Өйрәнүчеләрегезгә хакыйкать юлына басарга булышыгыз

1, 2. а) Ни өчен кайбер өйрәнүчеләр Йәһвә Шаһитләре булып китәргә ашыкмый? ә) Бу мәкаләдә нәрсә каралачак?

СЕЗ Йәһвә Шаһитләре белән өйрәнгәнегезне хәтерлисезме? Хакыйкать юлына сез шунда ук бастыгызмы я сезгә берәр нәрсә комачаулаган идеме? Бәлки, сез туганнарыгыз, дусларыгыз һәм хезмәттәшләрегез каршы чыгар дип курыккансыздыр. Ә бәлки, Изге Язмалардагы нормаларны тота алмассыз дип борчылгансыздыр. Шулай икән, Йәһвә Шаһитләре булып китәргә ашыкмаган өйрәнүчеләрегезне аңлау сезгә авыр булмас.

² Гайсә төрле куркуларның Йәһвә юлына басарга комачаулый алганын белгән (Мат. 13:20—22). Ләкин ул андый кешеләргә кул селтәмәгән. Гайсә аларга 1) рухи яктан үсәргә нәрсә комачаулаганын күрергә, 2) Йәһвәгә карата ярату үстерергә, 3) хезмәтне беренче урынга куярга һәм 4) басымга бирешмәскә булышкан. Без дә өйрәнүчеләребезгә шулай ярдәм итәргә тиеш. «Мәңге шатланып яшәгез!» дигән китап безгә бу яктан ничек булышыр? Әйдәгез, бу мәкаләдән моның турында белик.

АҢА РУХИ ЯКТАН ҮСӘРГӘ НӘРСӘ КОМАЧАУЛАГАНЫН КҮРЕРГӘ БУЛЫШЫГЫЗ

3. Никәдимгә Гайсәнең шәкерте булып китәргә нәрсә комачаулый алган?

³ Никәдим яһүд башлыкларының берсе булган. Гайсә нибары якынча алты ай вәгазьләсә дә, ул инде аның Мәсих булуын аңлаган. Ләкин Никәдим Гайсәнең шәкерте булып китәргә ашыкмаган (Яхъя 3:1, 2). «Яһүдләрдән курыкканга», ул Гайсә белән качып очрашкан (Яхъя 7:13; 12:42). Күрәсең, Никәдим хакимлеген һәм байлыгын югалтырга курыкканa.

4. Гайсә Никәдимгә ничек ярдәм иткән?

⁴ Никәдим Канунны бик яхшы белгән, ләкин Йәһвәнең үзенә карата ихтыярын аңлап бетермәгән. Аңа булышыр өчен, Гайсә вакытын жәлләмәгән һәм аның белән хәтта төнлә очрашырга әзер булган. Гайсә Никәдимгә нәрсә эшләргә кирәклеген аңлаткан: аңа тәүбә итәргә, суга чумдырылырга һәм Аллаһы Улына иман итәргә кирәк булган. Шулай итеп ул Мәсихнең шәкерте булып китә алган (Яхъя 3:5, 14—21).

5. Өйрәнүчегә рухи үсешен нәрсә тоткарлаганын күрергә ничек булышып була?

⁵ Өйрәнүчегез Изге Язмаларны яхшы белсә дә, рухи яктан үсәргә аңа эше я туганнары комачаулый ала. Ул чакта аның белән дусларча сөйләшеп алыгыз. Мәсәлән, моны бергә кофе эчкәндә я урамда йөргәндә эшләп була. Шундый дустанә атмосферада өйрәнүчегезгә үз хисләре һәм авырлыклары турында сөйләү җиңелрәк булыр, мөгаен. Аны күңелегезне табар өчен түгел, ә Йәһвәне яратканга үзгәрергә дәртләндерегез.

6. Өйрәнүчегезгә булышыр өчен, нәрсә эшләү мөһим? (1 Көринтлеләргә 16:13)

⁶ Йәһвә өйрәнүчебезгә югары нормалар буенча яшәргә ярдәм итәчәк. Безгә исә аны моңа ышандырып торырга кирәк. Шул чакта ул белгәннәрен тормышында куллана башлар, мөгаен. (1 Көринтлеләргә 16:13 укы.) Сезне мәктәп укытучысы белән чагыштырып була. Мәктәптә сезгә нинди укытучылар ошый иде? Бәлки, үз фәннәрен яхшы белгәннәре һәм шул ук вакыт сездә ышаныч хисе үстергәннәредер. Нәкъ шулай ук безгә дә өйрәнүчебезгә белем бирү белән генә чикләнмәскә, ә Йәһвәнең нормалары буенча яши алганына да ышанычын ныгытырга кирәк.

