Ашкынучан вәгазьчеләргә дога кылып уйланырга кирәк
1. Гайсә вәгазь эше анын өчен мөһим икәнен ничек итеп күрсәткән?
1 Гайсә кич дәвамында кешеләрне савыктырган һәм җеннәрне куып чыгарган. Киләсе көнне Гайсәне тапкач, ул могҗизаларны алда да күрсәтсен өчен, шәкертләр аңа болай дигән: «Барысы да Сине эзлиләр». Ләкин Гайсә аның өчен мөһим булган яхшы хәбәрне вәгазь эшеннән үзен бүлергә юл куймаган. Ул болай дип җавап кайтарган: «Китик башка урыннарга, күрше авыл-шәһәрләргә, Миңа анда да Яхшы хәбәрне сөйләргә кирәк. Мин шуның өчен килдем бит». Гайсәгә шундый караш сакларга нәрсә ярдәм иткән? Ул иртән-иртүк торып уйланган (Марк 1:32—39). Ничек итеп дога кылып уйлану безгә дә ашкынучан вәгазьчеләр булырга ярдәм итә?
2. Нәрсә турында уйлану безгә вәгазьдә ашкынучан булып калырга ярдәм итә?
2 Нәрсә турында уйланырга? Гайсә халыкның «көтүчеләре булмаган сарыклар кебек» борчылганын һәм таралганын күргән (Мат. 9:36). Шулай ук без күпме кеше яхшы хәбәрне ишетергә тиеш икәне турында уйлана алабыз. Без нинди вакытта яшәгәнебез турында да уйлана алабыз (1 Көр. 7:29). Өстәвенә, без Йәһвәнең эшләре һәм сыйфатлары, Йәһвә Шаһите булу хөрмәте һәм без Аллаһы Сүзеннән белгән, ләкин территориябездәге кешеләргә әле таныш булмаган кыйммәтле хәзинәләр турында уйлана алабыз (Мәд. 76:12—14; Ишаг. 43:10—12; Мат. 13:52).
3. Без нинди вакытта уйлана алабыз?
3 Нинди вакытта уйланырга? Гайсә кебек кайберәүләр беркем дә комачаулый алмый чакта, ягъни иртән торып уйлана. Башкалар исә кич белән йоклар алдыннан уйлана (Ярат. 24:63). Графигыбыз бик тыгыз булса да, без уйланыр өчен вакыт бүлеп куя алабыз. Кайберәүләр җәмәгать транспортында барганда уйлана. Башкалар исә төшке аш вакытында ашыкмыйча уйлана. Күпләр хезмәт алдыннан уйлаганнан соң, ашкынып һәм кыюлык күрсәтеп вәгазьли ала дип әйтә.
4. Ни өчен безгә уйланырга кирәк?
4 Дога кылып уйлану Йәһвәгә хезмәт итү теләгебезне үстерәчәк, безгә рухи нәрсәләрне беренче урынга куярга һәм тәвәккәллек белән вәгазьләвебезне дәвам итәргә ярдәм итәчәк. Аллаһының төп хезмәтчесе, Гайсә, уйланып күп файда алган, без дә күп файда алачакбыз.