Ни өчен Гадәндәге вакыйга сезнең өчен мөһим?

КАЙБЕР белгечләр Гадән турында хикәя Яратылышта гына, Изге Язмаларның беренче китабында, искә алына дип саный һәм аны шик астына куя. Мәсәлән, динне өйрәнә торган фән буенча профессор Пол Моррис болай дип яза: «Гадән турында хикәя Изге Язмалардагы башка урыннарда турыдан-туры искә алынмый». Төрле «экспертлар» аның сүзләре белән ризалаша, әмма бу фикер фактларга ачыктан-ачык каршы килә.

Чынлыкта Изге Язмаларда Гадән бакчасы, Адәм белән Хаува һәм елан турында бик күп шигырьләр китереләa. Әмма берничә белгечнең бу хатасы белән чагыштырганда күпкә җитдирәк хата да бар. Дини җитәкчеләр һәм Изге Язмаларның тәнкыйтьчеләре Яратылыштагы Гадән бакчасы турында хикәяне кире кагып, чынлыкта Изге Язмалар китабының дөрес түгеллеген исбат итәргә тырыша. Ничек итеп?

Изге Язмаларның бүтән китапларын аңлар өчен, Гадәндә булган вакыйгаларны аңлау мөһим. Мәсәлән, кешеләр үзләрен борчый торган бик катлаулы һәм иң мөһим сорауларга җавапны Аллаһы Сүзендә таба ала. Бу сорауларга Изге Язмалардагы җаваплар еш кына Гадән бакчасындагы вакыйгалар белән бәйле. Кайбер мисалларны карап чыгыйк.

● Ни өчен без картаябыз һәм үләбез? Адәм белән Хаува, Йәһвәгә буйсынып яшәгән булса, мәңге яшәр иде. Ә фетнә күтәргән булса, үләр иде. Фетнә күтәргән көнне алар үлем юлына баскан (Яратылыш 2:16, 17; 3:19). Камиллекне югалтып, алар үз буыннарына гөнаһ белән үлем генә мирас итеп бирә алган. Шуңа күрә Инҗилдә болай дип әйтелә: «Бер кеше аркылы гөнаһ һәм гөнаһ белән бергә үлем дөньяга үтеп керде. Шулай итеп, үлем барлык кешеләргә таралды, чөнки барлык кешеләр гөнаһ кылдылар» (Римлыларга 5:12).

● Ни өчен Аллаһы явызлыкны рөхсәт итә? Шайтан Гадән бакчасында Аллаһыны ялганчы дип атаган һәм ул үз затларыннан яхшы нәрсәләрне яшерә дип аны гаепләгән (Яратылыш 3:3—5). Шулай итеп, Шайтан Йәһвә идарәсенең хокуклы булуын шик астына куйган. Адәм белән Хаува Шайтанга кушылган; шулай итеп, алар да Йәһвә хакимлегеннән баш тарткан. Асылда, алар шуны күрсәткән: кеше нәрсә яхшы, ә нәрсә яман икәнен үзе сайлый ала. Йәһвәнең гаделлеге һәм акыллылыгы камил булганга, ул бу авыр мәсьәләне чишәр өчен, бер генә юл бар икәнен белгән: кешеләрнең үзләре белән идарә итәргә мөмкинлеге булсын өчен, ул аларга җитәрлек вакыт биргән. Шайтанның дәвамлы бозык идарәсе аркасында мөһим хакыйкать әкренләп ачыкланган булган: кеше Аллаһысыз үзе белән идарә итәргә сәләтсез (Иремия 10:23).

● Аллаһының җиргә карата нияте нинди? Йәһвә нияте буенча бөтен җир шары, Гадән бакчасы кебек үк, матур булырга тиеш булган. Моның өчен ул Адәм белән Хаувага җир йөзен тутырырга һәм аны «буйсындырырга» кушкан (Яратылыш 1:28). Шулай итеп, Аллаһының җиргә карата нияте — Адәм белән Хауваның камил буыннарының, бердәм гаилә булып, оҗмахта яшәве. Изге Язмалардагы күп урында Аллаһы үз ниятен ничек үтәячәк икәне турында әйтелә.

● Ни өчен Гайсә Мәсих җиргә килгән? Гадәндәге фетнә аркасында Адәм белән Хаува ахыр чиктә үлгәннәр. Аларның бар буыннары да ахыр чиктә үлә, ләкин Аллаһы үз яратуыннан чыгып безгә өмет биргән. Изге Язмаларда әйтелгәнчә, ул җиргә үз Улын җибәргән, һәм шулай итеп йолым түләнгән булган (Маттай 20:28). Бу нинди мәгънә йөртә? Гайсә — «соңгы Адәм» һәм ул Адәм булдыра алмаган эшне уңышлы үтәгән. Гайсә Аллаһыга тыңлаучан калып камил кеше тормышын саклаган. Аннары ул, бар тугры кешеләрнең гөнаһлары кичерелсен өчен, үз тормышын корбан, яки йолым, итеп теләп биргән. Шулай ук бу аларга Адәм белән Хаува, гөнаһ кылганчы, Гадәндә алып барган шатлыклы тормышка ирешергә юл ача (1 Көринтлеләргә 15:22, 45; Яхъя 3:16). Шулай итеп Гайсә Йәһвә ниятенең — җирне Гадән бакчасы сыман оҗмахка әверелүе — тормышка ашачагына ышандырганb.

