ДӘРЕС 07
Йәһвә нинди ул?
Сез Йәһвә Аллаһыны ничек күз алдына китерәсез? Ул сезнең өчен курку-хөрмәт уятучы, ләкин әллә кайдагы галактиканың йолдызлары сыман ерактагы шәхесме? Яисә ул сезнең өчен шәхес түгел, ә давыл кебек көчле нәрсә генәме? Ә чынлыкта Йәһвә нинди? Үз Сүзе, Изге Язмалар, аша Йәһвә үзенең кайбер сыйфатларын ача, анда шулай ук ул сезнең белән кызыксына дип әйтелә.
1. Ни өчен без Аллаһыны күрә алмыйбыз?
«Аллаһы — Рух ул» (Яхъя 4:24). Йәһвәнең физик тәне юк. Ул — күктә яшәүче күренмәс шәхес.
2. Йәһвәнең кайбер сыйфатлары нинди?
Йәһвәне күреп булмаса да, ул реаль шәхес һәм искиткеч сыйфатларга ия. Аның турында күбрәк белгән саен, без аны күбрәк ярата башлыйбыз. Изге Язмаларда болай диелә: «Йәһвә гаделлекне ярата һәм үзенә тугры булганнарны калдырмый» (Зәбур 37:28). Ул шулай ук кешеләргә, аеруча газап кичергәннәренә, карата назлы һәм шәфкатьле (Ягъкуб 5:11). «Йәһвә боек күңеллеләргә якын, рухы сынык булганнарны ул коткара» (Зәбур 34:18). Ә безнең Йәһвәне я сөендерә, я күңелсезләндерә алганыбызны сез белә идегезме? Начар эшләр кылган кеше аны рәнҗетә һәм кайгыга төшерә (Зәбур 78:40, 41). Ә дөрес булганны эшләгән кеше аны шатландыра. (Гыйбрәтле сүзләр 27:11 укы.)
3. Йәһвә безне яратканын ничек күрсәтә?
Йәһвәнең иң күренекле сыйфаты — ярату. Чыннан да, «Аллаһы — мәхәббәт ул» (1 Яхъя 4:8). Йәһвә үз яратуын Изге Язмалар аша гына түгел, ә шулай ук үзе булдырган нәрсәләр аша да күрсәтә. (Рәсүлләр 14:17 укы.) Мәсәлән, безнең нинди итеп яратылганыбызны алыйк. Ул безгә төрле төсләрне күрү, матур музыканы ишетү һәм тәмле ризыктан ләззәтләнә алу сәләте биргән. Аллаһы безнең шатланып яшәвебезне тели.
ТИРӘНРӘК КАЗЫГЫЗ
Йәһвәнең гаҗәеп эшләрне башкарыр өчен нәрсә кулланганын белегез. Аннары Йәһвә үзенең матур сыйфатларын ничек ача һәм чагылдыра икәнен карап чыгыгыз.
4. Изге рух — Аллаһының эш итүче көче
Эшләрне башкарыр өчен, без кулларыбызны кулланган кебек, Йәһвә үзенең изге рухын куллана. Изге Язмалар ачыклаганча, изге рух бу — Аллаһының төрле эшләрне башкару өчен кулланган көче. Әмма кайбер кешеләр изге рух шәхес дип уйлый. Лүк 11:13 һәм Рәсүлләр 2:17 не укыгыз һәм җавап бирегез:
Аллаһы үзенең изге рухын аны сораган кешеләргә «коя». Димәк, сезнеңчә, изге рух бу шәхесме я Аллаһының эш итүче көчеме? Аңлатыгыз.
Йәһвә үзенең изге рухын гаҗәеп эшләрне башкарыр өчен куллана. Зәбур 33:6 һәм 2 Петер 1:20, 21 не укыгыз һәм җавап бирегез:
Йәһвә үзенең изге рухын ничек кулланган?
5. Йәһвә күркәм сыйфатларга ия
Муса пәйгамбәр, Аллаһының тугры хезмәтчесе булса да, үзенең Барлыкка Китерүчесен яхшырак белергә теләгән. Шуңа күрә Муса аңа болай дигән: «Миңа үз юлларыңны белдерче, минем сине беләсем... килә» (Чыгыш 33:13). Җавап итеп, Йәһвә Мусага үзенең кайбер сыйфатларын ачкан. Чыгыш 34:4—6 ны укыгыз һәм җавап бирегез:
Йәһвә Мусага үзенең нинди сыйфатларын ачкан?
Йәһвәнең кайсы сыйфатлары сезгә аеруча ошый?
6. Йәһвә кешеләр турында кайгырта
Борынгы заманда Аллаһының халкы — исраиллеләр — Мисырда коллар булган. Аларның газап чигүләре Йәһвәгә ничек тәэсир иткән? АУДИОЯЗМА тыңлагыз һәм укылачак шигырьләрне күзәтеп барыгыз яисә үзегез Чыгыш 3:1—10 ны укыгыз һәм сорауларга җавап бирегез.
Бу хәбәр буенча, кешеләр газап чиккәндә, Йәһвә нәрсә хис итә? (7 һәм 8 нче шигырьләрне кара.)
Сезнеңчә, Йәһвә кешеләргә чыннан да булышырга телиме һәм ул моны эшли аламы? Аңлатыгыз.
7. Тирә-яктагы дөнья Йәһвәнең сыйфатларын ача
Йәһвә үзе булдырган нәрсәләр аша үзенең сыйфатларын ача. ВИДЕОРОЛИК карагыз. Аннары Римлыларга 1:20 не укыгыз һәм сорауга җавап бирегез.
Сез Йәһвәнең булдырган иҗади эшләрендә аның нинди сыйфатларын күрәсез?
КАЙБЕРӘҮЛӘР: «Аллаһыны күреп булмый, шуңа күрә аны белеп тә булмый»,— дип әйтә.
Ә сез ничек уйлыйсыз?
Ни өчен сез алай дип әйтәсез?
ЙОМГАКЛАУ
Йәһвә — күренми торган Рух. Ул күп кенә күркәм сыйфатларга, аеруча мәхәббәткә, ия.
Кабатлау
Ни өчен Йәһвәне күреп булмый?
Изге рух нәрсә ул?
Йәһвәнең нинди сыйфатлары бар?
ӨСТӘМӘ МАТЕРИАЛ
Йәһвәнең дүрт төп сыйфаты турында белеп, аның турында белемегезне арттырыгыз.
Аллаһының һәркайда булуы турындагы фикернең ялгыш икәненә дәлилләрне карап чыгыгыз.
Изге Язмаларда Аллаһының изге рухы аның куллары итеп сурәтләнә. Ни өчен икәнен карап чыгыгыз.
Бер сукыр кешегә Аллаһының үзе турында кайгыртуына ышану авыр булган. Аңа үз карашын үзгәртергә нәрсә ярдәм иткәнен белегез.
«Хәзер мин башкаларга ярдәм итә алам» («Күзәтү манарасы» 2015 ел, 1 октябрь)