АНЫ АЛЛАҺЫНЫ ЯРАТЫРГА ӨЙРӘТЕГЕЗ

7. Гайсә кешеләргә Аллаһыны яратырга ничек булышкан?

⁷ Гайсә шуны белгән: кешеләр Аллаһыны яратса, белемнәрен тормышларында кулланачак. Шуңа күрә ул аларга Аллаһыга карата ярату үстерергә булыша торган мисаллар китергән. Мәсәлән, ул Йәһвәне балаларына яхшы бүләкләр биргән әти белән чагыштырган (Мат. 7:9—11). Ә башка очракта Гайсә шәфкатьле ата турында мисал сөйләгән. Шул ата читкә киткән улын кичергән һәм аны ярату белән кире кабул иткән. Ата назын күрмәгән кешеләрне бу мисаллар битараф калдырмагандыр, булса кирәк. Алар Йәһвәнең никадәр кызганучан Ата булуын күргән (Лүк 15:20—24).

8. Без өйрәнүчебезне Йәһвәне тагы да ныграк яратырга ничек өйрәтә алабыз?

⁸ Өйрәнүчебезне Аллаһыны тагы да ныграк яратырга дәртләндерер өчен, безгә дә, Гайсә кебек, Аллаһының сыйфатларына ешрак игътибар итү мөһим. Һәрбер дәреснең Йәһвәнең яратуын ничек ачыклаганын күрергә булышыгыз. Мәсәлән, йолым темасын үткәндә, бу югары бәянең шәхсән өйрәнүчегез өчен түләнгәнен ассызыклагыз (Рим. 5:8; 1 Яхъя 4:10). Ул бу фикерне аңласа, Йәһвәне ныграк яратыр, мөгаен (Гәл. 2:20).

9. Майклга Йәһвә юлына басарга нәрсә булышкан?

⁹ Индонезиядә яшәгән Майкл мисалына игътибар итик. Ул хакыйкатьтә үскән, ләкин суга чумдырылмаган. 18 яшендә ул чит илгә эшләргә дип киткән. Берникадәр вакыттан соң ул кире кайткан, өйләнгән, әмма соңрак кабат чит илгә киткән. Шул вакыттарак аның хатыны һәм кызы Изге Язмаларны өйрәнә башлаган һәм рухи яктан үскән. Майклның әнисе үлеп киткәч, ул, әтисе турында кайгыртыр өчен, өенә кайткан. Соңрак Майкл да Изге Язмаларны өйрәнә башлаган. «Мәңге шатланып яшәгез!» китабының 27 нче бүлегендәге «Тирәнрәк казыгыз» дигән өлешне өйрәнгәндә, Майкл, Гайсә үлгәндә, Йәһвәнең нәрсә хис иткәне турында уйланган. Бу аның йөрәгенә шулкадәр үтеп кергән ки, ул хәтта елап җибәргән. Йолым өчен рәхмәтле булганга, ул тормышын үзгәртергә һәм суга чумдырылырга булган.

АҢА ХЕЗМӘТНЕ БЕРЕНЧЕ УРЫНГА КУЯРГА БУЛЫШЫГЫЗ

10. Гайсә үз шәкертләренә хезмәтне беренче урынга куярга ничек булышкан? (Лүк 5:5—11) (Шулай ук иллюстрацияне кара.)

¹⁰ Гайсәдән яхшы хәбәрне ишеткән кайбер кешеләр аның Мәсих булуын шунда ук аңлап алган, ә менә ашкынып вәгазьләргә кирәклегенә соңрак кына төшенгән. Моны Петер белән Әндри турында әйтеп була. Алар Гайсәгә иман итсә дә, берникадәр вакыттан соң гына даими рәвештә аның белән йөри башлаган (Мат. 4:18, 19). Моңа кадәр алар Ягъкуб һәм Яхъя белән балык тоткан. Бу эш, күрәсең, акчалы булгандыр (Марк 1:16—20). Ләкин Гайсә белән йөрер өчен, алар «ятьмәләрен», ягъни балык тоту эшен калдырган. Әлбәттә, алар алга таба да гаиләләре турында кайгырткан. Ләкин хәзер инде вәгазь эше алар өчен иң мөһиме булган. Шәкертләрне үз приоритетларын үзгәртергә нәрсә дәртләндергән? Гайсәнең бер могҗизасы. Бу могҗиза шәкертләрнең иманнарын бик ныгыткан һәм Йәһвәнең үзләрен матди яктан кайгырта алуына ышандырган. (Лүк 5:5—11 укы.)

11. Өйрәнүчебезнең иманын ныгытыр өчен, аңа нәрсә турында сөйләп була?

