Аллаһы Сүзендәге хәбәр — качаклар өчен өмет!

Һәр ел миллионлаган кешегә үз йортларын ташлап китәргә туры килә. Сезгә дә күченергә туры килдеме? Өметсезлеккә бирелмәгез, чөнки Аллаһы — сезнең Ярдәмчегез. Ул Изге Язмалар аша киләчәктә тормыш күпкә яхшырак булачак дип вәгъдә итә.

«Качаклар һәм үз йортларын ташлап китәргә мәҗбүр булган кешеләрa ашыгыч ярдәмгә генә түгел, ә шулай ук... өметкә дә мохтаҗ»,— дип әйтә Европа союзының комиссарыb Христос Стилианидис. Өмет кешеләргә киләчәккә уңай караш белән карарга булыша. Шулай ук качакларга юаныч та кирәк. Бу аларга эмоциональ яраларын дәваларга ярдәм итә ала.

«Миңа, гаиләмне калдырып, илемнән качарга туры килгәч, күңелемдә бушлык сиздем. Мин бик курыктым, борчылдым һәм кайгы-хәсрәт кичердем» (Гаитидан качкан Эммануэл).

Сезнең дә андый хисләр кичергәнегез бармы? Сезгә өегезне ташлап китәргә туры килгән икән, өмет белән юанычны кайдан табарга? Бу яктан сезгә Аллаһы Сүзе булыша ала.

Аллаһы Сүзендәге юаныч

Изге Язмаларда болай дип әйтелә: «Йәһвәc... ...килмешәкне ярата» (Канун 10:17, 18).

Изге Язмаларда болай дип әйтелә: «Йәһвә үзен чакыручыларның барысына... якын» (Зәбур 145:18).

Изге Язмаларда болай дип әйтелә: «Чиксез Кодрәт Иясе өчен яманлык эшләү акылга сыймаслык хәл! ...Чиксез Кодрәт Иясе гаделлекне бозмый» (Әюп 34:10, 12).

Димәк, газапларның чыганагы Аллаһы түгел. Ул сезгә җәза бирми, тормышыгызны авырайтып сезне сынамый.

Аллаһы Сүзендәге өмет

Изге Язмаларда Аллаһының безнең хакка башкарачак эшләре турында әйтелә. Бу китаптагы сүзләр качакларга өмет бирә.

Изге Язмаларда болай дип әйтелә: «[Аллаһы] аларның һәр күз яшен сөртәчәк, һәм үлем, кайгы, ачы тавыш, авырту инде булмаячак» (Ачылыш 21:4).

Димәк, газаплар тиздән булмаячак. Аллаһы өметсезлеккә батыра торган бар проблемаларны хәл итәргә вәгъдә итә.

«Тиздән Аллаһы гаделсезлекне һәм явызлыкны юк итәчәк. Бу өмет миңа булышып тора. Мин газапларсыз тормыш турында уйланып яшим» (Сальвадордан качкан Карла).

Изге Язмаларда болай дип әйтелә: «Элекке нәрсәләр инде искә төшмәс һәм күңелгә дә килмәс» (Ишагыя 65:17).

Димәк, әрнү-авырту китерә торган хәтирәләр юкка чыгачак. Аллаһы ярдәмендә сез үзегезне җәфалап торган уйлардан арына алырсыз.

«Изге Язмаларда вәгъдә ителгәнчә, без кичергән авыртулар да, югалтулар да үткәндә калыр. Бу өмет миңа туган авырлыкларны кичереп чыгарга булыша, чөнки мин шуны беләм: тиздән барысы үзгәрәчәк» (Украинадан качкан Наталия).

Изге Язмаларда болай дип әйтелә: «Күкләр Аллаһысы беркайчан да җимерелмәячәк патшалык урнаштырачак. [...] Ул барлык шушы патшалыкларны җимереп, аларны юкка чыгарачак» (Даниял 2:44).

Димәк, җир өстеннән күктәге камил хөкүмәт — Аллаһы Патшалыгы идарә итәчәк. Тиздән Аллаһы кешелекнең бар хөкүмәтләрен күктәге хөкүмәт белән алмаштырачак. Шул хөкүмәт чын тынычлык һәм иминлек урнаштырачак, кешеләр гадел дөньяда муллыкта яшәячәк (Микай 4:3, 4).

«Җәберләү, дискриминация, тискәре караш, расизм — моның барысы вакытлыча гына, чөнки Йәһвә Патшалыгы моның барысын юк итәчәк. Моны белү миңа көч өстәп тора» (Якын Көнчыгыштан качкан Мустафа).

