Изге Язмалар өйрәнүен табар өчен биш ысул
1. Әгәр дә территориябездә Изге Язмалар өйрәнүен табу авыр икән, без нәрсә эшләргә тиеш һәм ни өчен?
1 Изге Язмалар өйрәнүен табу синең өчен авырмы? Тырышлыклар куюыңны дәвам ит. Йәһвә аның ихтыярын бирешмичә үтәүчеләрне фатихалый (Гәл. 6:9). Аста китерелгән биш киңәш сиңа ярдәм итә ала.
2. Изге Язмалар өйрәнүен турыдан-туры тәкъдим итеп, без өйрәнүне ничек башлый алабыз?
2 Турыдан-туры тәкъдим ит. Күп кешеләр без Изге Язмаларга нигезләнгән басмалар тәкъдим итәбез икәнен белә, ләкин алар без Изге Язмалар өйрәнүен тәкъдим итәбез икәнен белмәскә мөмкин. Ни өчен өйдән-өйгә вәгазьләгәндә өйрәнүне турыдан-туры тәкъдим итмәскә? Без килеп йөргән кызыксынучы кешеләрдән аларның Изге Язмаларны өйрәнергә теләкләре турында сорый алабыз. Алар риза булмаса, син аларга брошюралар калдырып, кызыксынуларын алга таба да үстерә аласың. Бер абый-кардәш ирле-хатынлыларга басмаларыбызны еллар буе алып килгән. Аларга брошюраның соңгы санын калдыргач, ул китәр алдыннан сорарга булган: «Сез Изге Язмаларны өйрәнергә телисезме?». Алар: «Әйе!»,— дип әйткәч, ул гаҗәпләнгән. Хәзер алар суга чумдырылган кардәшләр.
3. Җыелышка килгән кызыксынучылар Изге Язмаларны берәрсе белән инде өйрәнәләр дип уйларга кирәкме? Аңлат.
3 Очрашуга килгән кешеләр. Җыелышка килгән кызыксынучылар Изге Язмаларны өйрәнәләр инде дип уйлама. Бер абый-кардәш болай дип әйтә: «Өйрәнүләремнең яртысыннан күбрәге җыелышка килгән кешеләр белән сөйләшүдән башланды». Бер апа-кардәш бер оялчан хатынга өйрәнергә тәкъдим иткән. Аның җыелышта чумдырылган кызлары булган. Бу хатын 15 ел буе җыелышка йөргән һәм һәрвакыт нәкъ җыелыш башланыр алдыннан Патшалык Залына килгән һәм бетүгә үк киткән. Хатын өйрәнергә ризалашкан һәм вакыт узу белән хакыйкатькә килгән. Бу апа-кардәш болай дип яза: «Мин аңа Изге Язмалар өйрәнүен 15 ел буе тәкъдим итмәгәнемә үкенәм!».
4. Башкалар ярдәмендә без ничек өйрәнүләр таба алабыз?
4 Башкалардан белеш. Бер апа-кардәш башкалардан аны Изге Язмалар өйрәнүенә алуларын сорый. Өйрәнү алып баручының рөхсәтеннән ул өйрәнү азагында өйрәнүчедән аның өйрәнергә теләгән танышлары бармы икәнен сорый. Изге Язмаларны өйрәнү өчен басманы кызыксынучы кешегә тәкъдим иткәндә, син болай дип сорый аласың: «Бәлкем, сез бу китапны укырга теләүче берәр кешене беләсездер?» Кайчакта вәгазьчеләр һәм пионерлар кайбер шартлар аркасында участокларында очраткан берәр кеше белән өйрәнү үткәрә алмый. Шуның өчен син Изге Язмалар өйрәнүен үткәрә алуыңны башкаларга белдер.
5. Ни өчен безгә кардәшләрнең ышанмаучы хатыны яки иреннән өйрәнергә теләкләре турында сорарга кирәк?
5 Кардәшнең ышанмаучы тормыш иптәше. Күп җыелышларда вәгазьчеләрнең ышанмаучы тормыш иптәшләре бар. Синең җыелышыңда шундый кардәшләр бармы? Кайбер ышанмаучы кешеләр Изге Язмалар турында үз мәсихче тормыш иптәше белән сөйләшергә теләми, ләкин башка вәгазьче белән өйрәнергә ризалашырга мөмкин. Кардәштән ышанмаучы хатыны яки ире белән ничек яхшырак өйрәнеп була икәне турында алдан сорасак, яхшы булыр.
6. Өйрәнү табарга тырышканда, дога никадәр мөһим?
6 Дога. Дога көчкә ия икәне турында онытма (Ягък. 5:16). Йәһвә аның ихтыяры буенча булган үтенечләребезне тыңларга вәгъдә итә (1 Яхъя 5:14). Графигы бик тыгыз булган бер абый-кардәш Изге Язмалар өйрәнүе турында дога кыла башлаган. Аның хатыны ире өйрәнүче өчен, аеруча өйрәнүченең күп авырлыклары туса, вакыт табармы дип шикләнгән. Ул Йәһвәгә ире өйрәнү тапсын дип дога кылган, әмма шул ук вакытта борчылулары белән дә бүлешкән. Ике атнадан соң Йәһвә аларның догаларына җавап биргән: җыелыштагы бер пионер өйрәнергә теләгән кешене табып аны бу абый-кардәшкә тапшырган. Аның хатыны болай дип әйтә: «Кайберәүләр Изге Язмалар өйрәнүен үткәрү аларның хәленнән килмәс дип уйларга мөмкин. Мин андый кардәшләргә болай дип әйтер идем: догаларыгызда гомуми сүзләр белән генә чикләнмәгез һәм бертуктаусыз дога кылыгыз. Мин бу безгә нинди шатлык китерәчәк икәнен күз алдыма да китермәгән идем!». Тырышлыклар куйсаң, син дә Изге Язмалар өйрәнүен табып, кешегә «тормышка алып баручы юл» буенча барырга ярдәм итә алырсың һәм шатлык кичерә алырсың (Мат. 7:13, 14).