¹¹ Без, Гайсә кебек, могҗизалар кыла алмыйбыз, билгеле. Ләкин без Йәһвәнең үз хезмәтчеләрен ничек кайгыртканы турында, шул исәптән үз очракларыбызны сөйли алабыз. Бәлки, сезгә дә, җыелыш очрашуларын калдырмас өчен, начальнигыгыз белән эш графигын үзгәртү турында сөйләшергә туры килгәндер. Һичшиксез, Йәһвә кыюлыгыгызны фатихалаган һәм бу иманыгызны ныгыткандыр. Өйрәнүчегезгә моның турында сөйләгез. Бу аның да иманын ныгытыр.

12. а) Ни өчен өйрәнүгә төрле кардәшләрне чакырырга кирәк? ә) Өйрәнүчегезне Йәһвәгә таянырга өйрәтер өчен, тагын нәрсә куллану мөһим? Мисал китерегез.

¹² Өйрәнүгә башка кардәшләрне чакырсагыз, бу да өйрәнүчегезгә файда китерер, чөнки алар да үз тәҗрибәләре белән бүлешә ала. Шуңа күрә төрле-төрле кардәшләрне чакырырга кыенсынмагыз. Алар Йәһвә юлына ничек басканнары һәм хезмәтне беренче урынга ничек куя башлаганнары турында сөйләсен. «Тирәнрәк казыгыз» дигән өлештәге һәм «Өстәмә материал» дигән рамкадагы роликларны куллану да бик мөһим. Аларда күрсәтелгән кардәшләрнең мисаллары өйрәнүчегезне Йәһвәгә таянырга өйрәтә ала. Мәсәлән, 37 нче дәресне өйрәнгәндә, «Йәһвә ихтыяҗларыбызны кайгыртачак» дигән роликтагы фикерләрне җентекләбрәк карап чыгып була.

АНЫ БАСЫМГА БИРЕШМӘСКӘ ӨЙРӘТЕГЕЗ

13. Гайсә үз шәкертләрен каршылыкларга ничек әзерләгән?

¹³ Гайсә үз шәкертләрен, аларга хәтта туганнары каршы киләчәк дип, кат-кат кисәткән (Мат. 5:11; 10:22, 36). Ә хезмәтенең ахыры якынлашканда ул аларның кайберләрен хәтта үтерәчәкләр дигән (Мат. 24:9; Яхъя 15:20; 16:2). Ул шәкертләрен хезмәттә сак булырга өйрәткән. Мәсәлән, Гайсә аларга ачулы кешеләр белән бәхәсләшмәскә һәм һәрвакыт акыл белән эш итәргә киңәш иткән.

14. Без өйрәнүчебезгә каршылыкларга әзерләнергә ничек булыша алабыз? (2 Тимутигә 3:12)

¹⁴ Безгә дә өйрәнүчебезгә каршылыклар туачагын аңлатырга кирәк. (2 Тимутигә 3:12 укы.) Хезмәттәшләре аңардан Изге Язмалар буенча яши башлаганы аркасында көләргә мөмкин. Ә дуслар белән туганнар, яңа карашлары белән ризалашмыйча, аны тәнкыйтьли ала. Без өйрәнүчебезгә моның турында никадәр иртәрәк әйтсәк, ул моңа шулкадәр яхшырак әзерләнгән булыр.

15. Өйрәнүче якыннарының каршылыгына очраса, нәрсә эшли ала?

¹⁵ Өйрәнүчегезгә гаиләдәгеләре каршы килсә, аны моның сәбәбе турында уйланырга дәртләндерегез. Бәлки алар Йәһвә Шаһитләре алдакчылар һәм начар кешеләр дип уйлыйдыр. Хәтта Гайсәнең туганнары да бит ул акылдан язган дип уйлаган (Марк 3:21; Яхъя 7:5). Өйрәнүчегезне сабыр булырга һәм башкалар белән, шул исәптән, гаилә әгъзалары белән әдәпле сөйләшергә өйрәтегез.

16. Өйрәнүчене белемнәрен әдәпле итеп бүлешергә ничек өйрәтеп була?

¹⁶ Ә өйрәнүчегезнең туганнары кызыксыну күрсәтсә, аңа ничек акыллы эш итәргә? Бар белгәнен берьюлы чыгарып салмасын, юкса туганнары бүтән сөйләшергә теләмәс дип аңлатыгыз. Белгәннәрен әз-әзләп сөйләргә киңәш итегез (Көл. 4:6). Бәлки ул аларга сайтыбызны күрсәтер. Һәм туганнары, үзләренә уңайлы булганда, шунда кереп Йәһвә Шаһитләре турында күбрәк белә алыр.

17. Өйрәнүчебезне еш бирелә торган сорауларга җавап бирергә ничек өйрәтергә? (Шулай ук иллюстрацияне кара.)

