï úkuarhispti, jiájkani Abraáni niáraspti Isaakiiri taati jémbeeni, sapini enga xáni tsípikua jingoni erokuarhini japka. ¿Andisï xáni seguru japi Abraáni eska Jeoba niárapiringa kumplirini ambe enga aiakuni japka?
2. ¿Andisï xáni seguru japi Abraáni eska Tata Diosï Jeoba ísï úpiringa eska na aiakupka?
2 Jimboka Abraáni sési mítespka Tata Diosï Jeobani ima ‘meru mintsikasïreendi eska niárapiringa úkuarhini ambe enga Tata Diosï Jeoba aiakupka’ (Rom. 4:21). Imeeri jakajkukua jimbo Jeoba niáraspti sési exeni ka jaiapanhentani (Sant. 2:23). Ísï eska na uandajka Roma 4:18, erokuarhini ka mintsikani kánikua jukaparhakuespti para Abraáni. Ju je iásï exeni ambe enga uandapka apostoli Pablu mintsikakueri ambe Roma kapitulu 5 jimbo.
3. ¿Ambe uandasïni Pablu erokuarhikueri ambe?
3 Apostoli Pablu uandasïndi andichisï uaa seguru jarhani eska “nóchi méni kʼuratsekua jingoni pakaraaka engachi ísï mintsikani jauaka” (Rom. 5:5). Ístujtsïni jarhuatasïndi kurhanguni néna uaa juchaari mintsikakua sánderu uinhapiti jarhani. Engachi exepani jauakia Roma 5:1-5, eratsenta je néna niáraxakiia tiempu jingoni chaari mintsikakua sánderu uinhapini. Ístu, ambe engachi exeni jauaka exeraatiksïni nénajtsï uaa sánderu uinhaperani chaari mintsikakuani. Orhetachi sési jásï erokuarhikua ma exeaka enga Pablu uandajka eskajtsïni no kʼuratsekua jingoni pakataaka.
JUCHAARI SÉSI JÁSÏ EROKUARHIKUA
4. ¿Ambeeri uandasïni Roma 5:1, 2?
4 (Arhinta je Roma 5:1, 2). Pablu ini ambe karakuaspti Roma anapu kúnguarhikuarhu anapu erachiichani. Imeechaksï jorhenguarhisptia Jeobaeri ka Jesúsiiri ambe, xarhatasptiksïa eskaksï mintsikasïreenga Tata Diosï Jeobani ka niárasptiksïa kristianu úkuarhini. Jimbokaksï mintsikaspka Tata Diosï ísï exeasïndi “komueska kʼuiripuecha enga[ksï] sési jámajka” ka espiritu santu jimbo erakuaspti. Jiánksï uératini jatsispti sési jásï ma erokuarhikua ka enga ísï úkuarhipiringa.
5. ¿Náki kóntperataksï erokuarhixaki erakukateecha?
5 Ísï tátsekua, Pablu aianguaspti Éfesu anapu kristianu erakukateechani inde erokuarhikueri enga Tata Diosï íntsaapiringa. Arhiaspti eskaksï intsïnhapiringa ambakiti ambe “enga ima patsakuani jaka pímbinharhatiichani para íntsaani komueska erensia ma” (Éfes. 1:18). Ka Kolosasi anapuechani aianguaspti naniksï intsïnhapirini indeni kóntperatani engaksï erokuarhini japka. Arhiaspti: “Jimbokajtsï chá indeni ambe erokuarhixaka ambe engajtsï míndanhaka auandarhu” (Kol. 1:4, 5). Jiájkanksï ima kristianuecha engaksï erakukateeka, ambakiti ambeksï erokuarhixati, tsíntanksï ka irekanksï para méntkisï auandarhu, nani engaksï Jesukristu jingoni juramuaka (1 Tes. 4:13-17; Apok. 20:6).
Erachi Frederick Franz uandaspti eskaksï kristianu erakukateecha seguru jarhaspka eska ambe engaksï erokuarhini jaka meru ísï úkuarhiaka. (Exe je párrafu 6)
6. ¿Ambe uandaspi erachi erakukata ma imeeri erokuarhikueri ambe?
