1 Көринтлеләргә 10:13: «Аллаһы тугры»

«Сез барлык кешеләр дучар булган вәсвәсәләргә генә дучар буласыз. Ләкин Аллаһы тугры, һәм ул сезнең каршы тора алмаслык вәсвәсәгә дучар булуыгызны рөхсәт итмәячәк, әмма вәсвәсәгә дучар булганда нык калыр өчен, сезгә котылу юлын да күрсәтәчәк» (1 Көринтлеләргә 10:13, «Яңа дөнья тәрҗемәсе»).

«Сез гадәти, кешеләргә хас сынауга дучар булдыгыз. Аллаһы ышанычлы, Ул сез чыдый алмаслык сынауга юл куймас. Сыналганда түзеп тору өчен, сезгә котылу юлын да күрсәтәчәк» (1 Көринтлеләргә 10:13, Изге Китапны тәрҗемә итү институты тәрҗемәсе).

1 Көринтлеләргә 10:13 нең мәгънәсе

Бу шигырьдә Аллаһының күркәм бер сыйфатына, аның тугры булуына, басым ясала. Аллаһының тугры хезмәтчесе һич тә шикләнмәсен: Аллаһы аңа булышып торачак. Аеруча, ул сынаулар кичерсә я вәсвәсәгә эләксә, ул үз хезмәтчесенә ярдәм итәчәк.

«Сез барлык кешеләр дучар булган вәсвәсәләргә генә дучар буласыз». Аллаһы хезмәтчесен Аллаһыны күңелсезләндергән эш кылырга котыртырга мөмкиннәр. Андый сынауларга, алар авыр булса да, күп кенә кеше эләгә.a Шуңа күрә Аллаһы хезмәтчесе дә андый сынауны кичереп чыга ала, ул моңа һич тә шикләнмәсен.

«Аллаһы тугры». Йәһвәb Аллаһы ышанычка лаек һәм аңа һәрвакыт таянып була. Ул үзен яратучыларны, үзенә тугры һәм буйсынучан кешеләрне беркайчан да ташламаячак дип вәгъдә итә һәм үз сүзен тота (Канун 7:9; Зәбур 9:10; 37:28). Йәһвәгә тугры хезмәт итүче кешеләр Аллаһы бу шигырьдә әйтелгән ике гаҗәеп вәгъдәсен тотачак икәнен белә.

«Ул сезнең каршы тора алмаслык вәсвәсәгә дучар булуыгызны рөхсәт итмәячәк». Аллаһы кешенең кичереп чыга алмаслык сынауга дучар булуын рөхсәт итмәячәк. Шулай итеп ул үзенең тугры булуын күрсәтә. Аллаһы үз хезмәтчесе нәрсә кичереп чыга ала, ә нәрсәне кичереп чыга алмый икәнен белә (Зәбур 94:14).

«Ул... вәсвәсәгә дучар булганда нык калыр өчен, сезгә котылу юлын да күрсәтәчәк». Аллаһы сынауны я алып куя ала, я хезмәтчесенә ул, сынауны кичереп чыга ала алсын өчен, кирәклесен бирә ала. Мәсәлән, үз изге рухы ярдәмендә ул кирәкле җитәкчелек бирә ала. Ул үз хезмәтчесен Изге Язмалар ярдәмендә юата ала я аңа имандашлары аша булыша ала (Яхъя 14:26; 2 Көринтлеләргә 1:3, 4; Көләсәйлеләргә 4:11).

1 Көринтлеләргә 10:13 нең контексты

Бу шигырьдәге сүзләрне рәсүл Паул Көринт шәһәрендәге мәсихче җыелышка язган. Хатның бу өлешендә Паул борынгы Исраил тарихын искә ала һәм аны көринтлеләр өчен сабак итеп куллана (1 Көринтлеләргә 10:11). Паул Исраил халкы кичергән сынауларны һәм вәсвәсәләрне искә ала. Алар, мәсәлән, потларга табынган һәм әхлаксыз эшләрдә катнашкан (1 Көринтлеләргә 10:6—10). Аларның кайберләре андый вәсвәсәләргә каршы тормаган. Паул, аларның мисалларын китереп, мәсихчеләрнең исләренә төшерә: алар үз-үзләренә чиктән тыш ышанучан булмаска, вәсвәсәгә беркайчан да бирелмәячәкләр дип уйламаска тиеш (1 Көринтлеләргә 10:12). Паул аларга 1 Көринтлеләргә 10:13 язылган сүзләрне китереп, аларны ышандыра: Аллаһының тугры хезмәтчесе һәркайсы сынауны җиңеп чыга ала.

1 Көринтлеләргә язылган хат турындагы кыска видеороликны карагыз.