Аллаһы нияте абстракт теологик һәм буталчык төшенчә түгел, ә чынбарлык. Гадән бакчасы җирдә билгеле урында урнашкан булган, анда чыннан да кешеләр һәм хайваннар яшәгән. Киләчәккә кагылышлы Аллаһы нияте дә билгеле, һәм ул тиздән үтәләчәк. Бу сезнең дә киләчәгегез булырмы? Сез моны үзегез сайларга тиеш. Аллаһы андый киләчәкне мөмкин кадәр күбрәк кеше өчен, хәтта аның нормалары буенча яшәмәгән кешеләр өчен ниятләгән (1 Тимутегә 2:3, 4).

Гайсә үз үлеме алдыннан Аллаһы нормалары буенча яшәмәгән бер кеше белән сөйләшкән. Бу кеше җинаятьче булган һәм ул үлемгә лаек булганын белгән. Әмма ул юанычка вә өметкә мохтаҗ булганга, Гайсәгә мөрәҗәгать иткән. «Син Минем белән бергә җәннәттә булачаксың»,— дип әйткән аңа Гайсә (Лүк 23:43). Гайсә элекке җинаятьче булган кешенең терелткәнен һәм фатихаланганын теләгән. Ул аңа Гадән бакчасы сыман оҗмахта мәңге яшәргә мөмкинлек биргән икән, әллә ул сезнең өчен дә андый фатиханы теләмимени? Әлбәттә, тели! Аның Атасы да тели! Сез дә андый киләчәген үзегез өчен теләсәгез, Гадән бакчасын яраткан Аллаһы турында белем алыр өчен, бар тырышлыклар куегыз.

[Искәрмәләр]

[10 биттәге рамка/иллюстрация]

ИЗГЕ ЯЗМАЛАР БУЕНЧА КЫЗЫЛ ҖЕП БУЛЫП ҮТКӘН ПӘЙГАМБӘРЛЕК

«Синең [елан] белән хатын-кыз арасына, синең токымың белән аның нәселе арасына дошманлык җебе сузачакмын. Аның нәселе сиңа сугып башыңны ярыр, син исә аны үкчәсеннән чагарсың» (Яратылыш 3:15).

Аллаһы шул сүзләрне Гадәндә әйткән, һәм бу Изге Язмалардагы беренче пәйгамбәрлек. Хатын-кыз һәм аның нәселе, елан һәм аның токымы кемнәр алар? Алар арасында нинди мәгънәдә «дошманлык» булачак?

ЕЛАН

Шайтан Иблис (Ачылыш 12:9).

ХАТЫН-КЫЗ

Рухи затлардан торган Йәһвәнең күктәге оешмасы (Гәләтиялеләргә 4:26, 27). Ишагыйя пәйгамбәр бу «хатын-кыз» рухи халык тудырачак дип алдан әйткән булган (Ишагыйя 54:1; 66:8).

ЕЛАННЫҢ ТОКЫМЫ

Шайтанның ихтыярын үтәүчеләр (Яхъя 8:44).

ХАТЫН-КЫЗНЫҢ НӘСЕЛЕ

Бу нәселнең төп өлеше — Гайсә Мәсих, ул Йәһвә оешмасының күктәге өлешенә керә. Шулай ук бу «нәсел» Мәсихнең рухи кардәшләреннән тора, алар аның белән бергә күктә идарә итә. Бу майланган мәсихчеләр рухи халыкны, «Аллаһының Исраилен», тәшкил итә (Гәләтиялеләргә 3:16, 29; 6:16, искәрмә; Яратылыш 22:18).

ҮКЧӘСЕННӘН ЧАГУ

Мәсихкә китерелгән зыян зур, әмма ул төзәтерлек. Шайтан Гайсәне җирдә үтергән. Шулай да Гайсә терелтелгән булган.

БАШЫН ЯРУ

Шайтанның үлем ярасы. Гайсә Шайтанны мәңгегә юк итәчәк. Әмма башта Гайсә Гадәндә Шайтан тудырган явызлыкны юк итәчәк (1 Яхъя 3:8; Ачылыш 20:10).

Изге Язмаларның төп темасын кыскача карап чыгар өчен, «Изге Язмалар. Анда нинди хәбәр язылган?» дигән брошюраны карагыз. Йәһвә Шаһитләре тарафыннан бастырылган.

[11 биттәге иллюстрация]

Адәм белән Хаува гөнаһның ачы җимешен татыганнар