12 НЧЕ БҮЛЕК
Аллаһының акыллы киңәшләре
Гыйбрәтле сүзләр китабы — бу Аллаһы иңдергән киңәшләр җыентыгы. Аларның күпчелеген Сөләйман язган, һәм алар көндәлек тормыш өчен җитәкчелек бирә
ЙӘҺВӘНЕҢ акыллы Хаким булуын нәрсә исбат итә? Мәсәлән, ул биргән киңәшләр. Алар файдалымы? Аларны куллансак, тормыш бәхетлерәк һәм мәгънәлерәк булырмы? Сөләйман йөзләгән гыйбрәтле сүзләр язган, һәм алар тормышның һәрбер өлкәсенә диярлек кагыла. Берничәсенә игътибар итик.
Аллаһыга таян. Йәһвә белән яхшы мөнәсәбәтләр булсын өчен, аңа таянып яшәргә кирәк. «Бөтен йөрәгең белән Раббыга сыен, үз белдегеңә таянма. Йөрер юлларыңда һәрвакыт Аллаһыны юлдаш ит, Ул синең адымнарыңны тугъры якка юнәлдерер»,— дип әйтелә Гыйбрәтле сүзләр 3:5, 6 да. Без Йәһвәгә таянуыбызны аның җитәкчелеге буенча яшәп һәм аңа тыңлаучан булып күрсәтәбез, бу тормышыбызны чын мәгънәле итә. Андый тормыш Йәһвә йөрәген сөендерә, һәм ул үз дошманы, Шайтан, күтәргән сорауга җавап кайтара ала (Гыйбрәтле сүзләр 27:11).
Үзеңне башкалар белән акыллы тот. Аллаһының ирләргә, хатыннарга һәм балаларга биргән киңәшләре аеруча безнең көннәрдә файдалы. Аллаһы ирләргә: «Яшьлегеңдәге... сөекле хатының белән күңелең ач»,— дигән киңәш биреп, үз тормыш иптәшләренә тугры булырга куша (Гыйбрәтле сүзләр 5:18—20). Ә кияүдәге хатын-кызлар Гыйбрәтле сүзләр китабының 31 нче бүлеген укып, ире һәм балалары мактаган игелекле хатын турында белә алалар. Гыйбрәтле сүзләр 6:20 дә Аллаһы балаларга үз әти-әниләрен тыңларга куша. Кеше башкалардан читләшеп торса, бу аның эгоист булуын күрсәтә, шуңа күрә бу китапта дуслык мөһим дип әйтелә (Гыйбрәтле сүзләр 18:1). Әмма дуслар безгә яхшы яки начар яктан тәэсир итәргә мөмкин, димәк, аларны сайлаганда, акыл белән эш итәргә кирәк (Гыйбрәтле сүзләр 13:20; 17:17).
Тәүфыйклы бул. Бу китапта исерткеч эчемлекләр эчүгә кагылышлы, сәламәтлегебезгә файда китерүче хисләр үстерү һәм зарарлы хисләр белән көрәшү, шулай ук тырышчан булу турында кыйммәтле киңәшләр бар (Гыйбрәтле сүзләр 6:6; 14:30; 20:1). Анда Аллаһы киңәше буенча эш итмичә, үз акылыбыз буенча эш итү бәлагә китерә диелә (Гыйбрәтле сүзләр 14:12). Анда язылган сүзләр безне үз йөрәгебезне бозык тәэсирдән сакларга өнди, һәм «йөрәк — тереклек чыганагы» икәнен исебезгә төшерә (Гыйбрәтле сүзләр 4:23).
Бу киңәшләрне кулланып яшәү төрле илләрдә яшәгән миллионлаган кешенең тормышын бәхетлерәк иткән. Шуңа күрә алар Йәһвәне үз Хакимнәре итеп саный.
Гыйбрәтле сүзләр китабына нигезләнгән.