6 Kristianu erakukateechaksï mintsita jingoni jukaparharasïndi indeni erokuarhikuani engaksï jatsika. Pori ejemplu, 1991 jimbo erachi Frederick Franz ini ambe uandaspti: “Juchaari erokuarhikua niáraati ísï úkuarhini, ka para iámindu jucha 144,000 Tata Diosïjtsïni íntskuati iámindu ambe engajtsïni aiachetini jaka, juchaari kóntperata iauani sánderu ambakitiuati ka eskachi na eratseni jaka”. ¿Néna pʼikuarherasïreeni ima enga xáni ióni marhuakupkia Tata Diosï Jeobani? Ima uandantaspti: “Májkuenchi jukaparharasïnga juchaari erokuarhikuani. Engachi sánderu tiempu erokuarhijka, sánderuchi jukaparharasïnga. Jindeesti ambe ma enga kánikua sési jaka erokuarhini, nájtukachi jatsipiringa para ma miioni uéxurhini erokuarhini. Iásï ini erokuarhikuani sánderu tsípikua jingoni erokuarhixaka eska antesi”.
7, 8. ¿Náki erokuarhikuanksï jatsiski sáno iámindu Tata Diosïiri marhuariicha? (Roma 8:20, 21).
7 Sáno iámindu kʼuiripuecha engaksï iásï marhuakuni jaka Tata Diosï Jeobani máteru erokuarhikuaksï jatsisti. ¿Nákiiski? Imani enga Abraáni erokuarhini japka: irekani para méntkisï Echerirhu Tata Diosï Jeobaeri Reinueri juramukua jimbo (Ebr. 11:8-10, 13). Pablu ístu uandaspti ini xáni ambakiti erokuarhikueri ambe (arhinta je Roma 8:20, 21). Engajtsï chá ueenapka jorhenguarhini ambe enga Biblia aiatspejka para sánderu orhepatini, ¿ambejtsï sánderu tsitiski? ¿Tsitiskijtsï eskajtsï nóteru pekadu jukaraakia ka perfektueni? ¿Kánikuajtsï tsípispi engajtsï mítepka eskaksï chaari familiariicha uaaka tsíntani ka Paraisurhuksï irekani? Tata Diosïiri aiatsperakuecha jimbo, chájtsï úsïnga niárani ambakiti erokuarhikua ma jatsini para sánderu orhepatini.
8 Iáminduchi erokuarhixaka kánikua sési irekani para méntkisï Echerirhu o auandarhu. I ambe engachi mintsikani jaka uaati pauani pauani sánderu uinhapiti jarhani. ¿Nénachi uaa ísï úni? Parachi míteni, ju je seguiriini exeni ambe enga apostoli Pablu karapka. Ambe enga ima karapka jarhuataatijtsïni parachi sánderu seguru jarhani eska úkuarhiaka ambe engachi erokuarhini jaka ka eskachi no méni kʼuratsekua jingoni pakaraaka.
NÉNA UINHAPERANI JUCHAARI EROKUARHIKUANI
Iámindu kristianuechachi míteska eskachi kʼérati uandanhiateechani jatsiauaka. (Exea je párrafuechani 9 ka 10)
9, 10. Májkueni eska Pablu, ¿ambechi mítetixaki eskachi nitamakuarhiaka? (Roma 5:3; Ístu exea je imajeniichani).
9 (Arhinta je Roma 5:3). Pablu uandaspti ambe ma engajtsïni jamberi úpiringa ísku pakatani: engachi no sési nitamakuarhijka sánderu uinhapintasïndi juchaari mintsikakua. Iámindu kristianuechachi mítetixaka eskachi niáraaka no sési nitamakuarhini. Ju je miáni ambe enga Pablu arhiapka Tesalónika anapu kristianuechani: “Engani jucha chánksïni jingoni japka, juchaksïni aiangusïreenga eskachi no sési ambe nitamakuarhipiringa, ka chájtsï exeskia eska ísï úkuarhiska” (1 Tes. 3:4). Ka Korintu anapuechani ísï karakuaspti: “Jucha uékasïnga eskajtsï chá mítetini jauaka na engachi no sési nitamakuarhika [...] engachi jamberi no mítepka sinchi tsípiti pakarapirini o nómbe” (2 Kor. 1:8; 11:23-27).
