Давыт патша гөнаһ кыла

Шау́л үлгәч, патша булып Давыт идарә итә башлаган. Ул вакытта аңа 30 яшь булган. Берничә ел узгач, Давыт җитди гөнаһ кылган. Бер кичне ул үз сараеның түбәсеннән бер матур хатынны күргән. Давыт аның исеме Битсәбия́ икәнен һәм ул У́ри исемле гаскәринең хатыны икәнен белеп алган. Ул, Битсәбияне́ үз сараена чакыртып, аның белән якынлык кылган. Һәм тегесе балага узган. Давыт үзенең гөнаһын яшерергә теләгән. Ул үзенең гаскәр башлыгына У́рины иң каты сугыш барган җиргә куярга һәм, аны калдырып, артка чигенергә кушкан. У́ри сугышта һәлак булганнан соң, Давыт Битсәбиягә́ өйләнгән.

Әмма Йәһвә бөтен шул явызлыкны күреп торган. Ул нәрсә эшләгән? Йәһвә Давыт янына Ната́н пәйгамбәрне җибәргән. Ната́н аңа мондый хикәя сөйләгән: «Бер бай кешенең күп сарыклары булган, ә ярлы кешенең бердәнбер яраткан сарык бәтие генә булган. Бай кеше шул ярлының бердәнбер бәтиен үзенә алган». Давыт, ачуланып: «Бу бай үләргә тиеш!» — дип әйткән. Шунда Ната́н Давытка: «Теге бай кеше — син ул!» — дигән. Нык күңелсезләнеп, Давыт Натанга́: «Мин Йәһвә алдында гөнаһ кылдым»,— дип үкенгән. Бу гөнаһ Давытка һәм аның гаиләсенә күп бәла китергән. Йәһвә Давытка җәза биргән, әмма аны исән калдырган, чөнки ул эчкерсез һәм басынкы кеше булган.

Давыт Йәһвәгә гыйбадәтханә төзергә теләгән, әмма Йәһвә бу эш өчен аның улы Сөләйманны сайлаган. Давыт төзелеш өчен кирәкле нәрсәләр әзерли башлаган һәм болай дигән: «Йәһвәнең гыйбадәтханәсе мәһабәт булырга тиеш. Ә Сөләйман әле яшь һәм тәҗрибәсез. Мин, аның өчен барысын алдан әзерләп, аңа ярдәм итәрмен». Давыт төзелеш эшләренә күп-күп акчасын бүләк иткән. Ул оста эшчеләрне тапкан, алтын-көмешне җыйган һәм Тир белән Сидонна́н эрбет агачларын китергән. Гомеренең азагында Давыт Сөләйманга, гыйбадәтханә сызымнарын биреп, болай дигән: «Йәһвә миңа бу сызымнарны сиңа бирергә кушты. Йәһвә сиңа ярдәм итәчәк. Курыкма. Нык бул һәм эшкә тотын».