Аллаһы Сүзендәге зирәклек

Изге Язмалардагы зирәклек тормышыгыздагы авыр чорны кичереп чыгарга булыша ала. Барысы кискен үзгәреп куйганда, мәсәлән мал-мөлкәтегезне югалтканда, бу китаптагы киңәшләр сезгә ярдәм итәр. Монда китерелгән принципларга игътибар итегез.

Изге Язмаларда болай дип әйтелә: «Кеше ничек кенә бай булса да, аның тормышы мал-мөлкәтенә бәйле түгел» (Лүк 12:15).

Бу акыллы сүзләр ничек булыша ала? Качак буларак, мал-мөлкәтегезне ташлап китәргә туры килгән икән, сез зур кайгы кичерәсездер. Ләкин, тукталып, үз гомерегезнең никадәр кадерле булуы турында уйланыгыз. Бу сезгә югалтуларыгыз аркасында чиктән тыш кайгырмаска булышыр.

«Кеше гомере мал-мөлкәткә караганда күпкә кыйммәтрәк. Еш кына мөлкәтегез дә, акчагыз да сезгә булыша алмый» (Украинадан качкан Наталия).

Изге Язмаларда болай дип әйтелә: «„Ни өчен үткән көннәр хәзергедән яхшырак булды икән?“ — димә» (Вәгазьче 7:10).

Бу акыллы сүзләр ничек булыша ала? Әйе, хәзерге хәлегез бик авырдыр, әмма аны үткәндәгеләр белән чагыштырмагыз. Бу сезне ачы хисләрдән яклар.

«Мин хәзерге хәлемнән зарланмыйм һәм шулай итеп уңай караш саклап яшим» (Руандадан качкан Эли).

Изге Язмаларда болай дип әйтелә: «Шуңа күрә ризык һәм кием-салым белән яшәү урыныбыз булса, моңа канәгать булыйк» (1 Тимутигә 6:8).

Бу акыллы сүзләр ничек булыша ала? Булганына канәгать булырга өйрәнегез. Шулай итеп, сез әзрәк борчылырсыз, һәм, нәтиҗәдә, эмоциональ яктан да сезгә җиңелрәк булыр.

«Изге Язмалар ярдәмендә мин карашымны үзгәрттем: югалткан нәрсәләр турында уйламаска тырышам. Без тормыш иптәшем белән исән-сау һәм тыныч урында яшибез» (Украинадан качкан Иван).

Изге Язмаларда болай дип әйтелә: «Кешеләрнең үзегезгә нәрсә эшләүләрен теләсәгез, үзегез дә аларга шуны эшләгез» (Маттай 7:12).

Бу акыллы сүзләр ничек булыша ала? Сабыр һәм игелекле булырга тырышсагыз, сез башкалар белән тыныч-тату яши алырсыз. Нәтиҗәдә, җирле кешеләргә сезне кабул итәргә һәм сезгә дусларча мөнәсәбәт күрсәтергә җиңелрәк булыр.

«Башка җиргә күченгәч, җирле кешеләрне хөрмәт итсәң, яратсаң, алар белән үзеңне игелекле тотсаң, аларның күпчелеге моны кадерләр. Нәтиҗәдә, алар белән яхшы мөнәсәбәтләргә ия булырсың» (Шри-Ланкадан качкан Анжело).

Изге Язмаларда болай дип әйтелә: «Аллаһыга үз үтенечләрегезне җиткерегез, һәм... Аллаһы тынычлыгы йөрәгегезне һәм аңыгызны... саклаячак» (Филипиялеләргә 4:6, 7).

Бу акыллы сүзләр ничек булыша ала? Үз хисләрегезне, ихтыяҗларыгызны һәм куркуларыгызны Аллаһыга сөйләп бирегез. Андый догалар чиктән тыш борчылмаска булышыр.

«Проблема туса, мин Аллаһыга дога кылам. Ул мине ишетә. Изге Язмалардан алган белем җан тынычлыгы бирә» (Көньяк Суданнан качкан Йол).

«Изге Язмалардагы киңәшләр мине тынычландыра һәм авырлыклар белән көрәшергә ярдәм итә» (Украинадан качкан Валентина).

«Аллаһы безне алда яхшырак тормыш көтә дип әйтә. Бу сүзләр миңа көч өстәп тора» (Гаитидан качкан Эммануэл).

Инде әйтелгәнчә, Изге Язмаларда юаныч һәм өмет бирә торган вәгъдәләр язылган. Сезнең бу вәгъдәләр турында һәм аларга ни өчен ышанып булганы турында күбрәк беләсегез киләме? Ул чакта Йәһвә Шаһитләренә мөрәҗәгать итегез. Алар сезгә булышырга шат булыр.