Римлыларга
6 Шулай итеп, нәрсә әйтик соң? Аллаһының юмарт игелеге ташып торсын өчен, гөнаһ кылып яшикме? 2 Юк, әлбәттә! Без гөнаһ өчен үле,+ ничек инде без гөнаһ кылып яшик?+ 3 Без һәммәбез, чумдырылып Мәсих Гайсә белән берләшкән кешеләр,+ аның үлеменә чумдырылу үттек,+ сез моны белмисезмени? 4 Шуңа күрә без аның үлеменә чумдырылу аша аның белән бергә җирләнгәнбез.+ Бу, Мәсих күктәге Атаның даны аша үледән терелеп яши башлаган кебек, без дә яңа тормыш белән яши алсын өчен булды.+ 5 Аның үлеменә охшаш үлем аша аның белән берләшкәнбез икән,+ һичшиксез, аның үледән терелүенә охшаш терелү аша аның белән берләшкән булачакбыз,+ 6 безгә бит шул билгеле: гөнаһлы тәнебез безнең өстән башка хакимлек итмәсен өчен+ һәм без инде гөнаһ коллары булмасын өчен,+ безнең иске шәхесебез аның белән бергә баганага кадакланган.+ 7 Үлгән кеше гөнаһтан азат* бит.
8 Ә инде Мәсих белән бергә үлгәнбез икән, аның белән бергә яшәрбез дә, дип ышанабыз. 9 Чөнки без шуны беләбез: үледән терелгән Мәсих+ башка үлми;+ үлем аңа инде хуҗа түгел. 10 Ул, гөнаһны юк итәр өчен, бер тапкыр үлде, һәм бу башка кабатланмаячак.+ Ә хәзер ул Аллаһы өчен яши. 11 Сез дә үзегезне гөнаһ өчен үле дип, ә Аллаһы өчен Мәсих Гайсә ярдәмендә тере дип санагыз.+
12 Шуңа күрә, тән нәфесләренә буйсынып яшәмәс өчен, гөнаһка фани тәннәрегездә патша булып идарә итәргә бирмәгез.+ 13 Үз тәнегезне тәкъвасызлык коралы итеп гөнаһка тапшырмагыз, киресенчә, үледән терелгәннәр буларак, үзегезне һәм, тәкъвалык коралы итеп, үз тәнегезне Аллаһыга тапшырыгыз.+ 14 Гөнаһ сезгә хуҗа булмасын, чөнки сез канун хакимлеге астында түгел,+ ә Аллаһының юмарт игелегенең хакимлеге астында яшисез.+
15 Һәм нишлик инде? Канун хакимлеге астында түгел, ә Аллаһының юмарт игелегенең хакимлеге астында булганга,+ гөнаһ кылыйкмы? Юк, әлбәттә! 16 Әллә белмисезме? Үзегезне тыңлаучан кол итеп берәр кемгә тапшырганда, сез аның колы булып китәсез:+ я үлемгә+ алып баручы гөнаһ колы,+ я тәкъвалыкка алып баручы тыңлаучанлык колы. 17 Ләкин кайчандыр гөнаһ колы булсагыз да, хәзер сез үзегезгә тапшырылган тәгълиматка чын күңелдән тыңлаучан булдыгыз, һәм мин моның өчен Аллаһыга рәхмәтлемен. 18 Әйе, гөнаһтан азат ителеп,+ сез тәкъвалык колы булдыгыз.+ 19 Сез табигатегез буенча көчсез, шуңа күрә сезгә кешеләр өчен аңлаешлы сүзләр белән әйтәм. Сез кайчандыр үз тәнегезне канунсызлыкка китерүче канунсызлыкка һәм нәҗеслеккә кол итеп тапшырган идегез, ә хәзер тәнегезне изгелеккә китерүче тәкъвалыкка кол итеп тапшырыгыз.+ 20 Чөнки сез гөнаһ колы булганда, тәкъвалык сезгә хуҗа түгел иде.
21 Ул вакытта нинди җимеш китерә идегез? Ул эшләрдән сез хәзер ояласыз. Аларның ахыры — үлем.+ 22 Ләкин хәзер, гөнаһтан азат ителеп Аллаһының колы булгач, сезнең җимешегез — изгелек,+ һәм бу мәңгелек тормышка алып бара.+ 23 Чөнки гөнаһ өчен түләү — үлем,+ ә Аллаһының бүләге — Хуҗабыз Мәсих Гайсә аша+ мәңгелек тормыш.+