Изге Язмаларда Гайсә тормышы төгәл тасвирланганмы?
Изге Язмалар нигезендә җавап
Изге Язмаларны язуда катнашкан Лүк Гайсә тормышы турындагы хәбәренең беренче юлларында: «Мин... барысын баштан ук җентекләп тикшереп төгәл хәбәр җыйдым»,— дип язган (Лүк 1:3).
Инҗилнең беренче дүрт китабында — Маттай, Марк, Лүк һәм Яхъя язган Яхшы хәбәр китапларында Гайсә тормышы турында әйтелә. Кайберәүләр бу китаплар дүртенче гасырда үзгәртелгән булган дип яза.
Әмма егерменче гасырда Мисырда Яхъя язган Яхшы хәбәрнең бер бик кыйммәтле өлешен тапканнар. Бу язманы Райлендз папирусы 457 (P52) дип атыйлар. Ул Манчестерда (Англия) Джон Райлендз китапханәсендә саклана. Бу өлештә китерелгән өзек бүгенге Изге Язмалар китабында, Яхъя 18:31—33, 37 һәм 38 китерелә.
Бу Мәсихче Грек Язмаларның иң борынгы өлеше. Күп кенә белгечләр бу өзек б. э. 125 елларында язылган булган дип саный. Димәк ул Яхъя үз Яхшы хәбәрен тәмамлаганнан соң нибары 25 елдан соң язылган булган. Бу өлештәге текст бүген билгеле булган бар текстлар белән төгәл туры килә дип әйтеп була.