Аллаһыны яхшырак белегез
«Ул үз Аллаһысы Йәһвәнең йөзен йомшарткан»
«МИН үземне бернәрсәгә дә яраксыз булып сиздем»,— дигән бер ир-кеше. Ул Аллаһыдан куркып яшәгән гаиләдә тәрбияләнгән булган, ләкин вакыт узу белән Аллаһы нормалары буенча яшәми башлаган. Үзенең яшәү рәвешен үзгәртә башлаганда, ул Аллаһы аны беркайчан да кичермәячәк дип курыккан. Әмма бу тәүбә иткән кеше 2 Елъязма 33:1—17 дә язылган Менаше белән очрактан юаныч тапкан. Сезнең үзегезне үткәндәге гөнаһларыгыз аркасында Аллаһының кичерүенә лаек түгел дип санаганыгыз бармы? Алайса, сез дә Менаше очрагыннан юаныч таба алачаксыз.
Менаше Аллаһыдан куркып яшәгән гаиләдә тәрбияләнгән булган. Аның әтисе — Хизәкыйя — Яһүдиядәге иң күренекле патшаларның берсе булган. Аллаһы, могҗиза күрсәтеп, Хизәкыйянең гомерен озынайткан. Өч ел үткәч, Менаше туган (4 Патшалык 20:1—11). Һичшиксез, Хизәкыйя үз улын мәрхәмәтле Аллаһы биргән бүләк дип санаган һәм аны хак гыйбадәт кылуның кадерен белергә өйрәткән. Ләкин Аллаһыдан куркып яшәгән гаиләдә тәрбияләнгән балалар вакыт-вакыт әти-әниләреннән үрнәк алмаска мөмкин. Нәкъ шундый хәл Менаше белән булган.
Менашегә, аның әтисе үлгәндә, 12 яшь кенә булган. Кызганычка каршы, Менаше «Йәһвә каршында явызлык эшләгән» (1, 2 нче шигырьләр). Яшь патшага хак Аллаһыга гыйбадәт кылмаган киңәшчеләр тәэсир итмәгәнме? Изге Язмаларда моның турында бернәрсә дә әйтелми. Әмма анда шунысы әйтелә: Йәһвә нормаларын чиктән тыш бозып, Менаше потларга табына башлаган һәм кансыз булып киткән. Ул ялган илаһларга корбан китерү урыннары төзегән, үз улларын корбанга китергән, спиритизм белән шөгыльләнгән һәм Йәһвәнең Иерусалимдагы гыйбадәтханәсендә пот куйган. Йәһвә, могҗиза күрсәтеп, Менашенең тууын мөмкин иткән. Әмма моңа карамастан Менаше үзсүзләнеп Йәһвәнең кат-кат әйтелгән кисәтүләрен санга сукмаган (3—10 нчы шигырьләр).
Ахыр чиктә, Йәһвә бабыллыларга, Менашенең кулларына богаулар кидереп, аны әсирлеккә алып китәргә рөхсәт иткән. Менаше, күрәсең, әсирлектә булып, үзенең тәртибе турында уйланган: анда ул көчсез һәм үле потлар аны яклый алмаячак икәнен аңлагандыр я үз балачагында әтисе аны нәрсәгә өйрәткән икәнен искә төшергәндер. Һәрхәлдә, Менаше үзгәргән. Изге Язмаларда болай диелә: «Ул үз Аллаһысы Йәһвәнең йөзен йомшарткан... Үзен нык түбәнсеткән. Һәм аңа дога кылган» (12, 13 нче шигырьләр). Ләкин Аллаһы шулкадәр күп гөнаһ кылган кешене кичерә аламы?
Менашенең чын күңелдән тәүбә итүе Йәһвәгә тирән тәэсир иткән. Бу патша Йәһвәнең мәрхәмәтле булуын үтенеп сорагач, Йәһвә аның догасына җавап биргән һәм «аны кабат Иерусалимда патша итеп утырткан» (13 нче шигырь). Менаше чыннан да тәүбә иткән, чөнки ул, үз хаталарын төзәтер өчен, бар көчен куйган. Мәсәлән, ул Яһүдиядә потка табынуны юкка чыгарган һәм үз халкын «Йәһвәгә хезмәт итәргә» чакырган (15—17 нче шигырьләр).
Сез үзегезне үткәндәге гөнаһлар аркасында Аллаһының кичерүенә лаек түгел дип санасагыз, сезгә Менаше белән очрак юаныч табарга ярдәм итәчәк. Бу очрак Изге Язмаларда, ягъни Аллаһы тарафыннан рухландырылган китапта, язылган (Римлыларга 15:4). Йәһвә безнең шуны белүебезне тели: ул безне кичерергә әзер (Мәдхия 85:5). Йәһвә кешенең нинди гөнаһ кылганына түгел, ә аның ихлас күңелдән тәүбә иткәненә игътибар итә. Гөнаһ кылучы, Йәһвәгә чын күңелдән дога кылып тәүбә итсә, начар юлын калдырса һәм яхшылыкны эшләр өчен бар көчен куйса, Менаше кебек «Йәһвәнең йөзен йомшарта» ала (Ишагыйя 1:18; 55:6, 7).