НӘФРӘТНЕ НИЧЕК ҖИҢӘРГӘ?

4 | Аллаһы ярдәменә таяныгыз

Изге Язмалардагы тәгълимат:

«Ә рух җимеше — мәхәббәт, шатлык, тынычлык, түземлек, игелек, яхшылык, иман, юашлык, тотнаклылык» (ГӘЛӘТИЯЛЕЛӘРГӘ 5:22, 23).

Бу нәрсәне аңлата?

Аллаһы ярдәме белән нәфрәт учагын сүндереп була. Аның изге рухы бездә үзебез ия була алмаган сыйфатларны үстерә ала. Шуңа күрә нәфрәттән арыныр өчен, үз көчегезгә түгел, ә Аллаһының ярдәменә таяныгыз. Шулай итеп сез рәсүл Паул язган сүзләрнең дөреслегенә инанырсыз. Ул болай дигән: «Мин үземә кодрәт бирүче ярдәмендә барысын булдыра алам» (Филипиялеләргә 4:13). Сез шулай ук: «Миңа ярдәм Йәһвәдән килә»,— дип әйтә алырсыз (Зәбур 121:2).

Нәрсә эшләп була?

«Йәһвәнең ярдәме белән мин мәрхәмәтсез кешедән тыныч холыклы кешегә әйләндем» (ВАЛЬДО).

Йәһвәгә дога кылып аның изге рухын сорагыз (Лүк 11:13). Аңардан күркәм сыйфатларны үстерергә ярдәм итсен дип үтенегез. Изге Язмаларда нәфрәткә каршы торырга булышучы сыйфатлар мәхәббәт, тынычлык, түземлек һәм тотнаклылык турында нәрсә әйтелгәнен өйрәнегез. Бу сыйфатларны үз тормышыгызда күрсәтер өчен мөмкинлекләр эзләгез. Шулай ук бу сыйфатларны үстерергә тырышкан башка кешеләр белән аралашыгыз. Алар сезне «мәхәббәт һәм игелекле эшләргә дәртләндерә» ала (Еврейләргә 10:24).

Тормыштан алынган мисал. ВАЛЬДО

Кызу холкын үзгәрткән

Вальдоны бала чагында еш кыйнаганнар, шуңа күрә ул үтә мәрхәмәтсез кеше булып үскән. Ул болай дип сөйли: «Мин наркотик сатучылар белән еш кына кыйнаша идем. Бер очракта ярышташ банда, мине үтерер өчен, киллерны яллады. Ләкин ул мине пычак белән генә яралый алды, һәм мин аңардан качып киттем».

Хатыны Йәһвә Шаһитләре белән Изге Язмаларны өйрәнә башлагач, Вальдога бу бер дә ошамаган. Ул болай дип сөйли: «Мин Шаһитләрне нәфрәт итә идем һәм күп кенә тапкыр аларга сүгенеп кычкыра идем. Әмма алар һәрвакыт тыныч кала иде».

Вакыт узу белән, Вальдо үзе дә Изге Язмаларны өйрәнә башлаган. Ул болай ди: «Миңа белгәннәремне куллану авыр иде. Мин үз начар холкымны беркайчан да үзгәртә алмам дип уйлый идем». Ләкин Изге Язмалардагы бер фикер аның тормышына зур йогынты ясаган.

Вальдо болай дип аңлата: «Минем белән Изге Язмаларны өйрәнгән Алехандро исемле абый-кардәш бер тапкыр мине Гәләтиялеләргә 5:22, 23 не укып чыгарга сорады. Алехандро миңа: „Бу сыйфатларны син үзең генә үстерә алмыйсың, моның өчен Аллаһының изге рухы кирәк“,— дип әйтте. Моны аңлагач, мин гел башкача уйлый башладым».

Аллаһы ярдәменә таянып, Вальдо көчле нәфрәт хисләрен җиңгән. Ул болай ди: «Туганнарым һәм элекке дусларым шулкадәр үзгәргәнемә ышанып бетми». Вальдо болай дип өсти: «Йәһвәнең ярдәме белән мин мәрхәмәтсез кешедән тыныч холыклы кешегә әйләндем».