10 Ka ini jurhiatikuechani jimbo májkueniisti, kristianuechachi mítetixaka eskachi uandanhiata ambe jatsiaka (2 Tim. 3:12). ¿Ambejtsï xáni nitamakuarhiski chá engajtsï ueenaka mintsikani Jesúsini ka chúxapani? Jamberiksïni chaari amiguecha o familiariicha teresmarhujti oksï niárani no sésiksïni kámani. ¿Jatsiaskijtsï chá uandanhiateechani chaari ánchikuarhitarhu jimbokajtsï uékasïnga jurhimbiti úni iámindu ambe? (Ebr. 13:18). ¿Juramutiichaksïni no sési kámasïni jimbokajtsï aianhpixaka ambe engajtsï erokuarhini jaka? Náki uéjki uandanhiateechanchi jatsiani, Pablu uandaspti eskachi jatsiska para kánikua tsípini jarhani. ¿Andi?
11. ¿Andichisï jatsi para eratsetini jarhani tekaantani?
11 Kánikuachi tsípisïnga engachi no sési nitamakuarhini jarhajka, jimbokajtsïni inde ambe jarhuatasïnga xarhatani ambakiti kualidadi ma. Roma 5:3 uandasïndi: “Engachi no sési nitamakuarhini jarhajka, inde ambejtsïni jarhuatasïndi parachi sánderu tekaantani”. Jimbokachi iámindu kristianuecha niárasïnga no sési ambe nitamakuarhini, jatsiskachi para eratsetini jarhani tekaantani. Engachi tekaantaska solu jiánchi intsïnhaaka imani kóntperatani engachi xáni erokuarhini jaka. Nóchi uékasïnga ima jásï kʼuiripueni enga Jesúsi uandapka ejemplurhu ma, ima semiieri enga andatseerapka nani enga tsakapu jatandepka. Imaksï jiókuarhisïndi Tata Diosïiri Uandakuani tsípikua jingoni, joperu “enga[ksï] niárajka uandanhiata ambe jatsini o no sési kánhani”, jirejiresïksï chkésïndi (Mat. 13:5, 6, 20, 21). Jo, no nema tsitisïndi no sési kánhani o tsʼéjkukua ambe jatsini, peru tekaantani marhuachesïndijtsïni. Ju je exeni andi.
12. ¿Ambe jimbojtsïni jarhuatasïni tekaantani?
12 Disipulu Santiagu uandaspti na enga xáni marhuajka tekaantani. Ini ambe karaspti: “Seguiriini ja je tekaantani jimbokaksïni inde ambe jarhuataaka parakajtsï sési jorhendakata jauaka, iámindu ambe jimbojtsï sési jauaka ka nójtsï ambe ma kueratanchaaka” (Sant. 1:2-4). Jiájkani tekaantskua ambakiti ánchikuarhita ma uaati. ¿Náki? Jarhuataatijtsïni sánderu tekaantstini, sánderu xénchani ka mintsikani Tata Diosïni. Joperu no inde ambejkuesti, ístujtsïni uaati máteru ambe jimbo jarhuatani.
13, 14. ¿Ambe úkuarhisïni engachi tekaantani jarhajka, ka néna jarhuatasïni juchaari erokuarhikuani? (Roma 5:4).
13 (Arhinta je Roma 5:4). Pablu uandaspti eska “engachi ísï tekaantajka Tata Diosïjtsïni jaiapanhentasïn[ga]” (Rom. 5:4). I ambe no arhikuekasïndi eska Tata Diosï Jeoba tsípisïnga engachi no sési nitamakuarhini jarhajka, sino eska tsípisïnga engachi tekaantani jarhajka. ¿A no eskaksïni kánikua uinhaperantasïnga míteni eskajtsï uaaka sési pʼikuastani Tata Diosï Jeobani engajtsï no jurajkuska ka tekaantani? (Sal. 5:12).
