Патшалык турында вәгазьләү. Яхшы хәбәр бөтен җир йөзе буйлап таратыла

СИН ял көнендә иртән вәгазьләргә җыена башлыйсың. Азрак арыганлык хис итеп, син берникадәр вакыт шикләнеп торасың. Иртән шулкадәр ял итәсе килә! Ләкин үз хисләреңне догада Аллаһыга әйтеп биргәч, син барырга буласың. Син тугры олы яшьтәге бер апа-кардәш белән хезмәттәшлек итәсең. Аның чыдамлылыгы һәм игелеге сиңа бик нык тәэсир итә. Син өйдән-өйгә йөреп хакыйкать белән уртаклашасың һәм болай дип уйлап куясың: кардәшләрем бөтен җир йөзе буенча шул ук хәбәрне тарата, шул ук басмаларны куллана һәм бер үк программа буенча өйрәтелә. Өйгә син рухланып кайтып керәсең. Өйдә калмаганыңа син шундый шат!

Бүген мәсихчеләр башкарган хезмәт Аллаһы Патшалыгының иң мөһим эше булып тора. Гайсә соңгы көннәрдә вәгазь эшенең киң колачлы булачагын пәйгамбәрлек иткән (Мат. 24:14). Аның пәйгамбәрлеге ничек үтәлә? Мәсихчеләр башкарган хезмәт миллионлаган кешегә Аллаһы Патшалыгына иманнарын ныгытырга булыша. Бу кисәктә без шул хезмәткә мөһим өлеш керткән кешеләр белән танышырбыз, шулай ук шул хезмәтне башкарыр өчен кулланылган төрле ысулларны һәм коралларны карап чыгарбыз.