Мәсих данының күренеше

Хәрмун тавыннан якынча 25 километр ераклыкта урнашкан Филипия Кайсариясе җирләрендә Гайсә халыкны өйрәтә. Шунда ул рәсүлләргә мондый искитәрлек сүзләр әйтә: «Сезгә хак сүз әйтәм: монда басып торучыларның кайберләре Адәм Улының үз Патшалыгында килүен күрмичә үлемне татымаячак» (Маттай 16:28).

Шәкертләр бу сүзләрне ничек аңларга икән дип гаҗәпләнәдер. Якынча бер атнадан соң, Гайсә үзе белән өч рәсүлен: Петер, Ягъкуб һәм Яхъяны алып, биек тауга менә. Бу, күрәсең, төнлә була, чөнки шәкертләр йокымсырый. Гайсә дога кылган арада аларның күз алдында аның кыяфәте үзгәрә: йөзе кояштай балкып китә, ә киемнәре яктылык кебек ялтырап торган ак төскә керә.

Аннары ике кеше — «Муса белән Ильяс» хасил була. Алар Гайсә белән «аның китүе турында — Иерусалимда булачак вакыйгалар турында» сөйләшә башлый (Лүк 9:30, 31). Гайсәнең китүе, күрәсең, ул үзе күптән түгел генә телгә алган үлемен һәм терелтелүен аңлата (Маттай 16:21). Петер Гайсәне үзен кызганырга өндәгән булса да, бу сөйләшү Гайсәнең хурлыклы үлеме котылгысыз икәнен раслый.

Хәзер өч рәсүл йокыларыннан тәмам айный, шаккатып карап тора һәм тыңлый. Бу хәл күренеш кенә булса да, ул шулкадәр чын булып күренә ки, хәтта Петер бу сөйләшүгә кушылып, Гайсәгә: «Остаз, монда шундый рәхәт. Каршы булмасаң, без өч чатыр корыр идек: берсен сиңа, берсен Мусага, берсен Ильяска»,— дип әйтә (Марк 9:5). Бәлки, Петернең чатырларны күренеш озаграк сузылсын өчен корасы киләдер.

Петер үз сүзләрен әйткән арада, аларны якты бер болыт каплый, һәм болыт эченнән: «Бу минем сөекле Улым, мин аны хуплыйм. Аны тыңлагыз»,— дигән тавыш ишетелә. Моны ишеткәч, котлары алынган рәсүлләр йөзтүбән каплана, ләкин Гайсә аларга: «Торыгыз, курыкмагыз»,— дип әйтә (Маттай 17:5—7). Рәсүлләр күтәрелеп караса, Гайсәдән башка беркем дә юк. Күренеш юкка чыккан. Икенче көнне таудан төшкәндә, Гайсә аларга: «Адәм Улы үледән терелеп торганчы, бу күренеш турында берәүгә дә сөйләмәгез»,— дип куша (Маттай 17:9).

Күренештә Ильясның пәйда булганы рәсүлләрдә сорау тудыра. Алар болай дип сорый: «Ни өчен... канунчылар башта Ильяс килергә тиеш диләр?» «Ильяс инде килде,— дип әйтә Гайсә.— Аны танымадылар» (Маттай 17:10—12). Гайсә Чумдыручы Яхъя турында әйтә, ул Ильясныкына охшаш йөкләмә үтәгән. Ильяс Илишага юл әзерләгән, Яхъя да Мәсих өчен шуны ук эшләгән.

Бу күренеш Гайсәне дә, рәсүлләрне дә бик ныгыткандыр! Күренеш аша Мәсихнең үз Патшалыгындагы даны алдан күрсәтелгән. Шулай итеп шәкертләр, Гайсә вәгъдә иткәнчә, «Адәм Улының үз Патшалыгында килүен» күргән (Маттай 16:28). Тауда алар «аның никадәр бөек икәненә» шаһит булган. Фарисейлар Гайсәдән үзенең Аллаһы сайлаган Патша булуын раслаучы билге күрсәтүен сораса да, ул аларга билге күрсәтмәгән. Ә Гайсәнең якын шәкертләренә аның кыяфәтенең үзгәрүен күрергә мөмкинлек бирелгән. Бу күренеш Патшалык турындагы пәйгамбәрлекләрнең ышанычлы булуын раслый. Шуңа күрә Петер соңрак болай дип язган: «Без пәйгамбәрлек сүзенә тагын да ныграк ышанабыз» (2 Петер 1:16—19).