14 Ju je miántani Abraánini. Ima úspti jaiapanherantani Tata Diosïni jimboka tekaantaspka tsʼéjkukuechani enga nitamakuarhiapka. Ísï jimbo Tata Diosï niáraspti ísï exeni komueska imeeri amigu, ka komu nema enga sési jámajka Jeobani japarini (Gén. 15:6; Rom. 4:13, 22). Májkueni úkuarhiati juchantsïni jingoni. Tata Diosïjtsïni no imani ambe jimbojku sési exeati engachi marhuakuni jaka ni pribilejiuecha jimbo engachi jatsiaka kúnguarhikuarhu, sino imajtsïni jaiapanhentaati engachi no méni jurajkuska ka seguiriinchi tekaantani. Ka indeni ambechi uaaka iáminduchi úni, no arhiparini na engachi xáni jatiriika, ambe engachi nitamakuarhini jaka ka na engachi xáni jorhenaka. ¿Tsʼéjkukuajtsï ma jatsiski? Miá je eska engajtsï no méni jurajkuska Tata Diosïni, imaksïni jaiapanhentaati. Míteni eskajtsïni Tata Diosï Jeoba jaiapanhentaxaka kánikuajtsïni sési pʼikuastasïndi ka uinhaperantasïndi juchaari erokuarhikuani.
EROKUARHIKUA MA ENGA SÁNDERU UINHAPITIIKA
15. ¿Ambeeri seguiriispi uandantani Pablu ka ambechi úpirini kurhamarhikuarhini?
15 Eskachi na exekia, apostoli Pablu uandaspti eska engachi tekaantaska, Tata Diosïjtsïni jaiapanhentaati. Iásïchi exeaka ambe enga ima seguirijka uandani: “Engajtsïni Tata Diosï jaiapanhentajka, niárasïngachi sánderu mintsikani eskajtsïni ima kóndentaaka ka nóchi méni kʼuratsekua jingoni pakaraaka engachi ísï mintsikani jauaka” (Rom. 5:4, 5). Sánitu antesi, Roma 5:2 jimbo, Pablu uandasptia eskaksï Roma anapu kristianuecha erokuarhikua ma jatsispka, enga jindeeka para ‘Tata Diosï k’éri ambe exeani’. Jamberichi kurhamarhikuarhijka: “Engaksï ima kristianuecha jatsipkia erokuarhikua ma, ¿andisï Pablu ménderu erokuarhikueri ambe uandajki?”.
Sési jásï erokuarhikua engajtsï iásï jatsika sánderu uinhapistia, sánderu kʼéstia, ka sánderujtsï seguru jarhaskia ka eska jiáni engajtsï ueenapka míteni. (Exea je párrafuechani 16 ka 17)
16. Uanda je na enga uaaka nema seguru jarhani eska ambe enga Biblia aiatspejka meru ísïiska. (Ístu exea je imajeniichani).
16 Uaakachi kurhanguni ambe enga Pablu arhikuekapka engachi no mirikurhiska eska erokuarhikua úsïnga sánderu uinhapiti jarhani. Pori ejemplu, engajtsï ueenapka kurhaani eskajtsï uaaka irekani para méntkisï paraisu ma jimbo ixú Echerirhu, jamberijtsï eratsepka eska inde ambe no méni niárapiringa ísï úkuarhini. Joperu engajtsï na sánderu mítepani japka Tata Diosï Jeobani ka ambe enga Biblia aiatspejka, niáraspkajtsï exeni eska inde erokuarhikua meru ísïiuaka.