¹⁷ Өйрәнүчегезгә туганнары һәм хезмәттәшләре төрле сораулар бирергә мөмкин. Сайтыбыздагы «Популяр сораулар» дигән рубриканы кулланып, аны сорауларга җаваплар бирергә өйрәтегез (2 Тим. 2:24, 25). «Мәңге шатланып яшәгез!» китабындагы «Кайберәүләр» дигән рамканы карап чыгыгыз һәм була алган сөйләшүләргә репетиция ясагыз. Җавапларын яхшыртыр өчен аңа киңәшләр бирергә оялмагыз. Андый әзерләнү аңа карашларын ышаныч белән якларга ярдәм итәр.

18. Өйрәнүчене җыелыш белән вәгазьли башларга ничек дәртләндереп була? (Маттай 10:27)

¹⁸ Гайсә үз шәкертләрен яхшы хәбәрне бар кешеләргә сөйләргә дәртләндергән. (Маттай 10:27 укы.) Өйрәнүче җыелыш белән иртәрәк вәгазьли башласа, Йәһвәгә тизрәк таянырга өйрәнер. Аңа бу максатка ирешергә ничек булышып була? Җыелышта берәр кампания, мәсәлән, Искә алу кичәсенә чакыру кампаниясе игълан ителгәч, өйрәнүчегезне вәгазьче булырга дәртләндерегез. Ни өчен андый чакларда җыелыш белән вәгазьли башлау җиңелрәк икәнен аңлатыгыз. Шулай ук ул атна уртасындагы очрашуда «Хезмәт итү осталыгын яхшыртабыз» дигән өлештә чыгышлар ясауны максат итеп куя ала. Бу максатка ирешсә, ул башкаларга үз ышануларын яхшырак аңлатырга өйрәнер.

АҢА ЫШАНЫЧЫГЫЗНЫ БЕЛДЕРЕГЕЗ

19. Гайсәнең үз шәкертләренә ышанганы нәрсәдән күренгән һәм без аңардан ничек үрнәк ала алабыз?

¹⁹ Күккә күтәрелер алдыннан, Гайсә үз шәкертләре белән кабат бергә булачагы турында әйтеп, аларга ышанычын белдергән. Сүз аларның күккә барачаклары турында барган, әмма алар моны аңламаган. Шулай да Гайсә аларның шикләренә түгел, ә аларның тугры булуларына игътибарын туплаган (Яхъя 14:1—5, 8). Ул аларга кайбер нәрсәләргә, мәсәлән, күктәге өмет тәгълиматына төшенер өчен, вакыт кирәклеген аңлаган (Яхъя 16:12). Әйдәгез без дә, өйрәнүчебезнең Йәһвәне сөендерергә теләгәненә шикләнмик һәм аңа моның турында әйтик.

20. Малавидагы бер апа-кардәш өйрәнүчесенә ничек уңай караш саклаган?

²⁰ Өйрәнүчегезгә уңай караш сакларга тырышыгыз. Малавида яшәүче Чифу́ндо исемле апа-кардәшнең мисалына игътибар итик. Ул «Мәңге шатланып яшәгез!» дигән китап буенча, Алина́фе исемле яшь католик хатыны белән өйрәнү башлаган. 14 нче дәресне тәмамлагач, Чифундо аңардан потларга табыну турында нәрсә уйлаганын сораган. Тегесе: «Бу шәхси сорау!» — дип кискен генә җавап биргән. Алинафе өйрәнүдән баш тартыр дип уйлап куйган Чифундо. Шулай да ул өйрәнүчесеннән өметен өзмәгән. Берничә айдан соң, алар 34 нче дәресне үткәндә «Изге Язмаларны өйрәнү һәм хак Аллаһы Йәһвә турында белем алу сезгә инде нинди файда китерде?» дигән сорау буенча фикер алышкан. Чифундо сүзләре буенча, Алинафе күп кенә якларны әйтеп киткән. Һәм «Йәһвә Шаһитләре Изге Язмаларда хөкем ителгән эшләрдә катнашмый»,— дип өстәгән. Тиздән Алинафе потларыннан котылган һәм күпмедер вакыттан соң суга чумдырылган.

21. Өйрәнүчебезгә хакыйкать юлына басарга ничек булышырга?

²¹ Төп «үстерүче Аллаһы» булса да, без дә өйрәнүчебезнең рухи яктан үсүенә үз өлешебезне кертә алабыз (1 Көр. 3:7). Без аны Аллаһы кушканнарны үтәргә генә түгел, ә Йәһвәгә яратуын да үстерергә дәртләндерергә телибез. Шулай ук аны Йәһвәгә хезмәт итүне тормышында беренче урынга куярга өндик. Моннан тыш өйрәнүчебез авырлыкларга очраса, аны Йәһвәгә таянырга өйрәтү бик мөһим. Өстәвенә аңа уңай караш саклыйк. Шулай эшләп без, бәлки, өйрәнүчебезгә хакыйкать юлына басарга булышырбыз.