Үҗәт буынга кайгы

Гайсә Чумдыручы Яхъя турында яхшы сүзләр әйтә. Ләкин күпчелек кеше Яхъяга ничек карый? Гайсә бу буын турында болай ди: «Ул базар мәйданында үзләре белән уйнаган иптәшләренә болай дип кычкырып утыручы балаларга охшаш: „Без сезгә флейта уйнадык, ә сез биемәдегез. Без үкереп еладык, ә сез кайгырып күкрәгегезгә сукмадыгыз“» (Маттай 11:16, 17).

Гайсәнең нәрсә әйтәсе килә? Ул болай дип аңлата: «Менә Яхъя килде, ашамый, эчми, ә кешеләр: „Ул җенле“,— диләр. Адәм Улы килде, ашый да, эчә дә, ә кешеләр: „Күрегез әле, бу кеше бирән, эчкече, салым җыючыларның һәм гөнаһ кылучыларның дусты“,— диләр» (Маттай 11:18, 19). Яхъя гади нәзир тормышы алып бара, ул хәтта шәрабтан тыела, әмма бу буын аның турында, ул җенле, ди (Саннар 6:2, 3; Лүк 1:15). Гайсә исә башка кешеләр кебек яши. Ул чамасын белеп ашый, эчә, ә аны чаманы белмәүдә гаеплиләр. Кешеләргә ярап булмый.

Гайсә бу буынны базар мәйданындагы балалар белән чагыштыра. Алар башка балалар флейта уйнаганда биергә теләми, ә тегеләре үкереп елаганда кайгырмый. «Ә зирәклекнең хаклыгы,— дип әйтә Гайсә,— эшләре белән күрсәтелә» (Маттай 11:16, 19). Әйе, Яхъяның һәм Гайсәнең «эшләре» аларга ташланган гаепләрнең ялган булганын ачык итеп күрсәтә.

Гайсә, бу буынны үҗәт буын итеп сурәтләгәннән соң, үзе кодрәтле эшләр башкарган шәһәрләрне — аеруча Хоразин, Битсәидә һәм Кәпернаумны шелтәли. Гайсәнең сүзләре буенча, бу кодрәтле эшләрне ул Финикия шәһәрләрендә — Тир белән Сидонда башкарган булса, алар тәүбә итәрләр иде. Хәтта вакыт-вакыт туктала торган Кәпернаумда да күпчелек кеше аны кабул итмәгән. Гайсә бу шәһәр турында: «Хөкем көнендә Сәдүм җиренә сиңа караганда җиңелрәк булачак»,— дип әйтә (Маттай 11:24).

Аннан соң Гайсә үзенең Атасын данлый, чөнки ул кыйммәтле рухи хакыйкатьләрне «зирәкләрдән һәм акыл ияләреннән» яшереп, басынкыларга — «балаларга» ачып бирә (Маттай 11:25). Гайсә андый кешеләргә мондый эчкерсез сүзләр әйтә: «Эштән йончыганнар, авыр йөк күтәреп йөрүчеләр — һәммәгез дә минем янга килегез, һәм мин җаннарыгызны яңартып җибәрермен. Минем камытымны киегез һәм миннән өйрәнегез, чөнки мин юаш, басынкы күңелле, һәм сез җаннарыгызны яңартырсыз. Минем камытым уңайлы һәм йөгем җиңел» (Маттай 11:28—30).

Гайсә кешеләрнең җаннарын ничек яңарта? Дин җитәкчеләре кешеләр өстенә авыр гореф-гадәтләр, мәсәлән, Шимбә көненә кагылышлы катгый кагыйдәләр йөкләгән. Ләкин Гайсә аларны Аллаһы турындагы хакыйкатькә, гореф-гадәтләр белән пычранмаган хакыйкатькә өйрәтеп, аларның җаннарын яңарта. Ул шулай ук сәяси хакимият изүе астында интеккән һәм кылган гөнаһларының авыр йөген күтәреп йөргән кешеләргә җиңеллек табарга ярдәм итә. Әйе, Гайсә аларга гөнаһлары ничек кичерелә алганын һәм Аллаһы белән якын мөнәсәбәтләргә ничек ия булырга икәнен ачып бирә.

Гайсәнең уңайлы камытын кигән кешеләр Аллаһыга багышланып, кызганучан, мәрхәмәтле күктәге Атабызга хезмәт итә ала. Моны эшләү җиңел, чөнки Аллаһының таләпләре авыр түгел (1 Яхъя 5:3).