17. Engajtsï na itsï atakuarhipkia, ¿nénajtsï niáraski sánderu mintsikani ambe engajtsï erokuarhini jaka?
17 Asta ísï tátsekua engajtsï na itsï atakuarhijkia, niárasïngajtsï sánderu mintsikani indeni erokuarhikueri ambe, jimbokajtsï sánderu jorhenguarhisïnga ka sánderujtsï mítesïnga Tata Diosïiri ambe (Ebr. 5:13–6:1). Seguru eskajtsï ísï úkuarhinchaka eska na uandajka Roma 5:2-4, jimbokajtsï niáraska uandanhiateechani jatsiani joperujtsï exeska eskaksïni Tata Diosï Jeoba jaiapanhentasïnga. Ka jimbokajtsï míteska eska ima tsípini pʼikuarherasïnga chánksïni jingoni, inde ambeksïni jarhuatasïndi parajtsï sánderu seguru jarhani eska Tata Diosï Jeoba ísï uaaka eska na aiatspeka. Sánderujtsï jakajkusïnga indeni erokuarhikuani eska antesi. Exesïngajtsï eska meru ísïiuaka, eska chaariuaka, ka uékaxakajtsïa eska niáraaka. Jarhuatasïndiksïni parajtsï úni sánderu sési kámani chaari familiani, sánderu sési erakuni úni ambe ma ka sánderu sési úrani chaari tiempuni.
18. ¿Ambejtsïni arhisïni Tata Diosï Jeoba parachi seguru jarhani eska ísï úkuarhiaka?
18 Enga Pablu na uandapkia eska sési jarhani Tata Diosïni jingoni úsïnga eska ma erokuarhikua ma jatsiaka, ístu uandaspti ambe ma enga kánikua jukaparhakueka: eskachi uaaka seguru jarhani eska inde erokuarhikua meru ísï úkuarhiaka. ¿Andi? Jimboka Pablu arini ambe arhiaspka kristianuechani Tata Diosïiri ambe: “Ka nóchi méni kʼuratsekua jingoni pakaraaka engachi ísï mintsikani jauaka; jimboka imani espiritu santuni jimbo engajtsïni íntskujka, Tata Diosïjtsïni xarhatachesïndi eskajtsïni xénchasïnga” (Rom. 5:5). Ísï jimbo, uaakachi seguru jarhani eska inde erokuarhikua meru ísï úkuarhiaka.
19. ¿Ambeerichi uaa seguru jarhani?
19 Sési japirindi eskajtsï miántapiringa Abraánini. Tata Diosï Jeoba ambe ma aiakuspti, jaiapanhentaspti ka ísï exespti eska imeeri amigu ma. Ambe enga Abraáni erokuarhipka meru ísï úkuarhispti. Biblia uandasïndi: “Ka jimboka Abraáni xáni ióni tekaantaspka, jimbosï Tata Diosï ísï aiakupti” (Ebr. 6:15; 11:9, 18; Rom. 4:20-22). Májkueni eska Abraáni, seguruchi jarhaska eska engachi no jurajkuska Tata Diosï Jeobani, intsïnhaakachi ambe engachi erokuarhini jaka. Inde erokuarhikua meru ísïisti, ka inde ambe úsïndi eskachi tsípini pʼikuarheraaka (Rom. 12:12). Pablu uandaspti: “Eska Tata Diosï, ima engaksïni jarhuatajka parajtsï chá erokuarhini jarhani ambe enga ima aiatspeka, eskaksïni ima jarhuataaka para chá tsípikua jingoni irekani ka parajtsï no uandanhiani jimbokajtsï chá mintsikasïnga, ka parakajtsï espiritu santueri uinhapikua jimbo méntku jauenani jauaka sánderu ambakiti ambe erokuarhini” (Rom. 15:13).
PIREKUA 139 ¿Eranhaskasïndi jimbanhi parhakpinini?
a Ini jorhenguarhikua jimbochi exeni jauaka ambe engachi Kristueri chúxapatiicha erokuarhini jaka ka andichisï uaa seguru jarhani eska niáraaka ísï úkuarhini. Roma kapitulu 5 jarhuataatijtsïni exeni eska inde erokuarhikua engachi iásï jatsika no májkueniiska eska ima erokuarhikua engachi jiáni jatsipka engachi apenasi míteni japka Tata Diosïiri ambe.