Фәрештәләр турында хакыйкать

Аллаһы Рух булган кебек, фәрештәләр дә күренмәс рухлар, аларның «тәне һәм сөяге юк». Тугры фәрештәләр күкләрдә яши һәм Аллаһы янында була ала (Лүк 24:39; Маттай 18:10; Яхъя 4:24).

Кайчак фәрештәләр, Аллаһы биргән йөкләмәләрне җирдә үтәр өчен, кеше кыяфәтен алган, ә йөкләмәләрен үтәгәннән соң яңадан рухлар булып киткән (Хакимнәр 6:11—23; 13:15—20).

Фәрештәләр Изге Язмаларда ирләр итеп күрсәтелсә дә һәм һәрвакыт ирләр кыяфәтен алган булса да, аларның җенесе юк. Алар өйләнешми һәм балалар тудырмый. Өстәвенә, фәрештәләр башта җирдә кешеләр булып: сабыйлар, балалар я олылар булып яшәмәгән. Фәрештәләрне Йәһвә барлыкка китергән; шуңа күрә Изге Язмаларда алар «Аллаһының уллары» дип атала (Әюп 1:6; Зәбур 148:2, 5).

Изге Язмаларда «кешеләр һәм фәрештәләр теле» турында әйтелә; бу рухи затлар сөйләшкән телнең барлыгын күрсәтә. Аллаһы кешеләр белән сөйләшер өчен фәрештәләрне кулланган булса да, ул безгә фәрештәләргә табынырга һәм дога кылырга рөхсәт итми (1 Көринтлеләргә 13:1; Ачылыш 22:8, 9).

Фәрештәләр саны мириадлаган мириадлар, бәлки, миллиардлагандырa (Даниял 7:10; Ачылыш 5:11).

Фәрештәләр «гаять кодрәтле», алар кешеләрдән күпкә көчлерәк һәм акыллырак. Алар, күрәсең, чиксез зур, кеше күз алдына да китерә алмаслык тизлек белән хәрәкәт итә ала (Зәбур 103:20; Даниял 9:20—23).

Кешеләрдән күпкә көчлерәк һәм акыллырак булсалар да, фәрештәләрнең мөмкинлекләре чикле, һәм кайбер нәрсәләрне алар белми (Маттай 24:36; 1 Петер 1:12).

Фәрештәләр шәхси үзенчәлекләр, Аллаһыга хас сыйфатлар һәм ихтыяр иреге белән барлыкка китерелгән. Шуңа күрә алар, кешеләр кебек, яхшылык эшләргәме я начарлыкмы үзләре сайлый ала. Кызганычка каршы, кайбер фәрештәләр Аллаһыга каршы фетнә күтәрергә булган (Яһүд 6).